Málɩ́kɩ 12
12
Nyɩ́kpɔbhlanɔnʋzrɩ̀nyʋa a núnúóó
(Matíe 21.33‑46; Lúkɩ 20.9‑19)
1Lé Zozíi pá núnúó, ɔ́ anɩ́: «Nyɔ a múó, ɔ́mɔ́ ɔ̀ glɩ ɔ glàyʋ̀làgba. Ɔ́ kɩkla lágbàà, lé ɔ́ nɩ mɔ̀ɔ glàyʋ a cɩa da. Lágbàà a dɛdɛ̀ a zà, ɔ́ pá mɔ̀ɔ gbadʋ́. Lé ɔ́ ŋwʋ́ mɔ̀ɔ nɔnʋzrɩ̀nyʋa bhè ɔ yà ámá sɔ́ ká lɛ bhábhà. Lé ɔ́ mʋ wɛ́ɛ. 2Glàyʋ̀ɔ̀ a zalɩmatànyɩ̀ɛ̀ ŋnɩ a, ɔ́ cíe ɔ cóyʋ mà ɔ mʋ lé ɔ yɛ́ nɔnʋzrɩ̀nyʋa lé cémʋ́ a yɔ̀sɔ́ ŋwʋ́ʋ wázɔ̀ kʋ́ a, á ká yɩ́ saá bhábhà. 3Mà nyɔɔ́ mʋ a, á bhlio kʋ́ lé á bhitoó, lé á jɩ́ɩlɔɔ́ lé ɔ yà glɔ̀gbɩ kɔfɩ́ɛ́ sɔ́ yrɩ́bhà. 4Lé lágbàà a kanyɔ cíe sɔ́kʋ́ sɔ́ nyɔ ànɔ. Á bhlio kʋ́, á klálɔɔ́ gòdì klú, á trʋlɔɔ́ lé á jɩ́ɩlɔɔ́. 5Lé ɔ́ cíe sɔ́kʋ́ ɔ cóyʋ ànɔ a múó, á bhlio kʋ́ á bhitoó lé á bhlɔ́ɔ́. Ɩ́ kʋ lɛ́ saá, cóyuo kɔ́kɔ́mnɩ́ ɔ́ cíe yɩ́ mɔ̀ɔmɔ̀. Mà á mʋ a, nɔnʋzrɩ̀nyʋ̀àà bhɩtɩ àna, lé á bhlá àna.
6Bhʋ́ ɔ́ cíe yɩ́ cɩɩ́ bɩ́kʋ́ bhɩàda ɔ́ mnɩ́ a yʋ́, ɔ́ wàwàyʋ̀ɔ̀ a múó ɔ́ ka a. Ɔ́ srʋ ɔ nyoku mà: A nɩ́ yɛ́ ɔ́ a, a yio kpá ŋwʋ́. 7Mà ɩ nɩ́ sɩ́tɛ̀ plɩ́ɩ̀, á yɛ́ ɔ́ a á srʋ srʋ, á anɩ́: Ɔ̀ nà kà lɛ́ lágbàà jáa kʋ́ li a, ɔ́mɔ́ yie lɛ́ ɔ̀! A yi à bhlɔ́ɔ́ bhè lágbàà ká àmɔ̀ wlɩ plɩ́ɩ. 8Á bhlio kʋ lé á bhlɔ́ɔ́ lé á pá ɔ gàzɛ̀ɛ̀ klá.
9Naa lágbàà a kanyɔ nɩ yi a, cégbá mʋ́ ɔ́ na ká nɩ a? Ɔ nɩ yi a, ɔ́ na ká nɔnʋzrɩ̀nyʋ̀àà bhlá, lé ɔ ká lágbàà mnɩ́ yígàdà nyʋa ŋwʋ́.
10A ya lɛ́ wɔlɩdrèè lɩ̀à Lagɔ̀bɔ̀gʋ a mnɩ́ zɛ a? Ɩ́ jɩ́jrɔ̀ mɔ̀ɔ mà:
Cɔ́kʋɔ́ ghlɩpanyʋaá nɩ́ lɛ́ mányɩ a,
Ʋ́mʋ́ ʋ̀ bhli yɩ́ lɛ́ wlʋɔ́ kʋ́.
