Lúkɩ 14
14
Zozíi yalɩma sɔ́kʋ́ gupuonyɔ Zúfʋnyʋa a nyɔbhleyru kʋ́
(Lúkɩ 6.6‑11; 13.10‑17)
1Zúfʋnyʋa a nyɔbhleyru a múó kʋ́, Falizɩ́ɛnyʋa a cífɩ a múó wle Zozíi ɔ gbó a ká kʋ́ lii. Mà nyʋaá kʋ̀ ʋ́ a, ŋwʋ́ɛ́ Zozíi yɩ́ gɔ̀. 2Mà nyɔ a múó bɔ́ɔ Zozíi drɩ̀ a, gúó ʋ̀ bhlɔ́ɔ́ a, ʋ́ nio lé ɔ́ bóbùò. 3Lé Zozíi bháʋ́ niwɔlɩ lé ɔ́ yrá lɔ̀ a másɛnyʋaá yà Falizɩ́ɛnyʋaá sɔ́ kʋ ʋ́ a, mà: «Nyɔ yi míi lé ɔ yi ɔ liyʋ yalɩma Zúfʋnyʋa a nyɔbhleyru kʋ́ ʋʋ?» 4Ɔ́ yrá a, nyɔ nɩ́ né saà lé Zozíi yalɩma gupuonyɔɔ́ lé ɔ́ srʋ ɔ́ mà ɔ mʋ gbó. 5Lé ɔ srʋ nyʋaá mà: «A nyièdɩ a Nyɔɔ́ a Yuwliyʋɔ́, ɩ́zà ɔ dɔ̀dɔ̀bhlɩ nɩ bhli nyúbhukuo a mnɩ́ Zúfʋnyʋa a nyɔbhleyru kʋ́ a, ɔ nɩ́ ka dáamúó kʋ lé ɔ kɛ́ɛ́ mɔ̀ɔ sa a?» 6Zozíi yrá sɩ́tɛ̀ a, á nyièdɩ a nyɔ a múó coco nɩ́ niwɔlɩ yrɩ́bha.
A ná mʋ́mɔ drɩ̀ a kpí a mnɩ́ a bɔ́ɔlɛɛ́
7Nyʋaá á wle lilie a zà a, cémʋ́ drɩ̀ a kpí a mnɩ́ bɔ́ɔlɛɛ́ á wà a, Zozíi ŋwʋ́ɩ́ yɩ́gɔ̀, ɩ́ ka ŋnɩ lé ɔ́ pá nyʋa fɩ́ɛ́ kʋ̀ ʋ́ a dɔ̀, ɔ́ anɩ́: 8«Nyɔ nɩ wle mɔ̀ dɛ́ɛ́ a pálɛ ŋwɩ́ta a, lé nɩ̀ yi ʋ́ a, nàa mʋ́ drɩ̀ a kpó a mnɩ́ bɔ́ɔ ka mà à nɩ́ máà yì, nyɩ́kpɔkádɔ yi lɛ yi. 9Lé nyɔɔ́ ɔ̀ wle aa sɔ́ɔ a, nɩ ka lɛ mɔ̀ srʋ mà: Soglù, lé nyɩ́kpɔkádɔ̀ɔ̀ ɔ̀ yi a, ɔ ká sá bɔ́ɔ! Ɔ nɩ nií a, zʋ̀ʋ yi lɛ mɔ́ bhlá lé bɩ́kʋ́ ɔ́ nà ka yɩ́ lɛ bɔ́ɔ ka mʋ. 10Na a nɩ wle mɔ̀ jrè lé nɩ̀ mʋ a, bɔ́ɔ bɩ́, lé nyɔɔ́ wle mɔ̀ a, ɔ ká yi lé jrè a nyʋa fɩ́ɛ́ a klʋ́ jɩ̀, ɔ́mɔ́ kà mɔ̀ srʋ mà: Plɩ́ drɩ̀ a kpó a mnɩ́ kà sá bɔ́ɔ. Tányɩɛ́ mʋ́ ɔ́ na ká yɩ́ lɛ́ mɔ̀ sɩ́tɛ̀ srʋ á, ɩ́ yi yɩ́ lɛ mɔ̀ kpá ŋwʋ́.#14.8‑10 A zɛlɩɩ sáà Níní 25.6‑7. 11Ná srʋɛ amɔ mà, nyɔ nɩ bhá ɔ nyoku kʋ́ a, Lagɔ ɔ́ɔ kwléloó sá, ɩ́zà nyɔɔ́ ɔ̀ kwléle ɔ nyoku sá a, ɔ́mɔ́ Lagɔ bhá kʋ́.»
