Záan 14

Zozíi anɩ́ ɔ ká ɔ́ kʋjɩ̀nyʋ̀àà sabɔ̀da gɩglà

1Lé Zozíi srʋ ɔ́ kʋjɩ̀nyʋ̀àà, mà: «Di ná gbláa amɔ nyú! A tɔ̀ Lagɔ duo, lé a tɔ̀ sáà mɔ́ɔ duo! 2Ɩ Tʋ́ a gbó a mnɩ́ wlʋ̀. Ɛ̀ nɩ nɩ́ la sɩ́tɛ̀ ŋwɔ́ɔ a, nɩ́ ka la amɔ mɩ́ srʋ. Ná ká mʋ lé ká a sabɔ̀da gɩglà. 3Nɩ mʋ lé nɩ gɩglà aa sabɔ̀da a, ká yɩ́ amɔ bhá ka yi lé dɛ́ ɩ́ kʋ a, a ká sáà ʋ́ kʋ. 4Lé bhlɩ́ɛ́ jɩ̀ ɩ́ mnɛ a, a yì mɔ̀ɔ a nyúzɔ̀ɔ̀.»

Zozíi ŋwɔ́ɔ Tʋ́ɔ́ gɔ̀ a nyúzɔ̀ɔ̀

5Ɔ́ cí lɛ́ sɩ́tɛ̀ a, ɔ́ kʋjɩ̀nyɔ Tomáa anɩ́: «Kanyɔɔ̀, bhlɩ́ɛ́ jɩ̀ ɩ̀ mnɛ a, à nɩ́ mɔ̀ɔ dá yì, cégbá mʋ́ à yi mɔ̀ɔ a nyúzɔ̀ɔ̀ yɩbhlɩ a?» 6Zozíi anɩ́: «Mɔ́ɔ ŋwɔ́ɔ nyúzɔ̀ɔ̀, mɔ́ɔ ŋwɔ́ɔ cɩ́cása lé mɔ́ɔ ŋwɔ́ɔ kɔ́. Nyɔ nɩ nɩ́ mɔ́ɔ mʋ́ plɩ́ a, ɔ nɩ́ ka míi lé ɔ ká Tʋ́ɔ́ gɔ̀ mʋ. 7A nɩ yì mɔ́ɔ a, a yi sáà ɩ Tʋ́ yɩbhlɩ. Bhá yɩ́ lɛ́ zɩmnɛ́ jɩ̀ a, a ya yɩ́ mɔ́ yɩbhlɩ, a ya sáà mɔ́ yɛ́.»

8Ɔ́ cí lɛ́ sɩ́tɛ̀ a, ɔ́ kʋjɩ̀nyɔ Filípʋ anɩ́: «Kanyɔɔ̀, pápa àmɔ̀ Tʋ́ɔ́ bhè a di ká bhli!» 9Lé Zozíi srʋ ɔ́, ɔ́ anɩ́: «Filípʋ, ya amɔ sɔ́ à kʋ̀ lɛ́ ʋ́ a, ɩ́ ya gwlɛɛ̀, sɩ́tɛ̀ ɩ́ kʋ bhè nɩ mɔ́ɔ yɩbhlɩ? Ɔ̀ nɩ̀ yɛ́ mɔ́ɔ a, ɔ́ ya Tʋ́ɔ́ yɛ́. Lé ɩ̀ nie sɔ́kʋ́ mà, ɩ pápa amɔ Tʋ́ɔ́? 10Nɩɩ́ saá yì mà, yáa Tʋ́ɔ́ sɔ́, à kʋ̀kʋ̀ mʋ́? Ɔ́ kʋ mɔ́ɔ mʋ́ lé mɔ́ɔ ɩ́ kʋ ɔ mʋ́. Wɔlíɛ́ ɩ́ cíle lɛ́ amɔ gɔ̀ a, ná wlú mʋ́ nɩ́ bhɩ́ɩ́. Mà Tʋ́ɔ́ kʋ̀ mɔ́ɔ mʋ́ a, ɔ́ nɩnɩgbɩ kʋ̀ʋ̀. 11A ka ná cɩ́cása nɩ cí mànɩ́ ɩ́ kʋ Tʋ́ɔ́ mʋ́ lé Tʋ́ɔ́ kʋ sáà mɔ́ɔ mʋ́ a, ɩ́zà a dʋdʋ̀ nɩnɩgbɩ fɩ́ɛ́ ɩ́ nie a, bhʋ́ a yi ná cɩ́cása ka à!

