Záan 5

Zozíi yalɩma kplákplányɔ Zúfʋnyʋa a nyɔbhleyru

(Záan 7.19‑24; 9.1‑17)

1Tányɩɛ́ mʋ́ ɩ̀lɩa á lɔ̀fɩ́ɛ́ plɩ́ a, Zozíi mʋ Zúfʋnyʋa a glɩ̀sɩ́sɩ a múó kʋ́ Zelízalɛ́mʋ. 2Zelízalɛ́mʋ a dúó a nékʋ́, bhlábhlɩ́ a plɩ́ɩda a, nyíé kʋ ʋ́, ɛ́mɛ́ Ebléenyʋa á wlele Bezatáa a. Á páa nyíé gɔ̀ gbògbí a gbɩ́, 3ɩ́mɩ́ zɔ̀ gupuonyʋaá a lɔ̀fɩ́ɛ́ gwlɛlɛ, bhʋ́ á pʋ́lɛ: Ŋwʋ́ yɩ́ yígu a bhlányʋa, bhɩbhlanyʋa lé kplákplányʋa kʋ á nyièdɩ [a sɛ́fʋɔ́ á dɛdɛ nyíé ɛ ká bháa. 4Tányɩ kʋɛ ʋ́ lé Lagɔ a kplɔkplɔzùzu kwlíle nyíé lé nyíé bhálɛ. Mà gupuonyɔɔ́ tɛ̀tɛ̀ nà kà nyíé kwlíi a, gú a céana yió la bhlá ɔ́ yi yalɩma à.]#5.4 Wɔlɩdrèè lɩ̀à, nɩ́ bhlagɔ̀gɔ̀bɔ̀gwɩ ànɩ a mnɩ́ kʋʋ.

5Gupuonyɔ a múó kʋ gupuonyʋaá nyièdɩ, ɩ́ lɩkpɩ á glʋ̀ lé kʋ́gbá gbàáta lɛ̀ɛ̀. 6Tányɩɛ́ mʋ́ Zozíi yɛ́ɛ ʋ́ mɔ́ dʋ̀dʋ kʋ́ sapʋda a, ɔ́ yɩbhlɩ saá mà nyɔɔ́ ya ʋ́ nyíéé gɔ̀ gwlɛ, bhʋ́ ɔ́ yrɔ́ɔ́: «Ɩ̀ yrá lé kà yalɩma a?» 7Gupuonyɔɔ́ anɩ́: «Kanyɔɔ̀, nɩ́ kʋfanyɔ ka à lé nyíé nɩ bháa a, ɔ ká mɔ́ɔ mɔ̀ɔ páa. Máà nɩ́ míi a, ɩ́ kʋɛ trányɩ da lé nyɔ ànɔ plɩ́lɛ mɔ́ɔ yɩ́ kʋ́ lé ɔ́ kwlíle nyíé.» 8Lé Zozíi srʋ ɔ́: «Soglù! Bháʋ́ nà gbìtéé bhè kà náa!» 9Nyɔɔ́ kʋ dá a múó lé ɔ́ yalɩma, ɔ́ bháʋ́ ɔ gbìtéé a, ɔ́ɔ námɛ yɩ́. Bhè bhʋ́ a yruó ŋwɔ́ɔ Zúfʋnyʋa a nyɔbhleyru. 10Ɩ́ ka ŋnɩ́ lé Zúfʋnyʋa cífɩnyʋaá yi nyɔɔ́ ɔ̀ yalɩma lɛ́ a srʋ ka mà: «Zúfʋnyʋa a nyɔbhleyruó lɛ̀ zɩmnɛ́, nɩ́ɩ ka lé kà gbìté wlɩ gbá.» 11Bhʋ́ ɔ́ srʋ á mà: «Nyɔɔ́ ɔ̀ nɩ lé ɩ́ yalɩma a, ɔ́mɔ́ srʋ mɔ́ɔ mà ɩ bháʋ́ ná gbìtéé ká mʋ.» 12Bhʋ́ á yrɔ́ɔ́ mà: «Nyɔgbá ɔ̀ srʋ mɔ̀ mà bháʋ́ nà gbìtéé lé kà náa a?» 13Mà nyɔɔ́ ɔ̀ yalɩma lɛ́ a, nyɔɔ́ mɔ̀glʋ̀ kɔ̀ɔ lɛ́ yalɩma a, ɔ nɩ́ ɔ́ yì, bhè Zozíi ya jrèè a mnɩ́ mnɔ́mnɔɔ̀.

