Mataayo 27

Yesu ˆakahiru o‑Bhiraato

(Maariko 15:1; Ruuka 23:1–2; Yohana 18:28–32)

1Hano bhookiire, abhakoro bha bhachaama haghirohamu na abhagharuka bha Bhayahuuti bhaghiishererani haghirohamu kinya bhuno bhakomwita Yesu. 2Niho bhakamubhöha, bhakamwimoki, bhaaghaye nawe mo‑mukangati o se yaabho, Omoruumi uno are arabherekeru Bhiraato.

Yuuta ˆakiiyita

(Amaköri gha Bhatomu 1:18–19)

3Mbe, Yuuta, uno amuhaaniri Yesu mo‑mabhökö gha bhabhisa, hano arooche kubha Yesu aghateneru ekiina itu, akiiyoghu kobhe. Akiimoki ebheteneka bhiire bhe chambiiri miröngö etato na kobhigharoki kwo bhakoro bha bhachaama na abhagharuka bha Bhayahuuti. 4Akabhabhoorera akabhugha, “Niköriri amasari komuhaana mo‑mabhökö ghaanyu omooto uno ataanyi ne eriisari ryoryose kubha itu.”

Amare ibho bhakabhugha, “Ghayo ghataaghotusakeri itu, n‑gha ghaacho iye mwene.”

5Niho Yuuta aghachirëkëra chambiiri chiire mo‑riigho re Risëngërö, aghatanura, aghaye akinyëëta.

6Abhakoro bha bhachaama bhaghachitööra chambiiri chiire, bhakabhugha, “Taanyi bhoheene ghusangerani chambiiri chino na che mo‑Risëngërö gho kubha chambiiri chino nchiitiri amasaahë.” 7Mbe, bhakarwacha na ghwishererani kwimoki chambiiri chiire na ghoghora omoghondo o rishegheeri habhe ahaghiro ha koryekera abhaghëni. 8Nikyo omoghondo uyo okobherekeru Omoghondo o Masaahë mbagha reero.

9Niho ekahikeerana angʼana ino ighamburu no omurööti Yeremiya kubha, “Bhakiimoki ebheteneka bhe chambiiri miröngö etato, riighori rino Abhiisiraeri bhiishereriini. 10Bhaghaghora omoghondo o rishegheeri kinya bhuno Omutëmi ꞉andagheriiri.”#27:10 Mööhi Sakariya 11:12–13; Yeremiya 19:1–13, 32:6–9; Mataayo 26:15.

Yesu ˆaghasëmu ambërë e Bhiraato

(Maariko 15:2–15; Ruuka 23:2–3, 23:18–25; Yohana 18:29—19:16)

11Niho Yesu akiimeerera ambërë e mukangati Omoruumi uno are arabherekeru Bhiraato. Omukangati uyo akamobhoori akabhugha, “Kana, iye niiye uno bhakobhugha, Omutëmi o Bhayahuuti?”

Yesu akamugharokeri akabhugha, “N‑iye obhughiri.”

12Mbe, abhakoro bha bhachaama na abhagharuka bha Bhayahuuti bhaghasëëma komusëma Yesu, amare iwe tagharokiiri ngʼana. 13Niho Bhiraato akamobhoori akabhugha, “Kana, tokooghu ghayo ghoose bhaghoghusëma iye?” 14Amare Yesu tagharokiiri koru angʼana imu. Niho Bhiraato akaroghoora chwee.

15Kira omooka mo‑rosiko ro nyangi e Bhaasaka, omukangati uyo naare na asughara e ghotighooroka omubhöhu umu uno abhaato bhëëndiri. 16Mbe, kwo riibhagha riire, naare‑ho omubhöhu umu uno are arabherekeru Bharaabha. Omubhöhu uyo ꞉naamënyuru chwee gho ghiri e mabhe ghano are araköra. 17Mbe, hano abhaato bhiikomiine, Bhiraato akabhabhoori akabhugha, “N‑niwe mokwënda nemotighooroke ghate e bhabhöhu bhano bhabhere? Kana, mokwënda nemotighooroke Bharaabha ghasi Yesu uno abhaato bhakomobherekera Kirisito?” 18Bhiraato ꞉naabhabhooriri hangʼu gho kubha ꞉naamënyiri kubha abhakangati bha Bhayahuuti ꞉mbaamurëëtiri Yesu ghokooche gho ghiri e riihari.

