Málɩ́kɩ 13
13
Zozíi anɩ́ Lagɔ̀gbìkádàà yi wɔlɔɔ̀
(Matíe 24.1‑2; Lúkɩ 21.5‑6)
1Zozíi wlʋ́ɛ́ Lagɔ̀wlʋ̀ɔ̀ a mnɩ́ ɔ́ yie lé ɔ kʋjɩ̀nyɔ a múó sa né, ɔ́ anɩ́: «Dʋdʋ̀ Másɛɛ̀! Àmɛ cɔ́kwɩ ghlɩ náa! Ghlɩ kádɩ á pá ɛ̀ɛn!» 2Lé Zozíi srʋ ɔ́, ɔ́ anɩ́: «Ghlɩ kádɩ̀ɛ̀ lɩ̀à ɩ̀ dʋdʋɛ lɛ́ dɛ́ a, yruú yi ʋ́ kʋ lé á yií wla lé lɛ́ nɩ́ ka dɛ́ tuo.»
Zozíi srʋ ɔ́ kʋjɩ̀nyʋ̀àà mà á mányɩ
(Matíe 24.3‑14; Lúkɩ 21.7‑19)
3Lé Zozíi mʋ Lagɔ̀wlʋ̀ɔ̀ gɔ̀ a Olivíe kikéé wlú. Ɔ́ bɔ́ɔ mɔ̀ɔmɔ̀ ɔ̀ yà Pɩ́ɛ́lɩ lé Zákɩ lé Záan lé Adrée sɔ́ lé á yrɔ́ɔ́, á anɩ: 4«Másɛɛ̀, tányɩ gbá mʋ́ bhʋ́anɩ wɔlɩ́ɛ́ fɩ́ɛ́ lɩ̀à na ká ŋnɩ áa? Ɩ́zà cégbá mʋ́ à yi tányɩɛ́ yɩbhlɩ a?» 5Zozíi anɩ́: «A nɩ nɩ a, a mányɩ! Nyɔ ná nyɩ́glɩ̀ amɔ. 6Kɔ́kɔ́mnɩ́ yi yi, lé á yi ná ŋnɩ́ fa. Á yi cí mà: Ámá ŋwɔ́ɔ Kláyɩ́sɩ, lé á yi nyʋa kɔ́kɔ́mnɩ́ nyɩ́glɩ̀. 7A yi tʋ́ a wɔlɩ́ nú, lé a yi sáà ʋ́ yrè nú, mà di ná gbláa amɔ nyú. Ɩ́ ka lé ɩ ká saá plɩ́ɩ, mà zɩkpaá bhɩa bhɩa tányɩɛ́ nɩ́ àyɩ ŋnɩ. 8Bhlɩ́ yi glù sɔɔ̀ lé ɛ́ yi ɛlibhlɩ tʋ́ fa. Lé léyibhlɩ yi glù sɔɔ lé ɛ́ yi ʋ li léyibhlɩ tʋ́ fa. Bhlɩ́ kɔ́kɔ́mnɩ́ jɩ̀ a dʋ̀dʋ yi tɩtɛɛ̀, lé kɔkwɛ yi sáà pla. Bhʋ́anɩ nyakalɩɛ́ fɩ́ɛ́ lɩ̀à yi wlʋ́ mànɩ́, cémʋ́ gbádɩ̀ŋwnɔ nɩ yrá ɔ ká va a, ɩ́ nyakalɩɛ́ ɔ́ yɛ́ lɛ́ a.
9Mà amɔ, a mányɩ a nyoku kʋ́. Nyʋa yi amɔ tʋ́ ku, á yi amɔ zúfʋcɛcɩghlɩ a mnɩ́ kʋ́ bhlii lé á yi amɔ bhɩtɩ. Á yi sáà amɔ gɔ̀mnànyʋa yà léyuo sɔ́ a drì tɩ́tɩ́ ŋwʋ́ ná zà, a ká mɔ̀ɔmɔ̀ ná ŋwɔ́nɩ́srɩ̀lɛ nɩ ɩ́ zà. 10Mà Lagɔ a Námadìè ka lé ɩ ká fɩ́ɛ́ bhlɩ́ɛ́ fɩ́ɛ́ jɩ̀ cílo. 11A nɩ tɔ́pʋ amɔ lé a nɩ fa amɔ zúzu a dú a, ŋanɩmɛ ná bhlá amɔ, wɔlɩ́ɛ́ a na ká cí a, zà. Mà wɔlɩdrèè nà kà amɔ dáamúó duo kʋ́ bhli a, a cí á, mà Blɔ̀blɔ̀zùzu ŋwʋ́ amɔ má neé. 12Nɩ́ayʋ́ɔ́ yi ɔ nɩ́ayʋ́ nyʋa nékʋ́ nyɛ́ɛ̀ lé á yio bhlá. Tʋ́ yi sáà ɔ yʋ́ sa à lé á yio bhlá. Lé yúó yi sáà a vanyʋa gbʋ́ jɩ̀ gʋà lé á yi á kúbhlajɩ̀ɩ ŋwʋ́. 13Lé nyʋaá fɩ́ɛ́ yi amɔ mʋ́ gblɩ̀ ná zà. Mà nyɔɔ́ ɔ̀ nà kà duo kʋ́ tɛ́maá lé bɩ́kʋ́bhɩa yruó ká ŋnɩ a, ɔ́ yi ʋ́ neé wlʋ́.
