যাত্রা 11
11
মিসর উগুরে দশ্ লম্বর্ আঘাত-পত্তম্ পূয়োবো মরাণা
1সেক্কে লগেপ্রভু মোশিরে কলঅ, “মুই ফরৌণরে আর মিসর দেজ্চানরে আরঅ এক্কান্ আঘাত দিম্। সে পরেদি ফরৌণে ইয়েনত্তুন্ তমারে যেবাত্তে দিবো। সালে তে যেক্কে তমারে যেবাত্তে দিবো সেক্কে ইয়েনত্তুন্ তমারে তে এক্কুবারে ধাবেই দিইনে বিদেয়্ গুরিবো। 2তুই ইস্রায়েলীয়গুনোরে কবে, মিলে-মরদ বেক্কুনে যেনে তারার্ কায়-কুরে পাড়াল্যেগুনোত্তুন্ সনা আরঅ রুবোর জিনিস মাগি নেযান্।” 3ইন্দি লগেপ্রভু ইস্রায়েলীয়গুনো উগুরে মিসরীয়গুনোর্ মনত্ এক্কান্ দোয়্যের্ মনভাব জাগেই দিলো। ইয়েন্ বাদে মোশিয়ো ফরৌণ কাম্ গুরিয়্যেগুনো ইধু আর মিসর মানুচ্চুনোর চোগেদি এক্কো দাঙর্ মানুচ্ এলঅ।
4মোশি ফরৌণরে কলঅ, “লগেপ্রভু কোইয়্যেদে, তে রেত্ সম্বাগত্ মিসর্ দেজর্ ভিদিরেন্দি যেবঅ। 5সেক্কে মিসর্ দেজর্ বেক্ পরিবারর্ পত্তম পূয়োবো মুরি যেবঅ। সিংহাসনর্ অধিকারী ফরৌণর পত্তম পূয়োবোত্তুন্ ধুরি আরাম্ভ গুরি চোরোন্দরা ধোজ্যে চাগরানীবোর্ পত্তম পূয়োবো সং কনজনে বাদ ন-যেবাক্। ইগুনবাদেয়ো য়েমানুনোর পত্তম চেলা ছবো মুরি যেবঅ। 6সেক্কে পুরো মিসর্ দেজত্ এমন্ কানানার্ রঅ উদিবো যিবে আগে কনদিন্অ ন-উদে আর কনদিন্অ ন-উদিবো। 7মাত্তর্ ইস্রায়েলীয়গুনো ভিদিরে এক্কো কুকুরো রঅয়ো শুনো ন-যেবঅ, সিবে মানুচ্ দেগিনে ওক্ বা য়েমান্ দেগিনে ওক্। সেক্কে তুমি জানি পারিবাদে, লগেপ্রভু মিসরীয় আর ইস্রায়েলীয়গুনোরে যুদো গুরি চায়। 8তর্ এ কাম্গুরিয়্যেগুনে এইনে মঅ মুজুঙোত্ আদু পাদিনে কবাক্, ‘তুই তর্ বেক্ মানুচ্চুন নেযেইনে নিগিলি যাহ্!’ সে পরেদি মুই যেম্বোই।” এ কধাগান্ কোইনে মোশি রাগে আগুন্ ধোক্ক্যেন ওইনে ফরৌণ ইধু গেলঅ।
9লগেপ্রভু মোশিরে কোইয়্যেদে, “মিসর দেজত্ মর্ আমক্ অবার্ কামানি যেনে বেশ্ অয় সেনত্যে ফরৌণে তঅ কধা ন-শুনিবো।” 10এ আমক্ অবার কামানি মোশি আর হারোণে ফরৌণ মুজুঙোত্ গুরিলাক্, মাত্তর্ লগেপ্রভু ফরৌণ মনান্ দর গুরি দিলো বিলিনে তে তার্ দেজছানত্তুন্ ইস্রায়েলীয়গুনোরে যেবাত্তে ন-দিলো।
Currently Selected:
যাত্রা 11: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
