Ruuka 15

Eghetuubhaani ke ngʼöndu ino ebhoriri

(Mataayo 18:12–14)

1Orosiko rumu, abhatöbhi bha righööti bhaaru na abhaato abhande bha masari, bhakamutambana Yesu, bhamutëghëërërë. 2Gho ghayo, eghaghëri Amabharisaayo na abheeghi bha meghiro, bhariingʼunyerangʼunyera bharabhugha, “Omooto uno, ngwake akobhaghënëhi abhaato bhano bha masari! Wiiki nakuraaghëra haghirohamu nabho!”

3Ibheere Yesu akabhabhoorera eghetuubhaani, arabhugha, 4“Tobhughe umu ghate yaanyu, naanyi na changʼöndu eriighana. Aramënya kubha imu nebhoriri, nibhu aghuköra? Mbe, taaghochetigha chiire miröngö kende na kende a‑keriisho, na ghuye ghutabhara yiire ebhoriri, mbagha ayibhönë? 5Hano akoyibhöna, nakoyisambeka gho ghuchömëru, 6na koyirëëta aka. Hano akohika nakobhabherekera abhasaani bhaache na abhaatani, na kobhabhoorera, ‘Ntosiighesiighe haghirohamu, gho kubha angʼöndu yaane, ino ere ebhoriri, neyebhwine!’

7“ˆNekabhabhoorera, hangʼu hangʼu ngookubha na ghuchömëru kwaru Mwishaaro, eriibhagha omooto umu o masari aratuukuunera amasari ghaache. Ghuchömëru kuyo, ngookubha ghokoro ghokera kuure kwo bhaato abhachömu miröngö kende na kende, bhano bhataanyi na amënda gha ghotuukuuna.

Ghuchömëru gho kubhöna orobhiiri runo roore robhoriri

8“Ibheere, mutëghëërërë eghetuubhaani ekende, tobhughe omukari umu naanyi na chambiiri ikomi che riighori ikoro,#15:8 Chambiiri ikomi che riighori ikoro. Mo‑Keyunaani tarakima imu neere, amareho gha muhöki o meremo kwo rosiko rumu. na arabhori imu. Tigha naghughööti oromore, na ghutareki anyumba yoose, arayitabhara gho changuru mbagha ayibhönë? 9Hano akoyibhöna, nakobhabherekera abhasaani bhaache na abhaatani, na kobhabhoorera, ‘Ntosiighesiighe haghirohamu, gho kubha orobhiiri ruure roore robhoriri ro riighori ikoro, nerobhwine!’

10“ˆNekabhabhoorera, hangʼu hangʼu, Eryobha ndeghuchömëru chwee ambërë e bhamarayika bhaache, hano omooto umu o masari akubha atuukuuniire amasari ghaache.”

Ghuchömëru gho kubhöna omoona uno arumeeriri

11Yesu akëëngëra kobhugha, “Naare‑ho omooto umu, uno are na abhaana bhabhere bha ghesubhe. 12Omobhureni omonyi, akamusëëta ishe akamobhoorera, ‘Taata, nuuhë aghabho yaane.’ Mbe, ishe akabhahööhi abhaana bhayo bhabhere obhwame bhooche.

13“Akamara chaasiko insuuhu, omobhureni uyo omonyi aghakoma ebheghiro bheeche bhyose, aghaköra orughëndö aghaye mo‑se e kurë. Hano ahikiri iyo, aghasëëma kobhisanchani ebheghiro bheeche gho ghwisöhi mo‑mangʼana amabhe. 14Eriibhagha amariri chambiiri choose, hakarwera aghëëcha ihaari chwee mo‑se iyo are, nawe akabha ataghöötë egheghiro ghyokyose. 15Gho ghayo, akamutambana omooto umu o iyo, akamusabha kubha abhe omutamishi waache. Omooto uyo, akamotoma mo‑moghondo waache aghi kuraaghëri chambeechi.#15:15 Chambeechi. Abhayahuuti mbaare bhachicheeriri chwee. 16Hano are arachiha ebhiinyakurë, akarighi bhuure cheekurë amaghökö, aghiighomba woose ghogharë! Amare taanyi‑ho mooto uno amoheere ghyokyose ghe kurë.

