Pianciilna 31
31
Laban kung pan Jacob Tai
1Laban tapate in, “Ih pa ii neisa theampo Jacob in la siat hi. A hauna theampo sia ih pa ii neisa tungtawnin a nga hi,” a cina thu Jacob in za hi. 2Nidang bang a Laban ii a pawlvawt nawn ngawlna thu zongh Jacob in mu hi. 3Tuasia ciang, Topa in ama tungah, “Na beete kung le na pate ii ngam le lei zuan kik in. Nang taw kong omkhawm tu hi,” ci hi.
4Tua ahikom Jacob in a tuute omna lo sungah ama taw kimu tu in, Rachel le Leah kam vaitha hi. 5Ama in a zite tungah, “Na pa ii nidang lai hong pawlvawt ngei bang ahi nawn ngawlna thu ka he hi; ahizong ka pa ii Pathian in kei hong ompui hi. 6Ka tha neiza taw na pa ii na ka sep sia na heak uh hi. 7Ahizong ama in kei hong theamin ka thamante sawmvei hong khealsak zo hi. Ka tungah siatna hong vawt tu sia Pathian in oai ngawl hi. 8Laban in, ‘Keal a pawl iim-iam teng na thaman tu hi,’ hong ci ciang nganno theampo a pawl iim-iam in piang hi. Ama in, ‘Keal a ngial teng na thaman tu hi,’ hong ci ciang nganno theampo a ngialin piang hi. 9Pathian in na pa kung pan ngannote la a, kei hong pia hi.
10“Ngannote a ta nei tu hunin, mang khat ka man a kealpuite sia kealtal a ngial, a pawl te taw omkhawmin ka mu hi. 11Pathian vantunglalang in ka mang sungah hong paupui in, ‘Jacob!’ hong ci a, ‘Om khi hi,’ ci in ka zo hi. 12Tuaciang ama in, ‘En in’ kealpuite a ompui kealtalte sia a ngial, a pawl vive hi. Hi bang a piang tu in, keima vawt hi, banghang ziam cile nang tungah Laban ii hong vawtna teng ka mu zo hi. 13Keima in Bethel ah nang tung a hong kilangh Pathian ka hi hi, tua munah nong phaw tawntung natu khansuang phutin olive thau na buak a, aapna nei in kei tungah kiciamna khat na vawt hi. Tu in kithoai in a, na pianna ngam le lei zuan kik in’ hong ci hi,” ci hi. #Pian 28:18-22
14Rachel le Leah in Jacob tungah, “Ka pa uh kung pan ka lua tu bangma taang nawn ngawl hi. 15Ama in ko sia ngamdangmite bangin hong vawt hi. Ama in ko hong zuak a, hong kileina sum teng zongh zangh siat zo hi. 16Ka pa uh kung pan Pathian ii a laak sa hi nei le lamh theampo sia ko le ka tate aa ahi hi. Pathian hong sawl pawpo seam in,” ci in zo uh hi.
17-18Tua ahiciang Jacob sia Canaan ngam a pa kung zuan kik tu in kithoai hi. Ama in a tate le a zite, kalaohte tungah tosak hi, Mesopotamia ngam pan a nga na theampo taw a nganno theampo a mai ah hawl hi. 19Laban sia a tuute mul meet tu in pai a, ama om ngawl lanin Rachel in a pa ii neisa innkuan pathian milimte nguksak hi. 20Jacob in Laban theam a, a cia natu vai hesak ngawl hi. 21Ama in a neisa theampo la in paisan vingveng hi. Ama in Eupharates ngun kaantan in, Gilead mualtung ngam sang manaw hi.
Laban in Jacob Del
22Jacob taina thu ni thum zawkciang Laban tungah kison hi. 23Ama in a mite samin a mite taw Gilead ngam mual tungah Jacob a phak dong ni sali sung del uh hi. 24Tua zanin Laban mang sungah Pathian kilangh in Laban tungah “Bangbang po ahizong Jacob na lauthawn ngawl natu in kidawm ta'n,” ci hi. 25Jacob sia mual tungah ngiaphual saat a, Laban sia a mipuite taw Gilead mualtung ngam sungah ngiaphual saat hi.
26Laban in Jacob tungah, “Banghangin hong theam a, ngal sungah ngalmat numeite bangin ka tanute taipui ni ziam? 27Kei hong theam a, kei hong son ngawlin banghang ngelku ni ziam? Hong son hi lete lungdam in lasa a, daalkual khuangnote, tengtongh tumin hong tha tu khu hi. 28Ka tute le ka tanute mangpha thaakin, nong namhsak beak bua hi. Tua in a mawmawthuai ngamtatna ahi hi! 29Nang kong vawtsiat thei natu in tha nei khi hi, ahizong tu zanin na pa ii Pathian in bangbang po ahizong nang kong lauthawn ngawl natu in kidop tu thu hong pia hi. 30Hi bang nong nusiat sia na inn na thet kik tu thintoi mama na hina kong he hi, ahizong ka innkuan pathian milimte banghang ngu nu ziam?” ci hi.