Wle ŋazɩ̀nyʋa a ká li
12Nyɔɔ́ ɔ̀ wle Zozíi lilie a zà a, Zozíi srʋ ɔ́ mà: «Nɩ cí mà kà nà gbó nyʋa wle lilie a zà a, nàa wle ɩ̀ bheyinyʋa, ɩ̀ nɩ́ayúó, nà lɔ́lɔ́kpɩnyʋa, nàa wle lɛkanyʋaa yà sɔ́ a sí dáamúó a, ámá nɩ̀ wle a, á míi lé a wle sáà mɔ̀ a gbó lilie a zà, bhʋ́ a tányɩɛ́, a nɩ́ yɩ́ nà lelilɩ a kpa kaa. 13Naa nɩ̀ cí mà kà nyʋa lilie a zà nà gbó wle a, wle ŋazɩ̀nyʋa, bhlɛ́kanyʋa, bhɩbhlanyʋa, wle yɩ́bhlanyʋa. 14À nɩ̀ ŋwɔ́ɔ ámá nɩ̀ wle a, yà pʋ́, máà bhʋ́anaá nɩ́ ka mɔ̀ lelilɩ a zà wle lé a ká aa kpa pɛ́ɛ, Lagɔ nà kà kɛ́zɔ̀ mɔ̀ pɛ́ɛ yruó kʋ́ nyʋaá à bhli Lagɔ̀nyùzɔ a, á na ká kɛ́zɔ̀ galɔ̀ a.»
Lelinyʋa a núnúó
(Matíe 22.1‑10)
15Zozíi cí sɩ́tɛ̀ a, nyʋa ɔ yà sɔ́ lie a, á nyièdɩ a nyɔ a múó sané, ɔ́ anɩ́: «Nyɔɔ́ nà kà kɛ́zɔ̀ Lagɔ a Léyibhlɩɛ́ a mnɩ́ li a, ɔ́ ya pʋ́!» 16Lé Zozíi pá núnúó lé ɔ́ srʋ ɔ́, ɔ́ anɩ́: «Ɩ̀ dʋdʋɛ, nyɔ a múó pi lelilɩ, lé ɔ́ wle nyʋa kɔ́kɔ́mnɩ́ lilie a zà. 17Lelitanyɩ ŋnɩ a, ɔ́ cíe ɔ cóyʋ nyʋaá wle ka: A yi mà lelilɩɛ́ ya yrɩ̀lɩ. 18Mà nyʋa a lɔ̀fɩ́ɛ́ wɔlɩ́ ceamúóó ámá á cíé, áa bhibhie mà ɔ cielaá. Tagànyɔ̀ɔ̀ anɩ́: Yáa lágba kla, ɩ́ ka lé ɩ mʋ mɔ̀ɔ kakamnɩ́lɛ́ lé ká mɔ̀ɔ dʋdʋ̀, naa ɩ́ bhibhie mɔ̀ mà nɩ́ ka yɩ́ ɔ̀ yi! 19Lé nyɔ ànɔ srʋ ɔ́ mà: Yáa dòdòbhlìi kla, ŋwnɔ́ lé yʋwlɩ a cɩ́ a gbɩ́, náa fɩɩ́ trányɩ ka lágbaá, naa nyɔkɔɔ̀ mà, nɩ́ ka yɩ́ ɔ̀ yi! 20Ànɔ srʋ ɔ́ sɔ́kʋ́ mà: Kakamnɩ́lɛ́ ɩ́ wlʋ́ lɛ́ ná ŋwnɔ́ fláa ka, naa nɩ́ ka yɩ́ ɔ̀ yi.
21Cóyʋɔ́ yrɩ́bha lé ɔ́ yi lé wɔlɩ́ɛ́ fɩ́ɛ́ nyʋaá cí a, ɔ́ sa mɔ̀ mɩ́ ɔ kanyɔ. Mà ɔ́ kanyɔɔ́ ŋwʋ́ dɩ lé ɔ́ srʋ ɔ́ sɔ́kʋ́ mà: Vʋ́vʋ̀à kʋ́ lé bhli dúó, mʋ crɩ́kpaá lé mʋ tríi, wle ŋazɩ̀nyʋa, wle bhlɛ́kanyʋa, wle bhɩbhlanyʋa wle sa yɩ́bhlanyʋa, a yi. 22Cóyʋɔ́ mʋ lé ɔ́ yi a, ɔ́ srʋ ɔ́ kanyɔ mà: Kanyɔɔ̀, nɔnʋɔ́ ɩ̀ nyɛ́ mɔ́ɔ a, yʋ́ʋ zɔ̀ bhɩa, mà sabɔ̀da kʋ àyɩ ʋ́. 23Kanyɔɔ́ anɩ́: Bhli bìdí kʋ́ a nyízɛ̀ɛ̀, dɛ́ɛ́ nà kà bìdé yɛ́ a, pla ʋ́, nyʋa fɩ́ɛ́ nà kà ʋ́ ŋnɩ a, wle á, nɩ pɩ́ɛ́ fɩ́ɛ́ lé a ká yi bhè gbó ká nyʋa kʋ́ yíè. 24Mà nyʋa ànàà ɩ́ wle lé à nɩ ka lɛ́ dá yi a, nɩ́ ka á nyièdɩ á nyɔ gbó lelida ŋnɩɩ̀.»
