Itanguriro 47
47
1Nuko Yosefu aja kwa Farawo, aramubwira ati: “Data n’abavukanyi banje baje bava mu gihugu c’i Kanani. Bazananye n’amasho yabo n’imikuku yabo n’ivyo batunze vyose; ubu bari mu karere ka Gosheni.” 2Yosefu yari yajanye na batanu muri bene se, maze abereka Farawo.
3Farawo abaza bene se ba Yosefu ati: “Umwuga wanyu ni uwuhe?”
Baramwishura bati: “Twebwe abasavyi bawe turi abungere b’ibitungwa, nk’uko ba sogokuruza babikora. 4Twaje kuba hano muri Egiputa igihe gito, kuko ata buragiro bw’imikuku yacu bugisigaye mu gihugu c’i Kanani. Hari amapfa ateye ubwoba. Nuko rero turakwinginze utwemerere, twebwe abasavyi bawe, kuba mu karere ka Gosheni.”
5Farawo abwira Yosefu ati: “Ko so na bene so bagusanze hano, 6igihugu cose ca Egiputa kiri imbere yawe, bahitiremwo aharuta ahandi kuba heza abe ari ho baba. Bareke bibere mu karere ka Gosheni. Kandi muri bo nihaba harimwo abafise ubihanga budasanzwe, ubazeze kuragira imikuku n’amasho vyanje na vyo.”
7Nuko Yosefu azana se Yakobo amwereka Farawo, maze Yakobo ahezagira Farawo. 8Farawo abaza Yakobo ati: “Umaze imyaka ingahe?”
9Yakobo aramwishura ati: “Maze imyaka ijana na mirongo itatu ngendagenda kuri ino si. Imyaka yanje yabaye mike kandi yarangumiye. Sinashikije imyaka ba sogokuruza bamaze bagendagenda kw’isi.” 10Nuko Yakobo yongera guhezagira Farawo, maze arasohoka ava ku kirimba.
11Nuko Yosefu aha se na bene se ahantu harusha ahandi kuba heza muri Egiputa, ahitwa mu karere ka Ramusesi, baba ari ho baba nk’uko Farawo yari yategetse. 12Yosefu aha se, bene se n’imiryango yabo yose ivyokurya, afatiye ku gitigiri c’abana bari bafise.
Amapfa muri Egiputa
13Yamara amapfa yarushiriza gukomera mu gihugu cose, kandi abantu bicwa n’inzara mu gihugu ca Egiputa no mu gihugu c’i Kanani. 14Nuko Yosefu yegeranya amahera yose yavuye mu kudandaza ingano mu gihugu ca Egiputa na Kanani, ayajana mu bubiko bwa Farawo. 15Abantu bo muri Egiputa n’i Kanani batagisigaranye uruhera na rumwe, Abanyegiputa bose baza kwa Yosefu baramubwira bati: “Turakwingize uduhe ivyokurya. Uremeye ko dupfira mu maso yawe? Amahera yacu yose yaheze.”
16Yosefu arabishura ati: “Ko amahera yanyu yaheze, nimuzane imikuku yanyu, nanje ndabahe ivyokurya mu gishingo cayo.” 17Nuko bazanira Yosefu ibitungwa vyabo na we abaha ivyokurya. Mu kibanza c’amafarasi, imikuku y’impene n’intama, amasho y’inka n’indogoba vyabo, Yosefu abaha ivyokurya vyo kubamaza umwaka.
18Uwo mwaka uheze, bagaruka mu wukurikira baramubwira bati: “Nyakwubahwa, ntidushobora kuguhisha ukuri. Amahera yacu yaraheze, kandi amasho yacu n’imikuku vyacu ubu ni ivyawe. Nta co dusigaranye twotanga atari imibiri yacu n’amatongo yacu. 19None tugupfire mu maso, twebwe n’amatongo yacu? Tugure twebwe n’amatongo yacu, hanyuma uduhe ivyokurya. Twebwe n’amatongo yacu duhisemwo kuba abagurano ba Farawo. Twebwe duhe ingano gusa kugira ngo tubeho, ntidupfe; kandi amatongo ntahinduke ubugaragwa.”
20Nuko Yosefu agurira Farawo amatongo yose yo muri Egiputa. Abanyegiputa bamugurishako amatongo yabo yose kuko amapfa yari abarembeje. Maze amatongo yose aba aya Farawo. 21Abantu na bo abagira abagurano biwe, kuva ku ruhande rumwe rwa Egiputa gushika ku rundi. 22Itongo ryonyene ataguze ryari itongo ry’abaherezi. Bari basanzwe baronka ivyo kubafasha bahabwa na Farawo, kandi baronka ivyokurya bikwiye bivuye muri iyo mfashanyo ya Farawo, ni co gituma batagurishije itongo ryabo.
23Maze Yosefu abwira abantu ati: “Murabona ko uno musi nabaguze mwebwe n’amatongo yanyu. Ngira ndabahe rero imbuto kugira ngo mushobore gutera imirima yanyu. 24Iyimbura niryagera, ica gatanu c’umwimbu wanyu muzogiha Farawo. Umwimbu usigaye uzoba uwanyu kugira ngo mushobore gutera imirima yanyu kandi mufungure n’imiryango yanyu n’abana banyu.”
25Baramwishura bati: “Nyakwubahwa, ko watugiriye ubuntu, ukarokora ubuzima bwacu, natwe tuzoba abagurano ba Farawo.”
26Nuko Yosefu aca asohora itegeko, kandi iryo tegeko riracakora gushika n’uno musi mu gihugu ca Egiputa; ko Farawo ategerezwa kuronka ica gatanu c’ivyimbuwe vyose mu gihugu ciwe. Itongo ryahawe abaherezi ni ryo ryonyene ritabaye irya Farawo.
27Ico gihe, Abisirayeli na bo baba mu karere ka Gosheni muri Egiputa. Baharonkera amatongo n’amatungo kandi baragwira baba benshi.
28Yakobo yabaye muri Egiputa imyaka icumi n’indwi; imyaka yose yamaze yabaye ijana na mirongo ine n’indwi. 29Igihe ciwe co gupfa cegereje, Isirayeli atumako umuhungu wiwe Yosefu, aramubwira ati: “Nimba ngiriwe ubuntu mu maso yawe, shira ukuboko kwawe musi y’itako ryanje undahire ko uzonyereka urukundo rudahera n’ubwizigirwa mu gushitsa ico ngusavye: ntuze umpambe muri Egiputa. 30Ninapfa ndakwinginze uze ukure umubiri wanje muri Egiputa, umpambe hamwe na ba sogokuruza.”
Yosefu aramwishura ati: “Nzobikora nk’uko ubivuze.”
31Yakobo aravuga ati: “Ndahira wemeze ko uzobikora uko.” Nuko Yosefu aramurahira, maze Isirayeli arunama asenga Imana yishimikije inkoni yagendesha.
Currently Selected:
Itanguriro 47: BKC
Highlight
Share
Compare
Copy
Want to have your highlights saved across all your devices? Sign up or sign in
Bibiliya mu Kirundi coroshe™
Uburenganzira © 2021, 2025 bwa Biblica, Inc.
Vyakoreshejwe bitangiwe uruhusha.
Uburenganzira bwose kwʼisi yose ni ubwa Biblica.
Kirundi Contemporary Bible™
Copyright © 2021, 2025 by Biblica, Inc.
Used with permission. All rights reserved worldwide.
