मरकुस 12
12
यीशुए दुष्ट किसानो का उदारण दिया
(मत्ती 21:33-46; लूका 20:9-19)
1तोबै यीशु उदारण देएबा यहूदी पुरोहितो, यहूदी शास्त्रीयों औरौ बुड़ेईको (यहूदी नेताओं) आरी बातौ कौरदा लागा: “ऐकी आदमीए अंगूरो का बाग लाया, औरौ तिथकै चोऊ ढौबौ खै बाड़ा बानै दिया, औरौ रोसौ का कुण्ड खुणा, औरौ तोबै होढ़ा बाणा; औरौ किसानो खै तिथकै ओधयाल़ी देएबा प्रदेश हौटै गौआ। 2जोबै अंगूर पाकै गौवै तौ मालिकै आपणै नोकरो खै किसानो कै धोरे छाड़ा कै अंगूरो कै बागो पौरैशै किछै हिस्सा तैसकै धोरे लियांव। 3पौरौ किसाने तैसीखै उंढा पाकड़ैबा पीटा औरौ खाली हाथ छाड़ै दिया। 4तोबै खेतौ कै मालिकै ऐक ओका नोकर किसानो कै धोरे छाड़ा, तिनुऐ तैसकौ मुंड फोटोऐ दियु औरौ तैसकी बैज्जती कौरी। 5तोबै मालिकै ऐक नोकर हौजौ छाड़ा, तिनुऐ तैसीखै बै मारै दिया; हौजौ तैणै बौहितै नोकरो कै छाड़ै तिनुमुंजी दै कोसी तौ तिनुऐ पीटै, औरौ किछै मारै दिए। 6ऐबै ऐकैई रौए गौआ थिया, जू तैसका लाड़कु बैटा थिया; आखिर दा तैणै तैसीखै बै तिनकै कै धोरे ऐजौ सोंचैबा छाड़ा कै सै मैरै बैटै कै इज्जत कौरलै। 7जोबै किसाने तैसका बैटा आन्दी बैई दैखा, तौ तिनुऐ आपी मुंजी बौल़ौ; ‘ऐजाई तौ वारिस औसौ, चालौ, आमै ऐसीखै बै मारै दियुंबे, तोबै जमीन-जायदात अमारै हौए जालै।’ 8औरौ तिनुऐ तैसीखै पाकड़ैबा मारै दिया, औरौ तैसकै लाश अंगूरो कै बागो कै बायरै फेराकाऐ दै। 9इथकारिए ऐबै अंगूरो कै बागो का मालिक का कौरला? सै आयौ तिनु किसानो खै मारै दैंदा, औरौ अंगूरो का बागो ओकी खै दैला।
10का तुऐं पवित्र शास्त्र दौ ऐजौ ना पौढ़ै रैई कै:
जैसी पाथरो कै मिस्रिए फेरकाए दिया थिया,
सैजाई पाथर कोंड़ियारा बौणै गौआ;#12:10 इथै यीशुए ऐसी कोंड़ियारे पाथरो कै तुलना आपियारी कौरे लोए
11पौरमेशवरे जू ऐजौ कियु,
तैसी बातौ पांदी आमै बौहितै हैरान हुवे।”
12औरौ यहूदी नेता यीशु कै थामणा चांव थिए; जिथुकै सै सौमझै गौवै थिए, कै यीशुए ऐजा उदारण तिनकै खिलाफ बौल़ै लौआ। पौरौ सै लोगौ दै डौरौ थिए; कै जै आमु यीशु कै थामो, तौ लोग आमु पांदी हमला कौरलै, एसी डौरौ शै यहूदी नेता तैसीखै छोडे़बा हौटै गौवै।
महाराजा कै कर दैणा
(मत्ती 22:15-22; लूका 20:20-26)
13बाद मै यहूदी नेताए किछै फरीसी लोगौ औरौ हेरोदियों कै दोस्त कै यीशु कै धोरे तैसी तैसकी बातौ दा फोशाणौ कारिए छाड़ै। 14तिनुऐ आयौ तैसीखै बौल़ौ, “ओए रै गुरुजी, आमै जाणुए, कै तू साचा औसौ, औरौ कोसी कै पोरवा ना कौरे कै लोग मुखै का बुलले। औरौ तू सौबी खै साथै ऐक जैशणा बर्ताव कौरे चाहै कुणिए बै हौं, पौरौ तू पौरमेशवर कै बाट सोच्चाई सै बौताए। तौ का रोम कै महाराजा खै मूसा कै कानून कै हिसाब शै आमुखै कर दैणौ चैंई या ना दैणौ चैंई?” 15का आमु कर दियु या ना दियु? पौरौ यीशुए तिनका ढोंग जाणैबा तिनुखै बौल़ौ, “तुऐं मुखै किथुखै पोरखौ?” ऐक चांदी का सिका#12:15 जिथकै धियाड़ी ऐकी दूसौ कै बोराबर हौंव ऐजा रोमी सरकार का सिका थिया जिथपांदी महाराजा कै किश्ती औरौ छाप हौं थी यहूदी लोग ऐसी सिका सिरफ कर दैणौ कै इस्तैमाल कौरौ थिये। मैरै धोरे लियांव, कै हांव तैसीखै दैखु। 