14Tányɩ plɩ́ a, Zozíi ŋnɩlɔɔ́ Lagɔ̀wlʋ̀kádʋ̀ɔ̀ a mnɩ́ lé ɔ́ srʋ ɔ́ mà: «Mɔ̀ lɛ̀ɛ! Yà yalɩma a, cíe yɩ́ nyumogbɩ á ninie sá bhè nyumowɔlɩ kádɩ ànɩ nɩ ka yɩ́ lɛ mɔ̀ ŋnɩ!» 15Lé nyɔɔ́ mʋ lé ɔ́ srʋ Zúfʋnyʋa a cífɩnyʋaá mà Zozíi yalɩmalɔɔ́. 16Mà cémʋ́ Zúfʋnyʋa a nyɔbhleyru kʋ́ Zozíi yalɩma nyɔɔ́ a, Zúfʋnyʋa a cífɩnyʋaá fɔɔ́ cícíé.

17Bhʋ́ Zozíi srʋ á mà: «Bhá wá kʋ́ a, ɩ Tʋ́ zrɩɛ àyɩ lé yi lé ŋnɩ zɩmnɛ́, ná sɛ́fʋ mà náa zrɩɛ sáà.» 18Wɔlíɛ́ ɔ́ cí lɛ́ sɩ́tɛ̀ a, ɩ́ ka ŋnɩ́ lé Zúfʋnyʋa a cífɩnyʋaá nie sáá fɩ́ɛ́ a kɔ́ɔ́ bhlá, ɔ́ sa Zúfʋnyʋa a nyɔbhleyruó gbɔ̀ɔ, à nɩ́ sáà ɩ́ a múó ŋwɔ́ɔ, mà ɔ́ nie sɔ́kʋ́ mà ɔ Tʋ́ ŋwɔ́ɔ Lagɔ, lé ɔ bhá ɔ nyoku Lagɔ kʋ́.

Lagɔ nyɛ́ ɔ yʋ́ tobhu

19Lé Zozíi srʋ á sɔ́kʋ́ mà: «Cɩ́cása a mnɩ́, náa srʋɛ amɔ mà, yʋ́ nɩ́ bhá ɔ duo kʋ́ wɔlɩ́ lé ɔ kɩ́ɩ́ nɩ, mà cémʋ́ ɔ Tʋ́ nie lé ɔ́ yɛ́ a, ɩ́mɩ́ ɔ nie. Wɔlíɛ́ fɩ́ɛ́ Tʋ́ nie a, ɩ́mɩ́ yʋ́ nie sáà. 20Máa Tʋ́ɔ́ wà yʋ́ɔ́, ɩ́ ka ŋnɩ́ lé ɔ́ pápalɔɔ́ nɩnɩgbɩɛ fɩ́ɛ́ ɔ́ nie a. Ɔ́ yi àyɩ mɔ́ɔ nɩnɩgbɩ ànɩ kɔ́kɔ́mnɩ́ pápa à, ànɩ̀ɛ̀ ɩ̀ ghlí lé ɩ̀ zi ɩ̀lɩa kʋ́ a, lé neé yi amɔ mna. 21Cémʋ́ Tʋ́ gala kúdùkuo lé á pʋ́ɛ́ a, sɩ́tɛ̀ tɛ̀ɛ̀ yʋ́ɔ́ pʋ́a nyʋaá ɔ́ wà a. 22Tʋ́ɔ́ nɩ́ plɔ nyɔ tɩ́tɩ́, Yʋ́ɔ́ mɔ́ ɔ́ nyɛ́ tɩ́tɩ́ɛ́ fɩ́ɛ́ a plɔplɔtobhu, 23lé nyʋa ká Yʋ́ɔ́ kpá ŋwʋ́ cémʋ́ á ŋwʋ́ɛ́ Tʋ́ɔ́ kpá a. Nyɔɔ́ nɩ̀ nɩ́ Yʋ́ɔ́ kpá ŋwʋ́ a, ɔ nɩ́ sáà Tʋ́ɔ́ ɔ̀ cíeó a, kpá ŋwʋ́ʋ.

