GENESIS 14
14
Abram Nih Lot A Chanh
1Shinar ram siangpahrang Amrafel, Ellasar siangpahrang Ariok, Elam siangpahrang Khedorlaomer le Goiim siangpahrang Tidal nih 2siangpahrang a dang panga kha an doh hna, cu hna cu: Sodom siangpahrang Bera, Gomorrah siangpahrang Birsha, Admah siangpahrang Shinab, Zeboiim siangpahrang Shemeber le Bela siangpahrang an si (Bela cu Zoar a si). 3Hi siangpahrang panga hi hmunkhat ah an ṭangṭi i Siddim nelrawn ah khan an ralkap cu an pumh hna; Siddim nelrawn cu atu i Rili Thi timi khi a si. 4Khedorlaomer kut tangah khan kum hleihnih an rak um i a kum hleithumnak ah amah kha an doh. 5A kum hleili kum ah Khedorlaomer le amah he a ṭangṭimi hna kha an ralkap he an ra ciammam i Refaim mi kha Ashteroth Karnaim ah, Zuzim mi kha Ham ah, Emim mi kha Kiriathaim nelrawn ah, 6Hormi kha Seir tlang ah an tei hna i thetse rawn kam i a ummi Elparan khua tiang an dawi hna. 7Cun an hun i mer i Kadesh ah khan an hung kir i Amelek mi hna ram vialte le Hazazontamar i a ummi Amor mi kha an tei hna (Kadesh cu Biaceihnak Cerhti ti zongah ti a si).
8Cun Sodom siangpahrang, Gomorrah siangpahrang Admah siangpahrang, Zeboiim siangpahrang le Bela siangpahrang nih (Bela cu Zoar a si), 9Elam siangpahrang Khedorlaomer le Goiim siangpahrang Tidal le Shinar siangpahrang Amrafel le Ellasar siangpahrang Ariok doh awkah Siddim nelrawn ah an ralkapbu cu a hunpi hna, khatlei ah panga le khatlei ah pali an si. 10Siddim nelrawn cu bitumen an cawhnak khor in a khat i cucaah Sodom siangpahrang le Gomorrah siangpahrang kha raltuknak hmun cun zam an i timh tikah cu khor chungah cun an tla. A dang cu tlang ah khan an zam. 11Siangpahrang pali hna nih cun Sodom le Gomorrah i a ummi thil vialte kha, rawl vialte he an i lak i an kal. 12Lot zong cu Sodom i a um caah a ngeihmi thil vialte he an kalpi ve.
13Sihmanhsehlaw a luat sualmi pakhat nih Hebru mi Abram cu cu kong cu a chimh. Abram cu Mamre thingzarh pawng i khua a sami a si, Mamre cu Eshkol le Aner hna u kha a si i hi hna hi Abram he ṭangṭi an si. 14Abram nih a rualchan an tlaih ti kha a theih tikah a riahhmun i a ummi a minung hna lak i zumhawktlak a timi minung za thum le hlei riat kha a kawh hna i siangpahrang hna cu Dan khua tiang an dawi hna. 15A mi cu bu hnih ah a ṭhen hna i zan ah an tuk hna i an tei hna. Damaskas khua chaklei i a ummi Hobah tiang an dawi hna i 16an thilri vialte kha an chuh ṭhan dih hna. A rualchan Lot le a chawva vialte zong kha a kirpi ṭhan hna, nu hna le mi dang zong an i tel.
Melkhizedek Nih Abram Thluachuah A Pek
(Heb 7.1-2)
17Abram cu Khedorlaomer le amah sinah a ṭangmi siangpahrang hna a va tei hnanak in a ra kir tikah, Sodom siangpahrang nih khan Shaveh nelrawn an timi in a rak don, (Shaveh nelrawn cu siangpahrang Nelrawn ti zongah ti a si). 18Cun Salem Siangpahrang Melkhizedek, Cung Nung Bik Pathian tlangbawi zong a simi nih khan Abram cu changreu le mitsur zu a rak phorh i #Heb 7.1-10 19thluachuah a pek i:
“Van le vawlei a sertu
Cung Nung Bik Pathian nih
Abram cu thluachuah in pe seh.
20Na ral an teitertu
Cung Nung Bik Pathian cu thangṭhat si ko seh,” a ti. Cun Abram nih hranchaw a lakmi vialte cheuhra cheukhat a pek.
21Cun Sodom siangpahrang nih Abram cu a thawh i, “Ka minung hna dah ti lo cu, na lakmi thil paohpaoh kha an dihlak in nangmah nih i chiah ko hna,” a ti. 22Sihmanhsehlaw Abram nih cun a leh i, “Van le vawlei a sertu Cung Nung Bik Pathian hmaiah chiatser tein bia kaa kam i, 23na thil a simi paohpaoh, la fang pakhat le phanah hri tiangin zeihmanh kaa lak lai lo, ka ti. Cucaah cun nang zong nih zeitikhmanh ah, “Abram cu keimah nih pei ka rumter ko cu,” na ti kho ve lai lo. 24Zeihmanh keimah caah kaa lak lai lo. Ka mi hna nih an hman cangmi thil hna le ka sin ṭang hna nih an hmuhtin awk a si vemi thil lawnglawng kha ka cohlan hna lai; Aner, Eshkol le Mamre nih khan an covo cu an i lak ve lai,” a ti.
Currently Selected:
GENESIS 14: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
