Mark 2
2
Jesus in Pasal Pumzaw khat Damsak
(Matthew 9:1-8; Luke 5:17-26)
1Ni tam kihal ngawlin Jesus Capernaum khua ah pai kik hi, tuaciang ama inn ah om hi, ci in kiza hi. 2Tua ahikom mihing tam mama hong kikhawmtua uh a, om natu mun awng zongh om nawn ngawl liangin kongbiang puasia dongin dim uh hi. Jesus in thu a hihil laitakin, 3pasal li hong theng a, Jesus kungah pumzaw pasal khat puak hi. 4Ahizong mihonpite hu in ciina sia Jesus kung tatak a then zo bua uh hi. Tua ahikom amate in Jesus omna san innkhum sulet uh a, pasalpa phah tungah lumsakin, innkhum a sukletna panin khiasuk uh hi. 5Amate in bangza in upna nei ci sia Jesus in a mu ciang, pumzaw pa munah, “Ka tapa awng, na mawnate hong kimaisak zo hi,” ci hi.
6Tua munah a to Thukham hil syate in, 7“Banghangin hi bangin pau ngam ziam? Hisia in Pathian min daisakna hi. Pathian bekma in mawnate maisak thei hi!” ci in ngaisun hi.
8Thakhatin Jesus in amate ngaisutna teng tel ahikom, “Banghang tuabangin ngaisun nu ziam? 9Hi pumzaw pa tungah ‘Na mawnate hong kimaisak zo hi’ cile, ‘Tho in, na phah luakin lampai in,’ ci koisia ol zaw ziam? 10Tua ahibuale Mihing Tapa in leitung mawmaisak theina nei hi, ci in no tungah lak tu khi hi,” ci in pumzaw pa munah, 11“Tho in, na phah luakin cia ta'n, hong ci khi hi!” ci hi.
12Amate mu tangin pasalpa tho a, a phah luakin cia vingveng hi. Amate in lamdang sa mama in, Pathian pok uh hi. “Hi bang peuma mu ngei bua hing!” ci uh hi.
Jesus in Levi Sam
(Matthew 9:9-13; Luke 5:27-32)
13Jesus Galilee tuili hui ah pai kik hi. Mihon khat ama kungah hong pai hi, tuasia ciangin amate thuhil tu in kipan hi. 14A pai kawkawm in, Alphaeus ii tapa Levi kici shiadongpa a zum sungah to in a om mu hi. “Hong zui ta'n” ci hi. Levi zongh ding vangiat in zui hi.
15Tua zawkciang Levi ii inn ah Jesus in an ne hi. Shiadongte honkhat le a dang a kinialnamhte pawlkhat in, Jesus zui a, Jesus le a nungzuite taw an nekhawm uh hi. 16Pharisee a kici Thukham hil syate in, Jesus shiadongte le a kinialnamhte taw an nekhawm in om a mu uh ciangin, “Banghangin ama in mihing tuabangte taw an nekhawm ziam?” ci in dongh uh hi.
17Jesus in amate thu kidok za a, “Mihing ciidamte in syavuan tulmaw ngawl a, ciinate bek in syavuan tulmaw uh hi. Mihing zatakhuaite sam tu in kong pai bua a, a kinialnamhte sam tu in kong pai hi,” ci hi.
An tanna huvau Dokna
(Matthew 9:14-17; Luke 5:33-39)
18Hun khat lai in, Tuiphumpa John ii nungzuite le Phariseete an tang uh hi. Mihing pawlkhat Jesus kungah hong pai a, “Banghangin Tuiphumpa John nungzuite le Phariseete nungzuite in an tang a, na nungzuite in, banghangin an tang ngawl ziam?” ci in Jesus dongh uh hi.
19Jesus in, “Mopoai an kivaakna sungah leangnate in an ne ngawlin om tu na um uh ziam? Om ngawl tu hi! Zineipa sia amate taw a omkhop laiteng amate in tuabang a ngamta buatu hi. 20Ahihang ni khat ni ciangin zineipa sia amate kung pan hong kila tu a, tuasia ciangin an tang tu hi,” ci in zo kik hi.
21“Kuama in puan lui ek sa sia puan thak taw phaw ngeingawl hi, banghang ziam cile puan thak sia a ton ciangin a lui sia ekkeak tu a, a vang zaisak seseam tu hi. 22Tuasia bangma savun thawl lui sungah sapittui thak kuama in thaal ngeingawl hi, banghang ziam cile sapittui thak sia in savun thawl lui sia saantham tu a, a sapittui le a thawl lalcip tu hi. Sapittui thak sia savun thawl thak sungah thaal tu hi zaw hi,” ci hi.
Sabbath huvau Dokna
(Matthew 12:1-8; Luke 6:1-5)
23Jesus sia Sabbath ni khat zungtaang lo pawlkhat kaantan in pai hi. A nungzuite zongh ama taw kithawl a, zungtaang huite hiat tu in kipan uh hi.#Thkna 23:25 24Tuasia ciang Phariseete in Jesus munah, “En in, Sabbath ni na nungzuite ii zia bang a ngamtat tu sia ih thukham in khaam hi,” ci uh hi.
25Jesus in, “David in bang khat po a neak tu a kisap mama hun laitakin, a ngamtatna sim ngeingawl nu ziam? Ama le a mite a ngilkial hi.#1 Sa 21:1-6 26Tua ahikom Pathian inn sungah tumin Pathian a kipiasa anluum ne hi. Tua hun laitak sia Abiathar in Thiampi Lianbel a sep laitak hi. Ih Thukham bangin ci leang thiampite bek in hi anluum a neak thei natu ahi hi, ahihang David in ne a, a mite zongh pia hi,” ci in zo kik hi.#Thiam 24:9
27A thukhupna ah Jesus in, “Sabbath sia mihingte ii phat natu in a kivawt hi a, mihing sia Sabbath atu a kivawt a hi bua hi. 28Tua hi a, Mihing Tapa sia Sabbath ngawngawn ii Topa ahi hi,” ci hi.
Currently Selected:
Mark 2: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016
