Lúkɩ 15
15
Bhlábhlɛ́ɛ́ ɛ̀ tuo lé á yɛ́ a, ɛ núnúó
(Matíe 18.12‑14)
1Lapóo a kʋbhlinyʋaá lé bhàlʋ̀nyʋ̀àà á yi Zozíi gɔ̀ a kɔ́ɔ́ nyúkwlí pʋ. 2Mà á yi lé Falizɩ́ɛnyʋa yà lɔ̀ a másɛnyʋa sɔ́ yɛ́ɛ a, á kalɔɔ́ neé, á nie mà: «Nyɔɔ́ lɩ̀à, ɔ cíe bhàlʋ̀nyʋa sá, lé á yio gɔ̀ lé ɔ yà sɔ́ lile kʋ́!»
3Wɔlíɛ́ á cíé a, ɩ́ nɩ lé Zozíi pá núnúó, ɔ́ anɩ́: 4«Á nyièdɩ a nyɔ nɩ ka bhlábhlɩ́ a gwlɩ̀ gbɩ́, lé bhlábhlɛ́ a múó nɩ wlʋ́ ɩ nyièdɩ lé ɛ nɩ tuo a, ànɩ̀ɛ̀ gwlɩ̀ɛ̀mɔ̀nàà lé kʋ́gbá fɛnaá, ɔ́ɔ tií ʋ́ lé bhlábhlɛ́ɛ́ ɛ̀ tuo a, ɔ́ mʋ́mɔɛ lé ɔ́ yɛ́ɛ! Kpɔkplá a? 5Ɔ nɩ yɛ́ a, lɔlɔ bhlɔ́ɔ́, lé lɔlɔsaá, ɔ́ ŋwʋ́ɛ́ blɛ jɩ̀, 6lé ɔ́ lɛɛ́ gbó. Ɔ nɩ lɛɛ́ a, ɔ́ wle ɔ bheyinyʋa lé nyʋa ɔ yà sɔ́ sí dáamúó a, lé ɔ́ srʋ á mà: A yi à nɩ lɔlɔ, mà ná bhlábhlɛ́ɛ́ ɛ̀ tuo wá zɔ̀ a, yɛ́ɛ yɛ́! 7Ɩ́zà ná srʋɛ sáà amɔ mà bhàlʋ̀nyɔ a múó nɩ cɩ́cɩɩ lé ɔ nɩ bhli Lagɔ̀nyùzɔ a, lɔlɔɔ́ ʋ̀ nilo ɔ́ zà lagɔɔ́ a, ʋ́ zù lé ʋ́ zi nyʋa gwlɩ̀ɛ̀mɔ̀nàà lé kʋ́gbá fɛnaá à kà nɩnɩgbɩ srí sá a kʋ́.»
Flèejìè tuo lé á yɛ́ a, ɛ núnúó
8 Ɔ́ srʋ á sɔ́kʋ́, ɔ́ anɩ́: «Ɩ́zà ŋwnɔ́ gbá yi flèejì a kʋ́gbá ka lé múó yi ɩ́ nyièdɩ tuo lé ɔ̀ nɩ ka nápɛ klʋ́ ŋwʋ́, lé ɔ̀ kà ɔ wlʋ a lɔ̀fɩ́ɛ́ a mnɩ́ nynʋpʋʋ̀, lé ɔ̀ kà flèejìè ɛ̀ tuo lɛ́ a mʋ́mɔ dɩgàsa dɩgàsa àààn lé ɔ̀ kɛ̀ yɛ́ a. 9Ɔ nɩ yɛ́ɛ́ a, ɔ́ wle ɔ bheyiŋwna lé ŋwnáá ɔ yàsɔ́ sí dáamúó a, lé ɔ́ srʋ á mà: A yi bhè à nɩ lɔlɔ, mà ná flèejìè ɛ̀ tuo wá zɔ̀ a, yɛ́ɛ yɛ́! 10Ɩ́zà ɩ́ srʋɛ amɔ mà: Bhàlʋ̀nyɔ a múó coco nɩ cíe bhàlʋ sá lé ɔ nɩ bhli Lagɔ̀nyùzɔ a, kplɔkplɔzìzi nie lɔlɔ lagɔɔ́ mɔ̀.»
