MARKA 16

Thawhṭhannak

(Mat 28.1-8; Luk 24.1-12; Jhn 20.1-10)

1Sabbath ni kha a dih tikah Mary Magdalin le Jeim nu Mary le Salome nih khan Jesuh ruak thuh awk caah cun zihmui kha an i cawk. 2Zarhpi Ni zingkate, nichuah kate ah khin, thlan ah cun an va kal. 3Lam ah cun pakhat le pakhat kha. “Thlan khar lung kha ahodah a kan thawnpiak te lai,” tiah an i ceih. 4(A khar cu lung nganpi a si). Cun an hun zoh i lung kha a rak i thawn cang. 5Cucaah thlan chungah cun an lut i puan rang aa aih i orhlei kam i a rak ṭhumi tlangval pakhat an hmuh i an lau ngaingai. 6Cu pa nih cun, “Nan thinphang hlah u. Vailam ah an tahmi Jesuh, Nazareth khua mi kha nan kawl ti kha ka hngalh. Sihmanhsehlaw hika ah hin a um ti lo — a tho cang! An vuinak hmun hi zoh hmanh u. 7Cucaah cun va kal u law a zultu hna kha le Peter kha, ‘Amah nih an chimh hna bantuk te khan nan hlanah Galilee ah a kal i cuka ah cun nan va hmuh lai,’ a ti tiah va chim hna u,” tiah a ti. #Mat 26.32; Mar 14.28 8Cucaah an chuak i an thin a phang i an ning a ṭih caah thlan cun an le. An thin a lau tuk caah ahohmanh an chim hna lo.#16.8 Hlanlio kutṭial cahlun zumhawktlak bikbik hna nih cun, Marka cauk hi 16.8 ah hin an donghter. Cahlun dang pakhat nih cun Marka cauk cu Donghnak Tawi Deuh timi hin a donghter; cun Cahlun dang nih cun Donghnak Tawi Deuh ah khan cang 9 in 20 tiang hi an peh. Cahlun tam bik ah cun cang 9-20 nih hin cang 8 nak kha an zulh colh i a cheu ah cun hi cang hna hi, lung awṭawm an si tiin an ti. Cun Cahlun a cheu ah cun Donghnak Tawi Deuh le Donghnak Sau Deuh, an donghnak ah hin Amen an telh veve.

MARKA THAWNGṬHA DONGHNAK SAU DEUH

Mary Magdalin Sinah A Lang

[9Jesuh cu thihnak in a thawh hnuah Zarhpi ni zingkate ah khan Mary Magdalin sinah khan a lang hmasa bik. Cu nu cu a chungin khuachia pasarih a chuahpiakmi nu kha a si. 10Mary cu a kal i a hawile kha a chimh hna. An ngaih a chia, an rak ṭap i, 11Jesuh cu a nung i ka hmuh, tiah a chimh hna tikah khan an zum lo.

Zultu Pahnih Sinah A Lang

(Luk 24.13-35)

12Hi hnuah hin zultu pahnih hna cu khuate lei i an kal lioah khan an sinah Jesuh cu a lang. 13An kir i a dang kha an chimh hna, sihmanhsehlaw an zum hna lo.

Zultu Hleikhat Sinah A Lang

(Mat 28.16-20; Luk 24.50-53; Jhn 20.19-23; Lam 1.6-8)

14A hmanung bik ah Jesuh cu a zultu pahleikhat hna sinah khan rawl an ei lioah a lang. Zumhnak an ngeih lo ruang le a nung in a hmumi hna chimmi kha an zumh khawh lo ruangah a sik hna.#16.14 Cun cang 14 nak ah hin, kutṭial cahlun a cheu hna ah cun, hi bia hi a peh hna: Cun annih nih an nawl i, “Atu chan, phung le lam zeihmanh a ngei lomi le zumhnak a ngei lomi chan hi Satan kut tang ummi chan a si i thlarau hna chung i a ummi thil thur cung i Pathian biatak le ṭhawnnak phak kha Satan nih cun a dawnh. Cucaah cun, atu ah hin na dinnak cu phuang ko,” an ti — cuticun Khrih sinah cun an chim. Cun Khrih nih cun a leh hna i, “Satan ṭhawnnak a kum khiahpiak a si cangmi cu a kum a tling cang, asinain thil ṭihnung dangdang kha an phan dengmang cang. Cun sualnak a tuahmi hna caah khan thihnak ah chanh kha ka si i cucu annih nih biatak ah khan an kir ṭhan nakhnga le an sual ti nakhnga lo ca le cun vancung i a ummi dinnak a sunparnak le a thlarau an co nakhnga caah a si. Cu thlarau sunparnak cu a rawk kho ti lomi sunparnak a si,” tiah a ti. 15A thawh hna i, “Vawlei cung khuazakip ah va kal u law miphun kip kha thawngṭhabia va chim hna u. #Lam 1.8 16A zum i tipilnak a ingmi paoh nih khamhnak an hmuh lai, a zum lomi paoh nih sual phawtnak an hmuh lai. 17A zummi pawl cu hi ṭhawnnak hmelchuhnak hi pek an si lai: ka min in khuachia an ṭhawl khawh hna lai, holh theih loin an holh lai, 18rul kha an tlaih hna i sivai an din zongah zeiti hmanh in an um lai lo; mizaw cungah an kut an chuan lai i an dam lai,” tiah a ti.

Van Ah A Kai

(Luk 24.53; Lam 1.9-11)

19Jesuh nih bia a ruah dih hna cun vancung ah a kai i Pathian orhlei kamah khan a hung ṭhu. #Lam 1.9-11 20A zultu kha khuazakip ah an kal i thawngṭhabia kha an chim; Pathian nih an sinin rian a ṭuan i an phungchimmi kha ahmaan, tiah ṭhawnnak hmelchunhnak a pekmi hna thawngin a langhter.]

MARKA THAWNGṬHA DONGHNAK TAWI DEUH

[9 Nu hna kha Peter le a hawile sinah khan an va kal i vancungmi nih a rak chimhmi hna kha a tawinak in an chimh hna. 10 Cu hnuah cun Jesuh hrimhrim nih, nichuahlei in nitlaklei tiang, zungzal a hmunmi khamhnak kong bia nung le bia thiang cu a zultu hna thawng khan a thanh.]

Currently Selected:

MARKA 16: HCL06

Highlight

Copy