Lúkɩ 12

Zozíi anɩ́ ŋanɩmɛ ná bhlá ɔ kʋjɩ̀nyɔ

(Matíe 10.26‑27)

1Bhʋ́ a tányɩɛ́ nyʋa kɔ́kɔ́mnɩ́ ŋnɩlɔ̀ Zozíi gɔ̀ wlú, nyʋa a zumole ka ŋnɩ́ lé á cécrele a nyoku jɩ̀, lé Zozíi srʋ ɔ́ kʋjɩ̀nyʋ̀àà mà: «A mányɩ Falizɩ́ɛnyʋa á nɩnɩgbɩ, mà áa ka yrʋʋ́. 2Wɔlíɛ́ fɩ́ɛ́ ɩ̀ zúzùò wá a, ɩ́ yi klʋ́ kalɔ. Lé wɔlɩ́ɛ́ fɩ́ɛ́ ɩ̀ nilo wá kotí kʋ́ a, ɩ́ yi zɔ̀ flʋ. 3Ɩ́mɩ́ kà ŋnɩ́ a zà wɔlɩ́ɛ́ fɩ́ɛ́ á na ká cúcú a mnɩ́ cí a, ɩ́ yi gàgàzrɩ̀ zɔ̀ flʋ; lé wɔlɩ́ɛ́ a na ká sré ŋwúŋwùò a, á yii crɩ́kpa dí kʋ́ ŋwʋ́ʋ.

4Na náa srʋɛ amɔɔ ŋwɔ́ɔ ɩ bheyinyʋa a, mà: Nyɩ́kpɔbhlanyʋa ná ka amɔ ŋanɩmɛ kʋ́, mà yɛ́kɛ́ a múó á yi mi lé á yi bhlá, a nɩ ka sɔ́kʋ́ wɔlɩ́ ànɩ a niníé míi! 5Ká amɔ nyɔɔ́ nà kà amɔ ŋanɩmɛ kʋ́ ka a, pápa a: Nyɔɔ́ nà kà amɔ ŋanɩmɛ kʋ́ ka a, ɔ́mɔ́ ŋwɔ́ɔ Lagɔ! Ɔ́mɔ́ kà pɔ́wa lé ɔ̀ yi míi lé ɔ̀ yi nyɔɔ́ ɔ̀ kú a, kosugàlàà à nɩ́ nyúmo a, mnɩ́ páa. 6Nimnilɔlɔkpa a múó kʋ ʋ́ lé a nɩ́ mákɩtɩ kʋ́ pɛ́lʋ́ ka, sɩ́tɛ̀ ɩ́ kʋ bhè ɩ́ ka Lagɔ gbʋ́! 7Amɔ, Lagɔ yì a wlú a nyí a zumole, ŋanɩmɛ ná bhlá amɔ mà a ka gbʋ́ lé a zi bhʋ́anɩ nimnilɔlɔkpaá a lɔ̀fɩ́ɛ́ kʋ́.

8Nyɔɔ́ nɩ̀ bhɩtɩ digblè nyʋa fɩ́ɛ́ a klʋ́ jɩ̀ mà, ná kʋjɩ̀nyɔ ɔ́ ŋwɔ́ɔ a, ná srʋɛ amɔ mà, Kplɔkplɔzìzi a klʋ́ jɩ̀, Nyɔɔ́ a Yuwliyʋɔ́ yi sáà bhʋ́anɩ nyɔ a zà digblè bhɩtɩɩ̀ cémʋ́ ɔ́ ŋwɔ́ɔ cɩ́cása ɔ kʋjɩ̀nyɔ a. 9Ɩ́zà, nyɔ nɩ cíi nyʋa a klʋ́ jɩ̀ mà ɔ nɩ́ ná kʋjɩ̀nyɔ ŋwɔ́ɔ a, Kplɔkplɔzìzi a klʋ́ jɩ̀, Nyɔɔ́ a Yuwliyʋɔ́ yi sáà cí mà ɔ nɩ́ ɔ́ yì. 10Nyɔ nɩ cí Nyɔɔ́ a Yuwliyʋɔ́ a zà nyumo wɔlɩ́ a, Lagɔ yi míi lé ɔ́ yi bhʋ́anɩ nyɔɔ́ cie. Mà nyɔ ká Blɔ̀blɔ̀zùzùò a zà nyumo wɔlɩ́ cí a, bhʋ́anɩ nyɔɔ́, Lagɔ nɩ́ kɔɔ́ kɔ́ɔ̀kɔ́ cie.

