Záan 6

Zozíi bhibhie lé flɔ́ɔ zumò

(Matíe 14.13‑21; Málɩ́kɩ 6.30‑44; Lúkɩ 9.10‑17)

1Ɩ̀lɩa á lɔ̀fɩ́ɛ́ plɩ́ a, bhʋ́ Zozíi dí Galilée a nyíé á wlele sáà Tibelíádɩ a. 2Mà lɛ̀wɔ̀lɩ̀ɛ̀ ɔ́ nɩ lé ɔ́ yalɩma gupuonyʋa lé nyʋa kɔ́kɔ́mnɩ́ yɛ́ a, ɩ́ ka ŋnɩ́ lé á jɩ́ ɔ́ kʋ́. 3Lé ɔ́ gblà kíké wlú, ɔ yà ɔ́ kʋjɩ̀nyʋ̀àà sɔ́ lé á plɩ́ɩ mɔ̀ɔmɔ̀ lé á bɔ́ɔ sá. 4Bhè Zúfʋnyʋa flíiflíiglɩ̀sɩ́sɩ̀ɛ̀ a tányɩɛ́ yà ʋ́ mɛ́.

5Zozíi bhá wlú kʋ́ lé ɔ́ dʋdʋ̀ a, nyʋaá à yie a, a nɩ́ zumole bɛ́. Lé ɔ́ yrá Filípʋ mà: «Filípʋʋ̀, dɛ́gbá mɔ̀ɔ à yi flɔ́ɔ kla lé à yi nyʋaá fɩ́ɛ́ lɩ̀à nyɛ́ lé á yi li a?» 6Zozíi ɔ́ɔ cí sɩ́tɛ̀ lé ɔ ká Filípʋ zɔ̀ sa à, mà ɔ́ yì cémʋ́ ɔ́ na ká nɩ a.

7Filípʋ anɩ́: «Siá! Kanyɔɔ̀, flèejì a gwlɩ̀ kʋ́gbá nɩ́ ka míi lé ɩ́ ká nyʋaá lɩ̀à a flɔ́ɔ kla, nyɔ ká tòyipɛ yɛ́ a zà, ʋ nɩ́ á neé bhɩa.» 8Zozíi a kʋjɩ̀nyɔ ànɔ a múó, Simɔ́ Pɩ́ɛ́lɩ ɔ nɩ́ayʋ́ Adrée, ɔ́mɔ́ cí mà: 9«Kanyɔɔ̀, zɔ̀kpɩ́yʋ a múó kʋ dɛ́ àmɔ̀ nyièdɩ, ɔ́ ka flɔ́ɔbhi a gbɩ́ lé zrìyuolɩ a sɔ́, mà nyɩ́kpɔgàdùò lɩ̀à a zà, dɛ́gbá ʋ́ na ká ŋnɩ a?»

10Bhʋ Zozíi srʋ á mà: «A nɩ lé nyʋa a lɔ̀fɩ́ɛ́ ká sá bɔ́bɔ̀! Máà dɛ́ á kʋ a, náma zɩkpa kʋ̀ʋ̀ lé bhʋ́alɛ wlʋ̀. Lé á mnèmnè a lɔ̀fɩ́ɛ́ sá, á yi míi lé á yi nyʋa a dí sɔ́ lé gwlɩ̀ kʋ́gbá ŋnɩ.»#6.10 Ɩ́mɩ́ ŋwɔ́ɔ mà, nyʋaá zɛlɔ lɛ́ sɩ́tɛ̀ a, ŋwná yà yúó sɔ́ nɩ́a mʋ́ kʋʋ. 11Lé Zozíi bháʋ́ flɔ́ɔ lé ɔ́ bhibhie, lé ɔ́ bhábhalʋʋ́ nyʋa fɩ́ɛ́ kʋ̀ ʋ́ a, céamúó ɩ́mɩ́ ɔ́ nɩ sáà zrìyuolɩɛ́ a zà, ɔ́ bhábha á lɔ̀fɩ́ɛ́ nyɔ nɩ́ kʋ́ ji, cémʋ́ nyɔ yrá a, ɔ́ yɛ́ sɩ́tɛ̀. 12Tányɩɛ́ mʋ́ á li lé á lʋ a, bhʋ́ Zozíi srʋ ɔ́ kʋjɩ̀nyʋ̀àà mà: «A gʋ́gwlà flɔ́ɔdrìè ɩ̀ tuo ʋ́ kʋ́, lɛ́ ná tuo ʋ́!» 13Lé á gʋ́gwlàlɩ̀ɩ̀ kʋ́, mà flɔ́ɔbhie gbɩ́ɛ́ Zozíi bhábha lé á li a, ɩ́ dríé ɩ̀ ji kʋ́ a, ɩ́ yie pápɩ́ a kʋ́gbá sɔ́.