19Bhiraato hano are ikeere mo‑ghetumbe keeche ghe ghotenera ekiina, mukaache akamotomera amangʼana akabhugha, “Otaacha komukörëra ibhe ryoryose omooto uyo taanyi ne eriisari ryoryose, gho kubha ninyaakiri chwee obhotiko mwiröötö gho ghiri yaache.”

20Amare abhakoro bha bhachaama na abhakangati abhande bha Bhayahuuti bhaghatebhitebhi abhaato kubha, bhamusabhe Bhiraato abhiighorere Bharaabha na komotenera ekiina Yesu kubha itu.

21Bhiraato akabhabhoori wiiki akabhugha, “N‑niwe mokwënda nemotighooroke ghate e bhabhöhu bhano bhabhere?”

Bhaghagharokeri bhakabhugha, “Ntokwënda otwighorere Bharaabha!”

22Bhiraato akabhabhoori wiiki akabhugha, “Mbe, nemukörëbhu Yesu uno bhakomobherekera Kirisito?”

Abhaato bhoose bhaghaköra eriireghe bharabhugha, “Amambu mo‑musarabha!”

23Bhiraato akabhabhoori wiiki akabhugha, “N‑eriisari ke aköriri reghughëri tomumambe mo‑musarabha?”

Amare ibho bhakëëngëra ghuköra eriireghe bharabhugha, “Amambu mo‑musarabha!”

24Hano Bhiraato amënyiri kubha taaghotora ghugharura amiihëëbhö gha bhaato bhayo na kubha bhaghasëëma anyööri, akiimoki amanche na ghwishaabha amabhökö ghaache ambërë yaabho kwërëki kubha taanyi ne eriisari ryoryose. Niho akabhabhoorera akabhugha, “Nteenyi ne eriisari ryoryose kwo mooto uno anyi o bhuhëënë. Ghano mokwënda ghuköra, n‑ighoro yaanyu inyu bheene!”

25Abhaato bhoose bhaghagharokeri bhakabhugha, “Eriisari riyo re komwita Yesu ribhe ighoro yiito na abhaana bhiito!”

26Akamara Bhiraato akabhiighorera Bharaabha, amare akahatëka abhaashirikare bhaache kubha bhamutëmë Yesu ne emicharicho na komumamba mo‑musarabha.

Abhaashirikare ˆbhakamochebhora Yesu

(Maariko 15:16–20; Yohana 19:2–3)

27Niho abhaashirikare bha mukangati o Moruumi bhakamwimoki Yesu, bhaaghaye nawe mo‑nyumba e ghitëmi. Bhaghakoma erikinda re bhaashirikare, rekamwinaareri Yesu. 28Bhakamoruusi changibho cheeche na komobheeki andachana ambararatu. 29Bhakaroka orohuuru ro maho, bhakamobheeki a‑mutu na ghotoora ahimbo e moori mo‑kubhökö kooche gho kwiro kubha arighibhu kinya n‑omutëmi. Bhakabhuna ebheru ambërë yaache kinya bhaghusëngëra na ghusëëma komochebhora gho ghitaraaho bharabhugha, “Ntoghoghukëëri, oo Omutëmi o Bhayahuuti!” 30Niho bhakamotwera amatë, bhakiimoki ahimbo yiire e moori mo‑kubhökö kooche na komutëma nayo a‑mutu. 31Eriibhagha abhaashirikare bhayo bhamariri komochebhora, bhakamoruusi andachana yiire na komobheeki changibho cheeche wiiki. Bhakamara bhaaghaye nawe komumamba mo‑musarabha.

