मरकुस 1
1
यूहन्ना बपतिस्मा दाता का सौंदेश
(मत्ती 3:1-12; लूका 3:1-9,15-17; युहन्ना 1:19-28)
1पौरमेशवर का बैटा यीशु मसीह कै बारै मुंजी सुसमाचार कै शुरुआत ऐशैखै औसौ। 2जैशैखै यशायाह पौरमेशवर कै बातौ बौताणौवाल़ै कै पवित्र शास्त्र दौ लैखै राखौ:
“दैख, हांव आपणै सौंदेश दैणौवाल़ै कै तैरै औगौड़ियौ भैजु,
तोबै सै लोगौ कै बौताए सौकौ कै सै तैरै आणौ कारिए आपी खै तैयार कौरौ।
3उजाड़ जौगैह दै ऐकी धाव दैणौवाल़ै कै धाव रौए शौणै कै,
प्रभु कै खातीरदारी कारिए आपणै मनो खै तैयार कौरौ,
औरौ तैसकै आणौ कारिए आपी खै सुधारौ।”
4सैजा सौंदेश दैणै वाल़ा यूहन्ना औसौ। जू उजाड़ जौगैह दा बपतिस्मा दैंव थिया, औरौ लोगौ खै बौल़ौ थिया कै पाप कौरणा छोड़े दैव, बपतिस्मा लोव, औरौ पौरमेशवर तोंवारै पाप माफ कौरला। 5यहूदिया प्रदेश कै, औरौ यरूशलेम शहर कै रौणौवाल़ै बौहितै लोग निकल़ैयो तैसकै धोरे हौटै, औरौ आपणै पापौ खै मानेबा यरदन नोंदी दा तैसी कैईंदा बपतिस्मा लौआ।
6यूहन्ना ऊँटौ कै बाल़ो कै बुणेयोंदे खोटणो बाम्बौ थिया, औरौ आपणै कमर दा चामड़े का पाटा बानै राखौ थिया, औरौ जोंगलो का मौं औरौ चिचलै खाया कौरौ थिया। 7औरौ ऐजा प्रचार कौरौ थिया, “मैरै बाद सैजा आणौवाल़ा औसौ, जू मुं दा बै शौकतीशाली औसौ; हांव तौ ऐसी लायक बै ना आथी कै ऐकी दास कै जैशै झोकैबा तैसकै बूटो कै तशमै खोले सौकु। 8मोऐं तौ तुऔं खै पाणी लैई बपतिस्मा दैय राए पौरौ सै तुऔं खै पवित्र आत्मा लैई बपतिस्मा दैन्दा।”
यीशु का बपतिस्मा
(मत्ती 3:13-17; लूका 3:21-22)
9इनु दूसौ दा यीशुए नासरत गांव पौरैशा गलील जिले दा आयौ, यरदन नोंदी दा यूहन्ना कैईंदा बपतिस्मा लौआ। 10औरौ जोबै सै पाणी पौरैशा निकल़ैयो बायरै ओऊवा, तौ तौलोंई तैणै स्वर्ग खै खोलदै औरौ पवित्र आत्मा खै कबूतर कै जैशणै आपी पांदी उतौरदे दैखा। 11तोबै पौरमेशवरे स्वर्ग पौरैशौ यीशु खै बौल़ौ, “तू मैरा लाड़कु बैटा औसौ, हांव तांवदा खुश औसौ।”
यीशु कै पोरखा
(मत्ती 4:1-11; लूका 4:1-13)
12तिथकै बाद पवित्र आत्माए तौलोंई यीशु खै उजाड़ जौगैह कै ढौबौ खै निया। 13औरौ सै उजाड़ जौगैह दा चाल़ीश दूसौ तौड़ी रौआ औरौ शैतानै तैसीखै पोरखा; औरौ सै जोंगली जानवरो कै साथै रौआ; औरौ स्वर्गदूत तैसकै सेवा कौरदै रौवै।
गलील जिले दा यीशु का सौंदेश
(मत्ती 4:12-17; लूका 4:14-15)
14कैई दूसौ कै बाद, जोबै यूहन्ना खै ज़ेलो पुंडा डाकै दिया, तोबै यीशु गलील जिले दा हौटा औरौ लोगौ मुंजी पौरमेशवर कै राज्य का सुसमाचार का प्रचार कौरा। 15औरौ तैणै बौल़ौ, “पौरमेशवरे जैसी दूसौ कै कौरार दैय राखै थी सैजौ दूस आए गौ, औरौ पौरमेशवर का राज्य नेड़िक आए गौआ; पाप कौरणै छोड़े दौ औरौ सुसमाचार पांदी बिशवाश कौरौ।”
