Lúkɩ 10
10
Zozíi cíe ɔ́ kʋjɩ̀nyʋ̀àà á gwlɩ̀ ta lé kʋ́gbá sɔ́
(Matíe 10.7‑16)
1Ɩ̀lɩa plɩ́ a, Kanyɔ sa sɔ́kʋ́ kʋjɩ̀nyʋ̀àà á gwlɩ̀ ta lé kʋ́gbá sɔ́ lé ɔ́ cíe a, sɔ́ sɔ́ sɔ́, ɔ́ srʋ á mà a plɩ́ bhlà dí a mnɩ́ lé dááfɩ́ɛ́ ɔ́mɔ́ mɔ̀glʋ̀ na ká la plɩ́ a, á mʋ mɔ̀ɔ. 2Lé ɔ́ srʋ á mà: «Lágbàà nɩ́ bɛ́ bhè a fányʋaá nɩ́ zù, a bhibhie lágbàà a kanyɔ ɔ ká fányʋa wɔlɩ́ pá. 3A mʋ mà náa cíe amɔ, cémʋ́ á cíele bhlábhlɩ́ vʋvʋmna á nyièdɩ a. 4A nɩ mʋ a, a ná ŋwʋ́ a nyoku moníi a mʋ́ŋwʋ̀lɛ gɔ̀, a ná fa sakɔ́sʋ, a ná fa síi, a yà nyɔ sɔ́ ná pápa sáà yúó nyúzɔ kʋ́.
5Gbíé fɩ́ɛ́ mnɩ́ a na ká pla a, a cí fɩ́ɛ́ mà: pʋ́pʋ́ɛ́ yi Gbó a mnɩ́! 6Mà nyɔ nɩ kʋ gbó lé ɔ nɩ ŋwɔ́ɔ pʋ́pʋ́ɛ́ a nyɔ a, a pʋpʋ́ɛ́ yio kʋ́ ŋnɩ, ɩ́zà sɩ́tɛ̀ a nyɔ nɩ nɩ́ gbóó a mnɩ́ kʋ a, ɛ́ yi amɔ kʋ́ yrɩ́bhaà. 7Nyɔ nɩ nyɛ́ amɔ sabɔ̀da ɔ gbó a, a bɔ́ɔ sá, a nɩ nyɛ́ amɔ nyú a, a mná, a nɩ nyɛ́ amɔ lelilɩ a, a li, mà nɔnʋzrɩ̀nyɔ ka lɛ pɛ́ɛ. A ná wlʋ́ bhʋ́anɩ gbóó á mnɩ́ lé a ká yígàdà gbo àna a mnɩ́ mʋ.
8Díé fɩ́ɛ́ mnɩ́ a na ká mʋ a, a nɩ nyɛ́ amɔ kʋplada a, lelilɩɛ́ á na ká amɔ nyɛ́ a, a lii! 9A yalɩma gupuonyʋa a na ká mɔ̀ɔ ŋnɩ a, lé a srʋ á mà: Lagɔ a Léyibhlɩɛ́ ya amɔ gɔ̀ ŋnɩ.
10A nɩ ŋnɩ dú kʋ́, lé mɔ̀ɔ a nyʋa nɩ nɩ́ amɔ kʋplada bhá a, a bhli dúó lé a srʋ nyʋaá mà: 11A dúó mnɩ́ a mʋ́mʋɩɛ́ kʋ̀ à kokokpí jɩ̀ a, ɩ́mɩ́ à gbɔ́dɔ lé à tie mɔ̀ɔ, mà a yɩbhlɩ sáà sa mà Lagɔ a Léyibhlɩɛ́ ya amɔ gɔ̀ ŋnɩ. 12Náa srʋɛ yɩ́ sáà amɔ mà, Lagɔ a tɩ́tɩ́plɔyruo kʋ́, bhʋ́anɩ dúó mnɩ́ nyʋaá a nɩ kalɩmɛɛ́ yi Sɔdɔ́mʋ a nyʋaá a nɩ kalɩmɛɛ́ gɔ̀ plɩ́.
