Maariko 9

1Yesu akëëndërëra kobhabhoorera akabhugha, “Mahëënë ˆnekabhabhoorera, mbaanyi‑ho abhamu bhiimeeriire hano, bhano bhataaghoku bhataamara bharighi obhutëmi bho Ryobha bhoraacha gho changuru.”

Abhaghëndi ˆbhakarighi obhokoro bho Yesu mo‑bhutëmi bhooche

(Mataayo 17:1–13; Ruuka 9:28–36)

2Hano chehetiri chaasiko ishaasabhe, Yesu akabhiimoki Bheetero, na Yakobho, na Yohana, aghatiira nabho mo‑gheghoro kire, ahaghiro hano abhaato bhataanyi. Hano bhaare iyo, Yesu aghiigharura eghisösö keeche ambërë yaabho. 3Amaghööti ghaache ghaghasëëma kubharibhari chwee. Ghaakabha meero ghokera omohuri wowoose mo‑se ino uno angatoriri ghoghahura. 4Eriya na Musa, abharööti bha kare, bhakarwera ambërë yaabho, bhaakabha bharasiikëra na Yesu.

5Bheetero akamobhoorera Yesu akabhugha, “Omweghi, ekabha bhoheene itu kubha hano. Twabhëkë hano ebhebhuru bhitato, kimu kibhe ghekeecho, ne ekende ke Musa, ne ekende ke Eriya.” 6Taamënyiri re ghosiikëra, gho kubha iwe na abhaghëndi bhaache ꞉mbaaghööturu na ahaho chwee.

7Niho erishaaro reghiika, rekabhakundekeri. Bhakooghu eriiraka re Ryobha rerarwera mo‑rishaaro riyo, rerabhugha, “Uno n‑Omoona waane omosiighani, momutëghëërërë!” 8Hayo hayo abhaanabheegha bhaare bhakamööhi ino na ino, bhataamorooche omooto owonde, amare Yesu omwene chiri.

9Hano bhaare bharahiringita koru mo‑gheghoro kiyo, Yesu akabharaghereri kubha bhatamobhoorera omooto wowoose ghano bharooche, mbagha hano Omoona o Mooto akubha aryokiri koru mo‑bhaku. 10Abhaanabheegha bhaare bhaghaghööta amangʼana ghayo, amare bhaakabha bharabhoorani abheene kwo bheene bharabhugha, “Koryoka kooche koru mo‑bhaku egheteemoro keeche n‑ghento ke?”

11Bhakamobhoori Yesu bhakabhugha, “Ibheere ngwake abheeghi bha meghiro bhahaabhugha kubha, nekwëndëru Eriya ache singa Kirisito akeere kuucha?”#9:11 Mööhi Maraaki 4:5–6. 12Nawe akabhagharokeri akabhugha, “M‑mahëënë, Eriya nakuucha singa ghuköra bhuhë amangʼana ghoose. Koru hangʼu, ngwake yandëkuru mo‑Mandëkö Amatööbhiyu kubha Omoona o Mooto, nakwëndëru abhönë anyaako ihaari chwee na ghuchëëru? 13Amare ˆnekabhabhoorera kubha, Eriya#9:13a Eriya. Yesu nakurëngʼaani Eriya na Yohana Omubhatisaachi. Yohana namuköriire Yesu anchëra, emeremo ghino Abhayahuuti ꞉bhaare bhariitëngʼëra kubha Eriya naghoghiköra. Mööhi Mataayo 11:13–14, 17:10–13; Maariko 1:2–4. niichiri, nabho bhakamukörëra amabhe ghoose ghano ꞉bhaare bharëënda,#9:13b Mööhi Maariko 6:14–29. kinya bhuure yandëkuru ighoro yaache.”

Yesu ˆakahëëbha omusambu o riirimo koru mo‑moona

(Mataayo 17:14–21; Ruuka 9:37–43)

14Hano Yesu, na Bheetero, na Yohana na Yakobho bhahikiri mo‑bhaanabheegha abhande, bhakarighi erikinda ikoro re bhaato bhabhiinaariiri. Abheeghi bha meghiro abhamu mbaare bharashangʼaana nabho. 15Hano erikinda riyo remorooche Yesu, bhoose bhakahagha chwee. Hayo hayo bhakamuyaarera, bhakamukëëri.

16Yesu akabhabhoori abhaanabheegha bhaache akabhugha, “Neke moghoshangʼaana nabho?”

