Ruuka 10

Yesu ˆaghatoma abhaghëndi abhande miröngö mohungate na bhabhere

1Achekumara ghayo, Omutëmi Yesu akaahura abhaghëndi abhande, miröngö mohungate na bhabhere. Akabhatoma bhabhere bhabhere, bhakangate mo‑meghya na ahaghiro hoose, hano are ëndiri ghuye omwene.

2Yesu akabhabhoorera akabhugha, “Omunöghö m‑mwaru chwee, amare abhaghësi m‑bhasuuhu. Ibheere, musabhe omwene omoghondo,#10:2 Omunöghö n‑abhaato bhano bhakwënda korekumi Eryobha. Abhaghësi n‑abhaato bhano bhakuraghani angʼana e Ryobha. Omwene omoghondo n‑Eryobha eryene. atome abhaghësi abhande mo‑moghondo waache.

3“Ibheere, mughëndë inyu, mumööhi ˆnekabhatoma kinya abhaana bha changʼöndu ghateghate e chasuuche! 4Motiimoki eriighöchi re chambiiri, koru omorigho, koru ebhekwera ebhende. Hano mookubha mo‑nchëra, motakëëchëra gho ghukëëri abhaato.

5“Hano moghusöha mo‑ka yoyoose, mukëëri abhaato bhaache hangʼu, ‘Omurëmbë ubhe mo‑ka ino.’ 6Arabha‑mu omooto o murëmbë, omurëmbë uno mookubha momwitabhiiri, noghusaagha nawe. Amare, aribha ataanyi‑mu omooto o murëmbë, omurëmbë waanyu nokobhagharukera. 7Motabha morasaamasaama mo‑chaaka chiyo mohikiire, amare, mwikare mo‑chaaka chiyo mohikiire, mubhe moraraaghëra ebhiinyakurë bhino bhabhaheere. Gho kubha omuköri o meremo nakurëngʼaanera kuhaabhu amareho ghaache.

8“Eriibhagha moghusöha mo‑moghya nyarebhe, na abhiikari bhayo bhakabhaghënëhi, mori ebhiinyakurë bhino bhaakubha bhabhaheere. 9Wiiki abhabhabharu bhano bhaanyi mo‑moghya uyo, mobhahöri. Mobhabhoorere abhiikari bhayo kubha, obhutëmi bho Ryobha ˆbhoghatingʼi.

10“Amare, eriibhagha moghusöha mo‑moghya nyarebhe, na abhiikari bhaange kobhaghënëhi, mohete mo‑chanchëra cheebho, morabhugha, 11‘Koru orotu ro moghya waanyu runo roonyi mo‑maghoro ghiito, ˆtokarokongʼoota, ibhe ekyërëkërëri ghe koryanga Eryobha. Koru hangʼu, mumënyë obhuhëënë kubha, obhutëmi bho Ryobha ˆbhoghatingʼi!’ 12ˆNekabhabhoorera kubha, orosiko ro ghotenera ekiina abhaato bha se, ndekobhatenera ekiina abhaato bha moghya uyo kwo bhororo ghokera kebhuno rekobhatenera ekiina abhaato abhabhe bha Sotoma!

Anchagho e meghya ghino ꞉gheemwangiri Yesu

(Mataayo 11:20–24)

13“Horeera mokorighi inyu abhaato bha moghya o Korasiini! Horeera mokorighi inyu abhaato bha moghya o Bhetisaayita! Gho kubha ebheroghooro bhino ꞉niiköriri ghokoonyu, aribha nengabhiköriri mo‑Tiiro na Sitooni,#10:13 Tiiro na Sitooni. Abhaato bha meghya ghiyo mbaare abhaato bha matöngö, na ꞉mbaamënyuru chwee na Abhayahuuti kubha na abhaato bhabhe chwee. abhaato bha meghya ghiyo mbangatuukuuniire amasari ghaabho korwera hayo. Mbangëërëkiri ghotuukuuna koobho gho kobheeka amaghööti gha maghönëra, na kwihaka eriibhu.” 14Gho ghayo, ˆnekabhabhoorera kubha orosiko ro ghoteneru ekiina, inyu moghoteneru ekiina kwo bhororo ghokera emeghya ghe Tiiro na Sitooni!