24Cɩ́cása a mnɩ́ náa srʋɛ amɔ mà, ɔ̀ nɩ̀ pʋ ná cícíwɔlɩ nyúkwlí lé ɔ̀ nɩ̀ kà nyɔɔ́ ɔ̀ cíe mɔ́ɔ a fádùò a, ɔ́ɔ yɛ́ kɔ́ɔ́ nɩ́ɩ bhɩada ka a, lé a nɩ́ kɔɔ gbʋ́ gʋa. Ɔ́ ya kwɩ́ɩ ne wlʋ́ ɔ́ ya pʋ́. 25Cɩ́cása a mnɩ́ ná srʋɛ amɔ mà tányɩ yi ʋ́ kʋ, ɩ́zà ɛ́ ya sáà ŋnɩ, kúdùkuo yi Lagɔ a Yuwliyʋɔ́ a niwɔlɩ nú, lé àa nà kɩɩ nú a, á ya pʋ́. 26Cémʋ́ Tʋ́ɔ́ gbá kɔ́ wlɩ a, sɩ́tɛ̀ mʋ́ ɔ́ nyɛ́lʋʋ́ Yuwliyʋɔ́. 27Cémʋ́ ɔ́ ŋwɔ́ɔ Nyɔɔ́ a Yuwliyʋɔ́ a, sɩ́tɛ̀ mʋ́ Tʋ́ɔ́ nyɛ́lɔɔ́ tɩ́tɩ́ɛ́ a plɔplɔtobhuó. 28Nee ná mna amɔ! Mà tányɩɛ́ nà kà ŋnɩ lé kúdùkuo fɩ́ɛ́ kʋ̀ lésií a, a ká Nyɔɔ́ a Yuwliyʋɔ́ a niwɔlɩ nú a, ɛ́ yie, 29á yi lési wlʋ́ á yi glù sɔɔ. Nyʋaá à nɩ wá námasa a, áa pʋ́, ɩ́zà ànàà à nɩ wá nyumoé a, a nɩ so kɔ́ɔ̀kʋ́ glù a, á yi jɩ̀ɩ pla. 30Mɔ́ɔ, nɩ́ ka mɩ́ lé ká wɔlɩ́ɛ́ ɩ́ wà a, nɩ. Cémʋ́ ɩ́ núle a, sɩ́tɛ̀ mʋ́ ɩ́ plɔlɛɛ́, ɩ́zà ná plɔplɔtɩtɩ́ srí sáà, nɩ́ plɔ nyɔ, nɩ́ nɩ sáà céé ɩ́ yrá a, mà ɔ̀ cíe mɔ́ɔ a, ɔ́ yráa ɩ́mɩ́ ɩ́ nie.