Dí ànɩ nɩ́ ŋwnʋ́ Lagɔ̀wɔ̀lɩ̀ɛ̀ kʋ́
(Matíe 11.20‑24)
13Kplé ya mɔ̀ kla mɔ̀ Kolazɛ́ɛ, kplé ya sáà mɔ̀ kla mɔ̀ Besayidáa! A ká saá yɩbhlɩ mà lɛ̀ wɔ̀lɩ̀ɛ̀ fɩ́ɛ́ ɩ̀ nilo amɔ mnɩ́ a, Tílɩ yà Sidɔ́ɔ#10.13 Tílɩ yà Sidɔ́ɔ: Lówùdùbhlɩ kʋ̀ʋ̀. sɔ́ ɩ ná nilo a, mɔ̀ɔ a nyʋa yi la cɩ́cɩɩ̀. Á yi la bhɛ̀gɩ yrʋ́ʋ̀, lé á yi tʋ́tɔ a mnɩ́ sá kplákplaà, lé á yi la Lagɔ á drɩ̀ bhɔtɔɔ̀, á nyumoé a zà. 14Ɩ́mɩ́ nà kà ŋnɩ́ ka lé Lagɔ a tɩ́tɩ́plɔyruo kʋ́, Tílɩ yà Sidɔ́ɔ sɔ́ anɛɛ́ yi kʋ́ yɔ́lʋma lé ɛ́ yi amɔ anɛɛ́ kʋ́ zi. 15Ɛ̀ nɩ̀ ŋwɔ́ɔ mɔ̀ Kapɛnayʋ́mʋ a, nà dùòkʋ́ Lagɔ na ká mɔ̀ ŋwnú fa a? Kpɔkplá di ɩ̀ ŋwʋ́ɛ́. Ɔ́ na ká mɔ̀ sá kwlée lé kà dʋ̀dʋ a glù ŋnɩ.»
16Zozíi srʋ sɔ́kʋ́ ɔ́ kʋjɩ̀nyʋ̀àà mà: «Ɔ̀ nɩ pʋ amɔ nyúkwlí a, mɔ́ɔ ɔ́ pʋ nyúkwlí, ɔ̀ nɩ̀ gblɩ̀ amɔ a, mɔ́ɔ ɔ́ gblɩ̀, ɔ̀ nɩ̀ gblɩ̀ sáà mɔ́ɔ a, nyɔɔ́ ɔ̀ cíe mɔ́ɔ a, ɔ́mɔ́ ɔ́ gblɩ̀.»
Zozíi a kʋjɩ̀nyʋ̀àà gwlɩ̀ɛ̀taá lé kʋ́gbá sɔ́ɔ́ ya yrɩ́bha
17Zozíi a kʋjɩ̀nyʋ̀àà gwlɩ̀ɛ̀taá lé kʋ́gbá sɔ́ɔ́ ɔ́ cíe wá a, á yrɩ́bha lɔlɔ a mnɩ́ lé á srʋ Zozíi mà: «Kanyɔɔ̀, nà ŋnɩ́ mʋ́ nyumozìzi ŋwʋ́ɛ́ ʋ́ àmɔ̀.» 18Bhʋ́ Zozíi srʋ á mà: «Ɩ́ yɛ́ Dɩ́blʋ lé ɔ́ wlʋ́ lagɔɔ́ lé ɔ́ bhli zɔ̀ nànɩ cémʋ́ lagɔ̀ɔ̀ wɛ́zɛ a. 19A dʋdʋ̀ yáa amɔ pɔ́wa nyɛ́ a ká bɛbɛlɩ yà gbúkɩ́ sɔ́ jɩ̀ námnɩ, a ká sáà a gblɩ̀nyʋa a pɔ́waá jɩ̀ námnɩ lé wɔlɩ́ nɩ́ ka amɔ ŋnɩ. 20Ɩ́zà nyumozìzi ŋwʋ́ɛ́ ʋ́ amɔ a, ɩ́mɩ́ nàa ŋwɔ́ɔ a lɔlɔ, mà a ŋnɩ́ɛ́ ɩ̀ jɩ́jrɔ̀ lagɔ̀duú a, ɩ́mɩ́ nɩ̀ ka amɔ lɔlɔ kʋ́!»