चोऊ मोछुवारै कै बोईदै
(मत्ती 4:18-22; लूका 5:1-11)
16ऐकी दूसै जोबै यीशु गलील झील कै किनारे-किनारे पांदी जांदै बैई, शमौन औरौ तैसका नानड़ा भाई अन्द्रियास खै झील दै जाल फेरकांदै दैखै; जिथुकै सै मोछुवारै थिए। 17यीशुए तिनुखै बौल़ौ, “आव, मैरै चैलै बौणौ, इबी तौड़ी तौ तुऐं माछी पाकड़ो थिए। पौरौ ऐबै हांव तुऔं खै शिखोऊंबा कै लोगौ खै मैरै चैलै कैशैखै बौणाणै।” 18औरौ तिनुऐ तौलोंई आपणै माछी पाकड़णो का काम कौरणा छोड़े दिया औरौ तैसकै चैलै बौणणौ कारिए तैसकै साथै हौटै गौवै।
19औरौ दैणिक औगौड़ियौ जाऐबा, तैणै जब्दी का बैटा याकूब औरौ तैसका भाई यूहन्ना खै, किश्ती पांदी जालो खै सोनालदै बैई दैखै। 20तैणै तौलोंई तिनुखै बौल़ौ, “मैरै साथै उंढे आव औरौ मैरै चैलै बौणौ” औरौ सै आपणै पिता जब्दी खै मजदूरो कै साथै किश्ती पांदी छोडे़बा तैसीआरी आगु हौटै, औरौ यीशु कै चैलै बौणै।
दुष्टआत्मा वाल़ा आदमी खै छुटकारा
(लूका 4:31-37)
21यीशु औरौ तैसकै चार चैलै कफरनहूम नगर दै ओऊवे, औरौ सै ओकी विशांव कै दूसै यहूदी सभा-घोरो दा जाऐबा उपदैश दैंदा लागा। 22औरौ लोग तैसकै उपदैश लैई हैरान हौवे; जिथुकै सै तिनुखै यहूदी शास्त्री कै जैशणै नी, पौरौ साची औधिकार कै साथै उपदैश दैंव थिया।
23तैसी सौमय, तिनकै यहूदी सभा-घोरो दा ऐक आदमी थिया, जैसदै ऐक दुष्टआत्मा थी। 24तैणै जोर शै लैर मारैयौ बौल़ौ, “ओए रै नासरत गांव कै यीशु, अमारै तांवआरी किछै लैणा दैणा ना आथी? कै तू आमुखै नाश कौरदा आए रौआ? हांव ताखै जाणुए, तू कुण औसौ? तू ही सैजा पवित्र आदमी औसौ, जू पौरमेशवर कै ढौबौशा आए रौआ!” 25यीशुए दुष्टआत्मा खै ऐजौ बौलेयौ झिड़की, “चुपी रौ; औरौ ऐसी पौरैशै निकल़ै जा।” 26तोबै दुष्टआत्मा तैसीखै मौरौड़यौ, औरौ जोरो कै लैर मारैयौ तैसी पौरैशै निकल़ै गौए। 27इयौं बातौ लैई सौबै लोग हैरान हौयौ आपी मुंजी पूछदै लागै, “ऐजै का बात औसौ? ऐजा तौ नौवाँ ही उपदैश औसौ! सै औधिकारो कै साथै दुष्टआत्मा खै बै झिड़कै दैंव, औरौ सै तैसकै आज्ञा मानौ।”
28इथकै बाद यीशुए जू चौमत्कार कौरे राए थिया इथ बोजे शै तैसकौ नांव गलील जिले कै नेड़िक कै सारै प्रदेशो दो फोयलै गौ।
बीमारों कै ठीक कौरणै
(मत्ती 8:14-17; लूका 4:38-41)
29जोबै यीशु औरौ तैसकै चैलै यहूदी सभा-घोरो शै निकल़ै, तोबै सै याकूब औरौ यूहन्ना कै साथै शमौन औरौ अन्द्रियास कै घोरे हौटै। 30औरौ शमौन कै शाशु तापो दै पौड़ै रौए थी, औरौ तिनुऐ तौलोंई तियांरै बारै मुंजी यीशु कैंई बौल़ौ कै सै बीमार औसौ। 31तोबै यीशुए तियांरै धोरे जाएयो हाथ थाम्बैयौ तियौंखै ऊबी बिजाल़ै; औरौ तियौं का ताप उतरी गौआ, औरौ सै तिनकै सेवा कौरदै लागी।
