Lúkɩ 11
11
Zozíi cɩ́a ɔ́ kʋjɩ̀nyʋ̀àà bhibhie
(Matíe 6.9‑13)
1Tányɩ a múó Zozíi kʋ dáamúó ɔ́ bhibhie, ɔ́ bhɩa bhibhie zɔ̀ a, ɔ́ kʋjɩ̀nyʋ̀àà a nyièdɩ a nyɔ a múó srʋ ɔ́ mà: «Kanyɔɔ̀, cémʋ́ Záan cɩ́a lɛ́ ɔ́ kʋjɩ̀nyʋ̀àà bhibhie a, cɩ́a sáà àmɔ̀ bhlɛ́ɛ!» 2Zozíi anɩ́: «A nɩ bhibhie a, a cí mà:
À Tʋ́ɔ́ kʋ̀ lagɔɔ́ a,
Nà ŋnɩ́ɛ́ ɩ blɔ̀!
Nàa pʋ́pʋ́ɛ́ yi!
3Nyɛ́ àmɔ̀ à yruú a lelilɛ
4Cie àmɔ̀ à nyumoé,
Cémʋ́ à sɛ́fʋɔ́, à ciele lɛ́ sáà
Nyʋaá à nie àmɔ̀ nyumoé a!
Lé nàa cíe àmɔ̀ sá
Lé nyumozùzu nɩ ka àmɔ̀ zɔ̀ sa à
À nɩ̀ kà nyumoé a mnɩ́ bhli!»
Nɩ̀ yráa Lagɔ lɛ́ mʋ́ a, ɔ́ nyɛ́ mɔ̀ mɛ́
(Matíe 7.7‑11; 15.22‑28; Lúkɩ 18.1‑8; Zákɩ 1.5‑7; 1 Záan 5.14‑15)
5Lé Zozíi srʋ á sɔ́kʋ́: «A nyièdɩ á nyɔ a múó nɩ ka bheyi, lé ɔ nɩ yi dʋdʋ́kádʋʋ́ ɔ́ kplu bhɩtɩ ka, lé ɔ nɩ srʋ ɔ́ mà: Bhéè, ɩ́bhìè gbla mɔ́ɔ flɔ́ɔbhi a ta 6mà ɩ bheyi a múó ya lówùduú wlʋ́ ɔ́ ya mɔ́ɔ zɔ̀ vú, lé nɩ́ ʋ́ lelilɛ ka kɔ́ɔ́ nyɛ́. 7Lé ɔ bheyie nɩ kʋ sré lé ɔ nɩ srʋ ɔ́ mà: Ɔ̀ɔ̀, nàa yɩa mɔ́ɔ kwlʋ́ mà yáà ná yúó sɔ́, à yà sá pʋ́. Nɩ́ a ká yɩ́ glù sɔɔ̀ lé ká nyɔ flɔ́ɔ nyɛ́. 8Náa srʋɛ amɔ mà: lɩ́ɛ́ fɩ́ɛ́ ɔ́ bheyie yrálɔɔ́ lɛ́ mʋ́ a, ɔ́ yi ɔ̀ mɩ́ nyɛ́, mà ɛ̀ nɩ́ bheyilɛ a zà ŋwɔ́ɔ, mà cémʋ́ ɔ́ bhite kpluó lé ɔ́ yɩɔ kwlʋ́ a, ɩ́zà ɔ́ na ká glùsɔɔ̀. 9Naa náa srʋɛ amɔ mà: a zraà mà á yi amɔ nyɛ́, a mʋ́mɔɔ̀, mà lɛ́ a mʋ́mɔ a, a yie yɛ́, a bhɩtɩ kplu, mà á yi ʋ́ ka. 10Nyɔ nɩ zra a áa nyɛ́ ɔ́, nyɔɔ́ ɔ̀ mʋ́mɔ a, ɔ́ɔ yɛ́, lé nyɔ nɩ bhɩtɩ kplu a, áa kalʋʋ́.
11Yʋ́ gbá ɔ̀ yi ɔ́ tʋ́ zrɩ̀ zra lé ɔ tʋ́ yi bɛbɛlɛ nyɛ́ à? 12Yʋ́ nɩ́ zra sáà ɔ tʋ́ kɔkɔgè, lé ɔ kɔ́ɔ́ gbúkɛ́ nyɛ́? 13Amɔɔ́ à ŋwɔ́ɔ mɔ́nyùmònyʋa a, a yì a yúó a námalɩ a nyɛ́ sa. Bhʋ́ à Tʋ́ɔ́ ɔ̀ kʋ̀ ɔ̀ lagɔɔ́ a, cégbá mʋ́ ɔ nɩ́ ka nyʋaá à yrálɔɔ́ Blɔ̀blɔ̀zùzùò mʋ́ a, nyɛ́ a?»