Zozíi anɩ́ zɔ̀bhɩ̀àdàà zʋ̀ɛ̀ yi yɛ́lɔɔ̀
(Matíe 24.15‑28; Lúkɩ 21.20‑24)
14Tányɩɛ́ mʋ́ a nɩ yɛ́ mnùzìènyɔ̀ɔ̀#13.14 mnùzìènyɔ̀ɔ̀: A zɛlɩɩ sáà Danɩ 9.27; 11.31; 12.11. ɔ̀ bhusulo lɛ́ Lagɔ gɔ̀ a lé ɔ nɩ kʋ dɛ́ɛ́ ɔ nɩ́ ka lé ɔ ká kʋ a, nyɔɔ́ ɔ̀ zɛlɛ bɔ́gʋ̀ɔ̀ lɩ̀à a, ɔ nú námasa wɔlɩ́ɛ́ ʋ́ cíé a. A nɩ ya wɔlɩ́ɛ́ fɩ́ɛ́ lɩ̀à yɛ́ a, nyʋa kʋ̀ Zudéebhlɩɛ́ a mnɩ́ a, a gú lé a zúzùò kíkíé a nyièdɩ. 15Ɔ̀ nà kà jrùkʋ́ kʋ a, ɔ ná pla yɩ́ sré lé ɔ ká lɛ́ bhá. 16Ɔ̀ nɩ̀ kʋ lágbaá nɔnʋzrɩ̀da lé ɔ̀ nɩ̀ sà la ɔ kótu mʋ́ a, ɔ ná yrɩ́bha yɩ́ lé ɔ kʋ́ʋ́ bhá ka mʋ. 17Gbádɩ̀ŋwnàà lé ŋwná ànàà à nyɩ́a yúó bhʋ́anɩ tányɩɛ́ a mnɩ́ a, á yi miè! 18Naa, a bhibhie Lagɔ lé ɩ̀lɩa lɔ̀fɩ́ɛ́ ná ŋnɩ nyʋ́gbʋ̀zʋ̀wɔ̀trɔ̀ a tányɩɛ́ a mnɩ́. 19Bhʋ́anɩ nyakalɩɛ́ nyʋa na ká mʋ́ blée a, ɛ́ zù kpanyɩ lé ɛ́ zi nyakalɩɛ́ fɩ́ɛ́ kʋ́. Kɔ́ nɩ ka wá wlʋ́ a, sɩ́tɛ̀ a nyakalɩ nɩ́ à zà ŋnɩ, lé ɛ nɩ́ ka kɔ́ɔ̀kɔ́ ŋnɩ.#13.19 A zɛlɩɩ sáà Danɩ 12.1. 20Kanyɔ Lagɔ nɩ nɩ́ la ɩ tányɩɛ́ kʋ́ sɩsa a, nyɔ nɩ́ ka la pʋ́. Ànàà Lagɔ pá lɛ́ ŋnɩ́ lé ɔ́ wle lɛ́ a, á zà ʋ́ sɩsa tányɩɛ́ kʋ́.
21Nyʋa yi amɔ srʋ mà: A dʋdʋ̀ Kláyɩ́sɩɛ́ ɔ́mɔ́ kʋ̀ ɔ̀! Lé àna yi cí mà a dʋdʋ̀ ɔ́mɔ́ kʋ dɛ́! Mà bhʋ́anɩ nyʋaá a ná bhá a wɔlɩ́ɛ́ cɩ́cása kʋ́. 22Kpɔkplányʋa yi sáà yi lé á yi a nyoku Kláyɩ́sɩ wleè, lé kpɔkplá lagɔ̀ɔ̀ a nékʋ́cinyʋa yi sáà yi. Á yi lɛ̀wɔ̀lɩ yà zʋ̀zʋ̀àwɔ̀lɩ sɔ́ nɩ lé áa nɩ yi míi a, nyʋaá Lagɔ pá lɛ́ ŋnɩ́ lé ʋ́ wle lɛ́ a, á ká á nyɩ́glɩ̀. 23Naa amɔ ànàà, náa pá bhlà amɔ kúná. A mányɩ weè!