11 Kanyɔ Lagɔ ɔ̀ nɩ lé ɩ́ plɩ́ɩ saá.
Ɩ́ lɔ̀fɩ́ɛ́ lɩ̀à ɩ́ ŋwɔ́ɔ námawɔlɩ. # 12.10‑11 A zɛlɩɩ sáà Lɔlɔ 118.22‑23. »
12Mà Zozíi cí lɛ́ saá a, Zúfʋnyʋa kádàà yì la saá mà ámá ɔ́ sa. Ɩ́ ka ŋnɩ́ a, á mʋ́mɔ la cémʋ́ á yi nɩ bhè á yio bhlá a, mà cémʋ́ á gúle la jrèè kʋ́ a á wlʋ́ɔ́ gɔ̀ lé á mʋ.
Lagɔ̀jràmáá cíé mà a pɛ́ɛ lapóo a?
(Matíe 22.15‑22; Lúkɩ 20.20‑26)
13Lé á cíe Falizɩ́ɛnyʋa yà Elódʋ a nyʋa a zùò sɔ́ mà a mʋ lé a sa Zozíi zɔ̀ bhè ɔ́mɔ́ mɔ̀glʋ̀ ɔ né kɔ́ɔ́ gbʋ́ gʋa. 14Á yi lé á yrɔ́ɔ́ mà: «Másɛɛ̀, à yì saá mà ɩ̀ cíé cɩ́cása, nɩ̀ɩ́ gbázɩ̀ nyʋa mʋ́, lé nɩ̀ɩ́ gúu sáà nyʋa a klʋ́ a wɔlɩ́ a ŋwʋ́ŋwʋ́ɛ́ lé ɩ̀ cɩ́alɛ námasa nyʋaá à bhlie Lagɔ a nyúzɔ a. Náa, srʋ caá àmɔ̀, à pɛ́ɛ Wlɔmɛ́ɛnyʋa a lóo kádɔ Sezáa a lapóo? Mà à ná pɛ́ɛlaá a?»
15Mà Zozíi yɛ́ á nyumo bhobhoé a mnɩ́ a, bhʋ́ ɔ́ yrá á, ɔ́ anɩ́: «Ɛ̀kʋ̀ʋ̀ lé a sa mɔ́ɔ zɔ̀ a? A la caá mɔ́ɔ flèejìè bhè kɛ́ yɛ́!» 16Á lɔɔ́ flèejìè a, lé ɔ́ yrá á, ɔ́ anɩ́: «Nyɔ gbá ɔ̀ kɔ̀ɔ̀ wlú á ŋwʋ́ flèejìè jɩ̀ a, lé ɔ̀ kɔ̀ ŋnɩ́ á jɩ́jrà ʋ́ jɩ̀ a?» Á anɩ́: «Lóo kádɔ Sezáa.» 17Zozíi anɩ́: «Àà! Naa, ɛ̀ nɩ̀ ŋwɔ́ɔ saá a, lɛ́ ɛ̀ ŋwɔ́ɔ Sezáa a lɛ́ a, a nyɛ́ɛ́ Sezáa, ɩ́zà lɛ́ ɛ̀ ŋwɔ́ɔ Lagɔ a lɛ́ a, a nyɛ́ɛ́ Lagɔ!» Mà Zozíi cílɛ́ saá a, nyʋaá neé mnaá.
