Málɩ́kɩ 11
11
Zozíi pla Zelízalɛ́mʋ du nànɩ́ lóo
(Matíe 21.1‑11; Lúkɩ 19.28‑40; Záan 12.12‑19)
1Zozíi yà ɔ́ kʋjɩ̀nyʋ̀àà sɔ́ mɛ́mɩa yɩ́ la Zelízalɛ́mʋ dùò gɔ̀, á mnɛ yɩ́ la Olivíe kikéé gɔ̀ a díé á wlele Befazée yà Betaníi sɔ́ a, lé Zozíi cíe ɔ́ kʋjɩ̀nyʋa a sɔ́, 2ɔ́ anɩ́: «A mʋ dúó ʋ̀ kʋ̀ drɩ̀ mɔ̀ɔ a mnɩ́. A nɩ ŋnɩ a, a yi dáamúó jákásɩ yʋ yɛ́. Á gʋɔ́, lé nyɔ nɩ́ à zà ɔ́mɔ́ jɩ̀ gblà. A vlulòò lé a lɔɔ́ mɔ́ɔ. 3Nyɔ nɩ yrá amɔ mà: Ɛ̀kʋ̀ʋ̀ lé a vlulòò a? A srʋ ɔ́ mà: À Kanyɔ yrɔ́ɔ́, mà ɔ́ anɩ́, ɔ́ yio kakamnɩ́lɛ́ yrɩ́bhà.»
4Ɔ́ cí sɩ́tɛ̀ a, áa mʋ. Á ŋnɩ lé á dʋdʋ̀ a, jákásɩ yʋɔ́ kʋ ʋ́. Á gʋalɔɔ́ jrùkʋ́ wlʋʋ́ a múó a kplu gɔ̀ nyúzɔ kʋ́. Lé á vlulòò. 5Nyʋaá à kʋ̀ la ʋ́ a, á nyièdɩ a nyʋa àna yrá á mà: «A nie áa? Ɛ̀kʋ̀ʋ̀ bhè a vlulo jákásɩ yʋɔ́ a?» 6Lé cémʋ́ Zozíi srʋ á la a, á cíí, lé nyʋaá cíe a sá.
7Á la jákásɩ yʋɔ́ Zozíi a, á ŋwʋ́ ɔ́ a kótié jɩ̀, lé Zozíi gblɔ̀ɔ jɩ̀. 8Nyʋa kɔ́kɔ́mnɩ́ wlʋ a loku nyúzɔ kʋ́, lé nyʋa àna la gblɩ́ɩ á díi klá a mnɩ́ a lé á ŋwʋ́ɩ́ nyúzɔ kʋ́. 9Àna kʋ Zozíi drɩ̀ lé àna kʋ̀ ɔ bɩ́ á pá wɔlɩ́. Á nie:
«Ozana!#11.9 Ozana: Ebléewɔlɩdrè kʋ̀ʋ, á ŋwɔ́ɔ Lagɔ a ŋnú fa wɔlɩ́.
Mɔ̀ɔ ɔ̀ yi lɛ́ Kanyɔ Lagɔ a ŋnɩ́ mʋ́,
Nyúpajɔ̀lʋ ŋnɩ mɔ̀ kʋ́!
10À tɩtɔ Davídɩ a léyibhlɩɛ́ a pɔ́wa à yie lɛ́ a,
Lagɔ pá á nyú!
Ozana yɛ́ pʋ́pʋ́ɛ́ Lagɔ gɔ̀ mɔ̀!»
11Zozíi ŋnɩ Zelízalɛ́mʋ a, ɔ́ pla Lagɔ̀wlʋ̀ɔ̀ a mnɩ́. Ɔ́ dʋdʋ̀ mɔ̀ɔ a lɩ́ɛ́ fɩ́ɛ́ ɩ̀ glalɔɔ́ klʋ́ a, mà cémʋ́ yrʋ́ ya la kpanyɩ mʋ a, ɔ́ plɩ́ lé ɔ́ mʋ Betaníi ɔ yà ɔ́ kʋjɩ̀nyʋ̀àà kʋ́gbá sɔ́ɔ́ sɔ́.
