मत्ती 24
24
यीशु दवारा मंदिर कै नाश हौणौ कै बारै मुंजी बौताणौ
(मर 13:1-31; लूका 21:5-33)
1जोबै यीशु मन्दिरो पौरैशा निकल़ैयो जांदा लागै रौआ थिया, तोबै तैसकै चैलै तैसीखै मन्दिरो कै कारीगरी दिखाणौ खै तैसकै धोरे आए। 2तैणै तिनुखै बौल़ौ, “तुऐं जू ऐजौ सौबै दैखै लौ हांव तुऔंखै साचौ बुलू, इथै पाथरो पांदी पाथर बै चोकना-चूर हौए जांदै औरौ ऐक बै पाथर आपणी जौगैह पांदी ना रौंदा।”
यीशु कै पाछु आणौ का निशान
3जोबै सै जैतून धारो पांदी बौठै रौआ थिया, तोबै चैलै एकान्त जौगैह दै तैसकै धोरे आयौ बौल़ौ, “आमुखै बौताए दै ऐजी बातौ कोलो हौंदी? तैरै आणा का औरौ दुनिया कै अन्त का कुणजा निशान हौंदा?”
4यीशुए तिनुखै जवाब दिया “चौकश रौया कै कुणिए तुऔं खै भोरमाऐ नै दैंव। 5जिथुखै बौहितै लोग ऐशणै हौंदै जू मैरै औधिकार का दावा कौरदै औरौ बौलदै कै, ‘हांव ही मसीहा औसौ,’ औरौ बौहितै खै भोरमाए दैंदै। 6तुऐं लोड़ाई कै औरौ लोड़ाइयों कै चौर्चा शुणल़ै, दैखैया घोबराया नी; जिथुकै इनु बातौ का हौणा जौरुरी औसौ, पौरौ तैसी सौमय दुनिया का अन्त ना हौंदा। 7जिथुकै सौबै देश औरौ राज्य ऐकी दूजै कै खिलाफ हौए जांदै, औरौ जौगैह-जौगैह काल़ पौड़दा औरौ भुईचोल़ हौन्दै। 8ऐजी सौबै बातौ कठिन सौमय कै शुरुआत ही हौन्दै जैशै बैटमाणिशौ कै सुजणौ की पीड़ो हौंव।
9तोबै सैजै लोग जू तोंवारै खिलाफ औसौ कौल़ेश दैणौ खै तुऔं खै थोमाले औरौ तुऔं खै मारै दैंदै जिथुकै तुऐं मैरै चैलै औसौ इथकारिए सौबै देशो कै लोग तुऔंआरी बैर कौरलै। 10तोबै बौहितै सारै लोग मुं पांदी बिशवाश कौरणा छोड़े दैलै औरौ ऐकी दूजै खै पोकड़वाले औरौ ऐकी दुजैआरी बोयर राखदै। 11बौहितै झूठै पौरमेशवर कै बातौ बौताणौवाल़ै आलै, औरौ बौहितै लोगौ खै धौखा दैलै। 12अधरम कै बोड़णो शै ओका ओकीआरी प्यार ना कौरदा। 13पौरौ जू आपणै मौरणौ कै सौमय तौड़ी मुं पांदी भोरोशा राखलै पौरमेशवर तिनुखै बौचायौ राखला। 14औरौ पौरमेशवर कै राज्य का ऐजा सुसमाचार सारै जगत पांदी प्रचार कौरा जाला, तोबै सौबी देशो कै लोगौ खै इयौं बातौ कै मानणौ का मौका भैटदा तोबै दुनिया का अन्त हौए जांदा।”
कोष्टी की शुरुआत
15“पोढ़णो वाल़ै इथुकै सौमझौ: जोबै ऐक दूसै तुऐं ऐक बुरै चीज़ मन्दिर दै, जिथकै चौर्चा दानिय्येल़ पौरमेशवर कै बातौ बौताणौवाल़ै कै ढौबौशै हौए रौए थी पवित्र जौगैह दै खौड़ै हौएयौंदै दैखलै। 16तोबै जू लोग यहूदिया प्रदेश दै हौंव सैजै चुरिणौ कारिए धारो कै ढौबौ दौड़ै जाया। 17जू घोरो कै छोतौ पांदी हौलै, सै आपणै समान लोणो कारिए घोरे खै भीतरै नै जाया, 18औरौ जू खेतौ दै हौलै, सै आपणै खोटणो लेयांदै पाछु घोरे नै आया।
