मरकुस 13
13
यीशु दवारा मन्दिरो कै नाश कै भविष्यवाणी
(मत्ती 24:1-2; लूका 21:5-6)
1जोबै यीशु यरूशलेम मन्दिरो पौरैशा निकल़दा लागै रौआ थिया, तौ तैसकै चैलै मुंजीदै ऐकीए तैसीखै बौल़ौ, “ओए रै गुरु, दैख दिभा, कैशणै बौड़ै कामकै मेहलो औसौ औरौ इनु कैशणै बौड़ै पाथरो लैई बाणै राखै।” 2यीशुए तिनुखै बौल़ौ, “ऐजै बौड़ै-बौड़ै मेहलो खै जू तुऐं इबी दैखै लौवै: पौरौ हांव तुऔं कै बौतौऊं ऐकी दूसै इनु मेहलो कै सौबै पाथरो चकनाचूर हौए जालै औरौ ऐक बै पाथर आपणै-आपणै ठाँव दा ना रौंदा।”
आखरी दूसौ कै निशान
(मत्ती 24:3-14; लूका 21:7-19)
3यीशु जैतून धारो पांदी हौटा, औरौ घाटी चौढ़ेयौ यरूशलेम मन्दिरो कै ढौबौ मुं कौरेयौ बौठै रौआ थिया। जोबै यीशु इकली थिया तोबै पतरस, याकूब, यूहन्ना औरौ अन्द्रियास तैसकै धोरे ओऊवे, औरौ तिनुऐ तैसी कैईंदु पूछु, 4“आमुखै बौता कै ऐजी बातौ कोलो हौंदी? औरौ जोबै ऐजी सौब बातौ पूरी हौंदी, तौ तैसी सौमय का, का निशान हौंदा?”
5यीशु तिनुखै बौलदा लागा, “चौकश रौया कै कुणिए तुऔं खै भोरमाऐ नै दैंव। 6बौहितै लोग मैरै औधिकार का दावा कौरदै औरौ बौलदै कै ‘हांव ही मसीहा औसौ,’ औरौ बौहितै लोगौ खै भोरमाऐ दैंदै।
7जोबै तुऐं लोड़ाई, औरौ लोड़ाइयों कै चौर्चा शुणल़ै, तौ ना घोबराया; जिथुकै इनु बातौ का हौणा जौरुरी औसौ, पौरौ तैसी सौमय दुनिया का अन्त ना हौंदा। 8जिथुकै सौबै देश औरौ राज्य ऐकी दूजै कै खिलाफ हौए जांदै औरौ आपी मुंजी लोड़दै। हर कौथी भुईचोल़ हौलै, औरौ काल़ पोड़लै। ऐजी बातौ तौ कठिन सौमय कै शुरुआत ही हौंदै, जैशै बैटमाणिशौ कै सुजणौ की पीड़ो हौंव।
9पौरौ तुऐं आपणै बारै दै चौकश रौया, जिथुकै लोग तुऔं कै महासभा दै निलै औरौ तुऔं यहूदी सभा-घोर दै पीटदै, औरौ तुऐं मैरै चैलै औसौ इथकारिए लोग तुऔं खै राज्यपालो औरौ राजाओं कै आगै खौड़ै कौरदै। तोबै तुऐं तिनुखै मैरा सुसमाचार शुणाए सौकौ। 10पौरौ जौरुरी औसौ कै दुनिया का अन्त हौणौ दा आगै, मैरै बारै मुंजी सुसमाचार सौबी देशो कै लोगौ दा शुणाया जांव।
11जोबै सै तुऔं कौर्ट-कचेरी दै निलै, तौ आगैई फिकर नी कौरेया कै आमै का बुलू, पौरौ सोही सौमय आणौ पांदी पौरमेशवर जू किछै तुऔं खै बौल़ौ सैजौई कौरेया। जिथुकै पवित्र आत्मा तुऔं खै बोताला कै तुऔं का बौलणौ। 12लोग आपणै बिशवाशी भाईयों खै मार दैणौ कारिए थोमाले, औरौ माँ-बापू बै आपणै नानड़िया आरी ऐशैखैई कौरलै, औरौ नानड़िया आपणै माँ-बापू कै खिलाफ हौए जांदै औरौ तिनु ओकी लैई मोरवाए दैंदै। 13औरौ तुऐं मैरै चैलै औसौ इथकारिए सौबै लोग तुऔंआरी बैर कौरलै; औरौ जू आपणै मौरणौ कै सौमय तौड़ी मुं पांदी भोरोशा राखलै पौरमेशवर तिनुखै बौचायौ राखला।”
महाकष्टी का सौमय
(मत्ती 24:15-28; लूका 21:20-24)
14“पोढ़णो वाल़ै इथुकै सौमझौ: ऐक दूसै तुऐं ऐक बुरै चीज़ मन्दिरो दै खौड़ै दैखलै, जिथै तिथुखै ना हौणौ चैंई, इयौं बातौ की बौजैह शै सौबी खै मन्दिर छोड़णा पौड़दा। तोबै यहूदिया प्रदेश कै लोगौ खै चुरिणौ कारिए धारो कै ढौबौ दोऊड़नो पौड़दौ। 15जू घोरो कै छोतौ पांदी हौलै, सै आपणै समान लोणो कारिए घोरे खै भीतरै नै जाया, औरौ तिनुकै भागणौ चैंई। 16औरौ जू खेतौ दै हौलै, सै आपणै खोटणो लेयांदै पाछु घोरे नै आया। 17तिनु दूसौ दी जू होल़किणु औरौ जू दूध पियाणौ वाल़ी हौली, तिनुखै भागणौ बैजाए मुशकिल हौंदौ। 