11Á yi amɔ zúfʋcɛcɩghlɩɛ́ a mnɩ́ wɔlɩ́ gɔ̀ fa, á yi amɔ gɔ̀mnanyʋa drɩ̀ wɔlɩ́ gɔ̀ fa, ŋanɩmɛ ná bhlá amɔ lé a ká cí mà: Bhè cégbá à yi cí bhè à yi à nyòku kʋ́ bhla áa? 12Cémʋ́ a na ká cí a, Blɔ̀blɔ̀zùzùò yi amɔ mɩ́ duo kʋ́ páa.»

A ná máa zɩkpa zɔ̀ a léyri kʋ́

13Zozíi yà nyʋa sɔ́ kʋ jrèè, lé nyɔ a múó so á nyièdɩ glù, lé ɔ́ srʋ Zozíi mà: «Másɛɛ̀, srʋ ɩ nɩ́ayʋɔ́ bhè à kà àa jáa bhábhaa.» 14Bhʋ́ Zozíi srʋ ɔ́ mà: «Ɔ̀ ŋwʋ́ mɔ́ɔ a tʋ́ a jáa bhábha wɔlɩ́ yɩ́kʋ́ à?» 15Lé Zozíi srʋ nyʋa a lɔ̀fɩ́ɛ́ mà: «A nɩ nɩ a, a mányɩ! A ná máa lɩ́ a wàwʋ́ kʋ́, mà nyɔ yi léyri a céàna li, lé léyrie nɩ́ ka míi lé ɩ ká ʋ́ mɔ́ neé saà.»

16Lé Zozíi pá núnúó a múó, ɔ́ anɩ́: «Lɛkanyɔ a múó lʋ lágbɩ, lé ɔ lágbɩ̀ɛ̀ nyɛ́ ɔ́ cɩ́cálelilɩ. 17Lé ɔ́ srʋ ɔ nyoku mà: Cégbá mʋ́ ɩ́ yi lɛ́ nɩ áa? Nɩ́ ka lelilɩɛ́ lɩ̀à a ŋwʋ́ da yɛ́. 18Cémʋ́ na ká nɩ a, yɩ́ɩ yɛ́. Ná totíé fɩ́ɛ́ mnɩ́ ɩ́ gɩglalɛ ná lelilɩ a, náa kɩ́ɩ́ wlawlaà, lé ká lɛkádɩ pá, bhʋ́ ná lelilɩ yà ná lɩ́ ànɩ̀ɛ̀ fɩ́ɛ́ sɔ́ yi plaàda yɛ́. 19Bhʋ́ a tányɩɛ́ ɩ́ yì yɩ́ sa mà, yáa yɩ́ lelilɩ yɛ́ lɩkpɩ kɔ́kɔ́mnɩ́ a zà; ɩ́ yi yɩ́ duo sá páa, lé ɩ́ yi yɩ́ li, ɩ́ yi yɩ́ mná, lé ɩ́ yi yɩ́ lúbhoò!» 20Ɔ́ cí sɩ́tɛ̀ a, bhʋ́ Lagɔ srʋ ɔ́ mà: «Nɩnànyɔ̀, náa srʋɛ mɔ̀ mà dɩ́bɩ̀ɛ̀ lɩ̀à bhlɔ̀bhlɔ̀, ɩ̀ yi yrá tuò, lé nyɔɔ́ ɔ̀ kɔ̀ɔ̀ zà ɩ̀ ŋwʋ́ lɩ́ɛ́ fɩ́ɛ́ lɩ̀à sá a, à kɔ̀ɔ̀ yɛ́.» 21Zozíi srʋ ɔ́ sɔ́kʋ́ mà: «Lɛ́bhɛɛ wɔlɩ́ɛ́ ɩ̀ ŋnɩɛ nyɔɔ́ ɔ̀ lie léyri ɔ́ a múó a zà a, lé ɔ̀ nɩ́ mányɩ Lagɔ a wɔlɩ́ a.»