14Nyʋa à yɛ́ lɛ̀ɛ̀ Zozíi nɩ a dá a, á anɩ́: «Cɩ́cása, Lagɔ a nékʋ́cinyɔɔ́ ɔ̀ nà kà wá yi a, ɔ́mɔ́ lɛ̀!» 15Mà tányɩɛ́ mʋ́ Zozíi yɩbhlɩ saá mà á na kɔ́ɔ́ kʋ́ bhli lé a kɔ́ɔ́ Zúfʋnyʋa a léyikpoó jɩ̀ ŋwʋ́ a, ɔ́ wlʋ́ a nyièdɩ lé ɔ́ mʋ sɔ́kʋ́ kíkéé wlú, lé ɔ́ a múó kʋ mɔ̀ɔmɔ̀.

Zozíi námnɩ nyíé klʋ́

(Matíe 14.22‑34; Málɩ́kɩ 6.45‑53)

16Zozíi a kʋjɩ̀nyʋ̀àà kwlíi nyíé gɔ̀ kosúgbòsa. 17Lé á pla gɔ́lʋ́ a ká Kapɛnayʋ́mʋ díi. Yrʋ́ a bhli, bhè Zozíi nɩ́ àyɩ má jɩ̀ ŋnɩ. 18Bhè vʋ̀vɔ̀lʋ kádʋ yiela, nyie ya lákwɩ kʋ́ bhá. 19Zozíi a kʋjɩ̀nyʋ̀àà ya lú á ya dá trʋma à, á ya kilóoyuo gbɩ́ yà gbɩ́flɔ́ sɔ́ bhísakʋ́ bɩ́ pá, lé a yɩ́ bhli Zozíi jɩ̀ ɔ́ námnɩlɛ nyíéé klʋ́ ɔ́ yile gɔ́lʋ́ɔ́ mʋ́. Mà á yɛ́ ɔ́ a, duo wlʋ́ á mnɩ́. 20Lé Zozíi srʋ á mà: «Ŋanɩmɛ ná bhlá amɔɔ mà mɔ́ɔ kʋ̀ʋ!» 21Áa yrá yɩ́ lé ɔ ká yɩ́ la gɔ́lʋ́ a mnɩ́ pla, mà áa yà yɩ́ la á mnɛ a, ŋnɩ.

Nyʋa mʋ́mɔ Zozíi

(Záan 3.14‑16; 1 Záan 5.10‑13; 1 Kɔlɛ́tɩ 11.23‑26)