Kúdùkuo á galɔ̀ɛ̀
(Matíe 22.23‑33; Lúkɩ 20.27‑40)
18Zúfʋnyʋa a lɔ́lɔ́kpa ànàà á wlele lɛ́ Sadisɩɛ́nyʋa lé à nɩ́ bhá lɛ́ kúdùkuo a galɔ̀wɔ̀lɩ̀ɛ̀ cɩ́cása kʋ́ a, á yi Zozíi yrá ka mà: 19«Másɛɛ̀, Moyízɩ a Jràmáá nie mà: Nyɔ yà ɔ ŋwnɔ́ sɔ́ nɩ nɩ́ yʋ́ va lé ɔ nɩ kú a, ɔ nɩ́ayʋ́ bhá kʋ́zrɩ̀ŋnɔ̀ɔ̀ lé ɔ lɔ́lɔ́kpaá nɩ ka tuò.#12.19 A zɛlɩɩ sáà Detro 25.5. 20Naa, dʋdʋ̀ʋ̀ nɩ́ayúó gbàásɔ́ kʋ la ʋ́, tagà anɔ sí ɔ́ ka la ŋwnɔ́, mà ɔ yɔ̀sɔ́ nɩ́ yʋ́ va, lé ɔ́ kú. 21Lé sɔ́ anɔ bhá kʋ́zrɩ̀ŋnɔ̀ɔ̀. Ɔ yɔ̀sɔ́ nɩ́ sáà yʋ́ va lé ɔ́ kú. Lé ta ánɔɔ́ bhɔ́ɔ́, mà céamúó, ɔ yɔ̀sɔ́ nɩ́ yʋ́ va. 22Mà níayúó kú sɩ́tɛ̀ àààn, lé áa gbàásɔ́ɔ́ bhɩa ʋ́. Lé ŋwnɔ́ɔ́ mà ɔ́ pla mɔ̀ɔ sáà lé ɔ́ kú. 23Naa kúdùkuo nɩ galɔ̀ cɩ́cása a, ànɔ̀ gbá kɛtɛkʋ́ nà kà ŋwnɔ́ɔ́ bhá à? Máà áa gbàásɔ́ɔ́ bhɔ́ɔ́ la.»
24Lé Zozíi srʋ á, ɔ́ anɩ́: «Cémʋ́ a cíle lɛ́ dɛ́ a, a ya tuò. Ɛ̀kʋ̀ʋ̀ a? Lagɔ̀wɔ̀lɩ̀ɛ̀ a zɛlɛ lɛ́ a, a nɩ́ ɩ gba yì, lé Lagɔ a pɔ́waá cémʋ́ á kʋ a a nɩ́ ɩ́ sáà yì. 25Cémʋ́ ɩ́ kʋ lɛ́ a, nyʋa nɩ galɔ̀ a, sísí wɔlɩ́ nɩ́ yɩ́ ɔ̀ Lagɔɔ́ kʋ, nyʋa na ká yɩ́ kplɔkplɔzìzi bísakʋ́ kʋʋ̀. 26Ɩ̀ ŋwɔ́ɔ lɛ́ kúó a galàwɔ̀lɩ a, à nɩ́ à zà mɩ́ Moyízɩ a bɔ́gʋ̀ɔ̀ a mnɩ́ yɛ́ɛ? Bɔ́gʋ̀ɔ̀ a mnɩ́ Lagɔ srʋ Moyízɩ vɩ́da vɩ́da kpàkáá gɔ̀ mà: Mɔ́ɔ ɔ̀ ŋwɔ́ɔ Ablaámʋ a Lagɔ, Izákɩ a Lagɔ lé Zakɔ́bʋ a Lagɔ?#12.26 A zɛlɩɩ sáà Námɛɛ́ 3.6. 27Ɩ́ gba à ŋwɔ́ɔ mà Lagɔ nɩ́ kúdùkuo a Lagɔ ŋwɔ́ɔ, mà ʋ́ ŋwɔ́ɔ gàgànyʋa a Lagɔ. Naa cémʋ́ a cile lɛ́ ʋ́ a, a ya mnɔ́ɔ mɔ̀glʋ̀.»
Jràmá gbá à kámalɛ áa?