12Cɩ́cása a mnɩ́, ná srʋɛ amɔ mà: Nyɔɔ́ nɩ̀ kà ná fádùò a, ɔ́ yi wɔlɩ́ɛ́ ɩ́ nie lɛ́ a nɩ. Mɔ́ɔ náa mnɛ yɩ́ lɛ́ Tʋ́ɔ́ gɔ̀, ɩ́ yi ŋnɩ́ ka lé ɔ́ yi nɩnɩgbɩ ànɩ nɩ lé ɩ́ yi kɛ́zɔ̀ ná nɩɛ́ kʋ́ zi. 13Lé wɔlɩ́ɛ́ fɩ́ɛ́ a na ká ná ŋnɩ́ mʋ́ yrá a, ɩ́ yii nɩ, ɩ́mɩ́ mʋ́ yʋ́ɔ́ na ká Tʋ́ɔ́ kpá ŋwʋ́. 14A nɩ yrá ná ŋnɩ́ mʋ́ wɔlɩ́ a, ɩ́ yií nɩ.

Tʋ́ɔ́ yi Blɔ̀blɔ̀zùzùò cíè

(Záan 16.5‑15,33; 1 Záan 2.3‑5; 5.3)

15A nɩ wà mɔ́ɔ a, a yi ná jràmáá kpá ŋwʋ́. 16Ɩ́ yi Tʋ́ɔ́ bhibhie lé ɔ́ yi amɔ nyɔɔ́ ɔ̀ nà kà kɔ́ɔ̀kɔ́ amɔ gɔ̀ kʋ́ lé ɔ̀ kà amɔ kʋ́ fa a laà. 17Ɔ́mɔ́ ɔ̀ ŋwɔ́ɔ cɩ́cása a zuzùò. Kɔ́ a nyʋa nɩ́ kɔ́ɔ́ wlɩ tʋà, máà a nɩ́ yɔ́ɔ́ kʋ́ lé a nɩ́ ɔ́ sáà yì. Mà ɛ̀ nɩ̀ ŋwɔ́ɔ amɔ a, a yìò, ɔ́ kʋ kɔ́ɔ̀kɔ́ amɔ gɔ̀ lé ɔ́ kʋ amɔ mʋ́.

18Nɩ mʋ a, nɩ́ ka ʋ́ amɔ tɩ kúyuo bhísakʋ́. Ɩ́ yi sɔ́kʋ́ amɔ gɔ̀ yrɩ́bha. 19Tanyɩɛ́ ɛ̀ tuo mɔ̀ɔ ɛ nɩ́ yɩ́ mʋ́ trʋ̀, lé kɔ́ a nyʋa nɩ́ ka yɩ́ mɔ́ɔ yɛ́, mà ɛ̀ nɩ́ ŋwɔ́ɔ amɔ a, a yi mɔ́ɔ yɛ́. Ɛ̀kʋ̀à? Ɩ́ kʋ àyɩ kɔ́ lé a sɛ́fʋɔ́ a yi kɔ́ kʋ. 20Bhʋ́ a yruó kʋ́ a na ká saá yɩbhlɩ mà, mɔ́ɔ ɩ́ kʋ Tʋ́ɔ́ mʋ́ lé amɔ a kʋ mɔ́ɔ mʋ́ lé mɔ́ɔ ɩ́ kʋ amɔ mʋ́. 21Ɔ̀ nɩ̀ ŋwʋ́ ná jràmáá duo kʋ́ a, lé ɔ̀ nɩ̀ nɩ a sá a, bhʋ́anɩ nyɔɔ́ wà mɔ́ɔ. Nyɔɔ́ ɔ̀ wà mɔ́ɔ a, ɩ Tʋ́ yio wà lé ná sɛ́fʋɔ́ ɩ́ yio wà lé ɩ́ yio ɩ nyoku pápa a.»