22Zrɩ̀ɩ zɩ a, nyʋaá à tuo nyíé a bɩ́ lé à yɛ́ Zozíi a kʋjɩ̀nyʋ̀àà a mʋda a, á yɩbhlɩ saá mà gɔ́lʋ́ɔ́ a múó cocoó kʋ la ʋ́ nyíé gɔ̀ a, ʋ́mʋ́ ɔ́ kʋjɩ̀nyʋ̀àà fa lé á mʋ, a yà Zozíi sɔ́ nɩɩ́ sáà mʋ, á pʋpʋ́ʋ̀ mʋ. 23Bhè gɔ́lɩ́ ànɩ̀ɛ̀ ɩ̀ wlʋ́ Tibelíádɩ lé ɩ̀ yi a, ɩ́ pɛ́ɛ dɛ́ɛ́ Kanyɔ bhibhie lɛ́ flɔ́ɔ a wlú lé á li lɛ́ a. 24Naa tányɩɛ́ mʋ́ nyʋaá yɩbhlɩ sáà mà Zozíi yà ɔ́ kʋjɩ̀nyʋ̀àà sɔ́ nɩ́ ʋ́ kʋ a, á pla gɔ́lɩ́ɛ́ a mnɩ́ lé á mʋ Kapɛnayʋ́mʋ Zozíi mʋ́mɔ ka.

Zozíi ŋwɔ́ɔ pʋ́pʋ́ɛ́ a flɔ́ɔbhuo

25Nyʋaá mʋ lé á ŋnɩ Zozíi nyíé a bɩ́ a, bhʋ́ á yrɔ́ɔ́ mà: «Kanyɔɔ̀, tányɩ gbá mʋ́ ɩ̀ ŋnɩ dɛ́ à?» 26Bhʋ́ Zozíi srʋ á mà: « Cɩ́cása a mnɩ́ɛ́ náa srʋɛ amɔ, cémʋ́ a li flɔ́ɔ lé a lʋʋ kʋ́ a, ɩ́ zà a mʋ́mɔ mɔ́ɔ, mà, ɛ̀ nɩ́ lɛ̀wɔ̀lɩ̀ɛ̀ ɩ́ nɩ lɛ́ a zà ŋwɔ́ɔ. 27Lelilɩ ɩ̀ ŋátɔ a, a ná yɛ́ ɩ wlú a kalɩmɛɛ́, mà lelilɩ ànɩ̀ɛ̀ ɩ̀ nɩ́ ŋátɔ lé ɩ̀ yi amɔ kɔ́ɔ́ ʋ̀ nɩ́ bhɩada ka a nyɛ́ a, ɩ́ nɔnʋ a nɩ zrɩɩ̀! Cémʋ́ Nyɔɔ́ a Yuwliyʋɔ́ ɔ́mɔ́ à Tʋ́ Lagɔ nyɛ́ pɔ́wa a, ɔ́mɔ́ nà kà amɔ bhʋ́anɩ lelilɩɛ́ nyɛ́.» 28Ɔ́ cí sɩ́tɛ̀ a, bhʋ́ á yrɔ́ɔ́ mà: «Cégbá à yi nɩ lé à yi wɔlɩ́ɛ́ Lagɔ yrá a nɩ áa?» 29Zozíi anɩ́: «Wɔlíɛ́ Lagɔ yrálɛ amɔ mʋ́ a, ɩ́mɩ́ ŋwɔ́ɔ mà, a ka nyɔɔ́ ɔ́ cíe lé ɔ̀ yi a ɔ cɩ́cása.»

30Nyʋaá anɩ́: «Bhè mɔ̀ lɛ̀wɔ̀lɩ̀pɩ̀ʋ̀ gbá ɩ̀ yi amɔ pápa lé ʋ̀ yi ŋnɩ́ ka lé à yi nà cɩ́cása ka áa? Nɩnɩgbɩ ànɩ̀gbá ɩ̀ yi àmɔ̀ tʋa áa? 31À tinyʋa kʋ wá bhlɩ́ɛ́ mnɩ́ pitíplʋ nɩ́ wlʋ́ʋ a mnɩ́ a, flɔ́ɔ ʋ̀ wlʋ́ɛ́ wá lagɔɔ́ lé á wlele wá Mánɩ a, ʋ́mʋ́ á lie wá. Ɩ́ jɩ́jrɔ̀ Lagɔ̀bɔ̀gʋ a mnɩ́ mà: Flɔ́ɔ ʋ̀ wlʋ́ɛ́ wá lagɔɔ́ a, ɔ́ nyɛ́ amɔ mʋ́ liìda.»

