Záan 12

Malíi kɔ́sɔ Zozíi a kokokpí jɩ̀ dàŋwóni

(Matíe 26.6‑13; Málɩ́kɩ 14.3‑9; Lúkɩ 7.36‑50)

1Yri gbɩ́flɔ́ tuo mɔ̀ɔ lé Zúfʋnyʋa a flíiflíiglɩ̀sɩ́sɩ̀ɛ̀ ká ŋnɩ, lé Zozíi mʋ Betaníi, Lazáa ɔ̀ kú lé ɔ́ gala lɛ́ a, ɔ bhlé. 2Ɔ́ mʋ mɔ̀ɔ a, á pió lelilɩ gà, mà Mátɩ bhábhalɛ bhè Lazáa kʋ nyʋaá yà Zozíi sɔ́ lie a nyièdɩ. 3Á kʋ ʋ́ lé Malíi bhá dàŋwónikpalɩ́drè, dàŋwónié á wlele lɛ́ nádɩ a, ɩ yɛ́kɛ́ɛ́ mɔ̀glʋ̀ ɩ̀ kɩ̀ɩ̀ pɛ́lʋ́ ʋ̀ tɛ́ lɛ́ a, lé ɔ́ kɔ́sɔlɩɩ́ Zozíi a kokokpí jɩ̀ lé ɔ́ bhá ɔ nyí lé ɔ́ susuɩ́ mà ɩ nɔ́nʋ́ bháʋ́ wlʋɔ́ a lɔ̀fɩ́ɛ́. 4Mà Zozíi a kʋjɩ̀nyɔ̀ɔ̀ á wlele wá Zudáa Sɩkalɩ́ɔ́tʋ a, ɔ̀ nà kɔ̀ɔ̀ wá nyɩ́glɩ̀ lé ɔ̀ kɔ̀ɔ̀ wá nyʋa wlɩ pɛ́lʋ́ ŋwʋ́ʋ a, ɔ́mɔ́ cí mà: 5«Ɛ̀kʋ̀ʋ̀ lé à nɩ́ dàŋwónié lɩ̀à pɛ́lʋ́ ŋwʋ́ à? À yi la flèejì#12.5 Flèejìè a múó ŋwɔ́ɔ wá yruú a múó a nɔnʋ a pɛ́ɛ. a gwlɩ̀ ta kla lé à yi la ŋazɩ̀nyʋa nyɛ́.» 6Ɛ̀ nɩ́ cémʋ́ ŋazɩ̀nyʋa a wɔlɩ́ kɔ́ɔ́ bhlá bhè ɔ kɩ́ɩ́ cí a ŋwɔ́ɔ, mà ghlíighlíinyɔ kʋ̀ʋ lé ɔ́mɔ́ ɔ̀ ŋwʋ́ɛ́ á moníe sá, ɔ kɩ́ɩ́ ghlíi a, ɩ́zà ɔ́ cí saá. 7Bhʋ́ Zozíi anɩ́: «Sa ŋwnɔ́ɔ́ né gɔ̀ diin mà nɩ kú a, ná gàzɛ̀ɛ̀ a nɔnʋɔ́ nyʋa na ká lɛ́ zrɩ a, ʋ́mʋ́ ɔ́ zrɩɛ lɛ́.» 8Ŋazɩ̀nyʋa, á kʋ kɔ́ɔ̀kɔ́ amɔ gɔ̀, mà mɔ́ɔ, náa nɩ́ a ká kɔ́ɔ̀kɔ́ amɔ gɔ̀ kʋʋ̀.

Zúfʋnyʋa anɩ́ a ká sáà Lazáa bhlá

9Zúfʋnyʋa kɔ́kɔ́mnɩ́ nú mà Zozíi kʋ Betaníi, bhʋ́ á mʋ mɔ̀ɔ. Á mʋ mɔ̀ɔ a, ɛ̀ nɩ́ Zozíi a múó a zà ŋwɔ́ɔ, mà áa mʋ lé a ká sáà Lazáa Zozíi sa lɛ́ kúyra a yɛ́. 10Mà Lagɔ̀bʋ̀bɔ̀nyʋ̀àkádàà ya núnu lé a ká sáà Lazáa bhlá. 11Máà, ɔ́mɔ́ kà ŋnɩ́ a zà Zúfʋnyʋa kɔ́kɔ́mnɩ́ ya á bɩ́ wlʋ́ lé Zozíi a fádùò á ka yɩ́.