15“Inyu, abhaato bha moghya o Kabherenawumu, kana mokwihëëbha kubha Eryobha ndekobhatiiri mbagha Mwishaaro? Tiyaanyi! Eryobha ndekobhiiki mbagha nyaari!”

16Akamara, Yesu akabhabhoorera abhaanabheegha bhaache akabhugha, “Omooto uno akobhatëghëërëra inyu, nantëghëëriire koru eni. Omooto uno akobhaanga inyu, koru eni nanyangiri. Wiiki uyo akonyanga eni, nakomwanga koru uno antomiri.”

Mosiighesiighe amariina ghaanyu ngaandëkuru Mwishaaro

17Hano bhamariri ghuköra emeremo ghiyo, abhaanabheegha bhayo miröngö mohungate na bhabhere bhaghagharuka bharasiighasiigha. Bhakamobhoorera bhakabhugha, “Oo Omutëmi, koru emisambu ꞉ngeetosookiri, hano toghihëëbhiri kwo riina reecho.”

18Yesu akabhagharokeri akabhugha, “꞉Neerooche Erishambu reragho kinya orunanehi koru Mwishaaro. 19Mbe, mumënyë kubha, nebhaheere obhotoro bho ghokera changuru choose che mobhisa. Kwo bhotoro bhuyo, moghutacha koru chanchöka ne ebhitaamooni, na ghetaanyi‑ho egheghiro ghyokyose kino ghekobhanyahaara.

20“Koru hangʼu, motasiighasiigha gho kubha emisambu ngekobhasooka. Amare, mosiighesiighe kwo ngʼana ino kubha, amariina ghaanyu ngamariri kwandëku Mwishaaro.”

Mbiitabhiiru bhano bheeche kubha Yesu n‑Omoona o Ryobha

(Mataayo 11:25–27, 13:16–17)

21Eriibhagha riyo, Yesu aghachömëru chwee kwo bhotoro bho Körö Ahörëëru, akabhugha, “Oo Taata, ˆoghachömi, iye Omutëmi o Mwishaaro na ase yoose, gho kubha, amangʼana ghano, nobhabhisiri bhano bhaanyi na amangʼiini na abhasömi, amare okabhahunyurera abhaato bhano bhakwinyööhi ghokoocho kinya abhaana abhasuuhu. Oo Taata, ghano ghoose n‑kurëngʼaana na amënda ghaacho.” 22Akamara akabhabhoorera, “Taata waane, namariri ghotoora ghoose mo‑mabhökö ghaane. Wiiki taanyi‑ho uno amweche Omoona, n‑Ishe omwene. Koru taanyi‑ho uno amweche Ishe, n‑Omoona omwene, na wowoose uno Omoona akwënda komohunyurera.”

23Hayo hayo, Yesu akabhiigharurera abhaanabheegha bhaache, akabhabhoorera abheene chiri gho kobhisa abhande, “Ngʼoni inyu, gho kubha mokorighi amangʼana ghano kwo miisho ghaanyu! 24ˆNekabhabhoorera kubha, mbaare‑ho abharööti bhaaru, na abhatëmi bhaaru, bhano ꞉bhaare bhariighomba ghogharighi ghano mokorighi inyu, amare bhataagharooche. Wiiki, mbaare bhariighomba ghoghooghu ghano mokooghu inyu, amare bhataaghooghwire.”

Eghetuubhaani ke Musamaariya omuhëënë

25Orosiko rumu, omweghi umu o meghiro ghe Musa akiimeerera, akamobhoori Yesu eribhoori gho komusaki, akamobhoorera akabhugha, “Oo Omweghi, nikörë ke, kubha mo‑rosiko ro ntenero nibhönë obhuhöru bho miishe ghyose?”

26Yesu akamugharokeri akabhugha, “Neke kyandëkuru mo‑meghiro? Nibhu oghoghisöma?” 27Akamugharokeri akabhugha, “Ngyandëkuru kubha, ‘Omosiighe Omutëmi, Waryobha waacho, gho körö yaacho yoose, na kwo riimanya reecho ryose, na gho changuru cheecho choose, na kwo bhongo bhoocho bhoose.’#10:27a Mööhi Kohiita kwo Meghiro 6:5. Wiiki, ‘Omosiighe omwatani waacho, kinya bhuno wisiighiri iye omwene.’#10:27b Mööhi Abharaawi 19:18.” 28Yesu akamobhoorera akabhugha, “ˆOghagharokeri bhoheene! Köra hangʼu, iye nokubhöna obhuhöru.”