Zozíi a pɔ́waá Lagɔ ɔ̀ nyɛ́ ɔ̀ má
(Matíe 12.22‑30; Málɩ́kɩ 3.22‑27)
14Zozíi jɩ́ɩ yruú a múó kʋ́ nyumozùzùò ʋ̀ kʋ̀ nyɔɔ́ jɩ̀ lé ɔ nɩ́ cí a. Tányɩɛ́ mʋ́ nyumozùzùò wlʋ́ nyɔɔ́ jɩ̀ lé ɔ́ bháa ʋ́ cícíé kʋ́ a, neé mna nyʋa fɩ́ɛ́ kʋ̀ ʋ́ a. 15Sɩ́tɛ̀ ɩ́ kʋ bhè bhlɔ̀bhlɔ̀nyʋa anɩ́: «Nyumozùzùò ʋ̀ kámalɛ nyumozìzìè fɩ́ɛ́ lé á wlele Bezebúlʋ a, ʋ́mʋ́ ʋ̀ nyɛ́ Zozíi pɔ́wa lé ɔ́ jɩ́lɛ nyumozìzi.» 16Lé nyʋa àna yrá ɔ zɔ̀ sasʋ́, á srʋ ɔ́ mà: «Nɩ àa drɩ̀ wɔlɩ́ɛ́ yi amɔ neé mna a, bhʋ́ a yi saá yɩbhlɩ mà Lagɔ nyɛ́ mɔ̀ pɔ́wa.» 17Cémʋ́ Zozíi yì á bhobhoé a, ɔ́ srʋ á mà: «Léyibhlɩ a mnɩ́ a nyʋa a pʋpʋ nɩ dúlo mʋ́ lé a nɩ vʋ a, bhlɩ́ɛ́ ɛ́ɛ bhusule lé ɛ mnɩ́ a ghlɩ bhlibhlile jɩ̀.»
18A nie mà: «Bezebúlʋ nyɛɛ́ mɔ́ɔ pɔ́wa lé ɩ́ jɩ́lɛ nyumozìzìè, nɩ̀ yɩ́ a, nànɩ cémʋ́ Dɩ́blʋ̀ɔ̀ fa lɛ́ ɔ nyoku tʋ́ a, bhè Dɩ́blʋ̀ɔ̀ nɩ fa ɔ nyoku tʋ́ a, cégbá mʋ́ ɔ léyibhlɩɛ́ yi dá ka áa? 19Bhè Bezebúlʋ nɩ nyɛ́ mɔ́ɔ pɔ́wa lé nɩ jɩ́ɩ nyumozìzìè a, bhè amɔ, nyɔ gbá ɔ̀ nyɛ́ a yúó pɔ́wa lé á jɩ́lɛ nyumozìzìè áa? Ná srʋɛ amɔ mà a yúóó mɔ̀glʋ̀ nà kà a tɩ́tɩ́ plɔɔ̀. 20Mà Lagɔ a pɔ́wa nɩ bhá lé nɩ jɩ́ɩ nyumozìzìè a, a yɩbhlɩ saá mà Lagɔ a Léyibhlɩɛ́ a pɔ́waá ya amɔ gɔ̀ ŋnɩ.
21Nyɔɔ́ kà fɩ́ lé ɔ̀ kà pápálɩ a, ɔ gbó nɩ klulo námasa a, nyɔ nɩ́ ka míi lé ɔ ká ʋ́ ɔ kakalɛ bhá lé ɔ kɛ́ɛ́ fa. 22Mà nyɔ kà fɩ́ lé ɔ̀ zio kʋ́ a, ɔ́mɔ́ nà kɔ̀ɔ sɩa, lé ɔ̀ kà ʋ́ ɔ pápálɩɛ́ ɔ́ tɔ̀ duo a, ɔ́mɔ́ gɔ̀ bhá, lé ɔ̀ kà sáà ʋ́ ɔ kakalɩɛ́ fɩ́ɛ́ bhá lé ɔ̀ kɩɩ nyʋa bhábhà.
23Nyɔɔ́ yɔ́ɔ̀sɔ́ à nɩ́ núnu a, ná gblɩ̀nyɔ kʋ̀ʋ, lé nyɔɔ́ yɔ́ɔ̀sɔ́ à nɩ́ mʋ́mɔ kʋ́ a, ɔ́ɔ ŋáta.
