Ruuka 3
3
Emirimu gya Yoana Omubhatiiji
(Mataayo 3:1-12; Mariko 1:1-8; Yoana 1:19-28)
1Gwaringa omwaka gwa ekumi na etaanu, gunú Kaisari Tibherio yaaringa aratunga ekyaro kyonsego kya Abharuumi. Ponsio Pirato yaaringa omwanangwa wa ekyaro kya Yudea. Herode Antipa#3:1 Herode Antipa. Maaha eringʼana rinu mu Moonjooro eguru ya Amangʼana Amakongʼu. yaaringa omukama wa ekyaro kya Gariraaya. Firipo, omumura waabho Herode, yaaringa omukama wa ebhyaro bhya Iturea na Tarakoniti. Risania weeki yaaringa omukama wa ekyaro kya Abhireene. 2Eribhaga riyo, Anasi na Kayafa mbo bhaaringa abhasyengeri abhakuru.#3:2 Abhasyengeri abhakuru. Maaha Abhasyengeri mu Moonjooro eguru ya Amangʼana Amakongʼu.
Mbe, kwibhaga riyo, Yoana omwana wa Jakaria, yaaringa kukibhara. Hanú yaaringa eyo, akakeeribhwa eringʼana okurwa ku Waryubha. 3Akagya kukyaro kyonsego kinú kiringi embarika ya oruuji rwa Yorodani. Akabha araraarikira abhantu eringʼana riyo ega, “Mutige obhusarya bhwenyu, mumwihunjurire Waryubha, mubhatiijwe, naho abhaabhire obhusarya bhwenyu!” 4Amangʼana gayo gahikiibhwe, kya ego yaangʼoorwa mukitabho kya omurooti Isaaya ega,
“Omuntu aribhanga kukibhara araraarika kwa eriisi erinene ega,
‘Museemerye Omukuru Waryubha enjira,
mwimye kira ahasi hanú arihita!
5Amaruuma gonsego garibhwe,
eginkuku na ebhiswa bhinyaraganibhwe.
Eginjira ginú giikoonyeri giimibhwe,
na hanú haana amaruuma amake amake hanyaraganibhwe.
6Hayo nho, abhantu bhonsego bharirora kya ego Waryubha arituurya abhantu.’ ”#3:4-6 Maaha mukitabho kya Isaaya 40:3-5.
7Mbe, emiganda gya abhantu gyamuujiranga Yoana, naho abhabhatiije. Akabha arabhakeerya ega, “Bheenyu orwibhuro rwa eginjoka! Mumanyiri ega, obhujibhu bhwa Waryubha bhuriija. Niwi yaabhakeerya ega, muriheenerya obhujibhu bhuyo, kwa okubhatiijwa okwenego? 8Mbe, moorokye kuginteemo gyenyu ega, mweehunjuriiri Waryubha okurwa mubhusarya bhwenyu! Muteeganirirya ega, muryabhirwa kwa okubha bheenyu m-beebhurwa bha ehamati ya Abhurahamu.#3:8 Abhurahamu. Maaha eringʼana rinu mu Moonjooro eguru ya Amangʼana Amakongʼu. Ndabhakeerya ega, Waryubha aratura okuhunjura amagina ganu, okubha abhaana bha Abhurahamu! 9Bhoono, Waryubha yeeseemerye okubhabhuturira ekiina, kya ekisiri kiringi kumiri gya omuti, kireenda okugugeeja! Na bhanú bhatakukora amangʼana ga obhuheene, bharibha kya emiti ginú gitaana emisumo ginú girageejwa na okweswa mumururo.”
10Omuganda gwa abhantu bhakabha bharamubhuurya ega, “Bhoono, tukore egaki?” 11Akabhakyukya ega, “Unú yaana emyenda ebhiri, ogumwi agabhire unú ataanago. Unú yaana ebhyakurya, agabhire unú yaana enjara.”