(Matíe 22.34‑40; Lúkɩ 10.25‑28)
28Lɔ̀ a másɛ ànɔ a múó kʋ la ʋ́, lé ɔ́ pʋ a la nyúkwlí. Ɔ́ yɩbhlɩ lɛ́ saá mà Zozíi ŋwnʋ́ námasa Sadisɩɛ́nyʋaá kɔ́sɩ̀nɛ̀ɛ̀ kʋ́ a, ɔ́ ŋnɩ ɔ́ gɔ̀ lé ɔ́ yrɔ́ɔ́ mà: «Másɛɛ̀, Jràmá gbá a zi jràmá a lɔ̀fɩ́ɛ́ a nyièdɩ kʋ́ à?» 29Zozíi anɩ́: «Jràmá à zi jràmá a lɔ̀fɩ́ɛ́ a nyièdɩ kʋ́ a, ámá à ŋwɔ́ɔ: Pʋ nyúkwlí Izrayɛ́lɩ! À Kanyɔ Lagɔ a múó ɔ̀ ŋwɔ́ɔ Kanyɔ! 30Naa, wà Kanyɔɔ́ ɔ̀ ŋwɔ́ɔ nà Lagɔ a nà duo a lɔ̀fɩ́ɛ́ a mnɩ́, nà zuzu a lɔ̀fɩ́ɛ́ a mnɩ́, nà bhobhoé a lɔ̀fɩ́ɛ́ a mnɩ́, ɩ́zà nà fɩ́ɛ́ a lɔ̀fɩ́ɛ́ a mnɩ́.#12.29‑30 A zɛlɩɩ sáà Detro 6.4‑5. 31Sɔ́ jràmáá à gbɛ àlɩa jɩ̀ a, á cíé mà: Cémʋ́ ɩ̀ wà lɛ́ ɩ̀ nyoku a, wà sáà sɩ́tɛ̀ ɩ̀ liyʋ.#12.31 A zɛlɩɩ sáà Levíi 19.18. Jràmá nɩ́ yɩ́ sɔ́kʋ́ ʋ́ bɩ́ kʋ lé a ká yɩ́ Jràmɩ́ cié sɔ́ɔ́ lɩ̀à kʋ́ zi.»
32Lé lɔ̀ a másɛɛ́ srʋ Zozíi mà: «Cɩ́cása Másɛɛ̀, ɩ̀ cíé cɩ́cása mà: Kanyɔ Lagɔ a múó ɔ̀ ŋwɔ́ɔ Lagɔ, Lagɔ nɩ́ yɩ́ sɔ́kʋ́ ʋ́ kʋ ɛ̀ nɩ nɩ́ ʋ́ a múó ŋwɔ́ɔ a.#12.32 A zɛlɩɩ sáà Detro 4.35. 33Naa nyɔ nɩ wà Lagɔ ɔ duo a lɔ̀fɩ́ɛ́ a mnɩ́, ɔ fíkeé a lɔ̀fɩ́ɛ́ a mnɩ́ lé ɔ fɩ́ɛ́ a lɔ̀fɩ́ɛ́ a mnɩ́. Ɩ́zà cémʋ́ ɔ́ wà lɛ́ ɔ nyoku a, ɔ nɩ wà sáà sɩ́tɛ̀ ɔ liyʋ a. Ɩ́mɩ́ jràmɩ́ɛ́ sɔ́ɔ́ lɩ̀à ɩ́ zi bʋbɔ̀lɛ̀ kʋ́.#12.33 A zɛlɩɩ sáà Ozée 6.6.»
34Zozíi yɩbhlɩ saá mà nyɔɔ́ nú námasa ɔ cícíwɔlɩɛ́ mnɩ́ a, ɔ́ srʋ ɔ́ mà: «Mɔ̀, nɩ́ yɩ́ Lagɔ a Léyibhlɩɛ́ dá trʋ̀.» Ɔ́ cí sɩ́tɛ̀ a, nyɔɔ́ nɩ́ yɩ́ sɔ́kʋ́ mɔ́ kwɔ́sɩnɛ kʋ́ yrá à.
Kláyɩ́sɩ zi lóo Davídɩ kʋ́
(Matíe 22.41‑46; Lúkɩ 20.41‑44)
35Zozíi kʋ la Lagɔ̀wlʋ̀ɔ̀ a mnɩ́ cɩ́àda lé ɔ́ yrá, ɔ́ anɩ́: «Ɛ̀kʋ̀ʋ̀ bhè lɔ̀ a másɛnyʋaá nɩ cɩ́a, lé á nie mà, Kláyɩ́sɩ ŋwɔ́ɔ Davídɩ a yʋ́ à? 36Bhè Davídɩ mɔ̀glʋ̀, tányɩɛ́ mʋ́ Blɔ̀blɔ̀zùzùò kwlílo wá jɩ̀ a, bhʋ́ ɔ́ cí wá mà:
Kanyɔ Lagɔ srʋ ná Kanyɔ mà:
Plɩ́ɩ ná lilie kʋ́ lé bɔ́ɔ sá!
Lé ká nɩ lé kà nà gblɩ̀nyʋa jɩ̀ námnɩɩ̀. # 12.36 A zɛlɩɩ sáà Lɔlɔ 110.1.