17“Antenero, aghasëëma kwihëëbha mo-motema waache akabhugha, ‘Abhatamishi bharenge bha taata waane, bhakuraaghëra, mbagha bhiighota na ghusaaghi ebhiinyakurë! Amare eni hano, ˆneeghaku gho nchëra? 18Ibheere neghugharuka o‑taata, nemobhoorere nebhughe, “Taata, neritaasiiri Eryobha, na neghutaasiiri na niiye woose. 19Nteekurëngʼaanera kobherekeru omoona waacho wiiki. Gho ghayo, nunkörë kinya umu o bhatamishi bhaacho.”’

20“Mbe, omoona uyo akaru hayo, aghagharuka ghwi ishe. Hano are akeere kurë, ishe akamorighi, aghaghöötu na changori. Hayo hayo akamoturungʼanera omoona waache, akamukëëri gho komutahata. 21Omoona uyo, akamobhoorera ishe akabhugha, ‘Taata, neritaasiiri Eryobha, na neghutaasiiri na niiye woose. Nteekurëngʼaanera kobherekeru omoona waacho wiiki.’

22“Amare, ishe akabhabhoorera abhasësë bhaache akabhugha, ‘Mukörë bhwango! Murëëtë angibho inchömu momobheeki. Momobheeki abhëtë mo‑kyara keeche, momobheeki ne ebhekwera. 23Murëëtë ekeheeri ekenoru, momughööghërë. Tukörë obhughëni na ghosiighasiigha haghirohamu, 24gho kubha omoona waane uno, naare abhoriri, amare ˆakabhönëka. Wiiki naare kinya akuure, amare ibheere m-muhöru!’ Niho bhayo bhoose bhaghasëëma ghuköra obhughëni gho ghuchömëru.

25“Eriibhagha riyo, omoona waache omokoro naare a‑moghondo. Hano are aragharuka ˆaghatingʼi aka, akooghu abhaato mbakwemba na kobhina. 26Akamobherekera omusësë umu, akamobhoori akabhugha, ‘Neke ˆghekabhönëka hayo?’ 27Akamobhoorera akabhugha, ‘Omonyi waacho niichiri, iso namughööghiire ekeheeri kenoru, gho kubha nagharokiri anyi muhöru.’ 28Omoona uyo omokoro aghakarara chwee, akaanga ghusöha aka. Ishe akahoroka anche, akabha aramusasaama asöhë. 29Amare, omobhureni uyo akamugharokeri akabhugha, ‘Tëghëërëra taata! Emeeka myaru, nibheere nerakuhökëri, wiiki ntiimara ntigha ghoghosooka naabha! Amare, tuumara wuuha koru akabhori, kubha nikörë obhughëni haghirohamu na bhasaani bhaane. 30Amare omoona waacho uno asanchiri ebheghiro bheecho kwo bhasöngörëëri, hangʼu ˆakaacha, ˆokamughööghëra iwe ekeheeri ekenoru!’

31“Ishe akamobhoorera akabhugha, ‘Omoona waane, iye ntwikeere haghirohamu chaasiko choose. Ebheghiro bhyose bhino neenyi nabhyo hano m‑bhebheecho. 32Amare omonyi waacho uno, ntokwëndëru tomukörërë obhughëni na ghosiighasiigha haghirohamu. Niköriri hangʼu gho kubha naare abhoriri, amare ibheere ˆakabhönëka. Wiiki naare kinya akuure, ni ibheere m‑muhöru!’”

Currently Selected:

Ruuka 15: ntk

Highlight

Copy