12Abhatobhya bha erigooti#3:12 Abhatobhya bha erigooti. Maaha eringʼana rinu mu Moonjooro eguru ya Amangʼana Amakongʼu. bhonse bhakaaja, naho abhabhatiije. Bhakamubhuurya ega, “Omwihigirya, na bheetu tukore egaki?” 13Wonse akabhakyukya ega, “Hanú muraatobhyenga, mutoongerya-ko okukira kya ego mwaragiriribhwa.”
14Abhasirikare bhonse bhakamubhuurya ega, “Na bheetu tukore egaki?” Wonse, akabhakyukya ega, “Mutaruusya omuntu ebhintu bhyaye kwa amanaga, kweki mutajongera omuntu kwa okumuhaamirirya amangʼana ga obhubheehi. Amariho ganú murahaanwa, mwiswe nago.”
15Mbe, abhantu hanú bhaaringa bharaganyirira kinú kiraakoreke, bhakabha bhareebhuurya ega, hamwi Yoana ngʼo Kiristu Omutuurya. 16Nawe Yoana, akabhakeerya bhonsego ega, “Oni ndabhabhatiija kwa amanji, nawe oundi ariija, omukuru okukira oni. Ntakwenderwa kora okubha omugaya waaye, wa okusibhura egingoye gya eginkeeto gyaye!#3:16a Okusibhura egingoye gya eginkeeto gyaye. Kuginsiku girya, nyoore omugeni arasoha munyumba, omugaya wa insi bhukongʼu yaaringa aramusibhura eginkeeto na okoogya amaguru gaaye. Weeki aribhabhatiija kwa Omutima Omurabhu, na arisikya obhusarya bhwenyu kya ego omururo gurasikya ebhintu.#3:16b Weeki aribhabhatiija kwa Omutima Omurabhu, na arisikya obhusarya bhwenyu kya ego omururo gurasikya ebhintu. Ekiyunani kiragamba ega, Weeki aribhabhatiija Omutima Omurabhu na kwa omururo. 17Bhoono, weeki n-kya omuntu unú agwatiriri oruhungo mumabhoko gaaye. Ariirura eginkuunyu okurwa mubhuro. Nho, arigega obhuro na okubhutuura mukitara, na arisamba eginkuunyu mumururo gunú gutakusima.”
18Mbe, kwa amangʼana amaaru gayo, na agandi, Yoana yaaringa arabhakaanʼya abhantu bhayo, enu arabharaarikira Amangʼana Amajomu okurwa ku Waryubha.
19Eribhaga erindi, Yoana akamutoongʼanʼya omukama Herode Antipa ega, “Kwaki ogegeri Herodia, omukari wa omumura weenyu, omukoreri mukaaho?” Kweki, Yoana akamukaanʼya na obhusarya bhwaye obhundi. 20Nawe, Herode akoongerya obhusarya obhundi kweki, kwa okumubhoha Yoana mwigereja.
Yeesu arabhatiijwa
(Mataayo 3:13-17; Mariko 1:9-11)
21Eribhaga rinú Yoana yaaringa atarabhohwa mwigereja, abhantu abhaaru bhaaringa bharabhatiijwa, Yeesu wonse akaaja okubhatiijwa. Na hanú Yeesu yaaringa arasabha, orwire rukasiikuka, 22Omutima Omurabhu akeetuuma kya enguuti na okwikara eguru yaaye. Nho, eriisi rikarwa murwire riragamba ega, “Uuwe m-Mwana waani#3:22 M-Mwana waani. Maaha Omwana wa Waryubha mu Moonjooro eguru ya Amangʼana Amakongʼu. omuhanje, nngʼariirwe na uuwe!”
Ehamati ya Yeesu Kiristu
(Mataayo 1:1-17)
23Eribhaga rinú Yeesu yaamba emirimu gyaye gya okuraarika eringʼana rya Waryubha, yaaringa na emyaka muna mirongo esatu. Abhantu bhaakanyanga ega, yaaringa omwana wa Yusufu.