31Jacob in, “Kei kung pan na tanute nong lee kik tu ka lau hang hi. 32Ahizong na pathian milimte hi sung khat pawpo tungah na mu le ama kithatlum tu hi. Hi lai ah ih mite sia ih tetti tu hi, zong in a, nangma neisa pawpo la in,” ci in zo hi. Laban ii pathian milimte Rachel nguk hunlam Jacob in he ngawl hi.
33Laban pai in, Jacob puanbuk sung zong hi; tua zawkciang Leah puanbuk sung le sila numei niite puanbuk sung teng zong a, ahizong a pathian milimte mu ngawl hi. Tuasia ciang Rachel puanbuk sungah pai hi. 34Rachel in innkuan milimte ngu a, kalaoh tung tona ip sungah koi in topha hi. Laban in buk sung bup zong a, ahizong mu ngawl hi. 35Rachel in a pa tungah, “Na mai ah hong ding thei ngawl ka hikom topa awng, thin uuk heak in; numei ngeina ka nei laitak hi,” ci hi. Laban in zong a, ahihang a innkuan milimte mu ngawl hi.
36Tuaciang Jacob a thin uuk hi. “A bang khialna lian vawt khi ziam?” ci a, thin uuk tatakin dongh hi. “A bang thukham ka palsat hu in, bang thu nga a, hong zuizen thei ni ziam? 37Tu in ka vanh nei theampo tok siat zo ni hi, na neisa na innkuan vanh bang mu ni ziam? Tuasia, hi lai ah na mite le ka mite mu thei tu in hong pusua ta'n, akua maan hi ziam, thukhensak tawng. 38Nangma kungah tu in kum kul sung kong om a; na tuu le na kealte a ciing om ngawl hi, tuaciang na nganhonte sung pan tuutal khat pawpo ka ne bua hi. 39Ngamsate in tuu khat hong matsak simin keima supna vive hi. Kei khialna hi ngawl hi, ci sia a lak tu in na kungah kong paipui ngei bua hi. Sun ahizong zan ahizong a kingute peuma, a taang nong ngen hi. 40Tamvei tatak sun nisa le zan khuadap ka thuak hi. Ka mu thei bua hi. 41Tuabangin kum kul sung tawntung nang kungah kong om hi. Kum sawm le kum li sung na tanute nii — kum luk sung na ngannote ka nga natu in na ka seam hi. Tua zawk ngawngawn in ka thaman sawmvei nong kheal hi. 42Ka pate ii Pathian, Abraham le Isaac ii Pathian in kei taw omkhawm buathong le khut hawm nguakin nong hawlkhia zo tu hi. Ahizong Pathian in ka thinngimna le ka nasepna te mu zo a, tu zanin nang tungah thukhenna hong pia hi.”
Jacob le Laban Thukimna
43Laban in Jacob tungah, “Hi numeite sia ka tanute hi; a tate keima neisa hi, nganhonte keima neisa hi. A tatakin ci leang hi sungah na mu theampo keima neisa hi. Ahizong ka tanute le a tate ka kep natu in bangma ka vawt thei tu om ngawl ahikom 44nang taw thukimna khat vawt tu in ka kinging hi. Ih thukimna phaw kik natu in suangtumte ciang tawng,” ci in zo hi.
45Tua ahiciang Jacob in suangtum khat la a phaw kik natu khansuang in phut hi. 46Jacob in a mite suang pawlkhat khawmsak in ciangto hi. Tuaciang a suang cianna hui ah amate an ne uh hi. 47Laban in Jegar Sahadutha ci in min vaw ahihang Jacob in Galeed ci in min pia hi. 48Laban in Jacob tungah, “Hi ih suangcian sia nang le kei atu in phawk sakna hi tu hi,” ci hi. Tua ahiciang tua mun sia Galeed kina hi. 49Laban zongh in, “Eite khat le khat ih kikhen hangin Topa in ei hong mitsuan tahen,” ci hi. Tua ahikom tua mun zongh Mizpah ci in min phuak hi. 50Laban in, “Ka tanute na vawtsia a, ahibuale numei dang na teenpui le kei kong he bua zong Topa in eite hong en nginge ci in, ciamtee ta'n. 51Hi lai ah ka suang ciante ih kilaklaw ah om hi, hi sungah phawna khansuang om hi. 52Hi suangcian le phawna khansuangte ngeal in ih kiciamnate hong phawksak kikte ahi hi. Nangma hong sim tu in hi suangcian kong kaantan ngei buatu a, nangma zongh in keima hong sim tu in hi suangcian ahibuale hi phawna khansuang nong kaantan ngei buatu hi. 53Abraham ii Pathian le Nahor ii Pathian in eite kilaklaw ah thukhen tu hi,” ci lai hi. Tua zawkciang Jacob in a pa Isaac ii biak Pathian min taw hi kamciamna keamcing tu in ciliap huai takin kiciam hi. 54Ama in ngan khat ngo a, mual tungah sangaw biakpiakna pia in, an ne tu in a mite sam hi. Amate an a neak zawkciang mual tungah zankhuateak om uh hi. 55A zing ciang zingtuung in, Laban in a tute le a tanumeite namhin mangpha thaak a, tuaciang nusia in a inn ah cia hi.
Currently Selected:
Pianciilna 31: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