Yʋ́ɔ́ ɔ̀ tuo lé á yɛ́ a, ɔ́ núnúó
11Lé Zozíi srʋ á sɔ́kʋ́ mà: «Nyɔ a múó ka yuwliyuo a sɔ́. 12Yruú kʋ ʋ́ a, bɩ́kʋ́anɔɔ́ ɔ́mɔ́ srʋ ɔ tʋ́ mà à tʋ́ʋ, jáa nà kà lɛ́ ʋ́ tɩ a, nyɛ́ gáàgá ná naá, ɔ́ cí sɩ́tɛ̀ a, ɔ tʋ́ ɔ́ɔ díi ɔ kakalɩɛ́ mʋ́ lé ɔ́ nyɛ́ ɔ́. 13Yrií zùò plɩ́ a, yʋ́ɔ́ ŋwʋ́ lɩ́ɛ́ ɔ tʋ́ nyɛ́ ɔ́ a pɛ́lʋ́, lé ɔ́ bháʋ́ moníe lé ɔ́ mʋ bhlɩ́ jɩ̀ bika. Ɔ kʋ mɔ̀ɔmɔ̀ kàpàkápágbɩ a nɩ da àààn lé ɔ́ ŋáta moníe a lɔ̀fɩ́ɛ́.
14Mà tányɩɛ́ mʋ́ moníe bhɩɔ́ wlɩ a, kleé ɛ̀ pla bhlɩ́ɛ́ a mnɩ́ a, ɔ nɩ́ yɛ́ lelilɛ. 15Ɩ́ ka ŋnɩ́ lé lówùdùnyʋa nyièdɩ, ɔ́ɔ mʋ dúó a mnɩ́ nyɔ a múó gɔ̀ lé ɔ kɔ́ɔ́ ɔ nɔnʋ zrɩɩ̀ lé nyɔɔ́ fɔɔ́ ɔ lágbɩ a mnɩ́ ɔ kɔ́ɔ́ ɔ gékpíbhuzàlɩ kʋ́ lɔ́bhʋʋ̀. 16Mà kleé ka ŋnɩ́ lé lelilɩɛ́ bhuzalɩ̀ɛ̀ lie a, ɔ́ yrá lé ɔ kɩɩ́ li mà ɔ̀ nà kɔ̀ɔ mɩ́ nyɛ́ à?
17Kalɩmɛɛ́ ɔ́ yɛ́ a, ɛ́ nio lé ɔ́ srʋ ɔ nyoku mà: Ɩ́ tʋ́ a gbó a mnɩ́ a nɔnʋzrɩ̀nyʋa fɩ́ɛ́ yɛ́ lelilɩ lé á lie lé lelilɩ jie kʋ́, bhè mɔ́ɔ, ɩ́ kʋ dɛ́, lé kleé bhlá mɔ́ɔ kúkúsa! 18Ɩ́ yi ɩ́ tʋ́ gɔ̀ yrɩ́bha kɔ́ɔ́ srʋ mà: À tʋ́, Ɩ́bhìè yáa nyumosa nɩ, fɩ́ɛ́ lé ɩ́ bhli mɔ̀ nyumosa kʋ́! 19Naa náa nɩ́ yrɩ́bha lé kà sɔ́kʋ́ mɔ́ɔ va, mà bhli yɩ́ mɔ́ɔ nà coyʋ bhísakʋ́ kʋ́. 20Lé yʋ́ɔ́ yrɩ́bha ɔ tʋ́ gɔ̀. Ɔ́ yi lé ɔ tʋ́ a yɩ́ bhliloó jɩ̀ a, ŋazɩ kɔ́sɔlɔɔ́ kʋ́ lé ɔ́ gboloó kʋ́, lé ɔ́ fa soó lé ɔ́ bhliloó blɛ. 21Mà yʋ́ɔ́ srʋ ɔ tʋ́ mà: À tʋ́ʋ̀, yáa Lagɔ drɩ̀ nyumosa nɩ, lé ya mɔ̀ɔ nyumosa kʋ́ bhli, náa nɩ́ yrɩ́bha lé kà sɔ́kʋ́ mɔ́ɔ va.