17Omooto umu mo‑rikinda riire aghagharokeri akabhugha, “Omweghi, nemurëëtiri omoona waane ghokoocho. Naanyi no omusambu uno omuköriri abhe erimuumu. 18Mara kaaru nohaamughööta, na komoghwishi haase, na komuköra aruusi eriihuru mo‑monu, na ghukararaati amiino na kumagharara omobhere woose. Nebhasabhiri abhaanabheegha bhaacho kubha bhamoruusi omusambu, amare bhataatoriri.”

19Yesu akabhabhoorera akabhugha, “Inyu orwibhoro runo rotaaghokumi, neghwikara na niinyu na kobhaghumereri mbagha nyingake? Momurëëtë hano omoona uyo.”

20Bhakamurëëta omoona uyo. Amare hano omusambu omorooche Yesu, hayo hayo okamughööta omoona uyo na komukörëra eriirimo. Aghagho haase, aghiigharaghara na koruusi eriihuru mo‑monu. 21Yesu akamobhoori ishe omoona akabhugha, “Anyaako ino niisëëmiri korwera nyingake?” Ishe akamugharokeri akabhugha, “Korwera bhoona bhooche. 22Mara kaaru omusambu uyo nohaamoghwishi mo‑mororo na mo‑manche kubha omwite. Ibheere aribha oghotora ghuköra ghyokyose, otoghwere bheghongi, otusakeri.”

23Yesu akamugharokeri akabhugha, “Ngwake okobhugha kubha, ‘Aribha oghotora’? Ghoose ngaakubha kwo mooto uno akorekumi Eryobha.” 24Hayo hayo ishe omoona uyo aghatiiri eriiraka akabhugha, “Neghokumi! Amare obhokumi bhoone bhotaaghwisha, nunsakeri nibhe no obhokumi bhokoro.”

25Hano Yesu arooche kubha erikinda re bhaato ndekwëndërëra kwiyëngëra gho changuru, akawohiinya omusambu uyo, akabhugha, “Iye omusambu! Nokomuköra omoona uno abha erimuumu no omokiro. Ibheere ˆneghakuhatëka, nooru kwo mooto uno, no otasaki komusöhërëra konde.” 26Niho omusambu wuure oghaköra eriireghe ikoro, okamoghwishi omoona wuure na komukörëra eriirimo, okaru. Omoona wuure akabha kinya akuure, abhaato abhamu bhakabhugha kubha, “Nakuure!” 27Amare, Yesu akamughööta okubhökö omoona uyo, akamobhooki, akiimeerera.

28Mbe, hano Yesu asöhiri mo‑nyumba, abhaanabheegha bhaache bhakamobhoori bhaanyi abheene chiri bhakabhugha, “Ngwake itu totaatoriri komoruusi omusambu?” 29Yesu akabhabhoorera kubha, “Omusambu kinya uyo toghotora kowuhëëbha nanyinga kwo masabhi.”#9:29 Amasabhi. Amandëkö aghande gha Keyunaani ngakobhugha kubha, amasabhi na kwiyima ebhiinyakurë.

Yesu ˆaghasiikëra wiiki ighoro e ghoku na koryoka kooche

(Mataayo 17:22–23; Ruuka 9:43–45)

30Yesu na abhaanabheegha bhaache bhaakaru hayo, bhakaheta ghateghate e mukööwa o Ghariraaya. Yesu tëëndiri abhaato bhamënyë kubha hayi anyi, 31gho kubha naare areeghi abhaanabheegha bhaache. Akabha arabhabhoorera arabhugha, “Eni Omoona o Mooto, neghughöötu na kohiru mo‑mabhökö gha bhaato nabho mbakoonyita, amare orosiko ro ghatato korwera orosiko runo neeghoku, nekoryoka.” 32Abhaanabheegha bhaache bhataamënyiri ghano asiikiire, ibho bhaghatiina komobhoori.

N‑niwe anyi omokoro mo‑bhoose

(Mataayo 18:1–5; Ruuka 9:46–48)

33Yesu na abhaanabheegha bhaache bhakahika mo‑moghya o Kabherenawumu. Hano bhasöhiri mo‑nyumba, Yesu akabhabhoori akabhugha, “Neke moore morashangʼanera mo‑nchëra?” 34Niho abhaanabheegha bhaache bhaghakira, gho kubha mbaare bhashangʼaaniri abheene kwo bheene mo‑nchëra kubha n‑niwe ghate yaabho are omokoro ghokera abhande bhoose. 35Yesu aghiikara haase, akabhabherekera abhaanabheegha bhaache ikomi na bhabhere. Akabhabhoorera akabhugha, “Omooto uno akwënda abhe omokoro mo‑bhoose nakwëndëru iyiki haase, na kubha omutamishi o bhoose.”

