যাত্রা 12
12
উদ্ধোর-পরব্
1পরেদি লগেপ্রভু মিসর দেজত্ মোশি আর হারোণরে কলঅ, 2এ মাস্সো অবঅ তমার্ পত্তম মাস, তমা বজরর্ পত্তম মাস। 3তুমি বেক্ ইস্রায়েলীয়গুনোরে এগত্তর্ গুরিনে কোই দুয়ো যেনে এ মাসর দশ তারিগোত্ পত্তি পরিবারর্ মুরুব্বীবো নিজোর পরিবারত্তে এক্কো গুরি ভেড়া ছাগল ছঅ বেঈ লয়। পত্তি ঘরত্তে এক্কো গুরি ভেড়াছাগল ছঅ নেযা পড়িবো। 4কনঅ পরিবারত্যে যুদি এক্কো পুরো ভেড়া ছাগল ছঅ ন-লাগে, সালে পাড়াল্যে মানুচ্চুনো লগে সিবে ভাগ গুরি নেযা পড়িবো। দ্বিবে পরিবারর্ মানুচ্ মজিম্ পত্তিজনে কত্তমান্ হেই পারিবাক্ সিয়েনি বুঝিনে ভেড়া ছাগল ছঅবো নেযা পুড়িবো। 5সে ছঅবুয়ো অবঅ ছাগল বা ভেড়া ছাগল ঝাগত্তুন্ বেঈ নেযেয়ে এক্কো এক বোজোজ্যে পাদা ছঅ। তা কিয়্যেত্ যেন কনজাগাত্ কনঅ তুদো ন-থায়্। 6ছঅবুয়ো এ মাসর চোদ্দো তারিখ সং রাগা পড়িবো। সে পরেদি সেদিন্যে বেল্ ডুবি যানার পরেদি পুরো ইস্রায়েল সমাজর্ পত্তি পরিবারর যার্ যার্ ভেড়া ছাগল ছঅগুন কাবিবাক্। 7সে পরেদি যেদক্কানি ঘরত্ তারা সেই ভেড়া ছাগল এরানি হেবাক্ সে বেক্ ঘরানির দোরান তক্তানির্ দ্বিদাগেদি আর উগুরেদি কিজু লো নেযেইনে লিবি দিবাক্। 8সেই রেদোত্ তারা সেই এরানি আগুনোত্ সিগিনে সদানেইয়্যে পিদে আর তিদে শাগ লগে হেবাক্। 9সেই এরানি তুমি কাজা বা উজিনে ন-হেবা, মাত্তর্ মাদাবো, টেঙানি আর ভিদিরে জিনিস্চানি আগুনোত্ সিগিনে হেবা। 10বেন্যে সং সিয়েনির্ কনঅ কিজু ফেলেই ন-রাগেয়ো। যুদি কিজু বাগী থায় সালে সিয়েনি আগুনোত্ পুড়ি ফেলেবা। 11তুমি এ অবস্থায়্ সিয়েনি হেবা; তমা কাবড়্ থেবঅ কমরত্ গুজেয়্যে, টেঙত্ থেবঅ জদা আর আঢত্ লুদিক্। তুমি যাদিমাদি হেবা। ইবে অলঅ লগেপ্রভুর নাঙে উদ্ধোর-পরবর্ হানা। 12সেই রেদোত্ মুই মিসর দেজ ভিদিরেন্দি যেইম্ আর মান্জ্যর্ পত্তম পূয়োবো আহ্ য়েমানর্ পত্তম চেলা ছঅগুনোরে মারে ফেলেম। মুই মিসরর বেক্ দেব-দেবেদাগুনোরে সাজা দিম; মুই লগেপ্রভু। 13মাত্তর্ তমা ঘরত্ যে লোগানি লিপ্যে থেবঅ সিয়েনি অবঅ তমার্ চিহ্নো। আর মুই সেই লোগানি চেইনে তমারে বাদ দিইনে উজেই যেম্। সেক্কে মিসর দেজ উগুরে মর্ আঘাদর্ দজাত্তুন্ তুমি মাপ্ পেই যেবা। 14তমাত্যে সেদিন্নো অবঅ এক্কো নাঙ্ থাইদে দিন। লগেপ্রভুর নাঙে এ পরপ্পো এক্কো উমরত্যে সুদোম্ ইজেবে তমা বংশর পর বংশ ধুরি পালন্ গুরিবাক্।