32Zozíi anɩ́: «Cɩ́cása a mnɩ́, náa srʋɛ amɔ mà, flɔ́ɔɔ́ ʋ̀ wlʋ́ lɛ́ lagɔɔ́ a, Moyízɩ nɩɩ́ amɔ mʋ́ nyɛ́. Mà ɩ Tʋ́ʋ̀ nyɛ́ amɔ cɩ́cáflɔɔ́ à wlʋ́ɛ́ lagɔɔ́ a. 33Lagɔ á nɩ flɔ́ɔɔ́, ʋ́mʋ́ ʋ̀ wlʋ́ɛ́ ɔ́ gɔ̀ lé a kwlíe, ʋ́mʋ́ ʋ̀ nyɛ́ nyʋa kɔ́ɔ́ ʋ̀ nɩ́ bhɩada ka a.» 34Ɔ́ cí sɩ́tɛ̀ a, nyʋaá anɩ́: «Kanyɔɔ̀, bhʋ́anɩ flɔ́ɔɔ́ ʋ́mʋ́ nɩ̀ nyɛ́ kɔ́ɔ̀kɔ́ àmɔ̀!»

35Zozíi anɩ́: «Mɔ́ɔ ɔ̀ ŋwɔ́ɔ flɔ́ɔɔ́ ʋ̀ ŋwɔ́ɔ kɔ́ɔ́ ʋ̀ nɩ́ bhɩada ka a. Nyɔ nɩ yi mɔ́ɔ mʋ́ a, kleé nɩ́ kɔɔ́ kɔ́ɔ̀kɔ́ bhlá. Lé ɔ̀ nɩ̀ kà sáà ná fádùò a, mnátʋ nɩ́ kɔɔ sáà kɔ́ɔ̀kɔ́ bhlá. 36Yáa wázɔ̀ amɔɔ srʋ ɔ́ mà, a ya mɔ́ yɛ́ mà, a nɩ́ mɔ́ duo tɔ̀. 37Nyʋaá fɩ́ɛ́ ɩ Tʋ́ nyɛ́ mɔ́ a, á na ká mɔ́ mʋ́ yi. Lé nyɔ nɩ yi mɔ́ mʋ́ a, nɩ́ kɔɔ́ kɔ́ɔ̀kɔ́ jɩ́ɩ. 38Ɩ́ wlʋ́ lagɔɔ́ lé ɩ́ kwlíi a, nɩ́ ná duo kʋ́ a wɔlɩ́ nɩ ka yi, mà nyɔɔ́ ɔ̀ cíe mɔ́ɔ a, wɔlɩ́ɛ́ ɔ́ yrá a, ɩ́mɩ́ ɩ́ yi nɩ ka. 39Nyɔɔ́ ɔ̀ cíe mɔ́ɔ a, ɔ́ yrá lé nyʋaá ɔ́ cɛ́cɩ mɔ́ɔ a, ná tɩ á nyièdɩ a nyɔ lé bɩ́kʋ́bhɩayruó kʋ́ɔ́ ká á galà. 40Wɔlíɛ́ ɩ Tʋ́ yrá a, ɩ́mɩ́ ŋwɔ́ɔ mà, nyɔɔ́ nɩ à yɛ́ Lagɔ a Yuwliyʋɔ́ a, lé ɔ̀ kà ɔ́ fádùò a, ɔ yɛ́ kɔ́ɔ́ nɩ́ɩ bhɩada ka a, lé bɩ́kʋ́bhɩayruó kʋ́ɔ́, mɔ́ɔ kɔ́ɔ́ galà.»