19तिनु दूसौ दी जू होल़किणु औरौ जू दूध पियाणौ वाल़ी हौली, तिनुखै भागणौ बैजाए मुशकिल हौंदौ। 20प्रार्थना कौरेया कौरौ; कै तुऔं जाड़ै मुंजी या विशांव कै दूसै नी भागणौ पौड़ौ। 21जिथुकै तैसी सौमय ऐशणा बौड़ा कौल़ेश हौंदा जैशणा दुनिया कै शुरुआत शै उंढा ऐलो तौड़ी ना होई रैई औरौ ना कौलोंई हौंदा। 22औरौ जै पौरमेशवर तिनु दुखो कै सौमय कै ना घोटांदा, तौ कुणिए आदमी बै ना बौचदा; पौरौ चोणेयौंदे की बौजैह शै सैजै दूस घोटाए जांदै।
23तैसी सौमय जै कुणिए तुऔं खै बौल़ौ, कै दैख मसीह इथै औसौ! या तिथै औसौ तौ बिशवाश नै कौरेया।” 24“जिथु झूठै मसीह औरौ झूठै पौरमेशवर की बातौ बोताणौवाल़ै आन्दै, औरौ बौड़ै निशान औरौ अनौखै काम देखालै, औरौ हौए सौकौ तौ जिनु लोगौ खै पौरमेशवरे चोणे राए तिनु बै बोरमाए दैंदै। 25दैखौ, मोऐं आगैई तुऔं ऐजी सौबै बातौ बौल़ै दी। 26इथकारिए जै सै तुऔं बौल़ौ, ‘दैखौ, मसीह शुनशान जौगैह पुंडा औसौ।’ तौ तैसी दैखणौ कारिए बायरै ना जाया, ‘दैखौ सै कोठारियों दा औसौ,’ तौ बिशवाश नी कौरेया।”
27“जिथुकै जैशै बिजली पूरब शै निकल़ैयो पशिचमो तौड़ी चौमकैयो जांव, तैशैकैई मुं आदमी कै बैटै का बै आणा हौंदा। 28सौबी खै ऐजा पौता चालै जांदा कै कुकै हांव रौंव, जिथु सौबै जाणौ कै जिथै लाश औसौ तिथै घिईज कौठै हौंव।”
आदमी कै बैटै का औटेयौ आणा
29“दुखो का सौमय बितणौ कै बाद सुरज औरौ चांद पेयाशो ना दैंदै। औरौ तारै गौयण पौरैशै छुटी जांदै औरौ गौयण कै शौकतीशाली चीज़ौ आपणै ठाँव पौरैशी हिंजाल़ी जान्दी। 30तोबै मुं आदमी कै बैटै का निशान गौयण दा दैखिंदा औरौ तोबै धोरती कै सौबै जाति कै लोग छाती पीटदै, औरौ मुं आदमी कै बैटै खै अनौखी शौकतै औरौ महिमा कै साथै गौयणै कै बादल़ौ पांदी आन्दै दैखदै। 31हांव आदमी का बैटा आपणै स्वर्गदूतौ कै तुरही कै बौड़ै आवाज़ो कै साथै भैजदा जू चोऊ दिशाओं शै गौयण कै ओकी कुणै तौड़ी जायौ मैरै चोणेयौंदे लोगौ खै कौठै कौरदै।”
अंजीर कै डाल़ शै शिक्षा
32“अंजीर कै डाल़ो कैईंदा ऐजा उदारण शिखौ जोबै तिथकी डाल़ी नोरम हौए जांव, औरौ पात निकल़दै लागौ; तौ तुऐं जाणै पांव, कै गर्मी का सौमय नेड़िक औसौ। 33ऐशैखैई तुऐं इनु सौबी बातौ खै हौन्दै दैखौ, तौ जाणै पाया कै हांव आदमी का बैटा तावल़ा आणौवाल़ा औसौ। औरौ ऐजौ हौणौ ही वाल़ौ औसौ। 34हांव तुऔं कैंई साचौ बुलू कै किछै जियुंदै लोग तांव तौड़ी बै जियुंदै रोन्दै जोबै ऐजै दुख हौन्दै। 35गौयण औरौ धोरती टोल़े जालै, पौरौ मैरी बातौ हमैशा रोन्दी।”