36Akiimoki omoona omosuuhu, akamwimeereri ghateghate yaabho. Akamutahata, akabhabhoorera akabhugha, 37“Omooto wowoose uno aghughënëhi omoona omosuuhu kinya uno kwo riina reene, naakubha angënëhiri eni. Wiiki, omooto wowoose uno aghungënëhi eni, tangënëhiri eni omwene. Mahëënë naakubha aghënëhiri Taata uno antomiri.”

Omooto owonde uno akoruusi omusambu

(Ruuka 9:49–50)

38Yohana akamobhoorera Yesu akabhugha, “Omweghi, ntomorooche omooto uno are arahëëbha emisambu kwo riina reecho. Itu toghasaki komurëki, gho kubha taanyi haghirohamu na niitu.” 39Amare Yesu akabhugha, “Motamurëki omooto kinya uyo. Taanyi‑ho omooto uno aghuköra ebheroghooro kwo riina reene, amare wiiki angambe kobhe. 40Omooto uno ataaghotwanga, haghirohamu anyi na niitu. 41Mahëënë ˆnekabhabhoorera kubha, omooto wowoose uno akobhaha eghisënchö ke manche gha kunyo gho kubha inyu n‑abhaato bha Kirisito moonyi, Eryobha ndekomoreha atuho yaache.”

Atöngërö ighoro e masaki

(Mataayo 18:6–9; Ruuka 17:1–2)

42Yesu akëëndërëra kobhugha, “Aribha anyi‑ho omooto uno akomorumeeri umu ghate e bhasuuhu bhano bhaghonkumi eni, aghëri akörë amasari, konga omooto kinya uyo abhöhëru orobhohe ro ghusëëra mwighöti, na kurëkëru mo‑nyancha. 43Wiiki, okubhökö koocho koraghëri ukörë amasari, okonunge. N‑ngʼoni usöhë mo‑bhuhöru bho miishe ghyose otaanyi no okubhökö kumu, ghokera kubha na amabhökö abhere na ghuye mwiribha hano omororo otaakorima. [ 44Iyo niho chaangʼunyu cheeche chetaaghoku, no omororo waache tookorima.] 45Oghoghoro koocho koraghëri ukörë amasari, okonunge. N‑ngʼoni usöhë mo‑bhuhöru bho miishe ghyose otaanyi no oghoghoro kumu, ghokera kubha na amaghoro abhere na kurëkëru nyaari mwiribha re mororo. [ 46Iyo niho chaangʼunyu cheeche chetaaghoku, no omororo waache tookorima.] 47Wiiki, aribha n‑eriiso reecho reghughëri ukörë amasari, oreruusi. N‑ngʼoni usöhë mo‑bhutëmi bho Ryobha onyi ne eghitöngʼö, ghokera kubha na amiisho abhere, na kurëkëru mwiribha re mororo. 48Iyo niho chaangʼunyu cheeche chetaaghoku, no omororo waache tookorima.

49“Eryobha ndekoheti omooto woose mo‑nyaako ino etuubhiine no omororo,#9:49a Omororo. N‑eghetuubhaani ke nyaako ino ekobhabhöna Abhakirisito na ghuköngʼi obhokumi bhoobho. kinya abhachaama bhahaahaka omoonyo#9:49b Omoonyo. Abhayahuuti ꞉mbaahakiri chaanyama omoonyo gho ghiri bhachemuse niho bhachesireekereri. mo‑maruusi gha chaanyama chino chekeere ghosireekereru.#9:49c Ekeyunaani ngekobhugha, Omooto woose naghotooru omoonyo kwo mororo. Mööhi Abharaawi 2:13; Esekyeri 43:24. 50Omoonyo m‑muchömu, amare orabhori obhuchömu bhooche, moghotora ghotoora egheghiro ke kubha ughöötë wiiki? Na niinyu moose yaanyu, mubhe kinya omoonyo uno ughöötiri, mubhe no obhoghwani inyu bheene kwi inyu bheene.”

Currently Selected:

Maariko 9: ntk

Highlight

Copy