Lagɔ ŋwʋ́ɛ́ ɔ yúó yɩ́gɔ̀

(Matíe 6.25‑34)

22Zozíi srʋ ɔ́ kʋjɩ̀nyʋ̀àà mà: «Ná srʋɛ amɔ, a ná bhɔtɔ aa zɩkpa a zà, lé a ká cí mà, dɛ́gbá à yi lelilɛ yɛ́ lé à yi li áa? A ná bhɔtɔ sáà aa kpɩkpɩ a zà, lé a ká cí mà, bhè dɛ́gbá à yi kótu yɛ́ɛ lé à yi mʋ́ pla áa? 23A lɛ́bhɛɛ, nyɔ a kɔ́ náa lé ʋ́ zi lelilɩ kʋ́ lé nyɔ a kpɩkpɩ a námɛ zi sáà kóti kʋ́.

24A dʋdʋ̀ caá kɔ̀kɔ̀bàyrɩ́ a, ɩ nɩ́ glɩ lelilɩ lé ɩ nɩ́ ŋwʋ́ sáà lelilɩ wlʋ kʋ́ sá, sɩ́tɛ̀ ɩ́ kʋ bhè Lagɔ fínilɩɩ́. Bhè amɔ, a nɩ́ gbʋ́ ka lé a nɩ́ nimni kʋ́ zii? A ka kpanyɩ gbʋ́ à! 25A nyièdɩ a nyɔ gbá yi míi lé ɔ̀ yi bhɔtɔɛ bhá lé ɔ̀ yi ɔ zɩkpa zɔ̀ a yri kʋ́ ŋwʋ́ áa? 26Nyɔ nɩ́ kɩɩ míi, bhè ɛ̀ kʋ̀ bhè aa bhɔtɔɛ zù saá a?

27A dʋdʋ̀ ca flɛ́lɩ a námɛ a, flɛ́lɩ nɩ́ kótu a kplá sa yì, ɩ nɩ́ sáà gèseplʋ a bhla sa yì, sɩ́tɛ̀ ɩ́ kʋ bhè Salomɔ́ɔ mɔ̀glʋ̀ɔ̀ ŋwɔ́ɔ wázɔ̀ lóo a, tányɩɛ́ fɩ́ɛ́ ɔ́ zi zɩkpa zɔ̀ a, ɔ mʋ́plakotu a námɛ nɩ́ flɛ́lɩ námɛ zi. 28Pití a pʋpʋ́ɔ́ lɩ̀à, Lagɔ ŋwʋ́ ɩ́ yɩ́gɔ̀ lé nɩ̀ yɩ́ a, námɛ zii wlú, bhè sɩ́tɛ̀ ɩ́ kʋ bhè zrɩɩ ká zɩ ka mʋ a, á ŋwʋ́ ɩ́ kosu, bhè amɔɔ ŋwɔ́ɔ yrúkanyʋa a, amɔ Lagɔ nɩ́ ka yɩ́gɔ̀ ŋwʋ́ʋ, a yì saá mà Lagɔ yi amɔ né gɔ̀ sa a? Ɛ̀kʋ̀ʋ̀ lɛ́ ʋ́ bhè aa ditátɩ́ nɩ́ lɛ́ zù a? 29Náa srʋɛ sáà amɔ mà lelilɩ yà nyú sɔ́ a wɔlɩ́ ná gbláa amɔ duo nyú. 30Mà nyʋaá à nɩ́ Lagɔ yì a, ámá bhobho sɩ́tɛ̀, à nɩ̀ ŋwɔ́ɔ amɔ a, a Tʋ́ Lagɔ yì wɔlɩ́ɛ́ a yrá yru a. 31Lɛ́ɛ́ a na ká mʋ́mɔ a, ɛ́mɛ́ ŋwɔ́ɔ Lagɔ a Léyibhlɩɛ́, wɔlɩ́ɛ́ ànɩ̀ɛ̀ fɩ́ɛ́, Lagɔ yi amɔ mɩ́ nyɛ́.»

