Pianciilna 30
30
1Ahihang Rachel in Jacob taw ta khat zongh nei ngawl hi, tua ahikom ama in a suapuinu Leah eangin Jacob tungah, “Ta hong pia tan tua ahibuale ka thi tu hi,” ci hi.
2Rachel tungah Jacob thin uuk a, “Pathian dinmun ka la thei buatu hi. Ta nei tu hong khak pa sia ama hi,” ci hi.
3Ama in, “Hi lai ah, ka silanu Bilhah om hi; ama taw lumkhawm lete kei atu in ta nei thei tu hi. Hi bangin kei sia ama tungtawnin nu khat ka suak thei tu hi,” ci hi. 4Tua ahiciang ama in a pasal tungah Bilhah pia a, a pasal in ama ompui hi. 5Bilhah ngai in Jacob taw tapa khat nei hi. 6Rachel in, “Pathian in thukhen a, maipha hong pia hi. Ama in ka thungetna hong za in tapa khat hong pia hi,” ci a, tua ahiciang a min Dan phuak hi. 7Bilhah ngai kikin, Jacob taw tapa a niina nei hi. 8Rachel in, “Haksa takin ka suapuinu ka do a, ahizong keima in ka zo zo hi,” ci a tua ahiciang a min Naphtali phuak hi.
9Leah in a tatawp hunlam a kiheak ciang, a sila nu Zilpah sia Jacob ii zi tu in pia hi. 10Tuasia ciang Zilpah in Jacob taw tapa khat nei hi. 11Leah in, “Ka kaampha zo hi,” ci a, tua ahiciang a min Gad phuak hi. 12Zilpah in Jacob taw tapa dang khat nei hi. 13Leah in, “Bangza in ka lungdam ziam! Tu in, numeite in a lungdam nu hong ci tu hi,” ci a, tua ahiciang a min Asher phuak hi.
14Zungtaang laak hun laitakin Reuben sia lo sungah pai a, mandrake ai ngate #30:14 mandrake: Ta nei thei natu in dei-ai bangin a kizangh thingnga nam khat mu in a nu Leah puak hi. Rachel in Leah tungah, “Hesuakna taw na tapa ii mandrake ai ngate tawm hong pia ta'n,” ci hi.
15Leah in, “Ka pasal nong laaksak sia pha zo ngawl ziam? Tu in ka tapa ii mandrake ai ngate ngawngawn laaksak nong sawm lai hi,” ci in zo hi. Rachel in, “Na tapa ii mandrake ai ngate nong pia le, tu zan Jacob taw lumkhawm thei tu ni hi,” ci hi.
16Nitakin lo pan Jacob hong cia ciang, Jacob taw kimu tu in Leah pai a, “Tu zan kei kung hong lum tu ni hi, banghang ziam cile ka tapa ii mandrake ai ngate taw nang kong thapsa hi,” ci hi. Tua ahikom tua zanin Jacob le Leah omkhawm hi.
17Pathian in Leah ii thungetna zo a, ama ngai in Jacob taw tapa a ngana nei hi. 18Leah in, “Ka silanu ka pasal pia ka hikom Pathian in keima thaman hong pia zo hi,” ci a, tua ahiciang a tapa min Issachar phuak hi. 19Leah ngai kik a, Jacob taw tapa a lukna nei hi. 20Ama in, “Pathian in letsong pha khat hong pia zo hi. Tu in ka pasal in kei hong saang tu hi, banghang ziam cile ama atu in tapa luk ka neisak zo hi,” ci a, tua ahiciang a min Zebulun phuak hi. 21Tua zawkin ta numei khat nei a, ama in a min Dinah phuak hi.
22Tua zawkciang Pathian in Rachel phawk hi; ama ii thungetna zo in, ta nei thei tu in siam hi. 23Rachel ngai in tapa khat nei hi. Ama in, “Pathian in tapa khat hong piakna taw ka maizumna teng bosak zo hi. 24Topa in tapa dang khat hong pia lai tahen,” ci a, tua ahiciang a min Joseph phuak hi.
