যাত্রা 10
10
মিসর উগুরে আস্টো লম্বর আঘাত-পংগপালর্ তোষ্যে
1-2ইয়েন পরেদি লগেপ্রভু মোশিরে কলঅ, “তুই ফরৌণ ইধু যাহ্। মুই ফরৌণ আর তা কাম্গুরিয়্যেগুনোর্ মনানি দর গুরি দুয়োং যেনে তারা মর্ এ খেমতাগানর্ চিহ্নোগানি দেগন্ আর যেনে পরেদি তুই তঅ পূয়োগুনো ইধু আর নাদিনুনো ইধু কোই পারচ্ মিসরীয়গুনোরে মুই কেধোক্ক্যেন গুরিনে ভুল্ বানেয়োং আর মঅ খেমতার্ চিহ্নোগানি দেগেয়োং। ইয়েন্দোই তুমি বুঝি পারিবাদে, মুয়ই লগেপ্রভু।” 3মোশি আর হারোণে সেক্কে ফরৌণ ইধু যেইনে কলাক্, “ইব্রীয়গুনোর্ গোজেন লগেপ্রভু কত্তে, ‘আর কয়দিন্ তুই মঅ মুজুঙোত্ মাঢাবো লোঙেবাত্তে অস্বীগের্ গুরিবে? মরে তবনা গুরিবাত্যে মঅ মানুচ্চুনোরে যেবাত্তে দে। 4যুদি তুই মঅ মানুচ্চুনোরে যেবাত্যে দেদে রাজী ন-অচ্ সালে এযেত্যেকেল্যে মুই তঅ দেজঅ ভিদিরে পুগ্-যুগ্ আনিম্। 5সিগুনে এইনে দেজ্চানরে এমন্গুরি নাঢি ফেলেবাক্, মাদিয়ো দেগা ন-যেবঅ। শিলো-ঝড়ত্তুন্ যিয়েনি রেহাই পেইয়্যে সিয়েনি বেক্কানি পুগ্-যুগ্কুনে হেই ফেলেবাক্। মাদত্ যিদুক্কুন গাছ্-গাজারা উত্তোন্ সিগুনো তারা হেই ফেলেবাক্। 6সে পরেদি তর্ আর তর্ বেক কাম্গুরিয়্যেগুন আর অন্য বেক্ মিসরীয়গুনো ঘরানিত্ এ পুগ্-যুগ্কুনে ভুরি যেবাক্। এ দেজত্ এজানার্ পরেত্তুন্ ধুরি এচ্চ্যে সং তর্ বাপ-দাদাগুনে আর তারার্ বাপ-দাদাগুনেয়ো কনদিন এবাবোত্যে অদে ন-দেগন্।’ ” এ কধাগান্ কনার্ পরেদি মোশি পিজেদি ফিরি ফরৌণ ইধু গেলগোই।
7সেক্কে ফরৌণর্ কাম্গুরিয়্যেগুনে তারে কলাক্, “এ মানুচ্চো আর কয়দিন্ আমারে ফাল্ ফাদি থেবঅ? উই মানুচ্চুনে যেনে তারার্ গোজেন লগেপ্রভুর্ উবোসনা গুরি পারন সেনত্যে তারারে যেবাত্তে দে। তুই কি বুঝি ন-পারত্তে, মিসর্ দেজ্চান্ এক্কুবারে শেজ্ ওই গেলঅ?”
8সেনত্যে মোশি আর হারোণরে আরঅ ফরৌণ ইধু আনা অলঅ। ফরৌণে তারারে কলঅ, “যঅ, তুমি যেইনে তমা গোজেন লগেপ্রভুর নাঙে উবোসনা গরঅ। মাত্তর্ তমা লগে আর কন্না কন্না যেবঅ?”
9জোবত্ মোশি কলঅ, “আমা চিগোন্ চিজিগুন্ আর বুড়োগুন, আমা ঝি-পূয়োগুন্ আর আমার গোরু-ভেড়াছাগলুন্ আমা লগে যেবাক্, কিত্তে লগেপ্রভুর্ নাঙে আমার্ এক্কান পরব্ পালা পুরিবো।”
10সেক্কে ফরৌণে তারারে কলঅ, “যুদি কনঅ দিন্অ মুই ঝি-পূয়োগুন সুমুত্তো তমারে যেবাত্তে দুয়োং সালে তমার্ সে লগেপ্রভুবোয়ো যেনে তমা সমারে থায়্। উজিয়ার্! তমা উদ্দেশ্যগান্ গম্ নয়। 11না, সিয়েন্ ন-অবঅ। তুমি দঅ লগেপ্রভুর্ উবোসনা গুরিবাত্যে যেবার চর্, সালে বানা মরত্তুনে যাদোক্।” ইয়েন পরেদি ফরৌণ মুজুঙোত্তুন্ মোশি আর হারোণরে ধাবেই দিয়া অলঅ।
12পরেদি লগেপ্রভু মোশিরে কলঅ, “মিসর্ দেজ্ছান উগুরে তঅ আঢ্তান্ বাবেই দে। সেক্কে মাদত্ য়েল্ বেক্কানি, অত্তাৎ শিলো-ঝড়ত্তুন্ রেহাই পেইয়্যে বেক্কানি পুগ্-যুগ্কুনে এইনে হেই ফেলেবাক্।”
