Záan 17
17
Zozíi bhibhie lé Lagɔ kɔ́ɔ́ sɔ́kʋ́ ŋwnú faa
(Eblée 7.24‑28)
1Zozíi bhɩa sɩ́tɛ̀ a cícíé zɔ̀ a, ɔ́ bhá yɩ́ kʋ́ lé ɔ́ dʋdʋ̀ lagowlú lé ɔ́ bhibhie, ɔ́ anɩ́: «Tʋ́ʋ̀, glíyié ya kla! Na, fa nà yʋ́ɔ́ ŋwnú bhè ɔ ka sáà mɔ̀ɔ ŋwnú fa! 2Máa nà nyɛ́ ɔ́ pɔ́waá à zi kʋ́ a, lé ɔ ká nyʋaá ɩ̀ tió gɔ̀ a, kɔ́ɔ́ ʋ̀ nɩ́ bhɩàda ka a, nyɛ́. 3Kɔ́ɔ́ ʋ̀ nɩ́ɩ bhɩada ka a, ɩ́mɩ́ ŋwɔ́ɔ mà nyʋa yɩbhlɩ mɔ̀ɔ, mɔ̀ɔ nà múó ŋwɔ́ɔ cɩ́cá Làgɔ. Lé nyʋa yɩbhlɩ sáà nyɔɔ́ ɩ̀ cíe lé ɔ̀ ŋwɔ́ɔ Zozi Klísɩ a. 4Lé ɩ́ fa mɔ̀ ŋwnú dɛ́ dʋ̀dʋkʋ́ lé ɩ́ bhɩa nɔnʋɔ́ fɩ́ɛ́ ɩ̀ nyɛ́ mɔ́ɔ zrɩda a, zɔ̀. 5Bhè Tʋ́ʋ̀, fa mɔ́ɔ ɩ̀ nyòku gɔ̀ ŋwnú lé nyɛ́ sɔ́kʋ́ mɔ́ɔ ná blɔ́blɔ́ɔ́ ɩ́ ka wá tányɩɛ́ mʋ́ ɩ́ kʋ àyɩ wá mɔ̀ɔ gɔ̀ lé fɩ́ɛ́ lé kɔ́ ká wlʋ́ a!
Zozíi bhibhie ɔ́ kʋjɩ̀nyʋ̀àà kʋ́gbá sɔ́ɔ a wlú
6Nyʋaá ɩ̀ nyɛ́ mɔ́ɔ dɛ́ zɩkpa zɔ̀ yɩ́ gɔ̀ ŋwʋ̀da a, ɩ́ nɩ pɩ́ɛ́ fɩ́ɛ́ lé á yɩbhlɩ nà ŋnɩ́. Nà nyʋa kʋ̀ la ʋ́, fɩ́ɛ́ lé ɩ̀ nyɛ́ mɔ́ɔ má yɩ́ gɔ̀ ŋwʋ̀da lé á ŋwʋ́ nà cícíwɔlɩ kpá. 7Lɩ́ɛ́ fɩ́ɛ́ ɩ́ ka a, á yì yɩ́ saá mà mɔ̀ nyɛ́ mɔ́ɔ mɩ́. 8Wɔlíɛ́ ɩ̀ srʋ lɛ́ mɔ́ɔ a, ɩ́ srʋ à mɩ́ lé á núí. Á yɩbhlɩ cɩ́cása saá mà mɔ̀ɔ gɔ̀ ɩ́ wlʋ́, cémʋ́ mɔ̀ cíe mɔ́ɔ á ka yɩ́ ɩ cɩ́cása. 9Naa, a wlú ɩ́ bhibhie lɛ́. Nyʋaá fɩ́ɛ́ a wlú nɩ́ bhibhie. Mà ànàà ɩ̀ nyɛ́ mɔ́ɔ a, lé à ŋwɔ́ɔ sáà nà na a, a wlú ɩ́ bhibhie. 10Lɩ́ɛ́ fɩ́ɛ́ ɩ́ ka a, nà lɩ́ kʋ̀ʋ. Lé lɩ́ɛ́ fɩ́ɛ́ ɩ̀ kà a, ná lɩ́ kʋ̀ʋ̀, ɩ́mɩ́ nɩ lé á yɩbhlɩ saá mà ɩ́ blɔ̀. 11Mɔ́ɔ, nɩ́ yɩ́ dɛ́ zɩkpa zɔ̀ kʋ, mà ámá, á kʋ àyɩ zɩkpa zɔ̀. Náa yie yɩ́ mɔ̀ gɔ̀. Wéé! Tʋ́ʋ̀, blɔ̀blɔ̀ Lagɔɔ̀! Ɩ́bhìè, nà fɩ́ɛ́ ɩ̀ nyɛ́ mɔ́ɔ a, ɛ ŋnɩ́ mʋ́ ŋwʋ́ á yɩ́gɔ̀! Bhè cémʋ́ mɔ́ɔ lé mɔ̀ à ŋwɔ́ɔ lɛ́ céamúó a, a sɛ́fʋɔ́ a ká sáà lɛ́ a múó plɩ́. 12Tányɩɛ́ mʋ́ yáa sɔ́ à kʋ̀ àyɩ la dáamúó a, fɩ́ɛ́ ɩ̀ nyɛ́ mɔ́ɔ a, ɛ́ nɩ lé ɩ́ ŋwʋ́ á yɩ́gɔ̀, lé a nyièdɩ a nyɔɔ́ nɩ́ tuò, ànɔ̀ɔ̀ tɛ̀ɛ̀ nà kà la tuo a, ɔ́mɔ́ tuo lɛ́, bhè cémʋ́ ɩ́ jɩ́jrɔ̀ la Lagɔ̀bɔ̀gʋ̀ɔ̀ mnɩ́ a, ɩ ká neé sralɔɔ̀. 13Náa yie yɩ́ lɛ́ kakamnɩ́lɛ́ lɩ̀à mɔ̀ gɔ̀. Mà ɩ́ kʋ àyɩ zɩkpa zɔ̀ ɩ́zà ɩ́ srʋ á lé ná lɔlɔ ká á bhlá, lé ʋ ká á gɔ̀ plɩ́.