41Tányɩɛ́ mʋ́ Zozíi cí mà ɔ́mɔ́ ŋwɔ́ɔ flɔ́ɔbhuó à wlʋ́ lagɔɔ́ lé à kwlíi a, Zúfʋnyʋaá ŋwúŋwuole. 42Á nie mà: «Zɔ̀zɛ́fʋ a yʋ́ɔ́ ɔ́mɔ́ ɔ̀ nɩ́ dɛ́ kʋʋ? À yì ɔ tʋ́ lé à yì ɔ nɛ́, bhè ɛ̀kʋ̀ʋ̀ lé ɔ́ srʋɛ amɔ mà, lagɔɔ́ mʋ́ ɔ́ wlʋ lé ɔ́ kwlíi a?» 43Bhʋ́ Zozíi srʋ á mà: «A ná ŋwúŋwuò! 44Tʋ́ɔ́ ɔ̀ cíe mɔ́ɔ a, ɔ nɩ nɩ́ nyɔ tíe lé ɔ ká mɔ́ɔ mʋ́ yi a, nyɔ mɔ̀glʋ̀ nɩ́ ka míi lé ɔ ká yi. Nyɔɔ́ nà kà mɔ́ɔ mʋ́ yi a, ɔ́mɔ́ na ká bɩ́kʋ́bhɩayruó kʋ́ kúyraá saà.

45Lagɔ jɩ́jrà wɔlɩdrè a múó nékʋ́cinyʋaá a bɔ́gwɩ̀ɛ̀ a mnɩ́, ámá ŋwɔ́ɔ mà: Lagɔ yi kɔ́ a nyʋa a lɔ̀fɩ́ɛ́ cɩ́à.#6.45 A zɛlɩɩ sáà Eza 54.13.

Mà nyɔɔ́ ɔ̀ nà kà Tʋ́ɔ́ nyúkwlí pʋ lé ɔ̀ kà ɔ cɩ́acɩ́awɔlɩɛ́ kʋ́ ŋwnʋ́ʋ a, ɔ́mɔ́ nà kà mɔ́ɔ mʋ́ yiì. 46Nyɔ nɩ́ à zà Tʋ́ɔ́ yɛ́, mà ɔ̀ wlʋ́ Lagɔ gɔ̀ a, ɔ́ a múó coco ɔ̀ yɛ́ Tʋ́ɔ́. 47Náa srʋɛ amɔ cɩ́cása mà, nyɔɔ́ ɔ̀ nɩ ka ná fádùò a, ɔ́ yi kɔ́ɔ́ ʋ̀ nɩ́ bhɩada ka a yɛ́.

48Mɔ́ɔ ŋwɔ́ɔ flɔ́ɔbhuo à ŋwɔ́ɔ kɔ́ɔ́ a. 49A tinyʋaá kʋ wá zɩkpɩkɔfʋ́ a mnɩ́ a, á li flɔ́ɔɔ́ á wle mánɩ a, mà sɩ́tɛ̀ ɩ́ kʋ bhè á kú. 50Mà flɔ́ɔbhuó à wlʋ́ lagɔɔ́ lé à kwlíi a, nyɔɔ́ nà ka a li a, ɔ nɩ́ ka kú. 51Mɔ́ɔ ɔ̀ ŋwɔ́ɔ flɔ́ɔbhuó à ŋwɔ́ɔ kɔ́ a, lé à wlʋ́ lagɔɔ́ lé à kwlíi a. Nyɔɔ́ nɩ̀ li bhʋ́anɩ flɔ́ɔbhuó a, ɔ yi kɔ́ɔ́ ʋ̀ nɩ́ bhɩada ka a, yɛ́. Lé flɔ́ɔbhuó ná ká nyɛ́, lé à kà ʋ́ kɔ́ a nyʋa neé sa a, ná yɛ́kɛ́ kʋ̀ʋ.»