16तिनुऐ चांदी का सिका यीशु कै धोरे लियोऊवा, औरौ यीशुए तिनुखै बौल़ौ, “इथपांदी छाप औरौ नांव कोसको औसौ?” तिनुऐ बौल़ौ, “रोम देश कै महाराजा (कैसर) कै छाप औरौ नांव औसौ।” 17यीशुए तिनुखै बौल़ौ, “जू महाराजा को औसौ सैजौ महाराजा खै दैव, औरौ जू पौरमेशवर को औसौ सैजौ पौरमेशवर खै दैव।” औरौ इयौं बातौ पांदी सै हैरान हौए गौवै।
जियुंदै हौणौ कै बारै मुंजी सवाल
(मत्ती 22:23-33; लूका 20:27-40)
18तोबै सदूकी लोगौ का गुट यीशु कै धोरे ओऊवा, तिनका बिशवाश थिया कै मौरेयौंदे कौ जियुंदी हौणौ आथी ही ना, तैसकै धोरे आयौ तैसी कैईंदु पूछु, 19“ओए रै गुरुजी, कानून की किताब दो मूसाए आमुखै लैखै राव, कै जै कोसी का भाई बेओलाद मौरे जांव, औरौ तैसकै घोरवाल़ी विधवा हौए जांव, तौ तैसका भाई तैसकै घोरवाल़ी आरी बैयाव कौरेयौ आपणै भाईड़ी कै ओलाद पौयदा कौरो। 20ऐक बैई ऐकी कुड़बे दै सात भाए थिए। जैठा भाईड़ी बियाव कौरेयौ बेओलाद मौरे गौआ। 21तोबै दूजै भाइड़ीए तियौं विधवा आरी बियाव कौरा औरौ सै बै बेओलाद मौरे गौआ; औरौ तैशैखैई तिजै बै कियु। 22औरौ साती कैंई ओलाद ना होई। सौबी कै बाद सैजी विधवा बैटमाणिश बै बेओलाद मौरे गौए। 23ऐबै, आमुखै बोता जै मौरेयौंदे का जियुंदी हौणौ पांदी सैजी विधवा बैटमाणिश, जू साती भाईड़ीआरी बियाए रौए थै, सै तिनुमुंजी दै कोसके घोरवाल़ी हौलै?”
24यीशुए तिनुखै बौल़ौ, “तुऐं गौलत औसौ जिथुकै तुऐं ना जाणौ कै पवित्र शास्त्र दो का लैखै राए, औरौ ना ही तुऐं पौरमेशवर कै अनौखी शौकतै कै जाणौ? 25जिथुकै जोबै सै मौरेयौंदे पौरैशै जियुंदै हौलै, तौ तिनुमुंजी बियाव ना हौंदै; पौरौ स्वर्ग दै रौणौवाल़ै स्वर्गदूतौ कै जैशणै हौंदै।
26मौरेयौंदे पौरैशै जियुंदी हौणौ कै बारै मुंजी का तुऐं मूसा कै किताबो दो आग लैई जोल़ेयौंदे झाड़ी कै कथा दो ना पौड़ै रैई जियौं कथा दो पौरमेशवरे मूसा खै बौल़ौ: ‘हांव तैरै पुराणिया अब्राहम, इसहाक औरौ याकूब का पौरमेशवर औसौ?’ 27तैसी सौमय, सैजै तीनै जोणे मौरे रौए थिए; पौरौ पौरमेशवर कै सामणै सैजै ऐबै बै जियुंदी औसौ। इथकारिए तैणै ऐशैखै बौल़ौ सै मौरेयौंदे लोगौ का पौरमेशवर ना आथी। पौरौ तिनु लोगौ का पौरमेशवर औसौ जू जियुंदी औसौ, तुऐं इयौं बातौ पांदी बिशवाश ना कौरेयौ, बौड़ी गौलतै कौरे राए।”
महान आज्ञा
(मत्ती 22:34-40; लूका 10:25-28)