14Ɩ́ srʋ á wɔlɩ́ɛ́ ɩ̀ srʋ wá mɔ́ɔ a, mà cémʋ́ nɩ́ dɛ́ zɩkpa zɔ̀ a nyɔ ŋwɔ́ɔ a, sɩ́tɛ̀ a sɛ́fʋɔ́ a nɩ́ dɛ́ zɩkpa zɔ̀ a nyʋa ŋwɔ́ɔ, ɩ́mɩ́ kà ŋnɩ́ a zà zɩkpa zɔ̀ a nyʋa gblɩ̀làà. 15Nɩ́ mɔ̀ srʋ mà sa á zɩkpa zɔ̀, mà ŋwʋ́ á yɩ́gɔ̀ lé nɩ lé Dɩ́blʋ̀ɔ̀ ká á gwá wlʋ́ʋ. 16Cémʋ́ mɔ́ɔ nɩ́ lɛ́ zɩkpa zɔ̀ a nyɔ ŋwɔ́ɔ a, a sɛ́fʋ nɩ́ sáà zɩkpa zɔ̀ a nyʋa ŋwɔ́ɔ. 17Tʋ́ʋ̀, pláalaá nà nyʋa mʋ́ nà cɩ́cása a mnɩ́. Nà cícíwɔlɩɛ́ mɩ́ ŋwɔ́ɔ cɩ́cása. 18Cémʋ́ ɩ̀ cíe wá mɔ́ɔ zɩkpa zɔ̀ a, sɩ́tɛ̀ mɔ́ɔ ná sɛ́fʋɔ́ ɩ́ cía sáà dɛ́ zɩkpa zɔ̀. 19Náa nyɛ́ mɔ̀ ɩ nyoku á zà, lé nà cɩ́cása a mnɩ́, a sɛ́fʋɔ́ a ká sáà nàa na plɩ́.
Zozíi bhibhie ɔ́ kʋjɩ̀nyʋ̀àà fɩ́ɛ́ a wlú
20Áa múó a wlú nɩ́ bhibhie mà ŋwɔ́nɩ́srɩ̀lɛ ná kʋjɩ̀nyʋ̀àà na ká kɛ́zɔ̀ nɩ a, nyʋaá nà kɛ̀ɛ duo tɔ̀ a, a wlú ɩ́ bhibhie sáà. 21Ɩ́ bhibhie a wlú lé a lɔ̀fɩ́ɛ́ ká cé a múó plɩ́ɩ. Cémʋ́ yáa mɔ̀ sɔ́ à bhli lɛ́ múó a, a yà àmɔ̀ sɔ́ à kà sáà sɩ́tɛ̀ plɩ́, lé cémʋ́ mɔ̀ cíe mɔ́ɔ a, kɔ́ a nyʋa kɩ́ɩ́ duo tɔ̀. 22Ɩ́ ŋwʋ́ á kpáá ɩ̀ ŋwʋ́ mɔ́ɔ a lé a ká lɛ́ múó plɩ́. Cémʋ́ yáa mɔ̀ sɔ́ à ŋwɔ́ɔ lɛ́ múó a, a ká sáà sɩ́tɛ̀ múó bhli. 23Cémʋ́ ɩ́ kʋ lɛ́ ámá mʋ́ lé mɔ̀ ɩ̀ kʋ̀ lɛ́ mɔ́ɔ mʋ́ a, ɩ́mɩ́ nà kà nɩ lé a ka céamúó plɩ́. Bhʋ́ kɔ́ a nyʋa na ká saá yɩbhlɩ mà mɔ̀ cíe mɔ́ɔ. Lé ɩ̀ wà a cémʋ́ ɩ̀ wà lɛ́ mɔ́ɔ a. 24Kɔ́ nɩ́ àyɩ wá wlʋ, lé ɩ̀ wà wá mɔ́ɔ, ɩ́zà ɩ̀ ŋwʋ́ mɔ́ɔ kpá, Tʋ́ʋ̀, nyʋa ɩ̀ nyɛ́ mɔ́ɔ a, ɩ́ yrá lé dɛ́ɛ́ ɩ́ kʋ a, a kʋ sáà ʋ́, lé cémʋ́ ɩ̀ ŋwʋ́ mɔ́ɔ kpá a, a kɩ́ɩ́ yɛ́. 25Tʋ́ʋ̀, mɔ̀ɔ nà nɩnɩgbɩ srí sá a, mɔ̀ kɔ́ a nyʋa nɩ́ yɩbhlɩɩ̀, ɛ̀ nɩ̀ ŋwɔ́ɔ mɔ́ɔ a, ɩ́ yɩbhlɩ mɔ̀ lé nyʋaá ɩ̀ nyɛ́ mɔ́ɔ a, á yɩbhlɩ saá mà mɔ̀ cíe mɔ́ɔ. 26Lé ɩ́ nɩ lé á yɩbhlɩ nà ŋnɩ́ lé ɩ́ yi àyɩ sɔ́kʋ́ nɩ lé a ká nà ŋnɩ́ yɩbhlɩ. Lé wàwʋ́ ɩ̀ kà lɛ́ ná zà a, ʋ́ ká a di a mnɩ́ kʋʋ̀, lé ná sɛ́fʋ, ká sáà á di a mnɩ́ kʋʋ̀.»
Currently Selected:
Záan 17: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