Zozíi dabʋ̀ figíesuó
(Matíe 21.18‑19)
12Zrɩ̀ɩ zɩ lé Zozíi yà ɔ́ kʋjɩ̀nyʋ̀àà sɔ́ wlʋ́ɛ́ yɩ́ lɛ́ Betaníi a, bhʋ́ kleé bhlálɔɔ́ nyúzɔ kʋ́. 13Mà ɔ́ dʋdʋ̀ drɩ̀ mɔ̀ɔ a, ɔ́ yɛ́ figíesu ʋ́ ka nyokwi wlú, lé ɔ́ mʋ lé ɔ́ dʋdʋ̀ ʋ wlú, ʋ nɩ ka bhí wlú a, ɔ nɩ náa mʋ a, nyokwi a pʋpʋ́ ɔ́ ŋnɩlʋʋ́ wlú, figíesi a trʋ trʋ tányɩ nɩ́ àyɩ ŋnɩ. 14Mà Zozíi srʋ figíesuó, ɔ́ anɩ́: «Nyɔ ná li kɛ́ na wlú a bhúó!» Mà ɔ́ cí saá, ɔ́ kʋjɩ̀nyʋ̀àà pʋɛ la nyúkwlí.
Zozíi jɩ́ɩ pɛ́lʋ́panyʋa Lagɔ̀wlʋ̀kádʋ̀ɔ̀ a gbó a mnɩ́
(Matíe 21.12‑17; Lúkɩ 19.45‑48; Záan 2.13‑22)
15A ŋnɩ Zelízalɛ́mʋ a, Zozíi pla Lagɔ̀wlʋ̀kádʋ̀ɔ̀ a mnɩ́. Nyʋa kʋ mɔ̀ɔ á pá pɛ́lʋ́. Nyʋa àna sa, bhè àna kla. Bhʋ́ ɔ́ jɩ́ɩlaá. Nyʋaá à kʋ̀ la mɔ̀ɔ lé á cɩ́cɩlɛ la moníi mʋ́ a, ɔ́ bhóbhuo a tébhlié. Ànàà à ŋwʋ́ɛ́ la kpóòkpíé pɛ́lʋ́ a, ɔ́ pá a kpíé klá. 16Ɔ nɩ́ cíe pɛ́lʋ́panyʋa sá lé a ká Lagɔ̀wlʋ̀ɔ̀ a gbóó mʋ́ yra a. 17Ɔ́ cɩ́a á lé ɔ́ srʋ á mà: «Á jɩ́jrà mà: Ná wlʋɔ́ ŋwɔ́ɔ bhlɩ́ɛ́ fɩ́ɛ́ a bhibhieda à. Mà ʋ nɩ́ kàpàkápányʋa a gwlɛ̀da ŋwɔ́ɔ!#11.17 A zɛlɩɩ sáà Eza 56.7; Zele 7.11.»
18Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ nú wɔlɩ́ɛ́ Zozíi cí a, á yrá yɩ́ lé á kɔ́ɔ́ bhlá. Mà cémʋ́ nyʋa kɔ́kɔ́mnɩ́ wà àyɩ la kpanyɩ ɔ cɩ́acʋ́ a, á gú. 19Yrʋ́ bhli a, ɔ yà ɔ́ kʋjɩ̀nyʋ̀àà sɔ́ wlʋ́ Zelízalɛ́mʋ.