Zozíi pla Zelízalɛ́mʋ lóo bhísakʋ́

(Matíe 21.1‑11; Málɩ́kɩ 11.1‑11; Lúkɩ 19.28‑40)

12Zrɩ zɩ yɩ́ a, nyʋa kɔ́kɔ́mnɩ́ɛ́ fɩ́ɛ́ à yi à flíiflíiglɩ̀sɩ́sɩ̀ɛ̀ kʋ́ a, á ya nú mà Zozíi yie Zelízalɛ́mʋ. 13Ɩ́ ka ŋnɩ́ lé á bhá gblɩ́ɩ lé á fa yrè lé á mʋ ɔ́ dú a nékʋ́ nyúzɔ kʋ́, lé á nie yɩ́ mà:

«Ozana!#12.13 Ozana: Ebléewɔlɩdrè kʋ̀ʋ, á ŋwɔ́ɔ Lagɔ a ŋnú fa wɔlɩ́. À Kanyɔ Lagɔ,

Nà pápányuó ŋnɩ́ nyɔɔ́ ɔ̀ yie nà ŋnɩ́ mʋ́ a kʋ́!

Nà pápányu ŋnɩ Izrayɛ́lɩ a Lóoó kʋ́.»

14Zozíi bhá jákásɩyʋ lé ɔ́ gblɔ̀ɔ jɩ̀. Cémʋ́ tɛ̀ɛ̀ á jɩ́jrà Lagɔ̀bɔ̀gʋ a mnɩ́ a, sɩ́tɛ̀ mʋ́ ɩ́ niloò. Á jɩ́jrà mà:

15 Zelízalɛ́mʋʋ̀! Sinyɔ́ɔ a dúù!

Ŋanɩmɛ ná bhlá mɔ̀!

Nà lóo yie!

Ɔ́ bɔ́ɔ jákásɩyʋ jɩ̀! # 12.15 A zɛlɩɩ sáà Zaka 9.9.

16Wɔlíɛ́ fɩ́ɛ́ ɩ̀ nilo lɛ́ a, Zozíi a kʋjɩ̀nyʋ̀àà nɩ́ ɩ mnɩ́ nú. Mà tányɩɛ́ mʋ́ á ŋwʋ́ yɩ́ lɛ́ Zozíi kpá Lagɔ a blɔ̀blɔ́ a mnɩ́ a, bhʋ́ á luo mà, wɔlɩ́ɛ́ fɩ́ɛ́ lɩ̀à jɩ́jrɔ̀ wá ɔ zà Lagɔ̀bɔ̀gʋ̀ɔ̀ mnɩ́ a, lé cémʋ́ á jɩ́jrà wá a, sɩ́tɛ̀ tɛ̀ɛ̀ nyʋaá nɩ ɔ́ zà.

17Tányɩɛ́ mʋ́ Lazáa kʋ wá lésu a mnɩ́ lé Zozíi wle wá mɔ́ lé ɔ́ galɔ̀ a, nyʋaá fɩ́ɛ́ yɛɛ wá ɩ dá a, cí ɔ wɔlɩ́. 18Ɩ́mɩ́ kà ŋnɩ́ a zà nyʋa kɔ́kɔ́mnɩ́ yio lɛ́ sɩ́tɛ̀ nyúzɔ kʋ́, máà á nú wá lɛ̀wɔ̀lɩ̀ɛ̀ ɔ́ nɩ wá a. 19Ɩ́ kà ŋnɩ́ lé Falizɩ́ɛnyʋaá ŋwúŋwuole, á nie mà: «A dʋdʋ̀ʋ̀, à nɩ̀ ka míi lé à kà wɔlɩ́ nɩ, nyʋaá fɩ́ɛ́ a dʋdʋɛ lɛ́ a, ɔ́mɔ́ á jɩ́ɛ́ yɩ́ kʋ́!»

