LUKA 1
1
1Theofilas Bawipa,
Mi tampi nih kan lak i thil a cangmi kong hi an thiam khawh chungin ṭial an rak i zuam cio. 2Cu an ṭialmi cu a hramthawk lio i an mit in a rak hmumi hna nih an kan chimhmi le hi bia a rak chimtu hna nih an rak chimning khan a si. 3Cucaah Bawipa, kei zong nih hi thil vialte hi a hramthawk tein ṭha tein ka dothlat cikcek hnuah na sinah aa tlai thliahmah in ṭial ah a ṭha tiah ka ruah. 4A chimh zong an in chimh len cangmi kong biatak kha a ningcang tein na hngalh khawh nakhnga, tiin hi ca hi kan kuat.
Tipil Petu Johan Hrinnak
5Herod kha Judea Siangpahrang a si lioah, Abijah tlangbawi phu chungah aa telmi tlangbawi pakhat a min Zekhariah an timi kha a rak um. A nupi min cu Elizabeth a si i amah zong cu tlangbawi hrinthlak a si ve. #1Cha 24.10 6An pahnih in Pathian hmaiah nuncan ṭha in a nung i Bawipa nawlbia vialte le phunglam vialte tlamtling tein a zulmi an si. 7Elizabeth cu a cin caah fa pakhat hmanh an ngei lo. An pahnih in an tar ngaingai cang.
8Ni khat cu Zekhariah kha, nifate an rianṭuannak ah a caan a hung phan ve i Pathian hmaiah khan tlangbawi rian cu a ṭuan. 9Tlangbawi hna nih an zulhmi phungning in, biakṭheng cung i rimhmui khangh awkah khan amah cu camcawhfung zuh in an thim. Cucaah Bawipa Biakinn chungah khan a vung lut. 10Cu caan cu rimhmui khangh lio i mi zapi Biakinn leng i thla an cam caan kha a si. 11A sinah Bawipa vancungmi pakhat a rung lang i rimhmui an khanghnak biakṭheng orhlei kamah khan a dir. 12Amah cu Zekhariah nih khan a hmuh tikah a lau i a thin a phang. 13Sihmanhsehlaw vancungmi nih cun a thawh i, “Zekhariah, na thinphang hlah! Pathian nih na thlacamnak kha a theih i na nupi Elizabeth nih fapa an hrinpiak lai. A min ah Johan na sak lai. 14Amah cu a chuah tikah naa lawm hringhran lai i midang tampi zong an i lawm ngaingai ve lai. 15Zeicahtiah amah cu Bawipa hmaiah mi ngan a si lai. Zu siseh, zureu siseh, zeihmanh a ding lai lo. A chuahka hrimhrim in Thiang Thlarau in a khat lai; #Nam 6.3 16Israel mi mi tampi kha Bawipa an Pathian sinah a kirpi ṭhan hna lai. 17Amah cu Pathian thlahmi lamkaltu a si lai i profet Elijah bantukin a fekmi le a ṭhawngmi a si lai. Pale hna le fale hna kha hmunkhat ah a fonh ṭhan hna lai i nawl a ngai lomi hna kha miding mi hna ruahnak lam leiah a hruai ṭhan hna lai. Bawipa mi hna cu Bawipa ca i aa tlakmi minung si awkah a rak timh hna lai,” tiah a ti. #Mal 4.5-6
18Zekhariah nih vancungmi cu a thawh i, “Cucu a si kho lai tiah zeitindah ka zumh khawh lai? Zeicahtiah kei cu ka tar cang i ka nupi zong a tar ve fawn,” tiah a ti. 19Vancungmi nih cun a leh i, “Kei cu Gabriel, hi thawngṭha nangmah chimh awkah a ka thlahtu Pathian hmai i a dirmi cu ka si. #Dan 8.16; 9.21 20Ka bia cu na ka zum lo, asinain a caan a phak tikah cun a tling ṭhiamṭhiam te ko lai. Na zumh lo caah holh kho loin na um lai i kan chimhmi thil kha a tlin ni a phak hlantiang bia pakhat hmanh na chim kho lai lo,” tiah a ti.
21Cu chung cu zapi nih khan Zekhariah cu an rak hngah ko i zeicahdah Biakinn chungah cu cancan cu a rauh hnga, tiah an khuaruah a har. 22A hung chuah tikah a chawn kho hna lo — cucaah Biakinn chungah langhnak a hmu ti kha an hngalh. A kut in hmelchunhnak kha a tuah i cuticun a chawnh hna, bia pakhat hmanh a chim kho lo.