Nyumozùzu yie dɛ́ɛ́ á jɩ́lʋʋ́ a dʋdʋ̀ kà
(Matíe 12.43‑45)
24Nyumozùzu nɩ wlʋ́ nyɔ jɩ̀ lé ʋ́ nɩ mʋ a, bhlɩ́ɛ́ kɛ̀ɛ̀ dʋ̀dʋ tɛ́ síóko síóko lé pitíplʋ nɩ́ wlʋ́ʋ jɩ̀ a, mɔ̀ɔmɔ̀ ʋ́ mnɛ. Mɔ̀ɔmɔ ʋ́ mʋ́mɔlɛ kʋwɔtɔmada, ʋ nɩ nɩ́ kʋwɔtɔmada yɛ́ a, ʋ́ nie mà: Ká ná wlʋɔ́ mnɩ́ ɩ́ wlʋ́ a, yrɩ́bha. 25Ʋ́ nɩ yrɩ́bha lé ʋ nɩ yi, lé wlʋɔ́ mnɩ́ nɩ nynʋpʋɔ námasa a, 26ʋ́ʋ mnɛ lé ʋ́ wle nyumozìzi kádɩ ànɩ a gbàásɔ́ lé ɩ́ yie wlʋɔ́ a mnɩ́ sí ka, zɔ̀bhɩ̀àdàà mɔ̀ nyɔɔ́ jɩ̀ ɩ́ yie a, nà kɔ́ ŋátɔ lé ʋ́ plɩ́ɛ́ gɔ̀.»
Wɔlɩ́ gbá ɩ̀ nyɛ́ nyɔ jɔ̀lʋ a?
27Zozíi bhɩa kɔ́ɔ̀kʋ́ cícíé zɔ̀ a, ŋwnɔ́ a múó sané jrè a mnɩ́, ɔ́ anɩ́: «Ŋwnɔ́ɔ́ ɔ̀ gbɩdɩ̀ mɔ̀ ɔ nɩkpla a mnɩ́ lé ɔ̀ nyɩ́a mɔ̀ a, ɔ pʋ́!» 28Zozíi bháʋ́ niwɔlɩ ɔ́ anɩ́: «Nyʋaá à pʋ́ a, ámá ŋwɔ́ɔ nyʋaá à pʋɛ Lagɔ̀wɔ̀lɩ̀ɛ̀ nyúkwlí lé à ŋwʋ́ɩ́ kpá a.»
Nyʋa yráa Zozíi lɛ̀ mʋ́
(Matíe 12.38‑42)
29Cémʋ́ nyʋaá yiyile kɔ́ɔ̀kɔ́ jɩ̀ a, bhʋ́ Zozíi sané, ɔ́ anɩ́: «Zɩmnɛ́ a nyʋa a nɩnɩgbɩ nyù kpʋanyɩ, sɩ́tɛ̀ ɩ́ kʋ bhè á yrá lé a nɩ á lɛ̀wɔ̀lɩ, mà lɛ̀wɔ̀lɩ nɩ́ ka nilo, ɛ̀ nɩ̀ nɩ́ ka Zonásɩ a lɛ̀wɔ̀lɩ̀ɛ̀ ŋwɔ́ɔ a. 30Cémʋ́ Zonásɩ plɩ́ wá Ninívʋ a nyʋa á lɛ̀ a, sɩ́tɛ̀ tɛ̀ɛ̀ Nyɔɔ́ a Yuwliyʋɔ́ na ká zɩmnɛ́ a nyʋa a lɛ̀ plɩ́. 31Lagɔ a tɩ́tɩ́ plɔyruo kʋ́, jie á zɔ̀ a léyiŋwnɔɔ́ yi zɩmnɛ́ a nyʋaá lɩ̀à a drɩ̀ nynʋ́vʋ̀ kà yi ɔ ká a gbʋ́ wlú ŋwʋ́, máà ɔ́ wlʋ́ ɔ bhlé, bhè mɔ̀ nɩ́ bɛ́ lé ɔ́ yi lóo Salomɔ́ɔ a dɔ̀ nyúkwlí pʋ ka, bhè nyɔɔ́ kʋ dɛ́ amɔ nyièdɩ a, ɔ́ zi lóo Salomɔ́ɔ kʋ́!#11.31 A zɛlɩɩ sáà 1 Léyuo 10.1‑10. 32Lagɔ a tɩ́tɩ́ plɔyruo kʋ́, Ninívʋ a nyʋa yi zɩmnɛ́ a nyʋaá lɩ̀à a drɩ̀ nynʋ́vʋ̀ kà yi ɔ ká á gbʋ́ wlú ŋwʋ́ʋ. Máa tányɩɛ́ mʋ́ Ninívʋ a nyʋa nú wá Lagɔ a nékʋ́cinyɔ Zonásɩ a cícíwɔlɩ a, á wlʋ́ wá á nyumoé a gbʋ́, náa srʋɛ sáà amɔ mà nyɔ kʋ dɛ́ amɔ nyièdɩ, lé ɔ́ zi Lagɔ a nékʋ́cinyɔ Zonásɩ kʋ́!#11.32 A zɛlɩɩ sáà Zona 3.5.