Ɔ̀ kalɛ yídùò a ɔ́mɔ́ núé Lagɔ̀wɔ̀lɩ̀ɛ̀
(Matíe 11.25‑27; 13.16‑17)
21Tányɩɛ́ a múó a mnɩ́, Zozíi kʋ cída lé Blɔ̀blɔ̀zùzùò ŋwʋ́ ɔ́ lɔlɔ duo kʋ́ lé ɔ́ bhɩa wɔlɩ́, ɔ́ anɩ́: «Tʋ́ʋ̀, mɔ̀ ɩ́ falɛ ŋwnú nà gbɩ́ a námɛ a zà, mɔ̀ ŋwɔ́ɔ lagɔɔ́ yà dʋ̀dʋ kʋ́ sɔ́ a Kanyɔ! Àyúó, cémʋ́ ɩ̀ nɩ lé ɩ̀ pápa a yúósʋsʋ́ wɔlɩ́ɛ́ ɩ̀ zizie fíkenyʋa yà bɔ́gʋ̀yɩ̀bhlɩ̀nyʋa sɔ́ yɩ́ a. Aan, à Tʋ́ʋ̀, sɩ́tɛ̀ mʋ́ ɩ̀ yrá lé ɩ nɩ kʋ la, ɩ́zà ɩ́ kʋ́ saá. 22Ɩ tʋ́ nyɛ́ mɔ́ lɩ́ɛ́ fɩ́ɛ́, nyɔ a múó nɩ́ yʋ́ɔ́ yì, Tʋ́ɔ́ a múó yìo, lé nyɔ nɩ́ sáà Tʋ́ɔ́ yì, yʋ́ɔ́ a múó yìo, lé nyʋaá, yʋ́ɔ́ yrá lé ɔ ká Tʋ́ɔ́ pápa lé à kɔ̀ sáà yɩbhlɩ a.»
23Tányɩɛ́ mʋ́ Zozíi cí sɩ́tɛ̀ a, ɔ́ gà ɔ́ kʋjɩ̀nyʋ̀àà klʋ́ lé ɔ yàsɔ́ gbʋ́gbʋ lé ɔ́ srʋ á mà: «Amɔ nyʋaá à lɛ́bhɛ wɔlɩ́ɛ́ a yɩ́ dʋdʋɛ lɛ́ a, a ya pʋ́! 24Náa srʋɛ amɔ mà Lagɔ a nékʋ́cinyʋa kɔ́kɔ́mnɩ́ yà léyuo kɔ́kɔ́mnɩ́ sɔ́, yrá la wɔlɩ́ɛ́ a lɛ́bhɛ lɛ́ a, yɛ́yʋ́, mà á nɩ́ɩ yɛ́, a ká la sáà mɩ́ nú mà á nɩ́ɩ nú.»
Náma Samalitɛ́ɛyʋ a núnúó
25Zozíi bhɩa cícíé zɔ̀ a, lɔ̀ a másɛ a múó yio zɔ̀ sa ka. Ɔ́ yi a, ɔ́ srʋ ɔ́ mà: «Másɛɛ̀, cégbá mʋ́ ɩ́ yi nɩ lé ɩ́ yi kɔ́ɔ́ ʋ̀ nɩ́ bhɩàda ka a, yɛ́ a?» 26Bhʋ́ Zozíi yrɔ́ɔ́ mà: «Cégbá á jɩ́jrà Jràmáá a bɔ́gʋ̀ɔ̀ a mnɩ́ à? Wɔlɩ gbá ɩ̀ zɛ̀lɛ mɔ̀ à?» 27Nyɔɔ́ anɩ́: «Á jɩ́jrà mɔ̀ɔ mà: Wà nà Kanyɔɔ́ ɔ̀ ŋwɔ́ɔ nà Lagɔ a, nà duo a lɔ̀fɩ́ɛ́ a mnɩ́, wàlɔ̀ɔ̀ nà zuzu a lɔ̀fɩ́ɛ́ a mnɩ́, wàlɔ̀ɔ̀ nà fɩ́ɛ́ a lɔ̀fɩ́ɛ́ a mnɩ́, lé nà bhobhoé a lɔ̀fɩ́ɛ́ a mnɩ́, lé cémʋ́ ɩ̀ wà ɩ̀ nyoku a, wà sɩ́tɛ̀ ɩ̀ liyʋ.#10.27 A zɛlɩɩ sáà Detro 6.5; Levíi 19.18.»