22Ɩ́ kʋ bhlà ɔ neé bhè tʋ́ɔ́ pá ɔ cóyuoó wɔlɩ́: A vʋ́vʋ̀à kʋ́ a la plɔ́plɔ kwɩ̀táa káda lé a kɔ́sɔlaá ná yʋ́ɔ́ jɩ̀, a la kpàtrʋ̀wée a ŋwʋ́ ɔ́ wlie, a la àsadrɛ a plɔɔ mʋ́! 23A mʋ sáà lé a bhli bhlábhlɩ́wa káda kʋ́, a bhláá, à kà li à kà lɔlɔ nɩ, 24mà, ná yʋ́ɔ́ ɔ̀ yà wá kú, bhè ɔ̀ yi lɛ́ sɔ́kʋ́ pɩ́pɩ́ kʋ́ a, ɔ̀ yà wá tuo, bhè ɔ̀ yà lɛ́ sɔ́kʋ́ yɛ́lɔ a, ɩ́ ka ŋnɩ́ lé nyʋa bháa ʋ́ lɔlɔ a ninie kʋ́ gbó a mnɩ́.
25Mà tʋ́ɔ́ a tagàyʋ̀ɔ̀, ɔ kʋ lágba nɔnʋʋ́. Ɔ́ wlʋ́ɛ́ nɔnʋ gɔ̀ ɔ́ yie bhè ɔ́ núé plií a wɔlɩ́ lé lʋ́ yɛlɔ. 26Lé ɔ́ wle ɔ tʋ́ a cóyʋ a múó lé ɔ́ yrɔ́ɔ́, wɔlɩ́ gbá kʋ̀ a? 27Lé cóyʋɔ́ salɔɔ́ wɔlɩ́ɛ́ ɩ̀ plɩ́ a, dí kʋ́: Ɩ̀ nɩ́ayʋ́ɔ́ yà wá mʋ a, ɔ́mɔ́ yi, bhè cémʋ́ wɔlɩ́ nɩ́ ɔ́ mɔ̀ɔmɔ̀ ŋnɩ, lé ɔ́ ya yrɩ́bha a, ɩ́mɩ́ kà ŋnɩ́ lé ɩ̀ tʋ́ srʋ nyʋa lé á bhlá bhlábhlɩ́wa káda, ɩ́ lɔlɔ á nie. 28Cóyʋɔ́ sɔɔ́ dí kɔ́ɔ̀kʋ́ a, zɔ̀kpɩ́yʋɔ́ ŋwʋ́ dɩ, ɔ́ tuo gbine kʋ́. Ɩ́ nɩ lé ɔ tʋ́ flʋzɔ̀ lé ɔ mʋ ɔ́ bhibhie ka ɔ ká gbó pla. 29Mà yʋ́ɔ́ srʋ ɔ tʋ́ mà: Ɩ̀ lɛ́bhɛɛ, ɩ́ zrɩlɛ lɛ́ mɔ̀ gà a, ɩ́ ya gwlɛ, lé ɩ́ ŋwʋ́ɛ́ kɔ́ɔ̀kɔ́ ʋ́ mɔ̀, sɩ́tɛ̀ ɩ́ kʋ lé nɩ́a zà mɔ́ɔ wluyʋ a pʋpʋ́ bhláa lé yáà ɩ lía sɔ́ à kà lúbhoò! 30Mà tányɩɛ́ mʋ́ nà yʋ́ɔ́ ɔ̀ fa nà kakalɩɛ́ lé ɔ̀ ŋátɩɩ́ kàpàkápá ŋwna jɩ̀ a, ɔ́ yrɩ́bha a, nà srʋ nyʋa lé á bhlá bhlábhlɩ́wa káda, ɔ́ zà.
31Tʋ́ɔ́ anɩ́: Wé! Ná yʋ́ʋ, ya mɔ̀ sɔ́ kʋ̀ kɔ́ɔ̀kɔ́ dɛ́, lɩ́ɛ́ fɩ́ɛ́ ɩ́ ka lɛ́ a, nàa lɩ́ kʋ̀. 32Mà, ɩ̀ nɩ́ayʋ́ɔ́ lɩ̀à, ɔ́ ya wá kú lé ɔ yi lɛ́ pɩ́pɩ́ʋ́ kʋ́, ɔ́ ya wá sáà tuo, lé à yɔ̀ lɛ́ yɛ́, ɩ́ nɩ́ lɔlɔ kʋ́ ka a? Ɩ́mɩ́ ka ŋnɩ́ a zà à nie lɔlɔ lé à lúbho.»
Currently Selected:
Lúkɩ 15: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