Nápɛ a núnúó
(Matíe 5.15‑22‑23)
33Nyɔ nɩ́ ŋwʋ́ nápɛ klʋ́ lé ɔ kɛ́ɛ́ zizìè, a nɩ́ ŋwʋ́ sáà nápɛ klʋ́ lé a kɛ́ɛ́ sòlú zɔ̀ zízìè#11.33 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀. zɩkpa a mnɩ́ á bubuole lé nyʋa fɩ́ɛ́ ɩ̀ yie a, ɛ́ ŋana a kʋ́. 34Nà yɩ́ ŋwɔ́ɔ nà kpɩkpɩ a nápɛ. Nà yɩ́ nɩ ná a, nà kpʋkpa a yɩ́ wlʋ́ɛ́ mɔ̀. Ɩ́zà, ɛ nɩ nɩ́ ná a, cúcú mʋ́ nà kpʋkpa kʋɛ. 35Naa, mányɩ ɩ̀ nyòku bhè nápɛɛ́ kʋ mɔ̀ mʋ́ a, ɛ nɩ ka nyúmo, ɛ nɩ ka cúcú plɩ́. 36Mà nà kpɩkpɩ a lɔ̀fɩ́ɛ́ nɩ kʋ nápɛ a mnɩ́ a, lé pɩ́ʋ́ ànʋ nɩ nɩ́ cúcú kʋ a, cémʋ́ nápɛɛ́ ŋana lɛ́ plátata a, sɩ́tɛ̀ mʋ́ nà kpɩkpɩ a lɔ̀fɩ́ɛ́ na ká lʋ.»
Zozíi pla Falizɩ́ɛnyʋa yà lɔ̀ a másɛnyʋa sɔ́ nékʋ́
(Matíe 23.1‑36; Málɩ́kɩ 12.38‑40)
37Tanyɩɛ́ mʋ́ Zozíi bhɩa kɔ́ɔ̀kʋ́ cícíé zɔ̀ a, Falizɩ́ɛyʋ a múó wleloó ɔ gbó lilie a zà, lé Zozíi mʋ lé ɔ́ gblà tébhle jɩ̀. 38Mà cémʋ́ Falizɩ́ɛnyʋa a Jràmá a mnɩ́, nyɔ ka li a, ɔ́ wɔlɔ fɩ́ɛ́ wlɩ a, Zozíi nɩ́ɩ nɩ lé ɔ́ cíe lilie kʋ́, neé mna Falizɩ́ɛyʋɔ́. 39Lé Kanyɔ srʋ ɔ́ mà: «A lɛ́bhɛɛ, amɔ Falizɩ́ɛnyʋaá lɩ̀à, a dàplɩ yà a glàsɩ sɔ́ jɩ̀ a wɔlɔ, bhè a nɩ́ wɔlɔ ɩ mnɩ́, ɩ́zà a ŋwʋ́ɛ́ a mnɩ́ ghlíighlíé yà bhàlʋ sɔ́ sá. 40Nɩnànyʋa yɩ, cémʋ́ Lagɔ nɩ kpɩkpɩ a, sɩ́tɛ̀ mʋ́ ɔ́ nɩ́ sáà mnɩ́ nɩɩ? 41A bhá bhlɛ́ɛ a kplɔkplɔdì a mnɩ́ lé a nyɛ́ bhlɛ́ɛ ŋazɩ̀nyʋa, a nɩ nii a, bhʋ́ a wɔlɩ́ɛ́ fɩ́ɛ́ yi dá ka, lé ɩ́ yi kplɔɔ.
42Mà kplé ya amɔ kla amɔ Falizɩ́ɛnyʋa, ɛ̀kʋ̀ʋ̀ a? A pɛ́lɛ Lagɔ a nɔ́nʋ́nyokwié ɩ̀ ŋwɔ́ɔ mátɩ a, ɩ dímʋ, lé lelilɩɛ́ kʋ̀ lágbaá lé ɩ̀ ŋwɔ́ɔ gblɔ̀gblɔ, flɩ, yɩ́bhɛ, tomátɩ, ɩ́ lɔ̀fɩ́ɛ́ lɩ̀à, a pɛ́lɛ ɩ dímʋ, mà Lagɔ a cɩ́cása yà ɔ kpá ŋwʋ̀ŋwʋ́ɛ́ sɔ́ a pálɛɛ́ sɩsa kʋ́. Bhè ɩ́mɩ́ a ka lé a ká la fɩ́ɛ́ nɩ, lé ànɩ̀ɛ̀ a nie lɛ́ a, ká yɩ́ la bɩ́ bhɩa.