22Zúdʋ anɩ́: «Kanyɔɔ̀, cégbá mʋ́ ɩ́ kʋ bhè nɩ ka lɛ́ ɩ̀ nyoku bhlɩ́ pápa bhè àà múó nà ka ɩ̀ nyoku pápa a?» Zúdʋ yrálɛ́, mà ɛ̀ nɩ́ Zudáa Sɩkalɩ́ɔ́tʋ ŋwɔ́ɔ. 23Lé Zozíi srʋ ɔ́, ɔ anɩ́: «Nyɔɔ́ nɩ̀ wà mɔ́ɔ a, ɔ́ yi ná cícíwɔlɩ kpá ŋwʋ́. Ɩ́ Tʋ́ yio sáà wà, lé mɔ́ɔ lé ɩ Tʋ́ sɔ́ à yio gɔ̀ yi lé à yɔ̀sɔ́ à yi dáamúó sí. 24Nyɔ nɩ nɩ́ mɔ́ɔ wà a, ɔ nɩ́ ka ná cícíwɔlɩ kpá ŋwʋ́. Wɔlíɛ́ ɩ́ cíélɛ́ lé a pʋɛlɛ́ nyúkwlí a, mɔ́ɔ neé mʋ́ ɩ́ wlʋ́ɛ́, mà mɔ́ɔ nɩɩ́ cíi. Tʋ́ɔ́ ɔ̀ cíe mɔ́ɔ a, ɔ́mɔ́ cíle mɔ́ɔ neé.

25Yáa amɔ sɔ́ à kʋ̀ àyɩ ʋ́ a, ɩ́zà ɩ́ srʋɛ amɔ bhúanɩ wɔlɩ́ɛ́ bhlà. 26Nyɔɔ́ ɔ̀ nà kà amɔ kʋ́ fa a lé ɔ̀ ŋwɔ́ɔ Blɔ̀blɔ̀zùzùò a, lé Tʋ́ɔ́ na ká ná ŋnɩ́ mʋ́ la a, ʋ́mʋ́ nà kà amɔ wɔlɩ́ɛ́ fɩ́ɛ́ cɩ́à. Ʋ́mʋ́ nà kà sáà amɔ ná cícíwɔlɩɛ́ fɩ́ɛ́ luò.

27Ɩ́ tɩ amɔ dʋ̀dʋkʋ́ a kʋwɔtɔmalɛ gɔ̀. Ɩ́ nyɛ́ amɔ ná kʋwɔtɔmɛɛ́. Cémʋ́ zɩkpa zɔ̀ a nyʋa nyɛ́ lɛ́ kʋwɔtɔmɛɛ́ a, sɩ́tɛ̀ nɩ́ nyɛ́ amɔ ná nɛɛ́. Di ná gbláa amɔ nyú, lé ŋanɩmɛ ná bhlá sáà amɔ!

28A nú wɔlɩ́ɛ́ ɩ́ cí lé ɩ̀ ŋwɔ́ɔ mà: Náa mnɛ mà ɩ́ yi sɔ́kʋ́ amɔ gɔ̀ yrɩ́bhaà. A nɩ wà la mɔ́ɔ lé a nú lɛ́ mà náa ká ɩ́ Tʋ́ gɔ̀ mʋ a, ɩ́ yi la amɔ lɔlɔ kʋ́ kaa! Máa Tʋ́ɔ́ yrí lé ɔ́ zi mɔ́ɔ kʋ́. 29Náa srʋɛ bhlà amɔ fɩ́ɛ́ lé bhʋ́anɩ wɔlɩ́ɛ́ fɩ́ɛ́ ká ŋnɩ, bhʋ́ a tányɩɛ́ ɩ nɩ ŋnɩ a, a ká yɩ́ ɩ́ fádùò. 30Dɩ́blʋ̀ɔ̀ pɩalɛ dɛ́ dʋ̀dʋkʋ́ kʋ́ a, ʋ́ʋ yie yɩ́, yáa amɔ sɔ́ à nɩ ka yɩ́ kpanyɩ kʋ́ cíi. Ʋ nɩ́ mɔ́ɔ neé bhɩa, 31mà zɩkpa zɔ̀ a nyʋa ka lé a ká saá yɩbhlɩ mà ɩ́ wà Tʋ́ɔ́, lé wɔlɩ́ɛ́ Tʋ́ɔ́ yrálɛ mɔ́ɔ mʋ́ a, ɩ́mɩ́ ɩ́ nie. A soglù à kà mʋ!»

Currently Selected:

Záan 14: NEY

Highlight

Copy