Cégbá mʋ́ nyɔ yi nɩ lé ɔ́ yi Zozíi a kʋjɩ̀nyɔ plɩ́ a
(Matíe 10.37‑38)
25Tányɩ a múó, Zozíi yà nyʋa kɔ́kɔ́mnɩ́ sɔ́ bhlie nyúzɔ á mnɛ. Lé Zozíi yrɩ́bha lé ɔ́ gà la klʋ́, lé ɔ́ srʋ á mà: 26«Nyɔɔ́ nɩ̀ cí mà ɔ̀ kà mɔ́ kʋ́ jɩ́ a, ɔ wà mɔ́ lé ɔ zi ɔ tʋ́ kʋ́, ɔ nɛ́ kʋ́, ɔ ŋwnɔ kʋ́, ɔ yʋ́, ɔ nɩ́ayúó lé ɔ nyoku sɔ́ kʋ́, à nɩ nɩ́ sa ŋwɔ́ɔ a, ɔ nɩ́ ka ná kʋjɩ̀nyɔ plɩ́. 27Nyɔɔ́ nɩ ka ɔ kúsu a gbɩdɩɛ míi lé ɔ̀ kà mɔ́ kʋ́ jɩ́ a, ɔ nɩ́ ka ná kʋjɩ̀nyɔ plɩ́.
28Náa yrá ca a, a nyièdɩ a nyɔ gbá nɩ̀ yrá lé ɔ̀ kà wlʋ kádʋ pá, lé ɔ̀ nɩ́ bɔ́ɔ fɩ́ɛ́ sá lé ɔ̀ kà bhobho lé moníe ɔ́ ka a, ɩ nɩ yi míi lé ɩ nɩ yi wlʋɔ́ zɔ̀ bhɩa a, ɔ kɩ́ɩ́ yɩbhlɩ áa? 29Ɔ nɩ srí wlʋɔ́ lé ɔ nɩ nɩ́ ʋ́ pápʋ́ zɔ̀ bhɩa, nyʋaá fɩ́ɛ́ nà kɔ̀ɔ̀ yɛ́ a, á yió nyɩà. 30Lé a yi lɛ́ cí mà: A lɛ́bhɛɛ nyɔɔ́ lɩ̀à, ɔ cíe wlʋ a pápʋ́ kʋ́, mà ʋ́ sɩɔ́, ɔ nɩ́ ʋ́ zɔ̀ bhɩa!
31A lɛ́bhɛ sɔ́kʋ́ʋ, lóo nɩ cí mànɩ́ ɔ ká ɔ lilo tʋ́ fa a, ɔ́ɔ bɔ́ɔ fɩ́ɛ́ sá, lé ɔ́ bhobho námasa, ɔ́ nɩ yi míi lé ɔ nɩ yi tavʋ̀nyʋa a dí a gbɩ́ bhá lé nɩ yi ɔ liyʋɔ́ ɔ̀ kà tavʋ̀nyʋa a dí a kʋ́gbá a sɩa a, ɔ́ bhobhuí. 32Ɩ́ nɩ ŋwɔ́ɔ mà ɔ nɩ́ ka míi a, ɔ́ sa nyʋa, lé bhlɩ́ɛ́ jɩ̀ ɔ liloó yà ɔ tavʋ̀nyʋa sɔ́ kʋ a, á mnɛ ɔ́ wlú sra ka, lé á núnule. 33Náa srʋɛ amɔ, nyɔɔ́ ɔ̀ nɩ ka ɔ kakalɩɛ́ fɩ́ɛ́ a gbʋ́ wlʋ́, lé ɔ̀ ká mɔ́ gɔ̀ yi a, ɔ nɩ́ ka ná kʋjɩ̀nyɔ plɩ́.
34A lɛ́bhɛ gùu, ʋ́ náa, mà ʋ nɩ yi la mɛ́nɩmɛ bhɩa a, cégbá á yi la sɔ́kʋ́ mʋ́ mɛ́nɩma áa? Ʋ nɩ́ yɩ́ la céana a ninie ka. 35Ʋ nɩ́ ka la dʋdʋ̀ a mnɩ́ kʋ́ náma, lé a nɩ́ kʋʋ la sáà aglɛ́ɛ kʋ́ bhá, áa yi yɩ́ la mʋ́ klá pá. Ɔ̀ nɩ̀ kà nyúkwlí ɔ̀ kà nú a, ɔ nú!»
Currently Selected:
Lúkɩ 14: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