37Davídɩ mɔ̀glʋ̀ wle wá Kláyɩ́sɩ ɔ Kanyɔ, naa cégbá mʋ́ ɩ́ kʋ lé ɔ́ yi sɔ́kʋ́ ɔ yʋ́ plɩ́ à?» Zozíi cí lɛ́ saá a, nyʋaá fɩ́ɛ́ à pʋɔ nyúkwlí a, ɩ́ ka la má lɔlɔ kʋ́.
Zozíi anɩ́ a mányɩ lɔ̀ a másɛnyʋa a nɩnɩgbɩ kʋ́
(Matíe 23.1‑36; Lúkɩ 20.45‑47)
38Zozíi a cɩ́acʋ́ɔ́ a mnɩ́ɛ́, bhʋ́ ɔ́ cí, ɔ́ anɩ́: «Lɔ̀ a másɛnyʋaá yà á bànɩ̀vàyi sɔ́ wà bibíé, lé á yrá lé nyʋa fɩ́ɛ́ pá á yúó jrìnyiedɩ. Naa, a mányɩ á nɩnɩgbɩ̀ɛ̀ kʋ́! 39A nɩ pla zúfʋcɛcɩghlɩɛ́ a mnɩ́ a á wà drɩ̀ a kpí a mnɩ́ a bɔ́ɔlɛɛ́. A nɩ wle á glɩ̀sɩ́sɩ kʋ́ lé a nɩ yi a, nyɩ́kpɔkádàà a kpíé a mnɩ́ mɔ̀ɔ á yrá lé a ká bɔ́ɔ. 40Á yie sáà lé á nyɩ́glɩlɛ kʋ́zrɩ̀ŋwna lé á bháʋ́ á kakalɩɛ fɩ́ɛ́. A nɩ bhibhie a, á trʋmalɛ gbʋ́ a sá á bhibhie wɔlɩ́ɛ́ mʋ́ lé nyʋa ká á yɩ́ gɔ̀ ŋwʋ́. Á yi Lagɔ a drɩ̀ ɩ́ kpaá pɛ́ɛ.»
Ŋazɩ̀kʋ̀zrɩ̀ŋwnɔ̀ɔ̀ nyɛ́ lé ɔ́ zi lɛkanyʋa kʋ́
(Lúkɩ 21.1‑4)
41Zozíi mʋ lé ɔ́ plɩ́ɩ Lagɔ̀wlʋ̀ɔ̀ a mnɩ́ a bhɔ́klɔɔ́#12.41 bhɔ́klɔɔ́: Ʋ mnɩ́ á ŋwʋ́lɛ Lagɔ̀wlʋ̀ a mnɩ́ a moníi sá. gɔ̀ lé ɔ bɔ́ɔ sá. Bhʋ́ ɔ́ kʋ lé ɔ́ dʋdʋɛ nyʋa à ŋwʋ́ɛ́ mɔ̀ɔ moníi a. Léyuo kɔ́kɔ́mnɩ́ yie lé á ŋwʋ́ɛ́ mɔ̀ɔ moníi kɔ́kɔ́mnɩ́. 42Mà ŋazɩ̀kʋ́zrɩ̀wnɔ a múó yi, ɔ́ fa pìkìni yi a sɔ́ lé ɔ́ páa mɔ̀ɔ mɩ́. 43Bhʋ́ Zozíi wle ɔ́ kʋjɩ̀nyʋ̀àà lé ɔ́ srʋ á mà: «Cícása a mnɩ́, náa srʋɛ amɔ mà ŋazɩ̀kʋ̀zrɩ̀ŋwnɔ̀ɔ̀ lɩ̀à, ɔ́mɔ́ nyɛ́ kpanyɩ lé ɔ̀ zi nyʋaá fɩ́ɛ́ à ŋwʋ́ bhɔ́klɔɔ́ a mnɩ́ moníi a kʋ́. 44Ámá ànàà, moníe á nyɛ́ lɛ́ a, ɩ nɩ́ á gbʋ́ ka à. Mà ɔ́mɔ́ moníe fɩ́ɛ́ ɔ́ ka la lɛ́, lé ɔ ká la ɔ nyoku kʋ́ bhla a, ɩ́mɩ́ ɔ́ nyɛ́ lɛ́.»
Currently Selected:
Málɩ́kɩ 12: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