Lówùdùnyʋa yi Zozíi yɛ́ ka

20Nyʋaá à mʋ Flíiflíiglɩ̀sísɩ̀ɛ̀ kʋ́ Lagɔ̀bʋ̀bɔ̀ kà Zelízalɛ́mʋ a, lówùdùnyʋa kʋ á nyièdɩ. 21Ámá nyʋaá ŋnɩ Filípʋ gɔ̀. Filípʋɔ́, Galilée a dúo á wlele Besayidáa a, mɔ̀ a nyɔ kʋ̀ʋ. Lé á srʋ ɔ́ mà: «Kanyɔɔ̀, à yrá à kà Zozíi yɛ́.» 22Lé Filípʋ mʋ lé ɔ́ srʋ Adrée, lé áa sɔ́ mʋ lé á srʋ Zozíi. 23Lé Zozíi srʋ á mà: «Glíyie mʋ́ Lagɔ na ká Nyɔɔ́ a Yuwliyʋɔ́ ŋwnú fa ɔ blɔ̀blɔ́ a mnɩ́ a, ɛ́ ya kla. 24Cɩ́cása a mnɩ́, náa srʋɛ amɔ mà, a nɩ nɩ́ nyɔ̀yue dʋdʋ̀ ŋwʋ́, lé ɛ ká zɛ́ a, ɛ nɩ́ ka mʋ́ vavà. Ɛ́ɛ nɩ zɛ́ a, bhʋ́ ɛ́ trʋɛ yʋ́ lé yʋ́ɔ́ zumole. 25Nyɔ nɩ wà ɔ kɔ́ lé ɔ nɩ plɩ́ gɔ̀ dɛ́ zɩkpa zɔ̀ a, ɔ́ɔ tuo. Ɩ́zà, ɔ̀ nɩ̀ sa dɛ́ zɩkpa zɔ̀ ɔ kɔ́ duo bɩ́ a, ɔ́mɔ́ yɛ́ kɔ́ɔ́ ʋ̀ nɩ́ bhɩada ka a. 26Nyɔ nɩ cí mànɩ́ ɔ́ yi mɔ́ɔ gà zrɩ a, ɔ jɩ́ mɔ́ɔ kʋ́! Dɛ́ ɩ́ kʋ a, bhʋ́ ná kʋjɩ̀nyɔ kʋɛ. Lé nyɔ nɩ jɩ́ mɔ́ɔ kʋ́ a, ɩ Tʋ́ yio kpá ŋwʋ́.

Zozíi cí ɔ kwɩ́ a wɔlɩ́

27Ná duo sie! Cégbá ɩ́ yi cí a? Ɩ cí mà: Tʋ́ʋ̀, sa mɔ́ɔ glíiyie lɩ̀à kalɩmɛɛ́ neé? Bhè ɩ́ yi sáà cí mà glíiyie lɩ̀à a kalɩmɛɛ́ a zà ɩ́ yii!» 28Ɔ́ anɩ́: «Tʋ́ʋ̀, nɩ bhè nà ŋwnú ká mʋ!» Lé niwɔlɩ wlʋ́ lagɔɔ́: «Ná ŋwnú ya wá mʋ lé ʋ́ yi àyɩ sɔ́kʋ́ mʋ!»