18-19तिनु दूसौ दै लोगौ खै बैजाए दुख तकलीफ झेल़णै पोड़लै, सृष्टि कै शुरुआत शै, जौल़ौ दी ऊंडी पौरमेशवरे दुनिया बाणै राखी, जिथका सामणा लोगै ऐलो तौड़ी ना कौरे रैई औरौ ना ही इथकै बाद हौजौ कौरदै; इथकारिए प्रार्थना कौरेया कौरौ कै ऐजा कोष्टी का सौमय जाड़ै कै दूसै नै हौंव। 20औरौ जै पौरमेशवर तिनु दुखो कै सौमय कै नी घोटांदा, तौ कुणिए आदमी बै ना बौचदा; पौरौ तैणै चोणेयौंदे लोगौ कै बौजैह शै जिनुखै तैणै चोणे राखै, तिनु कारिए सौमय खै घोटाए दैला।
21तैसी सौमय जै कुणिए तुऔं खै बौल़ौ, ‘दैखौ, मसीह इथै औसौ!’ या ‘दैखौ, तिथै औसौ!’ तौ तिनकी बातौ पांदी बिशवाश नै कौरेया। 22जिथुकै झूठै मसीह औरौ झूठै पौरमेशवर की बातौ बोताणौवाल़ै आन्दै, औरौ निशान औरौ अनौखै काम देखालै, औरौ हौए सौकौ तौ जिनु लोगौ खै पौरमेशवरे चोणे राए तिनु बै भोरमाए दैलै। 23पौरौ तुऐं चौकश रौया, दैखौ मोऐं तुऔं खै सौब बातौ आगैई बौताए दी जू हौणौवाल़ी औसौ।”
यीशु का हौजौ आणा
(मत्ती 24:29-31; लूका 21:25-28)
24“दुखो का सौमय बितणौ कै बाद, सुरज औरौ चांद पेयाशो ना दैंदै। 25औरौ गौयणै पौरैशै तारै उदे छुटदै। औरौ गौयणी की शौकतीशाली चीज़ौ आपणै ठाँव पौरैशी हिंजाल़ी जान्दी। 26तोबै लोग मुखै आदमी कै बैटै कै अनौखी शौकतै औरौ महिमा कै साथै बादल़ौ दै आन्दै बैई दैखलै। 27हांव आदमी का बैटा आपणै स्वर्गदूतौ खै भैजदा, जू चोऊ दिशाओं शै धोरतियौं कै ऐकी कुणै शै गौयण कै ओकी कुणै तौड़ी जायौ मैरै चोणेयौंदे लोगौ खै कौठै कौरदै।”
अंजीर कै डाल़ो का उदारण
(मत्ती 24:32-35; लूका 21:29-33)
28“अंजीर कै डाल़ो कैईंदा ऐजा उदारण शिखौ जोबै तिथकी डाल़ी नोरम हौए जांव; औरौ पात निकल़दै लागौ; तौ तुऐं जाणै पांव, कै गर्मी का सौमय नेड़िक औसौ। 29ऐशैखैई तुऐं इनु बातौ खै हौंदै दैखौ, तौ जाणै पाया कै हांव आदमी का बैटा तावल़ा आणौवाल़ा औसौ। औरौ ऐजौ हौणौ ही वाल़ौ औसौ। 30हांव तुऔं कैंई साचौ बुलू कै किछै जियुंदै लोग तांव तौड़ी बै जियुंदै रोन्दै जोबै ऐजै दुख हौन्दै। 31गौयण औरौ धोरती टोल़े जालै, पौरौ मैरी बातौ हमैशा रोन्दी।”
सौदा जागदै रौंव
(मत्ती 24:36-44)
32“ऐजी बातौ कियों घोड़ी औरौ कोसी दूसै हौंदी कुणिए ना जाणौ, ना स्वर्गदूत औरौ ना पौरमेशवर का बैटा; पौरौ सिरफ स्वर्ग का पिता ही तैसी दूसौ कै जाणौ।
33दैखौ, जागदै औरौ प्रार्थना कौरदै रौव; जिथुकै तुऐं ना जाणौ कै हांव कोलो पाछु आन्दा। 34मैरै जाणौ औरौ पाछु आणौ का तरीका ऐशैखैई हौंदा जैशै ऐक आदमी प्रदेश जाणौ कै सौमय आपणौ घोर छोड़े दैंव, औरौ आपणै नोकर खै घोरो कै रोखवाल़ी कि जुमैवारी दैयौ जांव, औरौ सौबी खै तैसका काम बौताए दैंव, औरौ चोकीदार खै बौताए दैंव कै मैरै आणौ तौड़ी चौकश रौया। 35इथकारिए यीशुए आपणै चैलै खै बौल़ौ, तुऐं ना जाणौ कै घोरो का सयाणा कोलो आला, फिरै या आधै रात खै, या मुरगै कै बांक दैणै कै सौमय या झीशो। 36ऐशैखै ना हौंव सै एकदम आयौ तुऔं सौबी खै गैहरी निंदो दै सौतेयौंदै पांव। 37औरौ जू मोऐं तुऔं कैई बौल़ै राए ऐजौई सौबी कैई बुलू: सौदा मैरै आणौ कारिए तैयार रौंव।”
Currently Selected:
मरकुस 13: SRXNT
Highlight
Share
Copy
Want to have your highlights saved across all your devices? Sign up or sign in
Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.
