Záan 15

Zozíi ŋwɔ́ɔ glàyʋ̀vòò mɔ̀glʋ̀

1Zozíi cí sɔ́kʋ́ mà: «Mɔ́ɔ ɔ̀ ŋwɔ́ɔ glàyʋ̀vòò#15.1 A zɛlɩɩ sáà Eza 5.1‑7. mɔ̀glʋ̀ lé ɩ Tʋ́ ŋwɔ́ɔ glàyʋ̀làgbàà a kanyɔ. 2Yáa lábhʋ sɔ́ à nɩ̀ jányɩ lé ʋ̀ nɩ nɩ́ bhúó trʋ a, ɩ Tʋ́ ɔ́ɔ díú kʋ́. Ɩ́zà lábhʋ nɩ trʋ bhí a, ɩ Tʋ́ ɔ́ɔ kplʋʋ́ gɔ̀ lé ʋ́ gɔ̀ flíle, ʋ ká sɔ́kʋ́ bhí kɔ́kɔ́mnɩ́ trʋ. 3Cícíwɔlɩɛ́ ɩ́ srʋɛ lɛ́ amɔ a, ɩ́ ya amɔ kplɔɔ̀. 4Nànɩ́, cémʋ́ ɩ́ kʋ lɛ́ amɔ mʋ́ a, a kʋ sɩ́tɛ̀ mɔ́ɔ mʋ́. Mà lábhʋ yà suú sɔ́ nɩ nɩ́ jányɩ a, ʋ́ a múó nɩ́ trʋ bhúó, sɩ́tɛ̀ mʋ́ a sɛ́fʋɔ́ a nɩ nɩ́ mɔ́ɔ mʋ́ kʋ a, a nɩ́ ka bhúó trʋ.

5Mɔ́ɔ ŋwɔ́ɔ glàyʋ̀vòò, ɩ́zà amɔ ɔ̀ ŋwɔ́ɔ glàyʋ̀vòò a lábhɩɛ́. Nyɔɔ́ nɩ̀ kʋ mɔ́ɔ mʋ́, lé mɔ́ɔ ná sɛ́fʋ nɩ̀ kʋ ɔ mʋ́ a, ɔ yi bhí kɔ́kɔ́mnɩ́ trʋ. Mà a nɩ wlʋ́ mɔ́ɔ gwá a, a nɩ́ ka lɛ́ nɩ. 6Nyɔ nɩ nɩ́ mɔ́ɔ mʋ́ kʋ lé à kà céamúó plɩ́ a, áa pɔ́ɔ́ klá sulabhʋ bhísakʋ́ lé ɔ́ yɛ. Silabhɩɛ́ á díé kʋ́ a, ɩ nɩ yɛ a, áa tɩpɩɩ́, lé á pálɩɩ́ kosuú lé ɩ́ sie. 7Naa, a nɩ kʋ mɔ́ɔ mʋ́ lé ná cícíwɔlɩ nɩ kʋ amɔ mʋ́ a, a yrá wɔlɩ́ɛ́ a wà a, mà a yii yɛ́! 8A nɩ trʋ bhí kɔ́kɔ́mnɩ́ lé a nɩnɩgbɩ nɩ srʋ nyʋa mà a ŋwɔ́ɔ ná kʋjɩ̀nyʋa a, ɩ́mɩ́ nà ka nɩ lé ɩ Tʋ́ a ŋwnú ká mʋ.»

9Zozíi cí sɔ́kʋ́, ɔ́ anɩ́: «Cémʋ́ ɩ Tʋ́ wà lɛ́ mɔ́ɔ a, sɩ́tɛ̀ mʋ́ ná sɛ́fʋɔ́ ɩ́ wà amɔ. Naa a námnɩ ná wàwʋ́ɔ́ a mnɩ́! 10Mɔ́ɔ, ɩ́ ŋwʋ́ɛ́ ɩ Tʋ́ a cícíwɔlɩ kpá, lé ɩ́ námnɩlɛ ɔ wàwʋ́ɔ́ a mnɩ́. Naa, a sɛ́fʋɔ́, a nɩ ŋwʋ́ ná cícíwɔlɩ kpá a, a yi ná wàwʋ́ɔ́ a mnɩ́ námnɩ̀. 11Náa cí sɩ́tɛ̀ lé ná lɔlɔ ká amɔ di a mnɩ́ kʋʋ̀ lé a lɔlɔ ká neé sralɔɔ̀.

