Záan 16

1«Náa srʋɛ amɔ wɔlɩ́ɛ́ fɩ́ɛ́ lɩ̀à lé a nɩ ka a fádùò a ka a gbʋ́ wlʋ́. 2Á yi amɔ zúfʋcɛcɩwlʋ a mnɩ́ jɩ́ɩ̀ lé á yi kɛ́zɔ̀ amɔ bhlá, mà nyʋaá nà kɩɩ lɛ́ nɩ a, á yi bhobho mà Lagɔ̀nɔ̀nʋ á zrɩɛ. 3Cémʋ́ a nɩ́ ɩ Tʋ́ yì, lé á nɩ́ sáà mɔ́ɔ yì a, ɩ́zà á na ká amɔ sɩ́tɛ̀ kʋ́ bhlii. 4Náa srʋɛ bhlà amɔ wɔlɩ́ɛ́ fɩ́ɛ́ lɩ̀à lé ɩ tányɩɛ́ nɩ ŋnɩ kɛ́zɔ̀ a, a ká cémʋ́ ɩ́ srʋ wá amɔ a, luò. Bháa wá bháàda kʋ́ a, nɩ́ amɔ mɩ́ srʋ máà yáà amɔ sɔ́ dáamúó à kʋ̀ wá.

Lagɔ a Blɔ̀blɔ̀zùzùò yi yii

5Náa mnɛ yɩ́ lɛ́ kakamnɩ́lɛ́ lɩ̀à nyɔɔ́ cíe mɔ́ɔ a, gɔ̀, sɩ́tɛ̀ ɩ́ kʋ bhè á nyièdɩ a nyɔ nɩ́ yrá mɔ́ɔ mà: Dɛ́gbá ɩ̀ mnɛ a? 6Ɩ́zà cémʋ́ ɩ́ cíi amɔ gɔ̀ a zà aa kpɩkpɩ wɔtɔma amɔ gɔ̀. 7Bhè cɩ́cáwɔlɩ ɩ́ srʋ amɔ, mɔ́ɔ nɩ mʋ a, bhʋ́ ɩ́ yi amɔ a zà náma, mà nɩ nɩ́ mʋ a, nyɔɔ́ nà kà amɔ kʋ́ fa a, nɩ́ ka amɔɔ gɔ̀ yi. Mɔ́ɔ nɩ̀ mʋ a, bhʋ́ ɩ́ yi amɔ mɔ́ laa. 8Lé ɔ́ɔ nɩ yi a, bhʋ́ zɩkpa zɔ̀ a nyʋa yi saá yɩbhlɩ cémʋ́ á ya á nyumoé kʋ́ mnɔ́ɔ a zà, a Lagɔ a cɩ́cása a zà, lé á mnɔ́ɔ sáà Lagɔ a tɩ́tɩ́ɛ́ a zà.#16.8 A zɛlɩɩ sáà Nɩnɩgbɩ 24.25. 9Ɛ̀ nɩ̀ ŋwɔ́ɔ nyumoé a pɩ́ʋ́ a mnɩ́ a zà a, a nɩ́ ná fádùò kaa. 10Á mnɔ́ɔ Lagɔ a cɩ́cása a pɩ́ɔ́ kʋ́, cémʋ́ na mnɛ Tʋ́ɔ́ gɔ̀, lé a nɩ́ ka yɩ́ mɔ́ɔ yɛ́ a. 11Á mnɔ́ɔ sáà Lagɔ a tɩ́tɩ́ a pɩ́ɔ́ kʋ́, cémʋ́ Dɩ́blʋ̀ɔ̀ ɔ̀ pɩalɛ kɔ́ɔ́ kʋ́ a, ʋ́ ya wá plɔlɔɔ̀ a.

12Ɩ́ ka àyɩ wɔlɩ́ kɔ́kɔ́mnɩ́ lé ká amɔɔ srʋ ɔ́, mà a nɩ́ kakamnɩ́lɛ́ ɩ́ gbɩdɩɛ neé bhɩa. 13Mà tányɩɛ́ mʋ́ cícása a zuzùò na ká yi a, ʋ́ yi amɔ cɩ́cása a fɩ́ɛ́ mnɩ́ tíè. Ʋ nɩ́ ka ʋ mɔ̀glʋ̀ a ŋnɩ́ mʋ́ cíì, mà céé ʋ́ na ká nú a, ɩ́mɩ́ ʋ́ na ká cí. Ɩ́zà wɔlɩ́ɛ́ nà kà kɛ́zɔ̀ yi a, ɔ́ ká amɔ mɩ́ srʋ. 14Cémʋ́ ná ká cɩ́cása a zuzùò pápa a, sɩ́tɛ̀ mʋ́ ʋ́ na ká amɔ srʋ ɔ́. Náà, mɔ́ɔ ʋ́ na ká ŋwnú fa. 15Lɩ́ɛ́ fɩ́ɛ́ Tʋ́ɔ́ ka a, ná lɩ́ kʋ̀ʋ̀. Ɩ́zà ɩ́ cí lɛ́ mà cémʋ́ ná ká Blɔ̀blɔ̀zùzùò pápa a, ɩ́mɩ́ ʋ́ na ká amɔ srʋ.