Yusufu uyo, yeebhurwa na Heri.
24Heri yeebhurwa na Matati.
Matati yeebhurwa na Raawi.
Raawi yeebhurwa na Meriki.
Meriki yeebhurwa na Yaana.
Yaana yeebhurwa na Yusufu.
25Yusufu yeebhurwa na Matatia.
Matatia yeebhurwa na Amosi.
Amosi yeebhurwa na Nahumu.
Nahumu yeebhurwa na Esiri.
Esiri yeebhurwa na Nagai.
26Nagai yeebhurwa na Mati.
Mati yeebhurwa na Matatia.
Matatia yeebhurwa na Semei.
Semei yeebhurwa na Yoseki.
Yoseki yeebhurwa na Yoda.
27Yoda yeebhurwa na Yoana.
Yoana yeebhurwa na Resa.
Resa yeebhurwa na Jerubhabheri.
Jerubhabheri yeebhurwa na Sherateri.
Sherateri yeebhurwa na Neri.
28Neri yeebhurwa na Meriki.
Meriki yeebhurwa na Adi.
Adi yeebhurwa na Kosamu.
Kosamu yeebhurwa na Erimadamu.
Erimadamu yeebhurwa na Eri.
29Eri yeebhurwa na Yoshua.
Yoshua yeebhurwa na Eriejeri.
Eriejeri yeebhurwa na Yorimu.
Yorimu yeebhurwa na Matati.
Matati yeebhurwa na Raawi.
30Raawi yeebhurwa na Simeoni.
Simeoni yeebhurwa na Yuda.
Yuda yeebhurwa na Yusufu.
Yusufu yeebhurwa na Yonamu.
Yonamu yeebhurwa na Eriakimu.
31Eriakimu yeebhurwa na Merea.
Merea yeebhurwa na Mena.
Mena yeebhurwa na Matata.
Matata yeebhurwa na Natani.
Natani yeebhurwa na Daudi.
32Daudi yeebhurwa na Yeese.
Yeese yeebhurwa na Obhedi.
Obhedi yeebhurwa na Bhoaji.
Bhoaji yeebhurwa na Sarumoni.
Sarumoni yeebhurwa na Nashoni.
33Nashoni yeebhurwa na Aminadabhu.
Aminadabhu yeebhurwa na Adimini.#3:33a Adimini. Amangʼoore agandi ga akare aga Ekiyunani garagamba ega, Aramu.
Adimini yeebhurwa na Arini.#3:33b Arini. Amangʼoore agandi ga akare aga Ekiyunani gataana eringʼana rinu.
Arini yeebhurwa na Hejironi.
Hejironi yeebhurwa na Peresi.
Peresi yeebhurwa na Yuda.
34Yuda yeebhurwa na Yakobho.
Yakobho yeebhurwa na Esaaka.
Esaaka yeebhurwa na Abhurahamu.
Abhurahamu yeebhurwa na Teera.
Teera yeebhurwa na Nahoori.
35Nahoori yeebhurwa na Serugi.
Serugi yeebhurwa na Rehu.
Rehu yeebhurwa na Peregi.
Peregi yeebhurwa na Ebheri.
Ebheri yeebhurwa na Shera.
36Shera, yeebhurwa na Kainani.
Kainani yeebhurwa na Arufakisadi.
Arufakisadi yeebhurwa na Shemu.
Shemu yeebhurwa na Nuhu.
Nuhu yeebhurwa na Rameki.
37Rameki yeebhurwa na Metuseera.
Metuseera yeebhurwa na Enoki.
Enoki yeebhurwa na Yaredi.
Yaredi yeebhurwa na Maharareri.
Maharareri yeebhurwa na Kainani.
38Kainani yeebhurwa na Enoshi.
Enoshi yeebhurwa na Seeti.
Seeti yeebhurwa na Adamu.
Na Adamu yaabhumbwa na Waryubha.
Currently Selected:
Ruuka 3: Kabwa
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.