29Nyʋaá fɩ́ɛ́ à kʋ̀ la ʋ́ lé à nú niwɔlɩɛ́ ɩ̀ wlʋ́ lagɔɔ́ a, á anɩ́: «Lagɔ gbúgblule!» Àna anɩ́: «Kplɔkplɔzùzu cíloó gɔ̀!» 30Lé Zozíi srʋ á mà: «Niwɔlɩɛ́ a nú lɛ́ a, mɔ́ɔ gà ɩ nɩ́ cíloò, mà amɔ a zà ɩ́ cíloò. 31Tányɩɛ́ ya yɩ́ ŋnɩ, tányɩɛ́ mʋ́ Lagɔ na ká kɔ́ a nyʋa tɩ́tɩ́ ŋwʋ́ lé ɔ ká Dɩ́blʋ̀ɔ̀ ɔ̀ pɩalɛ kɔ́ kʋ́ a jɩ́ɩ lé ɔ kɔ́ɔ́ jrùkʋ́ ŋwʋ́ a, ɛ́ ya yɩ́ ŋnɩ. 32Mɔ́ɔ, nɩ ya yɩ́ lɛ́ kúsuó jɩ̀ kʋlɔ lé ɩ́ kʋ yɩ́ lɛ́ mʋ́ yɩ́ lagowlú a, bhʋ́ ná ká yɩ́ nyʋaá fɩ́ɛ́ ɩ nyoku gɔ̀ jriì.» 33Ɔ́ cí lɛ́ sɩ́tɛ̀ a, ɔ kwɩ́ a wɔlɩ́ ɔ́ cíé cémʋ́ ɩ́ na ká mʋ́ plɩ́plɩ a, sɩ́tɛ̀ ɔ́ pápalɛ.

34Lé nyʋaá srʋ ɔ́ mà: «Wɔlíɛ́ à zɛ Lagɔ̀jràmá a bɔ́gwɩ a mnɩ́ a, ɩ́mɩ́ ŋwɔ́ɔ mà Kláyɩ́sɩ na ká kɔ́ tuò, ɔ nɩ́ ka kɔ́ɔ̀kɔ́ kú. Bhè ànɩ̀gbá cíe lé ɩ̀ nie mà: Nyɔɔ́ a Yuwliyʋɔ́, á kʋlɔ kúsu jɩ̀ a? Ɔ̀ ŋwɔ́ɔ bhʋ́anɩ Nyɔɔ́ a Yuwliyʋɔ́ a?» 35Lé Zozíi srʋ á, ɔ́ anɩ́: «Nápɛɛ́ kʋ àyɩ amɔ nyièdɩ mà tányɩ nɩ́ yɩ́ mʋ́ trʋ̀. Dɛ́ a kʋ àyɩ nápɛɛ́ a mnɩ́ a, a náa, a mʋ, bhè cúcú nɩ ká amɔ zɔ̀ vú! Mà nyɔɔ́ ɔ̀ námnɩlɛ cúcú a mnɩ́ a, ɔ nɩ́ bhlɩ́ɛ́ jɩ̀ ɔ́ mnɛ a yì. 36Dɛ́ɛ́ nápɛɛ́ kʋ àyɩ amɔ nyièdɩ a, a tɔ̀lɛ̀ɛ̀ duo bhè a ká nápɛ a yúó plɩ́.»

Zozíi bhɩa cícíé zɔ̀ a, ɔ́ wlʋ́ nyʋaá yɩ́ lé ɔ́ mʋ zúzùò ka.

Zúfʋnyʋa nɩ́ Zozíi a fádùò ka

37Zozíi nɩ á drɩ̀ lɛ̀wɔ̀lɩ lé á yɩ́ɩ́ flɛ́flɛ̀sa, mà a nɩ́ ɔ fádùò ka à. 38Sɩ́tɛ̀ mʋ́ ɩ́ na ká plɩ́ɩ bhʋ́ Lagɔ a nékʋ́cinyɔ Ezayíi a wɔlɩ́ɛ́ ɔ́ cí wá a, ɩ́ ká kla. Ɩ́mɩ́ ŋwɔ́ɔ wá mà:

À Kanyɔɔ̀,

Wɔlíɛ́ à cí lɛ́ a,

Nyɔ gbá bhɩ́ɩ́ cɩ́cása kʋ́ a?

Nyɔ gbá Lagɔ tʋa ɔ sɔɔ́ a? # 12.38 A zɛlɩɩ sáà Eza 53.1.