52Wɔlíɛ́ ɔ́ cí a, ɩ́ ka ŋnɩ́ lé Zúfʋnyʋa cíe lɩ́kpɩɛ kʋ́, ɩ́mɩ́ ŋwɔ́ɔ mà: «Cégbá mʋ́ ɔ́ yi mɩ́ lé ɔ́ yi àmɔ̀ ɔ yɛ́kɛ́ liìda nyɛ́ a?» 53Bhʋ́alɛ Zozíi srʋ á mà: «Cɩ́cása ɩ́ srʋɛ amɔ, a nɩ nɩ́ Nyɔɔ́ a Yuwliyʋɔ́ a yɛ́kɛ́ li a, lé a nɩ nɩ́ ɔ́ dòlú mná a, a nɩ́ ka kɔ́ yɛ́. 54Ɔ̀ nɩ̀ li ná yɛ́kɛ́ lé ɔ̀ nɩ̀ mná ná dòlú a, ɔ́mɔ́ nà kà kɔ́ɔ́ nɩ́ɩ bhɩada ka a, yɛ́ lé bɩ́kʋ́bhɩayruó kʋ́, ɩ́ yio kúyraa saa. 55Na ná yɛ́kɛ́ɛ́ cɩ́cá lelilɩ ɛ́ ŋwɔ́ɔ lé ná dòlúó, cɩ́cányu kʋ̀ sáà ʋ́. 56Ɔ̀ nɩ̀ li ná yɛ́kɛ́ lé ɔ̀ nɩ̀ mná ná dòlú a, ɔ́ kʋ mɔ́ɔ mʋ́ lé mɔ́ɔ ɩ́ kʋ ɔ mʋ́. 57Tʋ́ɔ́ ɔ̀ cíe mɔ́ɔ a, ɔ́mɔ́ ŋwɔ́ɔ pʋ́pʋ́ɛ́ a kanyɔ, ɔ́mɔ́ nyɛ́ mɔ́ɔ pʋ́pʋ́ɛ́ ɩ́zà nyɔ nɩ li mɔ́ɔ a, ɔ́ pʋ́ɛ́. 58Flɔ́ɔbhuó à wlʋ́ lagɔɔ́ lé à kwlíi a, ámá lɛ̀, ɛ̀ nɩ́ a tɩtɩa a flɔ́ɔ á li wá lé á kú wá ŋwɔ́ɔ, flɔ́ɔbhuo ànàà lɩ̀à, ɔ̀ nɩ̀ li á a, ɔ yi pʋ́ kɔ́ɔ̀kɔ́ zà.» 59Wɔlíɛ́ fɩ́ɛ́ lɩ̀à ɩ́mɩ́ Zozíi cɩ́alɛ wá Kapɛnayʋ́mʋ a zúfʋcɛcɩwlʋɔ́ a mnɩ́.