Lagɔ a fádùò a mnɩ́ a bhibhie
(Matíe 21.20‑22)
20Geglìàmí, Zozíi ya ɔ́ kʋjɩ̀nyʋ̀àà sɔ́ yrɩ́bhà, á dʋdʋ̀ a, figíe suó Zozíi dabʋ̀ la a, ʋ́ ya yɛ. Ʋ́ yɛ lé ʋ bhlíkpi yɛ. 21Pɩ́ɛ́lɩ yɩ́ ʋ́ a, ɔ́ luò. Lé ɔ́ srʋ Zozíi, ɔ́ anɩ́: «Másɛɛ̀, dʋdʋ̀ figíesuó ɩ̀ dabʋ̀ la káàla a, ʋ́ lɔ̀fɩ́ɛ́ ya yɛ.» 22Lé Zozíi srʋ á, ɔ́ anɩ́: «Cícása a mnɩ́, náa srʋɛ amɔ mà, a ka Lagɔ a fádùò. 23Cícása a mnɩ́ náa srʋɛ amɔ mà, nyɔ nɩ srʋ kíkéé lɩ̀à mà, kíkée wlʋ́ dɛ́ lé bhli jié, lé wɔlɩ́ɛ́ ɔ́ cí lɛ́ sɩ́tɛ̀ a, ɔ nɩ tɔ̀lɩɩ mɔ̀glʋ̀ duo a, ɩ́ yi kla. 24Ɩ́zà ɩ́ srʋɛ lɛ́ amɔ mà, a nɩ kʋ bhibhieda a, lé a nɩ tɔ̀ Lagɔ duo a ɩ lɛ́ɛ́ a yrálɔɔ́ mʋ́ a, a yɩbhlɩ saá mà a yɛ ɛ́ yɛ́, bhʋ́ a yie yɛ́. 25A nɩ yrá a ká bhibhie, lé a nɩ ka nyɔ a nyumo wɔlɩ́ duo kʋ́ a, a cieloó. A nɩ nɩ saá bhʋ́ a Tʋ́ ɔ̀ kʋ ɔ̀ lagɔɔ́ a, ɔ́ yi sáà amɔ a nyumoé ciè. [26Mà a nɩ nɩ́ a lía cie a, a Tʋ́ ɔ̀ kʋ ɔ̀ lagɔɔ́ a, ɔ nɩ́ ka sáà amɔ ciè.#11.26 Á má wɔlɩdrèè lɩ̀à, bhlagɔ̀gɔ̀bɔ̀gwɩ̀ɛ̀ fɩ́ɛ́ a mnɩ́ a nɩ́ jɩ́jràlɔ̀.]»
Ɔ̀ cíe lɛ́ kɛtɛkʋ́ Zozíi a?
(Matíe 21.23‑27; Lúkɩ 20.1‑8)
27Zozíi yà ɔ́ kʋjɩ̀nyʋ̀àà sɔ́ yrɩ́bha sɔ́kʋ́ Zelízalɛ́mʋ a, ɔ́ kʋ Lagɔ̀wlʋ̀kádʋ̀ɔ̀ a mnɩ́ a bida lé Lagɔ̀bʋ̀bɔ̀nyʋ̀àkádàà lé lɔ̀ a másɛnyʋaá yà dɔ̀panyʋaá sɔ́, á yio gɔ̀. 28Lé á yrɔ́ɔ́, á anɩ́: «Nyɔ gbá cíe lɛ́ mɔ̀ kɛtɛkʋ́ a? Ɔ̀ nyɛ́ lɛ́ mɔ̀ pɔ́waá lé ɩ̀ nie lɛ́ wɔlɩ́ɛ́ fɩ́ɛ́ lɩ̀à a?» 29Á yrá saá Zozíi a, bhʋ́ ɔ́ srʋ á mà: «Ká amɔ wɔlɩdrè a múó coco kʋ́ yráa bhè a ká mɔ́ɔ srʋ bhʋ́ a tányɩɛ́ nyɔ ɔ̀ cíe mɔ́ɔ a ká amɔ mɔ́ pápa à. 30Ɔ̀ cíe lɛ́ Záan lé ɔ́ ŋwʋ́ lɛ nyʋa nyú wlú a? Nyʋa à cíeó, mà Lagɔ cíeó? A srʋ ca mɔ́ɔ a!»
31Zozíi cí lɛ́ sɩ́tɛ̀ a, á fa fa wɛ́ gɔ̀ a, á anɩ́: «À nɩ̀ cí mà: Lagɔ ɔ̀ cíe Záan a, ɔ́ yi cí mà: Bhè ɛ̀kʋ̀ʋ̀ lé a nɩ́ ɔ cícíwɔlɩɛ́ cɩ́cása kʋ́ bhá à? 32À nɩ̀ cí sáà mà: Nyʋa cíeó a, à yà wɔlɩ́ yɛ́.» Ɩ́ ka ŋnɩ́ a á gúu jrèè kʋ́, máà nyʋaá fɩ́ɛ́ yì la saá mà Záan ŋwɔ́ɔ la Lagɔ a nékʋ́cinyɔ mɔ̀glʋ̀. 33Bhʋ́ á srʋ Zozíi mà: «Nyɔɔ́ ɔ̀ cíe Záan à nɩ́ ɔ́ yì.» Zozíi anɩ́: «Àà! Mɔ́ɔ mà, ɔ̀ cíe mɔ́ɔ a, nɩ́ ka sáà amɔ mɔ́ pápa à.»
Currently Selected:
Málɩ́kɩ 11: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