13সেক্কে মোশি মিসর্ দেজ্ছান উগুরে তা লুদিক্কো বাবেইনে ধুরিলো; আর লগেপ্রভু এমন্ গুরিলো যিয়েনত্তে সে দেজছান উগুরে পুরো রেত্ আর পুরো দিন ধুরি পূগো বোইয়্যের্ বেলঅ। 14সেক্কে পুরো মিসর দেজছান উগুরে গুণি ন-পুড়েইয়্যে পুগ্-যুগ্ এইনে বেক্ জাগানিত্ বজিলাক্। এদক্ পুগ্-যুগ্ আগেদি আর কনঅদিন দেগা ন-যায়, কনদিন্ দেগায়ো ন-যেবঅ। 15সে পুগ্-যুগ্কুনে পুরো দেজছানত্ এমন্গুরি ছিদি পড়িলাক্, মাদি উগুরেদি কালা গুরি দেগা যেদঅ। মাদত্ য়েল্ বাবোত্যে বেক্কানি আর গাজত্ যিদুক্কুন্ গুলো শিলো-ঝড়ত্তুন্ রেহাই পেইয়োন্ সিগুন্ বেক্কুন্ তারা হেই ফেলেলাক্। পুরো মিসর দেজর্ গাছ-গাছরাগুনোত্ য়েল্ বাবোত্যে আর কিচ্চু ন-রলঅ। 16সেক্কে ফরৌণে যাদিমাদি মোশি আর হারোণরে ডাগি আনিনে কলঅ, “তমার গোজেন লগেপ্রভু ইধু আর তমা বিরুদ্ধে মুই পাপ গোজ্যং। 17সেনত্যে দোয়্যে গুরিনে তুমি এবার ধোক্ক্যেন মঅ পাপ্পানি ক্ষেমা গরঅ। তমার গোজেন লগেপ্রভু ইধু কোজোলী গুরি দুয়ো যেনে তে মঅ উগুরেত্তুন্ এ মরণর্ ছাবাবো সোরেই নেযায়।”
18সেক্কে মোশি ফরৌণ ইত্তুন যেইনে লগেপ্রভু ইধু কোজোলী গুরিলো। 19সেক্কে লগেপ্রভু বোইয়্যের নাল্লো ঘুরেই দিলো আর পোজিমেত্তুন্ এক্কো দাঙর্ বোইয়্যের্ বেঈনে পুগ্-যুগ্কুনোরে উড়ে নিইনে লোহিত সাগরত্ ফেলেল। গোদা মিসর্ দেজত্ আর এক্কোয়ো পুগ্-যুগ্ ন-রলাক্। 20মাত্তর্ লগেপ্রভু ফরৌণ মনান্ দরঅ গুরি দিলো; তে ইস্রায়েলীয়গুনোরে যেবাত্তে ন-দিলো।
মিসর উগুরে নয় লম্বর আঘাত-আন্ধার্
21পরেদি লগেপ্রভু মোশিরে কলঅ, “আগাজ কিত্তেদি তঅ আত্তান্ বাবেই দে। সেক্কে আত্তোই ধোজ্যেদে ধোক্ক্যেন আন্ধারত্ দেজ্চান্ ডুবি যেবগোই।” 22সেক্কে মোশি আগাজ ইন্দি আঢ্তানি বাবেই দিলো, আর সেক্কে তিন দিন সং গুর্গুজ্যে আন্ধারে গোদা মিসর দেজ্চান্ ঢাক্যে রলঅ।
23সেই তিন দিন সং কনজনে কাররে নয়ো-দেগিলাক্ আর ঘরানি ছাড়িনে কনজনে বারেন্দিয়ো ন-গেলাক্। মাত্তর্ ইস্রায়েলীয়গুনে যিয়েনত্ এলাক্ সিয়েনত্ পহ্র এলঅ। 24সেক্কে ফরৌণ মোশিরে ডাগি আনিনে কলঅ, “যাহ্, যেইনে লগেপ্রভুর্ উবোসনা গর্। তমার ঝি-পূয়োগুনেয়ো তমা লগে যেই পারিবাক্, মাত্তর্ তমা গোরু-ভেড়াছাগল পালুন্ ইয়েনত্ থেবাক্।”
25জোবত্ মোশি কলঅ, “আমার গোজেন লগেপ্রভুর্ নাঙে পুজ্যে আর অন্য ডালি দিবার্ য়েমানুন্ তত্তুন্ তোগেই দিয়্যে পুরিবো। 26আমার গোরু-ভেড়াছাগলুন আমা লগে নেযা পুরিবো। তারার্ এক্কো খুর্অ আমি ইয়েনত্ ফেলে যেই ন-পারিবোং। আমা গোজেন লগেপ্রভুর্ উবোসনাত্যে ইগুনো ভিদিরেত্তুন্ কয়েক্কো আমার কামত্ লাগিবাক্। সিদু ন-যানা সং আমি বুঝি ন-পারির্ লগেপ্রভুর্ উবোসনাত্যে কেধোক্ক্যেন য়েমান্ আমার্ লাগিবাক্।” 27মাত্তর্ লগেপ্রভু ফরৌণ মনান্ দরঅ গুরি দিলো আর সেক্কে তারারে ইরি দেদে তে রাজী ন-অলঅ।
28ফরোণ মোশিরে কলঅ, “মঅ মুজুঙোত্তুন্ যাগোই। উজিয়ার! আর কনদিন্ মঅ মুজুঙোত্ ন-এবে। যেদিন্যে তুই মঅ মুজুঙোত্ পড়িবে সেদিন্যে তর্ মরণ অবঅ।”
29মোশি কলঅ, “তুই যিয়েন্ কোইয়োচ্ সিয়েনোই অবঅ। মর্ নিজো আওজে মুই আর তঅ মুজুঙোত্ ন-এইম্।”
Currently Selected:
যাত্রা 10: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