Zozíi yi Tʋ́ɔ́ gɔ̀ mʋ lé ɔ́ yi sɔ́kʋ́ yi

16Ɛ̀ tuo mɔ̀ɔ tányɩ tòyipɛ lé a nɩ́ ka yɩ́ mɔ́ɔ a nyoku gɔ̀ yɛ́ɛ. Lé sɔ́kʋ́ tányɩ tòyipɛ ànɛ lé a yi sɔ́kʋ́ mɔ́ɔ yɛ́.» 17Wɔlíɛ́ ɔ́ cí lɛ́ sɩ́tɛ̀ a, ɩ́ ka ŋnɩ́ lé ɔ blɔ̀blɔ́ kʋjɩ̀nyʋ̀àà àna yráyralɛ a nyoku mà: «Wɔlɩ́ gbá ɔ́ yrá ɔ ká cí lé ɔ nie mà, ɛ̀ tuo yɩ́ mɔ̀ɔ tányɩ tòtoyipɛ, lé à nɩ́ ka yɩ́ mɔ́ɔ yɛ́ lé tányɩ tòyipɛ ànɛ lé à yio sɔ́kʋ́ yɛ́ a? Lé ɔ́ cíe sɔ́kʋ́ mà náa mnɛ yɩ́ Tʋ́ɔ́ gɔ̀ a, ɩ́ zà a? 18Ànɩ gbá ŋwɔ́ɔ tányɩ tòyipɛɛ́ ɛ̀ kɛ̀ɛ̀ wɔlɩ́ ɔ́ cíé lɛ́ a? Wɔlíɛ́ ɔ́ cí a, à nɩ́ nú ɩ gba.»

19Zozíi yì saá cémʋ́ á na kɔ́ɔ́ yrá ka yi a, ɩ́ ka ŋnɩ́ lé ɔ́ srʋ á mà: «Wɔlíɛ́ ɩ́ cí lɛ́ a, ɩ́ gba a mʋ́mɔɔ, ɩ́ cí lɛ́ mà: Ɛ̀ tuo àyɩ mɔ̀ɔ tányɩ tòyipɛ lé a nɩ́ ka yɩ́ mɔ́ɔ a nyoku gɔ̀ yɛ́ɛ, lé tányɩ tòyipɛ ànɛ lé a yi sɔ́kʋ́ mɔ́ɔ yɛ́ a, ɩ́zà a yráyralɛ lɛ́ a nyokuu? 20Cɩ́cása a mnɩ́, náa srʋɛ amɔ mà, a yi zɩzra a yi bhɔtɔɔ̀, bhè kɔ́ a nyʋa na ká lɔlɔ nɩ. Amɔ, kpɩkpɩ yi amɔ gɔ̀ wɔtɔma, mà ɩ́ kalɩmɛɛ yi kɛ́zɔ̀ amɔ lɔlɔ kʋ́ laa. 21A lɛ́bhɛɛ, ŋwnɔ́ nɩ cí mà ɔ ká va a, duo gblálɔɔ́ nyú, cémʋ́ ɔ glíiyie ya ŋnɩ a ɩ́ zà. Mà ɔ nɩ ya yɩ́ va a, kalɩmɛɛ́ fɩ́ɛ́ ɔ́ yɛ́ la a, ɔ́ drʋlɛ kʋ́. Cémʋ́ ɔ́ ya nyɔ zɩkpa zɔ̀ laa a, ɩ́ zà, ɩ́ ka yɩ́ mɔ́ lɔlɔ kʋ́. 22A sɛ́fʋ sáà, kakamnɩ́lɛ́ lɩ̀à a, di gblálɛ yɩ́ amɔ nyú. Mà ɩ yi sɔ́kʋ́ amɔɔ gɔ̀ yi, lé lɔlɔ yi amɔ bhlá. Bhʋ́anɩ lɔlɔɔ́, nyɔ nɩ́ ka kɔ́ɔ̀kɔ́ amɔ mʋ́ duo kʋ́ sa à.