29Amare, omweghi uyo o meghiro ghe Musa, naare arëënda kwërëki kubha niishereriiru ambërë e Ryobha, nikyo ghighëriri akamobhoori Yesu, “Omwatani waane, n‑niwe?”

30Yesu akamugharokeri akabhugha, “Naare‑ho omooto umu Omuyahuuti, uno are araru Yerusareemu, naare mo‑rughëndö ro ghuye mo‑moghya o Yeriko. Hano are mo‑nchëra, aghatëmëërana na amanyangara. Bhakamoruusi amaghööti, bhakamutëma chwee, bhakamotigha ˆaghatingʼi ghoku.

31“Orubhango ruchömu, mo‑nchëra iyo, akaheta‑ho omuchaama umu. Omuchaama uyo, hano amorooche omooto uyo, akaheta rubhareka aghaye. 32Hangʼu hangʼu Omuraawi#10:32 Omuraawi naare omotoorereri o bhachaama bha Ryobha, Mwisëngërö reeche. woose, akahika hayo amangʼana gharweriire. Hano amorooche omooto uyo, akaheta rubhareka aghaye.

33“Akamara akaacha Omusamaariya#10:33 Omusamaariya. Abhayahuuti mbaare bharabhataraaha Abhasamaariya, gho kubha ꞉mbaarooche kubha Abhasamaariya mbaare bharasëngëra Eryobha gho nchëra ino etaanyi e hëënë. Amatöngö ghano abhere ngaare gharëghiine chwee. umu, uno are mo‑rughëndö rooche. Hano amorooche omooto uyo, akamoghwera bheghongi. 34Akamwishukerera, akamuraghura amaghaati ghaache gho komuhaka amaghuta na adivaayi, na aghaghabhöha amaghaati ghayo. Akamara akamotiiri ighoro e tikere yaache, akamohira mo‑nyumba e bhaghëni, akabha aramuraghura.

35“Atabhoori yaache, akaruusi chatinaari ibhere, akamuha omwene anyumba akabhugha, ‘Omumööhëri omooto uno. Wiiki omundaghurere, chambiiri cherakera chino nekoheere gho ghiri yaache, neraacha ghugharuka, neghokoreha.’”

36Niho, Yesu akamobhoori omweghi uyo o meghiro ghe Musa, “Mbe! Gho korighi koocho, hano omooto uyo anyahaaruru na amanyangara, n‑niwe ghate e bhaato bhayo bhatato, are omwatani gho komukörëra amachömu?” 37Akamugharokeri akabhugha, “Uno amoghweriire ebheghongi.” Yesu akamobhoorera akabhugha, “Nooghi, na niiye ubhe na atëëmö enga iyo!”

Yesu awaabho Marita na Mariyamu

38Yesu na abhaghëndi bhaache, hano ꞉bhaare mo‑nchëra, bhaghasöha mo‑kyaro kimu. Omukari umu, eriina reeche Marita, akabhaghënëhi awaache. 39Marita uyo, naare no ömööbhö akobherekeru Mariyamu. Eriibhagha riyo, Mariyamu aghiikara haghuhe na amaghoro gha Mutëmi Yesu, aramutëghëërëra.

40Marita, naare aranyaaka gho ghuköra emeremo myaru. Akamutambana Yesu, akamobhoorera, “Oo Omutëmi wiito, tookorighi kobhe kubha omwito nantighiire nikörë emeremo ghyose eni mwene? Mbe, nomobhoorere ache antoori!”

41Amare Omutëmi akamugharokeri, “Oo Marita, Marita! Nokunyaaka no okwirighora gho ghiri e bheghiro bhyaru. 42Amare neenyi‑ho angʼana imu hangʼu ino ekwëndëru, wiiki n‑e hëënë ghokera ghoose. Mariyamu niyo ahwire, ghutëghëërëra angʼana yaane ino omooto wowoose ataaghotora komuhöka.”

Currently Selected:

Ruuka 10: ntk

Highlight

Copy