28यहूदी शास्त्री मुंजीदै ऐकीए आयौ शुणु कै यीशुए औरौ सदूकी लोगै आपी मुंजी का चौर्चा कौरे लोए, औरौ ऐजौ जाणियौ कि यीशुए तिनुखै आछै तरह शै जोवाब दै राए, तैणै यीशु कैईंदु पूछु, “पौरमेशवरे जिशै बै आज्ञा दैय रैई तिनुमुंजी दै सौबिदी खास कुणजी औसौ?” 29यीशुए तैसीखै जोवाब दिया, “सौबी आज्ञाओं मुंजीदै खास आज्ञा ऐजै औसौ: ‘ओए रै इस्राएल देशो कै लोगौ शुणौ, प्रभु अमारा पौरमेशवर ऐक ही प्रभु औसौ। 30औरौ तू प्रभु आपणै पौरमेशवर आरी आपणै सारै मन शै, औरौ आपणै सारै प्राण शै, औरौ आपणी सारी बुध्दि शै, औरौ आपणी सारी शौकतै शै प्यार राखैया।’ 31औरौ दूजै सौबी मुंजीदै खास आज्ञा ऐजै औसौ, ‘तू आपणै पड़ोसी आरी तैशणा प्यार कौर जैशणा आपिआरी कौरे।’ इदै बौड़ै आज्ञा कुणजै बै ना आथी।” 32यहूदी शास्त्रीए तैसीखै बौल़ौ, “ओए रै गुरु, एकदम ठीक बौल़ौ! तुऐं साचौ बौल़ौ, कै सिरफ प्रभु ही पौरमेशवर औसौ औरौ तैसकै सिवाए ओका पौरमेशवर कुणिए बै ना आथी। 33औरौ तैसीआरी सारै मन शै, औरौ सारै बुध्दि, औरौ सारै प्राण, औरौ सारै शौकतै कै साथै प्यार कौरेया; औरौ आपणै पड़ोसी आरी तैशणा प्यार कौर जैशणा आपिआरी कौरे, ऐजौ सौबी बलिदान औरौ भैंट शै बौड़ैयो औसौ।” 34जोबै यीशुए दैखौ कै तैणै सौमझैबा जोवाब दिया, तौ तैसीखै बौल़ौ, “तू पौरमेशवर कै राज्य कै नेड़िक औसौ।” औरौ कोसी कै बै हौजौ तैसीयादै किछै पूछणो कै हिम्मत ना होई।
यीशु का सवाल
(मत्ती 22:41-46; लूका 20:41-44)
35तोबै यीशुए यरूशलेम मन्दिरो दा उपदैश दैंदै बैई ऐजौ बौल़ौ, “यहूदी शास्त्री कैशैखै बौल़ौ, मसीह राजा दाऊद का बैटा औसौ? 36जोबै आपणै सौमय दो राजा दाऊदे पवित्र आत्मा की शौकतै दो हौयौ बौल़ौ:
‘प्रभु पौरमेशवरे मैरै प्रभु खै बौल़ौ, मैरै सोऐं ढौबौ बौठ,
जांव तौड़ी हांव तैरै बौयरी खै हराए ना दियु।’”
37“राजा दाऊद तौ आपी ही तैसीखै प्रभु बौल़ौ, तोबै सै तैसका बैटा कुकै दा हौआ?” औरौ भीड़ कै लोग तैसीखै खुशी शै शुणौ थिए।
यीशुए चैतावणी दै
(मत्ती 23:1-36; लूका 20:45-47)
38यीशुए आपणै उपदैश दो तिनुखै बौल़ौ, “यहूदी शास्त्री कैईंदै चौकश रौया, जू लाम्बै-लाम्बै खोटणो बाम्बेबा बाज़ारो दै लोगौ कैईंदै इज्जत पाणै चांव। 39औरौ तिनुखै यहूदी सभा-घोर दो खास-खास ठाँव औरौ बोईदुत मुंजी बै आदर दैणौ वाल़ी जौगैह दो बोठणौ बड़िया लागौ। 40सै धौखा दैयौ विधवाओं कै घोरो पांदी कब्जा कौरदै जांव, औरौ देखाणौ कारिए बौड़ी बार तौड़ी प्रार्थना कौरदै रौंव। पौरमेशवर जौरुर तिनुकै कड़ी सौजा दैंदा।”
विधवा का दान
(लूका 21:1-4)
41यीशु मन्दिरो कै भण्डार कै सामणै बौठैबा दैखदा लागा, कै लोग मन्दिरो कै भण्डार दै कैशैखै पौएसै छोड़ो, औरौ कैई अमीरे जादा मात्रा दो धन दान कौरौ। 42तोबै ऐकी कंगाल विधवाएं आयौ दो ताँबे कै सिक्कै छोड़े, जिथकी कीमत जोडे़ई कम थी। 43तोबै यीशुए आपणै चैलै खै आपणै धोरे बौएदैयौ तिनुखै बौल़ौ, “हांव तुऔं खै साचौ बुलू कै मन्दिरो कै भण्डार दै छौड़णौ वाल़ौ मुंजीदै इयैं गरीब विधवाएं सौबीदु बौड़ैबा पोऊ। 44इनु सौबी लोगै आपणै बौहितै धन पौरैशौ दियु, पौरौ इयैं विधवाएं गरीब हौणौ कै बावजूद जू किछै तियांरै आपणै जिणौ कारिए चैंई थियु, सैजौ बै पाए दियु।”
Currently Selected:
मरकुस 12: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