Zozíi a kʋjɩ̀nyʋ̀àà kɔ́kɔ́mnɩ́ wlʋ́lɔɔ gwá

60Ɔ́ kʋjɩ̀nyʋ̀àà nú wɔlɩ́ɛ́ a, a nyièdɩ a nyʋa kɔ́kɔ́mnɩ́ anɩ́: «Wɔlíɛ́ ɔ́ cí a, ɩ́ yrí kpanyɩ! Ɔ̀ yi míi lé ɔ̀ yii kʋ́ ŋwnʋ́ʋ a?» 61Mà cémʋ́ Zozíi yì saá mà ɔ́ kʋjɩ̀nyʋ̀àà ŋwúŋwuole a, ɔ́ yrá á mà: «Wɔlíɛ́, ɩ́ɩ gáa amɔ duo mnɩ́ ɩ? 62Bhè a nɩ yɛ́ Nyɔɔ́ a Yuwliyʋɔ́ a gblàda a, tányɩɛ́ mʋ́ ɔ́ mnɛ yɩ́ lɛ́ dɛ́ɛ́ mɔ̀ ɔ́ wlʋ́ wá a, cégbá mʋ́ a na ká cí a?#6.62 A zɛlɩɩ sáà Nɩnɩgbɩ 1.9‑11. 63Blɔ̀blɔ̀zùzùò ɔ́mɔ́ ʋ̀ nyɛ́ nyɔ kɔ́, yɛ́kɛ́ a pʋpʋ́ɔ́ nɩ́ nɩ nyɔ lɛ́. Wɔlíɛ́ ɩ́ srʋɛ lɛ́ amɔ a, ɩ́mɩ́ ŋwɔ́ɔ blɔ̀blɔ̀zùzùò lé ɩ́mɩ́ ŋwɔ́ɔ kɔ́. 64Mà sɩ́tɛ̀ ɩ́ kʋ lé nyʋa àna kʋ amɔ nyièdɩ, lé a nɩ́ bhɩ́ɩ́ cɩ́cása kʋ́.» Cémʋ́ ɩ́ kʋ a, nyʋaá à nɩ́ Zozíi a fádùò kà a, ɔ́ yì a wá sɩsɔɔ́ a tányɩ lé ɔ́ yì wá sáà nyɔɔ́ nà kɔ̀ɔ̀ sa a. 65Lé ɔ́ srʋ á sɔ́kʋ́ mà: «Wɔlíɛ́ lɩ̀à ɩ́mɩ́ kà ŋnɩ́ a zà ɩ́ srʋɛ wá amɔ mà, Tʋ́ɔ́ ɔ̀ cíe mɔ́ɔ a, ɔ nɩ nɩ́ nyɔ tíe lé ɔ ká mɔ́ɔ mʋ́ yi a, nyɔ mɔ̀glʋ̀ nɩ́ ka míi.»

66Bháa yɩ́ ʋ́ jɩ̀ a, Zozíi a kʋjɩ̀nyʋ̀àà kɔ́kɔ́mnɩ́ wlʋ́lɔɔ yɩ́ gwá, á wlʋ́ yɩ́ ɔ kʋjɩ̀jɩ́ɛ́ a gbʋ́. 67Bhʋ́ kʋjɩ̀nyʋ̀àà kʋ́gbá sɔ́ɔ́ tuo ʋ́ a, ɔ́ yrá á mà: «Bhè amɔ! A nɩ́ ka sáà mʋʋ?» 68Simɔ́ Pɩ́ɛ́lɩ anɩ́: «Kanyɔɔ̀, bhè nyɔ gbá gɔ̀ à yi lɛ́ sɔ́kʋ́ mʋ a, ɛ̀ nɩ̀ nɩ́ mɔ̀ ŋwɔ́ɔ a? Máà nà cícíwɔlɩ nyɛ́ kɔ́ɔ́ ʋ̀ nɩ́ bhɩada ka a. 69Àmɔ̀ à kà nà cícíwɔlɩ a cɩ́cása lé à yì sáà saá mà mɔ̀ ŋwɔ́ɔ Lagɔ a Kplɔkplɔnyɔɔ́#6.69 Lagɔ a Kplɔkplɔnyɔɔ́, á yi sáà cí mà Kláyɩ́sɩ, à ʋ́ ne sa nyɔ. ɔ́ cíe a!» 70Lé Zozíi srʋ á mà: «Aa kʋ́gbá sɔ́ɔ́, mɔ́ɔ nɩ́ amɔ mʋ́ gbázɩ̀ lé ɔ̀ nɩ́ amɔ wlee? Sɩ́tɛ̀ ɩ́ kʋ bhè dɩ́blʋ a múó kʋ amɔ nyièdɩ.» 71Wɔlíɛ́ ɔ́ cí lɛ́ sɩ́tɛ̀ a, Simɔ́ɔ Sɩkalɩ́ɔ́tʋ a yʋ́ Zudáa ɔ́ sa. Ɔ́mɔ́ nà kɔ̀ɔ̀ lɛ́ sa. Zozíi a kʋjɩ̀nyʋ̀àà kʋ́gbá sɔ́ a nyièdɩ a nyɔ kʋ̀ʋ.#6.71 A zɛlɩɩ sáà 13.2,21.

Currently Selected:

Záan 6: NEY

Highlight

Copy