Zozíi anɩ́ á nɩ ɔ ŋwɔ́nɩ́srɩ̀lɛ

31Mɔ́ɔ mɔ̀glʋ̀ nɩ cí ɩ nyoku a wɔlɩ́ a, ɩ nɩ́ cɩ́cása ka à. 32Mà nyɔ kʋʋ ɔ́ cíé ná wɔlɩ́, ɩ́ yì saa mà wɔlɩ́ɛ́ ɔ́ cíe ná zà a, ɩ́ ŋwɔ́ɔ cɩ́cása a. 33Amɔ cíe nyʋa Záan bɩ́ lé ɔ́ srʋ amɔ ná cɩ́cása.#5.33 Záan lɩ̀à, Zán Batísɩ á sa. Ɔ́mɔ́ nɩ cɩ́cása ŋwɔ́nɩ́srɩ̀lɛ. A zɛlɩɩ sáà 1.19‑27; 3.22‑30. 34Mɔ́ɔ, nɩ́ cíi mà nyɔ cí ná námasa, mà náa cíe sɩ́tɛ̀ lé aa ká ʋ́ neé wlʋ́. 35Záan ŋwɔ́ɔ wá nápɛɛ́ ɛ̀ lʋɛ lé ɛ̀ kɛɛ gɔ̀ a nile wá lɔlɔ tòyipɛ a. 36Mɔ́ɔ, ɩ́ ka àyɩ ŋwɔ́nɩ́srɩ̀lɛ ànɛ ɛ̀ ŋwnɔ́ kʋ́ lé ɛ̀ zi Záan anɛɛ kʋ́ a. Nɔnʋɔ Tʋ́ srʋ mɔ́ mà ɩ zrɩ lé ɩ́ zrɩ a, ʋ́mʋ́ srʋɛ nyʋa mà Tʋ́ɔ́ ɔ́ cíe mɔ́ɔ. 37Lé Tʋ́ɔ́ ɔ̀ cíe mɔ́ɔ a, ɔ́ nɩ sáà ná ŋwɔ́nɩ́srɩ̀lɛ. Mà a nɩ́ à zà ɔ niwɔlɩ nú, lé a nɩ́ à zà sáà mɔ́ yɛ́. 38Lé ɔ cícíwɔlɩɛ́ a nɩ́ɩ́ wɔlɩ́ kʋ́ bhá ɩ́zà nyɔɔ́ ɔ́ cíe a, a nɩ́ ɔ́ duo tɔ̀. 39A dùòkʋ́ kɔ́ɔ́ ʋ̀ nɩ́ bhɩada ka a, Lagɔ̀bɔ̀gʋ a mnɩ́ a na kʋ́ʋ́ yɛ́ɛ, ɩ́mɩ́ kà ŋnɩ́ a zà a nɩ́ bhá Lagɔ̀bɔ̀gʋ̀ɔ̀ a zɛ zɛ tanyɩ, bhè Lagɔ̀bɔ̀gʋ̀ɔ̀, mɔ́ɔ ná wɔlɩ́ ʋ́ cíé! 40A yrá lé a ká kɔ́ɔ́ ɔ̀ nɩ́ bhɩada ka a, yɛ́, sɩ́tɛ̀ ɩ́ kʋ bhè a nɩ́ yrá ná gɔ̀ a yiyíé.

41Nɩ́ cí mà nyɔ faa mɔ́ɔ ŋwnú, ɩ́mɩ́ nɩ́ mʋ́mɔ, 42lé ɩ́ yì amɔ, ɩ́ yì sáà mà aa nɩ́ Lagɔ wà. 43Ɩ Tʋ́ a ŋnɩ́ mʋ́ ɩ́ yii, sɩ́tɛ̀ ɩ́ kʋ bhè aa nɩ́ mɔ́ɔ wlɩ tʋa. Àa nɩ̀ ŋwɔ́ɔ la nyɔ ànɔ yi la ɔ nyoku a ŋnɩ́ mʋ́ a, aa yio la wlɩ tʋa. 44Nyʋa ká amɔ ŋwnú fa a, ɩ́mɩ́ a wà, mà Lagɔ a múó coco a ŋwnúfafʋ́ɔ́, ɩ́mɩ́ a nɩ́ yrá, cégbá mʋ́ a yi ná wɔlɩ́ cɩ́cása kʋ́ bhá à? 45A ná bhobho mà mɔ́ɔ nà kà kɛ́zɔ̀ amɔ ɩ Tʋ́ neé ŋwʋ́. Mà Moyízɩ a tɔ̀ lɛ́ duo a, ɔ́mɔ́ nà kà kɛ́zɔ̀ amɔ gbʋ́ gʋa à. 46Ɩ́zà a nɩ ka la Moyízɩ a cɩ́cása a, a yi la ná cɩ́cása ka à, máa ɔ́ jɩ́jrà sáà ná gɔ̀ a wɔlɩ́ɛ́ ɔ bɔ́gwɩ a mnɩ́. 47Ɩ́zà a nɩ nɩ́ wɔlɩ́ɛ́ ɔ́ jɩ́jrà a, cɩ́cása ka a, cégbá mʋ́ a yi ná cícíwɔlɩ cɩ́cása kʋ́ bhá à?»

Currently Selected:

Záan 5: NEY

Highlight

Copy