39Wɔlíɛ́ kà ŋnɩ́ lé nyʋa nɩ́ mɔ́ɔ duo tɔ̀ a, Ezayíi cí sɔ́kʋ́ mɩ́ ɔ́ anɩ́:

40 Ɔ́ bhle Lagɔ̀nyʋa a yɩ́,

Lé ɔ́ sú a di

A nɩ ka kʋ́ yɛ́,

A nɩ ka nú.

A bhobhoé nɩ ka klʋ́ kalɔɔ̀,

A nɩ ka mɔ́ɔ klʋ́ gà

Lé nɩ ka á yalɩma. # 12.40 A zɛlɩɩ sáà Eza 6.10.

41Lagɔ a nékʋ́cinyɔ Ezayíi, Zozíi a blɔ̀blɔ́ɔ́ mʋ́ ɔ́ yɛ́ a, ɩ́zà ɔ́ cí sɩ́tɛ̀. Naa Zozíi a gɔ̀ a wɔlɩ́ ɔ́ cíe lɛ́.

42Ɩ́ kʋ sɩ́tɛ̀ bhè Zúfʋnyʋa a cífɩnyʋaá a nyièdɩ, kɔ́kɔ́mnɩ́ ka Zozíi a fádùò. Mà á gúé lé a ká wɔlɩ́ɛ́ né wláa, Falizɩ́ɛnyʋa nɩ ka á zúfʋcɛcɩwlʋɔ́ a mnɩ́ jɩ́ɩ̀. 43Nyʋa a ŋnú falɛ á wà lé á zi Lagɔ ŋnú falɛ kʋ́.

Zozíi ŋwɔ́ɔ nápɛ

44Lé Zozíi pá wɔlɩ́, ɔ́ anɩ́: «Ɔ̀ nɩ̀ kà ná fádùò a, ná múó ná fádùò ɔ nɩ́ kaà mà ɔ̀ cíe mɔ́ɔ a, ɔ́ fádùò ɔ́ ka sáà! 45Nyɔ nɩ yɛ́ mɔ́ɔ a, ɔ̀ cíe mɔ́ɔ a, ɔ́mɔ́ ɔ́ yɛ́. 46Mɔ́ɔ ŋwɔ́ɔ nápɛɛ́ ɛ̀ yì zɩkpa zɔ̀ a, nyɔɔ́ nɩ̀ kà ná fádùò a, ɔ nɩ ka cúcú tuò. 47Nyɔ nɩ̀ nú ná cícíwɔlɩ, lé ɔ nɩ̀ nɩ́ ɩ saá ná a, mɔ́ɔ ɔ̀ nɩ́ plɔ ɔ tɩ́tɩ́. Nɩ́ zɩkpa zɔ̀ yi lé ká nyʋa a tɩ́tɩ́ plɔɔ̀, ná yi lé ká ʋ́ nyʋa neé saà. 48Nyɔ nɩ̀ nɩ́ mɔ́ɔ wà a, lé ɔ nɩ̀ pá ná cícíwɔlɩ klá a, wɔlɩ́ɛ́ ɩ́ cí lé ɔ́ nú lɛ́ a, ɩ́mɩ́ nà kɔ̀ɔ̀ ɔ tɩ́tɩ́ plɔɔ̀ bɩ́kʋ́bhɩayruó kʋ́. 49Wɔlíɛ́ ɩ́ cí lɛ́ a, ná wlú mʋ́ nɩ́ɩ bhá. Mà ɩ Tʋ́ɔ́ ɔ̀ cíe mɔ́ɔ a, céé ɩ́ nie lɛ́, lé céé ɩ́ cɩ́a lɛ́ a, ɔ́mɔ́ ɔ̀ pápa mɔ́ɔ mɩ́. 50Lé ɩ́ yì saá mà, cémʋ́ ɔ́ yrá a, ámá à nyɛ́ kɔ́ɔ́ ʋ̀ nɩ́ bhɩàda ka a. Cémʋ́ ɩ Tʋ́ srʋ mɔ́ɔ a, sɩ́tɛ̀ ɩ́ cíé.»

Currently Selected:

Záan 12: NEY

Highlight

Copy