Nyɔɔ́ a Yuwliyʋɔ́ a yiyitanyɩɛ́
(Matíe 24.29‑31; Lúkɩ 21.25‑28)
24Ɩ́ yrií a mnɩ́, bhʋ́anɩ kalɩmɛ nɩ plɩ́ a, yrʋ́gàvlà yi tríma, lé cʋ́ nɩ́ ka yɩ́ sáà lʋ.#13.24 A zɛlɩɩ sáà Eza 13.10; Eze 32.7. 25Lagɔ̀dràà yi bhli, lé pɔ́wa kádàà fɩ́ɛ́ kʋ lagɔɔ́ a, á yi gbʋgbɔ̀lɔ̀.#13.25 A zɛlɩɩ sáà Eza 24.4. 26Bhʋ́ a na ká Nyɔɔ́ a Yuwliyʋɔ́ yɛ́ lé ɔ ká jrùu a mnɩ́ laa, pɔ́wa kádàà yà blɔ̀blɔ́ɔ́ sɔ́ a mnɩ́.#13.26 A zɛlɩɩ sáà Danɩ 7.13. 27Ɔ nɩ yi a, ɔ́ yi kplɔkplɔzìzi pɩ́pɩ́ kʋ́ a dáá fɩ́ɛ́ cíè, lé ɩ́ yi nyʋaá Lagɔ pá ŋnɩ́ lé ʋ wle a, kʋ́ gʋ́gwlà.
Figíesu a pápalɛɛ́
28A lɛ́bhɛɛ wɔlɩdrèè á bhá lé á pápalɛ figíesuó a, á pʋ a nyúkwlí! A nɩ yɛ́ figíesu lé ʋ lábhɩɛ́ nɩ tɔpɔ a, á yɩbhlɩ saá mà kɔ̀kɔ̀yrʋ̀ ya ʋ́ mɛ́. 29Naa, a nɩ yɛ́ nɩnɩgbɩ̀ɛ̀ fɩ́ɛ́ lɩ̀à a, a yɩbhlɩ yɩ́ saá mà Nyɔɔ́ a Yuwliyʋɔ́ a yiyitanyɩɛ́ ya ʋ́ mɛ́. 30Náa srʋɛ amɔ cɩ́cása a mnɩ́ mà kakamnɩ́lɛ́ a nyʋa á jànyɩ̀ɛ̀ nɩ́ ka plɩ́, lé wɔlɩ́ɛ́ fɩ́ɛ́ ɩ́ srʋɛ lɛ́ amɔ a ɩ́ yi ŋnɩ. 31Lagɔ yà dʋ̀dʋ sɔ́ yi plɩ́, mà ná niwɔlɩ nɩ́ ka kɔ́ɔ̀kɔ́ plɩ́.
Bɩ́kʋ́bhɩadàà glíiyie nyɔ nɩ́ ɛ́ yì
(Matíe 24.36‑44)
32Ɛ̀ nɩ ŋwɔ́ɔ yruó yà glíiyie sɔ́ a, nyɔ nɩ́ ɩ́ yì. Kplɔkplɔzìzi nɩ́ sáà mɩ́ yì, lé Lagɔ a Yuwliyʋɔ́ mɔ̀glʋ̀ɔ̀ nɩ́ɩ́ sáà yì, mà ɔ Tʋ́ a múó coco ɔ́mɔ́ yìì. 33Naa, cémʋ́ a nɩ́ lɛ́ tányɩɛ́ yì a, a ná ŋwɔ́ɔ mà, a dɛdɛ̀.
34Cémʋ́ ɩ́ kʋ a, nɩ̀ yɩ́ a nànɩ́ cémʋ́ gbikanyɔ mʋ lɛ́ wɛ́ɛ lé ɔ́ tɩ lɛ́ ɔ gbóó ɔ cóyuo gɔ̀ a. Ɔ na ká mʋ a, ɔ́ nyɛ́ á nɔnʋ. Lé ɔ́ srʋ gbó a dɛdɛ̀ nyɔ̀ɔ̀ mà ɔ ná ŋwɔ́ɔ ɔ dɛdɛ̀ gbóó. 35Mà, cémʋ́ a nɩ́ tányɩɛ́ mʋ́ kanyɔɔ́ na ká yi a yì a, a ná ŋwɔ́ɔ. Àà! Kosúgbòsa ɔ́ yie yɩ́ ò! Dʋdʋ́kádʋʋ́ ɔ́ yie yɩ́ ò! Zizìèda ɔ́ yie yɩ́ ò! Geglìà ɔ́ yie yɩ́ ò! À nɩ́ɩ́ yì. 36Ɔ nɩ vídè kʋ́ lé ɔ nɩ yi a, ɔ́ yi amɔ yrá ŋnɩ. 37Wɔlíɛ́ ɩ́ srʋɛ lɛ́ ayɩ dɛ́ a, nyʋaá fɩ́ɛ́ ɩ́ srʋ ɩ́ lé á ká dɛdɛ̀.»
Currently Selected:
Málɩ́kɩ 13: NEY
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