23Biakinn chung i a rianṭuannak caan kha a dih tikah Zekhariah cu inn ah a ṭin. 24Cu hnu tlawmpal ah cun a nupi Elizabeth cu nau kha a hun pawi i thla nga chung leng chuak loin a um. 25A thawh i, “Atu cu a donghnak ah Bawipa nih hi tlukin maw a ka bawmh! Zapi hmai i ka ningzahnak cu a ka lakpiak cang,” tiah a ti.
Jesuh Hrinnak Kong
26Elizabeth pumlawnglo in a um thla ruknak ah, Pathian nih vancungmi Gabriel cu Galilee ram khua pakhat Nazareth timi ah cun a thlah. 27Siangpahrang David hrinsor a simipa Josef an timi he kan i ṭhi lai tiah bia aa kammi ngaknu kha bia na va chimh lai tiah a fial. Cu ngaknu cu a min ah Mary a si. #Mat 1.18 28Vancungmi kha a sinah cun a ra i. “Na cungah daihnak um ko seh. Bawipa cu na sinah a um i thluachuahnak tam piin an pek,” tiah a ti. 29Vancungmi bia kha a theih tikah Mary cu a lau ngaingai i a bia kha a sullam zeidah a si hnga tiah a khuaruah a har. 30Vancungmi nih cun a thawh i, “Mary, na thinphang hlah. Zeicahtiah Pathian nih nangmah cu vel an ngeih. 31Nau na pawi lai i fapa na hrin lai i a min ah Jesuh na sak lai. #Mat 1.21 32Amah cu milian mingan a si lai i Cungnung Bik Pathian fapa tiah ti a si lai. Amah a hringsortu Siangpahrang David bawiṭhutdan kha Pathian nih amah cu a pek i #2Sam 7.12,13,16; Isa 9.7 33Jakob tefa hna siangpahrang zungzal in a si lai, a pennak cu zeitikhmanh ah a dong lai lo,” tiah a ti.
34Mary nih vancungmi cu a thawh i, “Ngaknu thiang ka si ṭung, zeitindah hihi cu a si khawh lai?” tiah a ti. 35Vancungmi nih cun a leh i, “Thiang Thlarau kha na cungah a phan lai i Pathian ṭhawnnak cu na cungah aa fu lai. Hi ruangah hin a thiangmi fa cu Pathian Fapa tiah ti a si lai. 36Hi hleiah na rualchan Elizabeth kha a tar leiah fa a pawi i a cing ti i rak ti tawnmi kha atu hi a thla ruknak a si cang, 37zeicahtiah Pathian nih a tuah khawh lomi thil zeihmanh a um lo,” tiah a ti. #Gen 18.14
38Mary nih a thawh i, “Kei cu Bawipa salnu ka si ko, na chim bang cun ka cungah si ko seh,” tiah a ti i vancungmi nih cun a kaltak.
Mary Cu Elizabeth A Tlawng
39Cu hnu tlawmpal ah Mary cu aa tim i Judah tlangram i a ummi khua pakhat ah khan khulrang in a hung kal. 40Zekhariah inn ah khan a vung lut i Elizabeth cu a vun biak. 41Elizabeth nih Mary i a vun chawnhnak bia kha a theih tikah a paw chung i a fate cu a rak cawl. Elizabeth cu Thiang Thlarau in a khat i, 42aw thangpi in, “Nangmah cu nu vialte lakah thluachuak bik nu na si. Na hrin laimi na fa zong hi fa thluachuak a si. 43Zeicahdah ka Bawipa nu nih hin kei tehna hi na hung ka tlawn? 44Na ka biakchawnhnak ka theih cangka khan pei ka chung i ka fate cu lunglawmhnak in aa hlawh len cu. 45Bawipa bia na sinah a rami kha a tling taktak lai ti zumh cu na caah lunglawmh awk a va si hringhran dah,” tiah a ti.
Mary Sakmi Thangṭhatnak Hla
46Mary nih aa thawh i:
“Thanh tuah, ka lungthin, Bawipa lianhngannak cu. #1Sam 2.1-10
47I lawm tuah, ka nunnak,
Bawipa na khamhtu cungah;
48A salnu hi hi tluk minauta
ka si nain a ka philh lo.
Nihin thawk in hmailei ah cun
mi vialte nih thluachuaknu
an ka ti lai; #1Sam 1.11
49Bawipa, a ṭhawngmi Pathian nih
ka cungah khuaruahhar tuk in
rian a ṭuan.