28Zozíi srʋ ɔ́ mà: «Wɔlɩ́ɛ́ ɩ̀ cí a, nà bhɩa ʋ́ mɩ́. Naa, nɩ̀ mʋ a, cémʋ́ ɩ̀ cí lɛ́ a, nɩ sɩ́tɛ̀ mà kɔ́ɔ́ ʋ̀ nɩ́ bhɩada ka a, ɩ̀ yi ʋ yɛ́.»
29Nyɔɔ́ bhlalɛ àyɩ wɔlɩ́ kʋ́, ɔ́ yra sɔ́kʋ́ Zozíi mà: «Bhè ɔ̀ ŋwɔ́ɔ lɛ́ ɩ lía áa?» 30Lé Zozíi bhá sɔ́kʋ́ ʋ́ niwɔlɩ lé ɔ́ srʋ ɔ́ mà: «Nyɔ a múó wlʋ́ɛ́ Zelízalɛ́mʋ ɔ́ mnɛ Zelikóo, lé kàpàkápányʋa ŋnɩlɔ nyúzɔ kʋ́ lé lɩ́ɛ́ fɩ́ɛ́ ɔ́ ka a, á bhɔ́ɔ́ ɔ̀ mɩ́ gɔ̀, lé á bhítoó kúkúsa, lé á tɩ ʋ́ mɔ́ lé á mʋ. 31Ɔ́ pʋ́ nyúzɔ kʋ́ lé Lagɔ̀bʋ̀bɔ̀nyɔ a múó yi plɩ́ ka a, ɔ́ yɛ́ ɔ́ a, ɔ́ɔ kpálɔɔ́ lé ɔ́ plɩ́. 32Bhʋ́ ɔ́ pʋ́ lé Levítɩyʋ#10.32 Levítɩyʋ: Lɔ́lɔ́kpaá á wlele Levíi a, a mɔ́yuo ŋwɔ́ɔ Levítɩnyʋa. Á ŋwɔ́ɔ Lagɔ̀bʋ̀bɔ̀nyʋa a kʋfanyʋa. a múó yi sɔ́kʋ́ plɩ́ ka a, céamúó mɩ́ ɔ́ nɩ, ɔ́ɔ kpálɔɔ́ lé ɔ́ plɩ́. 33Mà Samalitɛ́ɛyʋ a múó ɔ̀ plɩ́ɛ́ ɔ̀ mnɛ lówùduú a, tanyɩɛ́ mʋ́ ɔ́ yɛ́ ɔ́ a, ɔ́ ŋazɩ kɔ́sɔlɔɔ́ kʋ́. 34Ɔ́mɔ́ Samalitɛ́ɛyʋɔ́ mɔ́ ŋnɩ ɔ́ gɔ̀ lé ɔ́ dʋdʋ̀ɔ̀, lé ɔ̀ bhá kpʋ́ lé duváa lé ɔ̀ jrió, lé ɔ̀ gbàdɩ̀ ɔ jíé, lé ɔ́ ŋwʋ́ ɔ́ ɔ jákásɩɛ́ jɩ̀, lé ɔ́ fɔɔ́ otɛ́lɩ a múó a mnɩ́, mɔ̀ɔmɔ̀ ɔ́ zrɩ námasa ɔ́ nɔnʋ. 35Zrɩ̀ɩ zɩ lé Samalitɛ́ɛyʋɔ́ na ká mʋ a, ɔ́ nyɛ́ otɛ́lɩɛ́ a nɔnʋzrɩ̀nyɔ̀ɔ̀ flèejì a sɔ́ lé ɔ́ srʋ ɔ́ mà: Ɩ́bhìè bhá moníe lɩ̀à lé ŋwʋ́ nyɔ lɩ̀à yɩ́gɔ̀ àyé, mà náa mnɛ ká yi, moníe nɩ nɩ́ wlú ŋnɩ a, nɩ yrɩ́bha, ɩ́ yii bhleè.»