Yesu ˆakamambu mo‑musarabha

(Maariko 15:21–32; Ruuka 23:26–43; Yohana 19:17–27)

32Eriibhagha abhaashirikare haghirohamu na Yesu ꞉bhaare bhararu mo‑moghya o Yerusareemu, bhakamubhöna omooto umu mo‑nchëra eriina reeche Simiyooni. Omooto uyo naare o mo‑moghya o Kireene. Abhaashirikare bhayo bhakamuhaamereri ghughëgha omusarabha o Yesu. 33Antenero, bhakahika ahaghiro hano haare harabherekeru Ghorighööta, egheteemoro keeche Ahaghiro ha Kehoore ke Mutu. 34Bhakamochebhora Yesu gho komuha adivaayi ino bhasangeriini ne egheghiro eghetondoru anyo.#27:34 Mööhi Sabhuri 69:21. Amare hano ayisamiri, akaanga kunyo. 35Bhakamumamba Yesu mo‑musarabha, bhakahööha changibho cheeche gho ghutëma akuura.#27:35 Mööhi Sabhuri 22:18. [Niho angʼana yiire ꞉ehikeriine ino ighamburu ighoro e Yesu gho nchëra e murööti umu kubha, “꞉Mbaahööhiri changibho cheene na ghutëmëra akuura erighööti reene.”] 36Mbe, bhaghiikara hayo hayo kubha bhamochonge. 37Ighoro e mutu waache, mbatooriri amangʼana gha komusëma ghano ghaandëkuru kubha, “uno n‑yesu, omutëmi o bhayahuuti.”

38Ahaghiro hayo, mbaare‑ho abhaato bhabhere bhano ꞉bhaare amanyangara. Abhaashirikare bhakabhamamba abhaato bhayo mo‑misarabha haghirohamu na Yesu, umu eribhaara re kwiro no owonde eribhaara re kumosi. 39Abhaato bhano ꞉bhaare bharaheta hayo, mbaare bharasingisi emitu gheebho na komotoka bharabhugha, 40“Kana! Iye, ꞉noobhughiri kubha nokuhaanyura Erisëngërö re Ryobha na koryabhëka wiiki gho chaasiko ishato! Ibheere, wiitoori iye mwene. Aribha iye n‑Omoona o Ryobha onyi, nwike mo‑musarabha!”

41Hangʼu hangʼu, abhakoro bha bhachaama na abheeghi bha meghiro haghirohamu na abhagharuka bha Bhayahuuti bhakamuchëëra Yesu. Ibho bhakabhugha, “꞉Naatooriri abhande, amare taaghotora ghwitoori omwene! 42Aribha mahëënë n‑Omutëmi o Abhiisiraeri, niike mo‑musarabha, niho na niitu tokomokumi. 43Iwe naghwitëngʼëra Eryobha, wiiki naare arasiikëra arabhugha, ‘Eni n‑Omoona o Ryobha.’ Mbe, Eryobha ndemotoori ibheere aribha remosiighiri hëënë.” 44Amanyangara ghaare abhaashirikare bhamambiri haghirohamu na Yesu, ghoose ghakamotoka kinya bhuno abhande bhamotokiri.

Yesu ˆaghaku

(Maariko 15:33–41; Ruuka 23:44–49; Yohana 19:28–30)

45Hano eryobha rehikiri a‑mutu, ekengʼuuri gheghakundekeri mo‑se yoose mbagha mo‑chaasa kende. 46Kwo riibhagha re chaasa kende, Yesu akarera kwo riiraka ikoro arabhugha, “Erooyi! Erooyi! Raama sabhaghitaani?” Egheteemoro ke mangʼana ghayo nikyo kino, “Oo Eryobha reene! Oo Eryobha reene! Ngwake oghantigha?”#27:46 Mööhi Sabhuri 22:1.

47Hano abhaato abhamu bhooghwire ghano Yesu are arabhugha, bhakabhugha, “Uno nakomobherekera omurööti Eriya.”#27:47 Eriya naghughambu hano gho ghiri Abhayahuuti bhaaru mbaare bharakumi kubha Eriya taakuure, amare Eryobha ꞉ndeemwimokiri koru mo‑se anyi muhöru na ghuye nawe Mwishaaro. Wiiki mbaare bhariitëngʼëra kubha Eriya naghugharuka wiiki mo‑se. Mööhi 2 Abhatëmi 2:11; Maraaki 4:5.

48Hayo hayo, omooto umu akayaara bhwango, akaacha no obhorobha, aghaköri mo‑divaayi andoro, akabhotoora obhorobha bhuure mo‑moori, akamuha Yesu anyo.

49Amare abhande bhakabhugha, “Tigha! Torighi aribha Eriya nakuucha komotoori!” 50Mbe, Yesu akarera wiiki kwo riiraka ikoro, aghatena akörö.

