Yohana 10
10
OMULISYA MUZIMA. — KRISTU N’OMO NA TATA. — BAKWENDA KUMULASY’AMABALE.
1Koto koto nkubagambira nti: Atakuraba mu mulyango kutaha mu kibuga ch’enabalega, nawe akahanamira handi, ogwo ni musuma n’omunyagi. 2Kandi akuraba mu mulyango, ogwo ni mulisya w’enabalega. 3Omulinzi wa ha mulyango akumukingulira, n’enabalega zikuhulira ilaka lye; kai akweta enabalega ze amazina, nazihurucha. 4K’akusyetura enabalega ze, nazyebemberera; kandi enabalega nizimuruba, obwo zikumanya ilaka lye. 5Omugeni tizikumuruba, nawe zikumwiruka, obwo zitakumanya ilaka ly’abageni. 6Yezu nabaganira olugani olwo; nawe bonene tibamanyire ebyo yabafumorera. 7Mbe Yezu nasuba kubagambira ati: Koto koto nkubagambira nti: Ine ndi mulyango gw’enabalega. 8Abezire bona ni basuma n’abasakuzi#10, 8 Yezu takugambaho abalagi n’Omwebembezi we, nawe Abafarizayo n’abakwolekerera amagambo g’endimi, nk’abalagi b’obubehi., n’enabalega tizibahulire. 9Ine ndi mulyango. Omuntu akutahira hal’ine, akuchunguka; akutaha, nahuruka, nasanga ebyo kulya. 10Omusuma takuletwa kindi, kutali kwiba no kubaga no kuhenahena. Ine nkeza, niho babone obulame, kai babubone bwingi muno. 11Ine ndi mulisya muzima. Omulisya muzima akuteraho enabalega ze omwoyo gwe. 12Nawe akulisiza empera, atali ninazo, enabalega zitali ze, k’akubona omusege nigwiza, akwiruka nasiga enabalega; omusege nigukwat’enabalega, niguzinyarambula. 13Omulisya w’empera akwiruka kuba ni w’empera, enabalega tizikumusasa. 14Ine ndi mulisya muzima, nkumanya enabalega zange, kai enabalega zange zikummanya, 15nk’okwo Tata akummanya, n’ene nikwo nkumanya Tata; kai nkuteraho enabalega zange omwoyo gwange. 16Kandi ndi n’enabalega zindi ezitali zo mu kihyo kinu; kai kuleta ezo zona ni mulimo gwange, na zonene zilihulira ilaka lyange, ziliba kihyo kimo n’omulisya omo. 17Nicho Tata akunendera, obwo nkutaho omwoyo gwange, mpiche kugubona lwa kabili. 18Tihaliho muntu akugunihaho, nawe ine n’ine nkugutaho omwene. Kai ndi n’obuhicha bwo kugutaho, kandi n’obuhicha bwo kugusubya: ekilagiro echo nkakihabwa Tata#10, 18 Enabalega nibo abantu bona. Ekibuga chazo niyo Eklezia katolika; abali mu kihyo cha Yezu nibo abantu abakuhulira Eklezia n’abakuru bayo.. 19Ebigambo ebyo nibisuba kuleta empaka mu Bayahudi. 20Banamwingi muli bonene nibagira bati: Ali na sitani, tali na bwenge; mukumuhuliriza ki? 21Abandi nibagira bati: Ebigambo ebi ti by’omuntu ali na sitani; hati si isitani likuhicha kuhumurura ameso g’omuntu?
22Yeruzalemu nihabaho olunaku lukuru lwo kubarik’ eklezia; zaliga zili naku z’ekitiko#10, 22 Olunaku lukuru olwo lwaizukizaga Abayahudi obubariki bw’eklezia yabo.. 23Yezu yaliga nalibata mw’eklezia mw’ibindo lya Salomoni. 24Mbe Abayahudi nibamwekumiriraho nibamugambira bati: Okutuha kutimatimya kuhika lihi? Raba iwe oli Kristu, notugambire ha bweru. 25Yezu nabasubiramo ati: Nkubagambira, kai timukwikiriza. Ebikorwa ebyo nkukolera mw’izina lya Tata, nibyo bikummanyisya. 26Nawe imwe timukwikiriza, obwo mutali bo mu nabalega zange. 27Enabalega zange zikuhulira ilaka lyange; kai n’ene nkuzimanya, zikunduba. 28Kandi nkuziha obulame obutahwaho, tizilibura nangu nangu, kandi si tihaliho alizinaka mu ngaro zange. 29Tata ayazimpere akukira bona, taliho akuhicha kuziha mu ngaro za Tata. 30Ine na Tata tuli omo.
31Mbe Abayahudi nibakoby’amabale kumulasa. 32Yezu nabasubiramo ati: Ndabolekire ebikorwa bizima bingi ebyarugire hali Tata; mukundasy’amabale ha bw’ebikorwa ki si muli ebyo? 33Abayahudi nibamusubiramo bati: Titukulasira ekikorwa kizima, nawe ebizumi ebyo okuzuma Mungu, kai n’obw’ okwegira Mungu, kunu oli muntu. 34Yezu nabasubiramo ati: Si tichandikirwe mu Kilagiro chanu kiti: Nagambire nti: Muli bamungu? 35Raba abo bayesirwe bamungu, abo ekigambo cha Mungu chezire, (kai Enandiko tizikuhicha kwihwaho), 36kai owe Mungu yakulize akamutuma mu nsi, niwe imwe mukugira muti: Okuzuma Mungu, obwo nagizire nti: Ndi Mwana wa Mungu? 37Raba ntakukola ebikorwa bya Tata, nimuleke kunikiriza. 38Raba nimbikola, mbe naho mutakwenda kunikiriza, hona nimwikirize ebikorwa byange, niho mumanye nimwikiriza okwo Tata ali mul’ine, kai ine ndi muli Tata. 39Mbe nibahiga kumukwata; nawe nanoha mu ngaro zabo. 40Nasuba kugenda ha mwambu gundi gwa Yordani, aho Yohana yaliga yatandikire kubatiriza; niyo naikara. 41Bengi nibamwizaho, nibagira bati: Yohana tiyakozire ihano n’elimo; 42nawe byona byona ebyo yagambire hali onu, byaliga bikomereze. Kai bengi nibamwikiriza.
Currently Selected:
Yohana 10: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