23Bhʋ́ a yruó kʋ́, a nɩ́ ka yɩ́ mɔ́ɔ wɔlɩdrè a múó coco kʋ́ yrá a. Cɩ́cása a mnɩ́, ná srʋɛ amɔ mà, a nɩ yráa ɩ Tʋ́ɔ́ lɛ́ mʋ́ ná ŋnɩ́ɛ́ mʋ́ a, ɔ́ yi amɔ mɛ́ nyɛ́. 24Lé à nɩ̀ kà wá ʋ́ kʋ a, a nɩ́ à zà ná ŋnɩ́ɛ́ mʋ́, lɛ́ yráa. A yráa Tʋ́ɔ́ lɩ́ mʋ́, mà ɔ́ yi amɔ mɩ́ nyɛ́, lé a lɔlɔɔ́ ká neé sralɔɔ̀.

Zozíi sɩa dʋ̀dʋ kʋ́ a pɔ́wa

25Níní mʋ́ ɩ́ cíi amɔ gɔ̀. Mà tányɩ yi ʋ́ kʋ, lé nɩ́ ka yɩ́ níní mʋ́ cíi, náa ká yɩ́ amɔ námasa Tʋ́ɔ́ gɔ̀ a wɔlɩ́ srʋ. 26Lé bhʋ́anɩ yruó kʋ́, mɔ́ɔ nɩ́ a ká cí mànɩ́ ɔ̀ ka a wlú Tʋ́ɔ́ bhibhie, amɔɔ mɔ̀glʋ̀ nà kɔ̀ɔ̀ lɩ́ mʋ́ yráa ná ŋnɩ́ mʋ́. 27Tʋ́ɔ́ mɔ̀glʋ̀ wà amɔɔ, cémʋ́ a wà mɔ́ɔ a, ɩ́zà. Lé a tɔ̀ mɔ́ɔ duo, máà a yì saá mà Tʋ́ɔ́ gɔ̀ ɩ wlʋ́ɛ́. 28Tʋ́ɔ́ gɔ̀ ɩ́ wlʋ́ lé ɩ́ yi lɛ́ dɛ́ zɩkpa zɔ̀. Kakamnɩ́lɛ́ lɩ̀à, náa wlʋ́ɛ́ yɩ́ zɩkpa zɔ̀, lé ɩ́ mnɛ yɩ́ Tʋ́ɔ́ gɔ̀.»

29Ɔ́ cí yɩ́ lɛ́ wɔlɩɛ́ lɩ̀à a, ɔ́ kʋjɩ̀nyʋ̀àà anɩ́: «Ɩ̀ lɛ́bhɛɛ, kakamnɩ́lɛ́ cɩɩ ɩ̀ srʋɛ yɩ́ lɛ́ àmɔ̀ wɩ́a a, nɩ́ cí yɩ́ cɩɩ níní mʋ́! 30Kakamnɩ́lɛ́ lɩ̀à, à yì yɩ́ cɩɩ́ saá mà, mɔ̀ɔ, nɩ́ gláa fɩ́ɛ́ lé a ká mɔ̀ wɔlɩ́ kʋ́ yráa. Wɔlíɛ́ fɩ́ɛ́ kʋ̀ nyɔ a duo a yɩ́ a, ɩ̀ yìi. Ɩ́zà à yì lɛ́ saá mà Lagɔ gɔ̀ ɩ̀ wlʋ́.» 31Á cí lɛ́ sɩ́tɛ̀ a, Zozíi anɩ́: «Na, a tɔ̀ yɩ́ cɩɩ mɔ́ɔ duo à? 32A lɛ́bhɛɛ! Yruú yi ʋ́ kʋ, lé ʋ́mʋ́ yruó ya sáà ŋnɩ, lé a yi sá jɛlɔ̀. Nyɔ nyɔ yi klá kla, lé a yi kɛ́zɔ̀ ʋ́ ná múó tɩ, mà nɩ́ sáà múó bhli, Tʋ́ɔ́ kʋ mɔ́ɔ gɔ̀. 33Náa cíle amɔ wɔlɩ́ɛ́ fɩ́ɛ́ lɩ̀à gɔ̀, lé a ká ná zà flíi. Mà pɛpɛ kalɩmɛɛ́ a nɩ́ a ká dɛ́ zɩkpa zɔ̀ yɛ́ɛ, naa a tɛ́ma mʋ́, mà yáa zɩkpa sɩa!»

Currently Selected:

Záan 16: NEY

Highlight

Copy