43Kplé ya amɔ kla amɔ Falizɩ́ɛnyʋa, ɛ̀kʋ̀ʋ̀ a? A nɩ yi zúfʋcɛcɩghlɩɛ́ a mnɩ́ a, drɩ̀ a kpí a mnɩ́ a bɔ́ɔtʋ bhlá amɔ, a nɩ yi sáà crɩ́kpaá nyʋa nyièdɩ a, bhʋ́ a yrá lé nyʋa kwlée a nyoku sá lé a pá amɔ yúó.
44Kplé ya amɔ kla, amɔɔ́ wlʋ́ mànɩ́ lésu nyʋa nɩ́ lùò bhè a námnɩ jɩ̀ a.»
45Zozíi bhɩa cícíé zɔ̀ a, lɔ̀ a másɛ a múó srʋ ɔ́ mà: «Másɛɛ̀, cémʋ́ ɩ̀ cíe lɛ́ a, àmɔ̀ ɩ̀ bhʋ́sʋlɛɛ!» 46Zozíi anɩ́: «Amɔ lɔ̀ a nyʋa, kplé ya sáà a sɛ́fʋ kla! Bédìè ɩ̀ ŋwnɔ́ kʋ́ a, ɩ́mɩ́ a sro a lía wlú lé amɔ á wlie a múó coco nɩ́ gbɔ́ lɛ́.
47Kplé ya amɔ kla, amɔɔ́ à malɛ Lagɔ a nékʋ́cinyʋa a lesié a, bhè a tinyʋa à bhlá á. 48Naa wɔlɩ́ɛ́ a tinyʋa nie a, ɩ́ ka amɔ lɔlɔ kʋ́, ɩ́zà á bhlá á, lé amɔɔ̀ malɛ yɩ́ a lési. 49Ɩ́mɩ́ ka ŋnɩ́ a zà Lagɔ bhá fíke lé ɔ́ srʋ amɔ mà:
Ɩ́ yi á Lagɔ a nékʋ́cinyʋa yà cíecíenyʋa sɔ́ fa,
Mà á yi á nyièdɩ àna bhlá
Lé á yi àna kalɩmɛ mʋ́ ŋwʋ́.
50Ɩ̀lɩa á lɔ̀fɩ́ɛ́ a zà, kɔ́ nɩ ka wá wlʋ́ lé Lagɔ a nékʋ́cinyʋaá nɩ̀ kà wá kú lé à kúé a, zɩmnɛ́ a nyʋa nà kà a kwɩ́ɛ́ a kpaá pɛ́ɛ. 51Aan, náa srʋɛ yɩ́ amɔ mà, bhá wá Abɛ́lɩ a kwɩ́ jɩ̀ lé kà Zakalíi a bhlá Lagɔ̀bʋ̀bɔ̀dàà kwɩ́ jɩ̀ ŋnɩ a, ɩ kúó fɩ́ɛ́ a kpaá, zɩmnɛ́ a nyʋa nà kà a pɛ́ɛ.
52Kplé ya amɔ kla amɔ lɔ̀ a másɛnyʋa, a ya ʋ́ klóníyié ɛ̀ kalɛ Lagɔ a fikeé a kpluó a bhá, amɔ mɔ̀glʋ̀ a nɩ́ pla mɔ̀ɔ lé a nɩ́ yrá yɩ́ sáà lé nyɔɔ́ ɔ̀ yrá mɔ̀ɔ a plaplʋ́ a, ɔ ká mɔ̀ɔ pla.»
53Zozíi wlʋ́ wlʋɔ́ mnɩ́ ɔ́ kʋ la a, lɔ̀ a másɛnyʋaá yà Falizɩ́ɛnyʋaá sɔ́ fɔɔ́ cícíé, lé a yrálɔɔ́ wɔlɩ́ kɔ́kɔ́mnɩ́ kʋ́. 54A fʋfʋɔ́ lé ɔ ká wɔlɩ́ neé páa bhè a kɔ́ɔ́ gbʋ́ wlú ŋwʋ́ʋ.
Currently Selected:
Lúkɩ 11: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