A ŋwʋ́ʋ Lagɔ gɔ̀ sá

(Matíe 6.19‑21)

32Lé Zozíi srʋ á sɔ́kʋ́ mà: «Ŋanɩmɛ ná bhlá mɔ̀, Lagɔ a mnakpɩtòyilɛ̀! Mà amɔ a Tʋ́ Lagɔ yrá lé ɔ ká ɔ Léyibhlɩɛ́ nyɛ́. 33A ŋwʋ́ a kakalɩɛ fɩ́ɛ́ pɛ́lʋ́, moníe á na ká ɩ mnɩ́ yɛ́ a, a bhábhalɩɩ́ ŋazɩ̀nyʋa. Bhɔ́klɔɔ́ ɔ̀ nɩ́ɩ ŋátɔ a, ʋ́mʋ́ a nɩ nɩ a nyoku gà, lagɔ̀duú a nɩ léyrie ɩ́mɩ́ a nɩ mʋ́mɔɔ̀, ɩ́mɩ́ nɩ́ bhɩa kʋ́, lé ghlíighlíinyɔ nɩ́ mɔ̀ɔmɔ̀ kʋ, gwlɩ̀gwlɩ̀ɩ nɩ́ sáà mɔ̀ɔmɔ̀ kʋ. 34Dɛ́ɛ́ a kakalɩ kʋ a, bhʋ́ a di kʋ.

A yrɩ̀lɩ!

(Matíe 24.42‑51; Málɩ́kɩ 13.33‑37)

35A pla nɔnʋzrɩ̀kòti mʋ́, a gʋa bɛ́tɩ gwá, a nápɩ ŋwʋ́lɔ kɔ́ɔ̀kɔ́ klʋ́! 36A nɩ cémʋ́ nyʋa gláa lɛ́ a kanyɔɔ́ ɔ̀ wlʋ́ɛ́ lówʋ̀duú ŋnɩ́ fla ka a, bhè ɔ nɩ bhɩtɩ ɔ gbó a, a ká á ka lé ɔ ká pla a. 37Cóyuó nà kà gláa, lé à nɩ ka ŋwɔ́ɔ lé a kanyɔ ká jɩ̀ ŋnɩ a, á ya pʋ́. Ná srʋɛ amɔ cɩ́cása, a kanyɔɔ́ nɩ yrɩ́bha a, ɔ́ yi nɔnʋzrɩ̀kòti mʋ́ pla lé ɔ́ yi a tébhle ŋwʋ́ lé á yi li. 38Á kanyɔ yi dʋdʋ́kádʋʋ́ yii, ɔ́ yi zizìèda yii, ɔ nɩ ŋnɩlaá dɛdɛ̀da a, á ya pʋ́.