32बैल़खै कै सौमय जोबै सुरज डोबै#1:32 यहूदी कानून कै हिसाब सै लोगौ खै विशांव कै दूसै टोल सांडणौ कै छूट ना थी, औरौ बीमारों खै टिपयौ लाणै तिनकै हिसाब सै ऐक टोल थी। इथकारिए तिनुवै बीमार लोगौ खै यीशु कै धोरे निणो कारिए सुरज ढोल़णो तौड़ी ठोल़ा, जांव तौड़ी विशांव कौ दूस बीती ना जांव गौआ तौ तैसी नोगरो कै बौहितै लोग जू बीमार थिए, औरौ जिनुदी दुष्टआत्माएं थी, लोगै तिनु तैसकै धोरे नियै। 33औरौ बौहितै लोगौ कै भीड़ घोरो बाइरै कौठै हौए गौए। 34तैणै बौहितै खै जू कैई भान्त कै बीमारियों लैई दुखी थिए, ठीक कौरे; बौहितै दुष्टआत्माओं खै गाड़ी; औरौ दुष्टआत्माओं खै बौल़ाणौ ना दी, जिथुकै सै तैसीखै पोछैयाणौ थी। कै यीशु ही पौरमेशवर का बैटा औसौ।
35ओकी दूसै झीशो इनारै दा ही, यीशु ऊबा बेजैबा, ऐक शुनशान जौगैह दा हौटा औरौ तिथै प्रार्थना कौरदा लागा। 36तोबै शमौन औरौ तैसकै साथी तैसीखै जोन्दै लागै। 37जोबै सै भैटा, तौ तैसीखै बौल़ौ, “सौबी लोगै ताखै जौए लौआ।” 38यीशुए तिनुखै बौल़ौ, “उंढे आंव; आमै कोसी नेड़िक बस्तियौं दै जोऊंबे, कै हांव इथकारिए आए रौआ कै लोगौ मुंजी आछै खोबर का प्रचार कौरु।” 39ऐशैखैई सै सारै गलील जिले कै बौहितै जौगैह दा तिनकै यहूदी सभा-घोरो दा जायौ प्रचार कौरदा औरौ दुष्टआत्माओं खै निकाल़दा रौआ।
यीशु का कोढ़ कै रोगी खै ठीक कौरणा
(मत्ती 8:1-4; लूका 5:12-16)
40ऐक दूस ऐक कोढ़ी आदमी यीशु कै धोरे ओऊवा, तैणै तैसीकैईं दै बिन्ती कौरे, औरौ तैसकै सामणै घुंडू नियुड़ाऐबा तैसीखै बौल़ौ, “जै तैरै मौरजी औसौ तौ तू मुखै ठीक कौरे दै।” 41तैणै तैसी पांदी गिणायो आपणा हाथ तैसी पांदी राखा, औरौ तैसीखै छौयौ बौल़ौ, “हांव चोऊं, कै तू ठीक हौए जाए।” 42औरौ तौलोंई तैसका कोढ़ आछा कौरेबा ठीक हौए गौआ, औरौ सै औटेयौ शुध्द हौए गौआ। 43तोबै तैणै तैसीखै चैतावणी दैयौ छाड़ै दिया, 44औरौ तैसीखै बौल़ौ, “दैख, कोसी कैंई बै किछै नै बौलेया, पौरौ यरूशलेम मंदिरो दा जाऐबा आपी खै यहूदी पुरोहित खै दिखा जै तू ठीक हौए गौआ। जू किछै बात मूसाए कोढ़ ठीक हौए जाणौ कै बारै मुंजी दैय राए थी तिथकै हिसाब शै पौरमेशवर कारिए बलिदान चौढ़ा, तोबैई यहूदी पुरोहित सौबी लोगौ खै बौताए सौकौ कै तू ठीक हौए गौआ।”
45पौरौ सै बायरै जाऐबा इयौं बातौ का बौहिता प्रचार कौरदा लागा औरौ इथै तौड़ी फौईलांदा लागा, कै इनु बातौ कै बौजैह शै यीशु तोबै खुलमखुल्ला नोगरो दा ना जाए सौकी, पौरौ यीशु नोगरो दा बायरै शुनशान जौगैह दा रौआ; औरौ तोबै बै चोऊ ढौबौशै लोग यीशु कै धोरे आन्दै रौवै।
Currently Selected:
मरकुस 1: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