12A lɛ́bhɛɛ ná lɔ̀ɔ̀ ʋ́mʋ́ ŋwɔ́ɔ mà: A wàwà cémʋ́ ɩ́ wà lɛ́ amɔ a! 13Wàwʋ́ɔ́ nyɔ yi ɔ liyʋ a zà ka, lé ʋ̀ yi kʋ́ zi a, ʋ́mʋ́ ŋwɔ́ɔ mà, sa ɩ̀ nyoku ɩ̀ lía a zà. 14Wɔlíɛ́ ɩ́ yrálɛ amɔ mʋ́ a, a nɩ nií a, à yi ɩ bheyinyʋa plɩ́. 15Bháa yɩ́ lɛ́ zɩmnɛ́ jɩ̀ a, nɩ́ ka yɩ́ amɔ ná cóyuo wleè máa wɔlɩ́ɛ́ cóyʋ ɔ kanyɔ nie a, ɔ nɩ́ɩ́ yì. Mà ɩ bheyinyʋa a ŋwɔ́ɔ máà wɔlɩ́ɛ́ fɩ́ɛ́ ɩ́ cɩ́á ɩ Tʋ́ɔ́ zɔ̀ a, yáa amɔ ɩ́mɩ́ pápa à. 16Amɔ ɔ̀ nɩ́ mɔ́ɔ mʋ́ gbázɩ̀, mà mɔ́ɔ ɔ̀ gbázɩ̀ amɔ mʋ́, lé ɔ̀ srʋ amɔ mà a trʋ bhí lé bhíé a na ká trʋ a, ɩ pʋ́ kɔ́ɔ̀kɔ́ a zà. Bhʋ́ wɔlɩ́ɛ́ fɩ́ɛ́ a na ká Tʋ́ɔ́ mʋ́ yráa ná ŋnɩ́ mʋ́ a, ɔ́ yi amɔ mɩ́ nyɛ́. 17Wɔlɩ́ɛ́ mɔ́ɔ ɩ́ yrálɛ amɔ mʋ́ a, ɩ́mɩ́ ŋwɔ́ɔ mà, a wàwà.

Á yi Zozíi a kʋjɩ̀nyʋ̀àà mʋ́ gblɩ̀

18Kɔ́ a nyʋa nɩ gblɩ̀ amɔ a, a yɩbhlɩ saá mà mɔ́ɔ tɛ̀tɛ̀ á gblɩ̀. 19Ɩ nɩ ŋwɔ́ɔ la mà zɩkpaá lɩ̀à zɔ̀ a nyʋa a ŋwɔ́ɔ la a, ɩ́ yi la ŋnɩ́ ka lé á yi la amɔ wà. Mà cémʋ́ ɩ́ gbázɩ̀ amɔ mʋ́ lé ɩ́ sa amɔ zɩkpa zɔ̀ a nyʋa nyièdɩ lé ɩ́ gbʋ́gbʋ̀ amɔ a, ɩ́mɩ́ kà ŋnɩ́ a zà kɔ́ a nyʋa gblɩ̀ amɔ mʋ́. 20Wɔlíɛ́ ɩ́ srʋɛ lɛ́ amɔ a, a luò! Mà cóyʋ nɩ́ yrí lé ɔ ká ɔ kanyɔ kʋ́ zi.#15.20 A zɛlɩɩ sáà Matíe 10.24; Lúkɩ 6.40; Záan 13.16. Kalɩmɛɛ́ á nyɛ́ lɛ́ mɔ́ɔ a, á yi sáà amɔ mɛ́ nyɛ́. Lé nyʋa nɩ ŋwʋ́ ná cícíwɔlɩ kpá a, á yi sáà amɔ a cícíwɔlɩ kpá ŋwʋ́. 21Mà wɔlɩ́ɛ́ fɩ́ɛ́ lɩ̀à ná ŋnɩ́ mʋ́ á na ká amɔ mɩ́ nɩ, máà a nɩ́ nyɔɔ́ ɔ̀ cíe mɔ́ɔ a yì. 22Nɩ nɩ́ la yi, lé ká la ámá gɔ̀ cí a, a nɩ́ ka la nyumoé a kpa ka a. Mà cémʋ́ yáa yɩ́ lɛ́ ámá á nyumoé srʋ á, a nɩ́ yɩ́ ciele ka. 23Nyɔ nɩ gblɩ̀ mɔ́ɔ a, ɔ́ gblɩ̀ sáà ɩ Tʋ́. 24Nɩ nɩ́ la yi, lé ká la nɩnɩgbɩ̀ɛ̀ nyɔ nɩ́ à zà má nyièdɩ nɩ a nɩ a, a nɩ́ ka la á nyumoé a kpa ka. Mà á yɛ́ nɩnɩgbɩ̀ɛ̀ ɩ́ nɩ a, sɩ́tɛ̀ ɩ́ kʋ bhè á gblɩ̀ mɔ́ɔ, lé á gblɩ̀ ɩ Tʋ́. 25Wɔlíɛ́ fɩ́ɛ́ lɩ̀à ɩ́ɩ ŋnɩ mɔ́ɔ lé á jràmá a mnɩ́ a wɔlɩ́ɛ́ á jɩ́jrà mɔ̀ɔ a, ɩ ká neé sralɔ. Ɩ́mɩ́ ŋwɔ́ɔ mà: Á gblɩ̀ mɔ́ɔ mʋ́ flɛ́flɛsa.#15.25 A zɛlɩɩ sáà Lɔlɔ 35.19.

26Zuzùò na ká la lé ʋ̀ kà amɔ kʋ́ fa a, ʋ́mʋ́ á wlele cɩ́cása a Zuzu. Ɩ Tʋ́ gɔ̀ ʋ́ wlʋ́ɛ́ lé ʋ́ yie, ʋ́mʋ́ na ká la lé ʋ̀ kà ná ŋwɔ́nɩ́srɩ̀lɛ nɩ. 27Lé a sɛ́fʋ, a yi ná ŋwɔ́nɩ́srɩ̀lɛ nɩ, máà bháa wá bháàda a lé yi lé ŋnɩ zɩmnɛ́ a, dáamúó à sí.»

Currently Selected:

Záan 15: NEY

Highlight

Copy