A min cu a thiang;
50Amah a ṭihmi vialte kha
chan khat hnu chan khat in
a zaangfah hna.
51A ṭhawngmi a ban kha a samh i
miruamkai hna kha
an khuakhanmi he a ṭhek dih hna.
52Siangpahrang ṭhawngṭhawng kha
an bawiṭhutdan cungin a ṭhumh hna i
Minauta kha a cawi hna. #Job 5.11; 12.19
53Rawl a ṭammi kha thil ṭhaṭha in
a khimter hna i
Mirum kha kut lawngin
a kalter hna.
54Kan pupa hna sinah a rak sermi
biakamnak kha a zulh hna;
A sal Israel kha bawmh awkah
a ra i
55Abraham le a tefa vialte hna sinah
zungzal in zaangfahnak langhter
ding kha a philh lo,” tiah a ti. #Gen 17.7
56Mary cu thla thum tluk Elizabeth sinah khan a um i cun inn ah a tlung ṭhan.
Tipil Petu Johan Hrinnak Kong
57Elizabeth cu a nithla a hung tling i fapate a hrin. 58Bawipa cu zeitluk in dah a cungah a ṭhat ti kha a innpa hna le a rualchan hna nih an theih tikah amah tluk te cun an dihlak in an i lawm.
59Ngakchiate cu zarh khat a hung ti ah khin a cuarpar tan awkah an kalpi; annih nih a pa min Zekhariah in kan auh lai, tiah an ti. #Lev 12.3 60Sihmanhsehlaw a nu nih khan, “Asilo, a min cu Johan a si lai,” tiah a ti. 61Annih nih amah cu an thawh i, “Nan sahlawh nan rualchan lakah cu min a ngeimi pakhat hmanh an um ṭung lo,” tiah an ti. 62Cun a pa kha kut zaoh in an chawnh i ngakchiapa kha a min zeidah sak na duh, tiah an hal. 63Zekhariah nih cun caṭialnak catlap a hal hna i, “A min cu Johan a si,” tiah a ṭial. 64Cu cangka cun Zekhariah cu a holh kho ṭhan i Pathian kha a hun thangṭhat. 65A innpa hna cu an khuaruah a har i hi thil kong cu Judea ram tlang cung vialte ah khan a thang dih. 66A theimi paoh kha an lung a suk hna i. “Hi fa hi zei ko dah a can te lai?” tiah an ti cio. Zeicahtiah Bawipa ṭhawnnak cu a cung i a um kha a fiang ko.
Zekhariah Chimmi Bia
67A pa Zekhariah cu Thiang Thlarau in a khat i, Pathian bia kha a chim:
68“Bawipa, Israel Pathian cu thangṭhat u sih.
A mi hna bawmh awkah a ra cang i
a luatter cang hna.
69Kan caah a ṭhawngmi Khamhtu kha
a chuahter cang.
Amah cu a sal David tefa kha a si.
70Hlanliopi ah a profet thiang hna sinin,
71‘Kan ral hna kut chungin le
kanmah a kan huatu vialte
hna sin khan,
khamh awkah bia a kan kam.
72Kan pupa hna cu, nan cungah
zaangfahnak ka ngei lai, a ti hna i
a thiangmi a biakamnak kha
ka philh lo,’ tiah a ti hna.
73-74Kan ral hna kut chungin
luatter awkah le
Amah cu ṭihnak um loin a rian
kan ṭuan nakhnga,
Kan pu Abraham sinah chiatser in
bia aa kam i
75cucu kan nunchung vialte,
amah hmaiah thianghlim le ding tein
kan um nakhnga caah a si.
76Nang, ka fa, nangmah hi
Cungnung Bik
Pathian profet tiah ti na si lai;
Amah lam kha rak sersiam chung awkah
Bawipa hmaiah cun na rak kal chung lai. #Mal 3.1
77A mi hna kha, nan sual ngaihthiam
nan si thawngin khamhnak
nan hmu lai, tiah na chimh hna lai.
78Zeicahtiah, kan Pathian cu
zaangfah thiammi le minunnem
a si:
Khamhnak khuaceu ṭha cu
kan cungah a tlunter lai i
79Thihnak thladem mui lak i a ummi
hna kha vancung in a vun ceuh
hna lai;
Kannih cu daihnak lam ah a kan hruai lai,” tiah a ti. #Isa 9.2
80Ngakchia cu a hung ṭhang i thlarau in a ṭhawngmi a si; Israel mi zapi sinah a hun i langh hlantiang, thetse ram ah cun a um.
Currently Selected:
LUKA 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006