36Zozíi bhɩa cícíé zɔ̀ a, bhʋ́ ɔ́ yrá lɔ̀ a másɛ mà: «Nyɩ́kpɔcié taá à kà a wɔlɩ́ ɩ́ cí lɛ́ a, á nyièdɩ a, nyɔ gbá ŋwɔ́ɔ nyɔɔ́ a liyrukanyɔ áa?» 37Lɔ̀ a másɛ anɩ́: «Nyɔɔ́ ɔ̀ bhá ŋazɩ̀dùò lé ɔ̀ zrɩ ɔ́ nɔnʋ a, ɔ́mɔ́ ŋwɔ́ɔ ɔ liyrukanyɔ.» Ɔ́ cíi a, bhʋ́ Zozíi srʋ ɔ́ mà: «Mɔ̀ nà sɛ́fʋɔ́ nɩ mʋ a, nɩ ɔ́mɔ́ nyɔɔ́ bhísakʋ́!»
Zozíi kʋ Mátɩ yà Malíi sɔ́ gɔ̀
38Zozíi yà ɔ́ kʋjɩ̀nyʋ̀àà sɔ́ kʋ nyúzɔ kʋ́ á mnɛ lé ɔ́ pla dú a múó a mnɩ́, mà ŋwnɔ́ kʋ̀ mɔ̀ɔ lé á wlele Mátɩ a, ɔ́mɔ́ bhɔ́ɔ kʋplada. 39Mà Mátɩɛ́ ka nɩ́ayʋ́ŋnɩkeyʋ a múó, ɔ́mɔ́ a wlele Malíi, ɔ́ yi lé ɔ́ plɩ́ɩ Kanyɔ a bhɩ zɔ̀ lé ɔ́ kplá sá lé ɔ́ pʋɛ yɩ́ wɔlɩ́ɛ́ ɔ́ cíe a, nyúkwlí. 40Bhè Mátɩ a múó bie ʋ́, ɔ nɩ́ cásɩ ka, ɩ́ nɩ lé ɔ́ ŋnɩ Zozíi gɔ̀ lé ɔ́ srʋ ɔ́ mà: «Kanyɔɔ̀, ná múó bie ʋ́ ɔ̀ zrɩɛ, bhè ɩ nɩ́ayʋ́ŋnɩkeyʋɔ́ kplá nà bhɩɩ́ zɔ̀ sá, ɩ nɩ́ bhlá mɔ̀ɔ̀? Srʋ ɔ́ bhlɛ́ɛ̀ lé ɔ yi ɔ ká mɔ́ɔ kʋ́ fa à!» 41Lé Kanyɔ srʋ Mátɩ mà: «Mátɩ, Mátɩ, ɩ̀ yɩa ɩ̀ nyoku kwlɩ́ flɛ́ɛsa wɔlɩ́ kɔ́kɔ́mnɩ́ a ninie a zà. 42Bhè wɔlɩpɩʋ a múó coco kà gbʋ́ a, ʋ́mʋ́ Malíi bhá lɛ́ mɔ̀ɔ, ʋ́mʋ́ náa sáà nyɔ nɩ́ ka míi lé ɔ ká ɔ̀ mʋ́ gɔ̀ bhá.»
Currently Selected:
Lúkɩ 10: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