39A dʋdʋ̀ ca a, gbó a kanyɔ nɩ yì tányɩɛ́ mʋ́ ghlíighlíinyɔ yio ghlí ka a, ɔ nɩ́ kɔɔ́ la sá cíe lé ɔ ká gbó pla. 40A sɛ́fʋɔ́, a yrɩ̀lɩ, mà tányɩɛ́ a nɩ́ lùò a, ɛ́mɛ́ mʋ́ Nyɔɔ́ a Yuwliyʋɔ́ na ká yi.» 41Tányɩɛ́ mʋ́ Zozíi cí sɩ́tɛ̀ a, Pɩ́ɛ́lɩ yrɔ́ɔ́ mà: «Kanyɔɔ̀, dɔ̀ɔ̀ ɩ̀ pá lɛ́ a, àmɔ̀ ɩ̀ srʋɛ, mà nyʋa fɩ́ɛ́ ɩ̀ srʋɛ?» 42Bhʋ́ Zozíi anɩ́: «Cóyʋ gbá ɔ̀ kɔ̀ nɩnɩgbɩ srí sá, lé ɔ̀ fíke lé ɔ kanyɔ yi lɛ́ srʋ mà ɔ ŋwʋ́ gbó yɩ́ gɔ̀, lé lelitanyɩ nɩ ŋnɩ a, ɔ nyɛ́ gbó a nɔnʋzrɩ̀nyʋ̀àà a lɔ̀fɩ́ɛ́ lelilɩ áa? 43Cóyʋɔ́ nà kà bhʋ́anɩ nɔnʋɔ́ a zrɩda kʋ lé ɔ kanyɔ ká yrɩ́bha a, ɔ́ ya pʋ́! 44Cɩ́cása a mnɩ́, ná srʋɛ amɔ mà bhʋ́anɩ cóyʋɔ́, ɔ kanyɔ yio ɔ gbó a kakalɩɛ́ fɩ́ɛ́ yɩ́ gɔ̀ ŋwʋ̀ da nyɛ́.

45Mà cóyʋɔ́ nɩ srʋ ɔ́ nyoku mà: Ná kanyɔ nɩ́ ka kamnɩ́lɛ́ yi, lé ɔ nɩ bháa ʋ́ cóyuoó yà geyiŋwnaá sɔ́ a bhite kʋ́, lé ɔ nɩ li, lé ɔ nɩ mná lé nʋ́ nɩ bhlɔ́ a, 46yruó kʋ́ ɔ kanyɔ na ká yrɩ́bha a, ɔ́ na kɔ́ɔ́ zɔ̀ vú; ɔ nɩ yi a, cémʋ́ á bhlile kàpàkápányʋa kʋ́ a, sɩ́tɛ̀ mʋ́ ɔ́ na kɔ́ɔ́ kʋ́ bhli, lé ɔ kɔ́ɔ́ jɩ́.

47Cóyʋɔ́ yi wɔlɩ́ɛ́ ɔ kanyɔ yrá, bhè ɔ̀ nɩ́ nií a, áa bhɩtoó. 48Cóyʋɔ́ nɩ́ wɔlɩ́ɛ́ ɔ kanyɔ yrá a, yì lé ɔ̀ nɩ nyumo sa a, ɔ́ nɩ bhiteé tɩ́tɩlɔ kʋ́.

A lɛ́bhɛɛ! Nyɔ á nyɛ́ kpanyɩ a, ɔ́mɔ́ á yrálɛ kpanyɩ mʋ́. A nɩ nyɛ́ nyɔ lɛkɔ́kɔ́mnɩ́ sa ŋwʋ̀da a, á nɩ yralɔ lɛ́ mʋ́ a, áa plɩ́ɛ́ wlú.»