जागेयौंदे रौया
(मर 13:32-37; लूका 17:26-30,34-37)
36“ऐजी बातौ कियों घोड़ी औरौ कोसी दूसै हौंदी कुणिए ना जाणौ, ना स्वर्ग कै स्वर्गदूत औरौ ना पौरमेशवर का बैटा; पौरौ सिरफ पिता ही तैसी दूसौ कै जाणौ। 37जैशै अमारै पुराणिया नूह कै दूसौ दो थियु, तैशैखैई मुं आदमी कै बैटै का आणा बै हौंदा। 38जिथुकै जैशै जलप्रलय शै औगौड़ियौ कै दूसौ दै जैसी दूसौ तौड़ी नूह जहाजो पांदी ना बुठी तैसी दूसौ तौड़ी लोग खांव-पियौं थिए, औरौ तिनुमुंजी बैयाव हौंव थिए। 39औरौ जांव तौड़ी जलप्रलय आयौ तिनु सौबी खै बोवायो नी लोए गौए तांव तौड़ी तिनुकै किछै बै पौता ना चाली। तैशैखैई मुं आदमी कै बैटै का आणा बै हौंदा। 40तैसी सौमय दो जोणे खेतौ दै हौन्दै, ऐक आगु निंदै औरौ ओका छोड़े दैंदै। 41दो बैटमाणिशौ चाकी पिशदी रौंदी, ऐक आगु निंदै औरौ औकै छोड़े दैंदै।
42इथकारिए यीशुए आपणै चैलै खै बौल़ौ, तुऐं ना जाणौ कै तोंवारा प्रभु कोसी दूसै आन्दा। 43पौरौ ऐजौ जाणै पाव कै जै घोरो का मालिक जाणदा कै चोर कोसी सौमय आन्दा, तोबै सै बिजी रौंदा, औरौ आपणै घोरो दै चोरी ना हौणौ दैंदा। 44इथकारिए तुऐं बै तैयार रौया, जिथुकै जैसी सौमय कै बारै मुंजी तुऐं सोंचै बै ना रैई तैसी सौमय हांव आदमी का बैटा आए जांदा।”
बिशवाश लायक नोकर औरौ दुष्ट नोकर
(लूका 12:41-48)
45“औरौ ऐक भोरोशे लायक औरौ ईमानदार नोकर सैजा औसौ, जैसीकै मालिक तैसी ओकी नोकरो कै दैखभाल कौरणौ औरौ तिनुकै खियाणौ पियाणौ कै जुमैवार दैय सौकौ। 46धन्य औसौ, सैजा नोकर, जैसी तैसका मालिक पाछु आयौ ऐशैखैई कौरदै पांव। 47हांव तुऔं खै साचौ बुलू; सै तैसी आपणै सारी धन जायदात पांदी औधिकारी बौणादा।
48पौरौ जै सै दुष्ट नोकर सुंचदा लागौ, कै मैरै मालिक कै आणौ दै देर औसौ। 49औरौ आपणै साथी नोकरो खै पिटदा लागौ, औरौ पिणौ वाल़ै कै साथै खांव पियौं। 50तौ तैसी नोकर का मालिक ऐशणै दूसै पाछु आला, जौल़ौ तैणै तैसकै ठोल़नाए नी कौरे रैली, औरौ ऐशणै सौमय दा जू सै ना जाणौ। 51तोबै सै तैसीखै सख्त सौजा दैला औरौ तैसकै ठाँव छल, कपटी वाल़ै लोगौ कै साथै हौंदा जिथै रुणु औरौ दांद पिशणौ हौंदौ।”
Currently Selected:
मत्ती 24: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