51Hayo hayo, omwando uno ore oteniini Mwisëngërö oribhiri Ahaghiro Ahatööbhiyu ha Hatööbhiyu, oghachaaruka chambaara ibhere koru ighoro mbagha haase. Wiiki ꞉haare ne ekerighito ghekoro kino ꞉ghiighëriri amatare ghabhaaruke. 52Chambeehera chekahunyuka ne emebhere myaru ghe bhatööbhiyu bha Ryobha bhano ꞉bhaare bhakuure ghekaryoka. 53Hano bharyokiri, bhaghasaagha hayo mbagha eriibhagha rino Yesu aryokiri, niho bhaghasöha mo‑moghya omutööbhiyu o Yerusareemu, bhakarighibhu na abhaato bhaaru.

54Akamara omokoro o bhaashirikare haghirohamu na bhano ꞉bhaare bharamochonga Yesu hano bharooche ekerighito na aghande ghoose ghano gharweriire, bhaghatiina chwee, bhakabhugha, “Mahëënë, omooto uno naare Omoona o Ryobha!”

55Mbe, mbaare‑ho na abhakari bhaaru hayo bhano ꞉bhaare bharamutambana Yesu koru mo‑mukööwa o Ghariraaya na komuhökëri. Abhakari bhayo ꞉mbiimeeriire gho kurë bharamööhërëri ghoose ghano ꞉ghaare gharaköru. 56Mo‑bhakari bhayo, naare‑mu Mariyamu o koru mo‑moghya o Maghitara, Mariyamu nyina o Yakobho na Yusubhu no omukari o Sebhetaayo.

Yusubhu koru Arimataaya ˆakamoryeka Yesu

(Maariko 15:42–47; Ruuka 23:50–56; Yohana 19:38–42)

57Eriibhagha bhwiriri, akaacha omoonamwegha umu o Yesu eriina reeche Yusubhu. Omooto uyo naare mwame uno aruure mo‑moghya o Arimataaya. 58Yusubhu aghaye o‑Bhiraato aghasabha erihundughu re Yesu. Mbe, Bhiraato akahatëka abhaashirikare bhaache kubha bhamuhë erihundughu riire. 59Yusubhu aghaye, akariimoki erihundughu riire na koriinaareri asanda e ghitani. 60Akaretoora erihundughu mo‑mbeehera yaache ahë ino ere etukuru mwitare. Akamara akahiringiti eriibhohe ikoro, akahunya eghisëku ke mbeehera iyo, aghatanura. 61Kwo riibhagha riyo, Mariyamu o Maghitara na Mariyamu wuure owonde mbaare bhiikeere kwërëkëra mo‑mbeehera iyo.

Abhaashirikare ˆbhaghachonga ambeehera

62Orosiko ro kabhere ndoore orosiko ro Riikane, abhakoro bha bhachaama na Amabharisaayo bhaghiikomana o‑Bhiraato. 63Bhakamobhoorera bhakabhugha, “Oo omutëmi, tokahiita kubha omuröngö wuure hano are akeere muhöru, ꞉naasiikiire akabhugha, ‘Mo‑rosiko ro ghatato, nekoryoka koru mo‑bhaku.’ 64Mbe, ntoghoghusabha uhatëkë abhaashirikare bhaacho bhachonge ambeehera mbagha mo‑rosiko ro ghatato. Toraanga ghuköra hangʼu, abhaanabheegha bhaache mbakoriibha erihundughu reeche na kobhangʼiina abhaato kubha naryokiri koru mo‑bhaku. Aribha bharaköra hangʼu, obhuröngö bhuyo mbookubha bhobhe ghokera bhuure bho Yesu omwene.”

65Bhiraato akabhagharokeri akabhugha, “Mobhiimoki abhaashirikare. Moghi mo‑mbeehera na ghochonga gho changuru cheenyu choose.” 66Niho bhaaghaye mo‑mbeehera, bhaghatoora ekingʼöchö ke mohuuri mo‑riibhohe kubha bhatore kumënya aribha omooto ichiri akarehiringiti. Bhakamara abhakangati bhayo, bhakabhatigha abhaashirikare bhayo hayo, kubha bhachonge ambeehera.

Currently Selected:

Mataayo 27: ntk

Highlight

Copy