Zozíi a zà nyʋa na ká mʋ́ dúlo

(Matíe 10.34‑36)

49Zozíi anɩ́: «Náa yi lé ká dʋ̀dʋ kʋ́ kosu ŋwʋ́, lé ɩ́ yrá lé ʋ vɩ́da sɩsɔɔ́! 50Náa ká wɔlɩ́ kádɩ mʋ́ blée, mà cémʋ́ duo gblálɛ mɔ́ɔ ɩ́zà nyú a, ɩ́ yra lé ɩ nilo yɩ́ sɩsɔɔ́! 51A yì saa mà náa yi lé dʋ̀dʋ kʋ́ ká kʋ́ wɔtɔma a? Ɛ̀ nɩ́ ɩ́mɩ́ ŋwɔ́ɔ, ná srʋɛ amɔ mà náa yi lé zɩkpa zɔ̀ a nyʋa ká ná zà mʋ́ dúlo! 52Bhá yɩ́ lɛ́ zɩmnɛ́ jɩ̀ a, nyʋa gbɩ́ yi gbó a múó mnɩ́ kʋ, á yi mʋ́ dúlò, ta yi ànàà sɔ́ lɔ́lɔ́kpá fa, lé sɔ́ yi ànàà taa lɔ́lɔ́kpá fa. 53Tʋ́ yi ɔ́ yʋ́ mʋ́ gblɩ̀, lé yʋ́ yi sáà ɔ tʋ́ mʋ́ gblɩ̀, ŋnɩ́keyʋ ya ɔ́ nɛ́ sɔ́ yi cí, lé nɛ́ yi ɔ ŋnɩ́keyʋ cícíé fa, ŋwʋ́trɔ yi ɔ́ yʋ́ a ŋwnɔ́ mʋ́ gblɩ̀, yʋ́ a ŋwnɔ́ yi sáà ɔ ŋwʋ́trɔ cícíé fa.»

A nɩ wɔlɩ́ɛ́ ɩ̀ ná a

(Matíe 16.2‑3)

54Zozíi srʋ sɔ́kʋ́ jrèè a mnɩ́ a nyʋaá mà: «A nɩ yɛ́ jrù lé ʋ nɩ la jie a, a nie mà nyú ya kla, ʋ́ na ká bhla, Lé cɩ́cása ʋ́ bhla. 55Lé a nɩ yɛ́ sáà vʋ̀vɔ̀lʋ̀ɔ̀ lalɛ klá wlú lé ʋ yie a, a nie mà: Yrʋ́ na ká pʋ́! Lé cɩ́cása, yrʋ́ pʋ́ɛ́. 56Yrʋnyʋa yɩ, a dʋdʋɛ lagɔɔ́ lé dʋ̀dʋ kʋ́, lé a yɩbhlɩɛ wɔlɩ́ɛ́ nà kà ŋnɩ a, bhè ɛ̀kʋ̀ʋ̀ bhè a nɩ yɩbhlɩ tányɩɛ́ lɩ̀à a mnɩ́ a wɔlɩ́ɛ́ à?

A yɩbhlɩ wɔlɩ́ a kʋbhlisa

(Matíe 5.25‑26)

57Bhè ɛ̀kʋ̀ʋ̀ bhè amɔ mɔ̀glʋ̀ a nɩ́ lɛ́ wɔlɩ́ a kʋbhlisa yɩ̀ a? 58A dʋdʋ̀ʋ̀, yà nyɔ sɔ́ a nɩ yɛ́ wɔlɩ́ a, bhobho lé yɔ̀sɔ́ ká núnu ɔ nɩ ka mɔ̀ lɔ́ya drɩ̀ fa, lɔ́ya nɩ ka sʋ́ja ku a nɩ ka mɔ̀ jɩ̀ ŋwʋ́. 59Náa srʋɛ mɔ̀ mà, nɩ̀ nɩ́ sɩ́tɛ̀ nɩ lé a nɩ ŋwʋ́ mɔ̀ jɩ̀ a, ɩ̀ yi mɔ̀ɔ kʋ lé ɩ̀ yi kpaá a lɔ̀fɩ́ɛ́ pɛ́ɛ, lé a nɩ́ ka mɔ̀ pìkìni a múó coco ciè.»

Currently Selected:

Lúkɩ 12: NEY

Highlight

Copy