Jacob ii Laban taw Thu A kinialna
25Joseph a sua zawkciang Jacob in Laban tungah, “Ka inn ah a cia kik tu in hong paisak ta'n. 26Nang atu naseamin kong thalawsa ka zite le ka tate hong pia ta'n, cia tu khi hi. Pha takpi na kong sepsak na he hi,” ci hi.
27Laban in ama tungah, “Thu hong son tong: Topa in nang hangin kei thupha hong piak hunlam mukholna nei in, ka he zo hi. 28Na thaman hong son lete kong pia tu hi,” ci hi.
29Jacob in, “Na na kong sepsakna thu le keima sep sungin na nganhonte a pun mama na thu na he hi. 30Kei kong thet ma in nganno tawm bek na nei hi, tu in tam mama in khang hi. Ka va ka ciana po ah Topa in nang thupha hong pia zo hi. Tu in keima phattuam natu ka ngaisut tu hun zo hi,” ci in zo hi.
31Laban in, “Bang hong pia tu khi ziam?” ci in dongh hi. Jacob in, “Thaman bangma dei bong. Hi ka ngaisutna bang na thukim le na nganhonte ka cing lai tu hi: 32Tuni in na nganhon theampo sungah hong paisak ta'n a, tuu a vom teng, kealno a ngial teng ahibuale a pawl teng hong theisak ta'n. Tua teng ka thaman tu in dei khi hi. 33Ka thumaanna sia mai sangah ol takin hong mu thei tu ni hi. Ka thamante sit tu in nong pai ciang kealte sung pan a pawl ngawl, a ngial ngawl khat, tuute sung pan a vom ngawl khat pawpo ka nei le ka nguk ahi hunlam he tu ni hi,” ci in zo hi.
34Laban in, “Thukim ing. Nangma ci bangin ih vawt tu hi,” ci in zo hi. 35Ahizong tua ni in Laban in kealtal a ngial, a pawl teng le kealnu a ngial, a pawl ahibuale a kaang kihel teng khenkhia hi; tuu vom teng zongh khentuam hi. Ama in, tua teng a tapate kep tu in koi a, 36tua zawkciang, Jacob kung pan ni thum paina munah hi nganhon teng paipui hi. Jacob in Laban ii nganno a taanglai teng keam hi.
37Jacob in hiang, thuangthi le pakngiam kungte pan a baak hingte saatin, a haw tawm ngiam a, a pawlin vawtin, a kaang ngialte kimusak hi. 38Ama in tua thingbaakte sia nganhonte ii mai, a tui neakna kuangte ii kungah koisak hi. Ama in tua munah thingbaak pawlte banghangin koi ziam cile ngannote tui ne tu in hong pai ciang a nu le a pa omkhopna mun ahihang hi. 39Tua ahikom, kealte tua thingbaak pawlte mai ah omkhawm a, no a nei uh ciang a ngial, a pawl veu piang uh hi.
40Jacob in tuute le kealte khenin tuam koi a, Laban ii nganno a ngial le a vom honte omna sang maingatsak hi. Hi bangin ama in a ngannote pungtosakin Laban ii ngannote taw kihelsak ngawl hi.
41Nganno ciidamte tua thingbaakte sungah a omkhop ciang, a no a pawlte a nei thei natu in thingbaak pawlte sia a maingatna uh tuikuang kungah Jacob in koi hi. 42Ahizong ama in tua thingbaakte sia nganno thazawmte mai ah koi ngawl hi. Hai ngawlin nganno thazawm teng Laban neisa suak a, nganno ciidam teng Jacob neisa suak hi. 43Hi bangin Jacob sia a hau mama suak hi. Ama in nganhonte, silate, kalaohte le laate tam mama nei hi.
Currently Selected:
Pianciilna 30: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