15“তুমি সাত দিন সং সদানেইয়্যে পিদে হেবা। তমা ঘরত্ যেদক্কানি সদা আঘে পত্তম দিনোত্ তুমি সিয়েনি বেক্কানি সোরেই ফেলেবা। এ সাত দিনো ভিদিরে যুদি কনজনে সদা দিয়্যে পিদে খায় সালে তারে ইস্রায়েলীয়গুনো ভিদিরেত্তুন্ বাদ দিয়া অবঅ। 16পত্তম আর সাত দিনোত্ তুমি পবিত্র এগত্তর্ অইদে-তেম্মাং গুরিবা। এ দ্বিদিনোত্ তুমি নিজোর্ হানা বানানা বাদে আর কনঅ কাম্ ন-গুরিবা। 17সদানেইয়্যে এই পরপ্পো এক্কো উমরর্ সুদোম ইজেবে তুমি বংশর পর্ বংশ ধুরিনে পালেবা, কিত্তে এ দিনোত্ সৈন্যদলুনো ধোক্ক্যেন গুরি মুই মিসর দেজত্তুন্ তমারে নিগিলেই আনিম্। 18তুমি পত্তম মাসর্ চৌদ্দো তারিগোর্ সাজোন্যেত্তুন্ ধুরি আরাম্ভ গুরিনে সেই মাসর্ এগোশ্ তারিগোর্ সাজোন্যে সং সদানেইয়্যে পিদে হেবা। 19এই সাত দিন সং তমা ঘরত্ যেন কনঅ সদা ন-থায়। যুদি কনজনে সদা-মিজেয়্যে কনকিজু খায়, সালে তারে ইস্রায়েলীয় সমাজত্তুন্ বাদ্ দিয়া পড়িবো, তে তমা জাদর্ মানুচ্ ওক্ বা অন্য জাদর্ মানুচ্ ওক্। 20তুমি যিয়োদ থেদা সাৎ এ সাত্ দিন সং তুমি সদা মিজেয়ে কনঅ কিজু ন-হেবা; পিদেয়ো হেবাদে সদা ন-মিজেইয়্যে।”
21সেক্কে মোশি ইস্রায়েলীয়গুনোর্ বুড়ো নেতাগুনোরে ডাগিনে কলঅ, তমা পরিবারত্তে ভেড়া ছাগল ছঅ লোইনে উদ্ধোর-পরব নাঙে সিবে কাবিবা। 22সে পরেদি এসোব ঝুবোত্তুন্ এক কট্টা ডেলা নেযেইনে কদরাত্ রাগেয়্যে লোগানত্ ভুরেইনে সে লোগান্ দোরান তক্তার্ দ্বিদাগেদি আর উগুরেদি তক্তাত্ লিবি দিবা; আর বেন্যে পহর্ ন-অনা সং কনজনে ঘর বারেদি ন-যেবা। 23মিসরীয়গুনোরে আঘাত্ গুরিবার লক্কে লগেপ্রভু যেক্কে মিসর দেজ ভিদিরেদি যেবঅ সেক্কে তমা দোরান তক্তানিত্ লো দেগিনে তে তমা দোরান বাদ্ দিইনে উজেই যেবঅ। যিবে এ ভস্তর্ কামান্ গুরিবো তারে তে তমা ঘরত্ সোমেইনে তমারে আঘাত গুরিবাত্তে ন-দিবো।
24“এই পরপ্পো নিত্য তুমি আর তমার বংশধরুনে এক্কো সুদোম্ ইজেবে পালেবাক্। 25লগেপ্রভু যে দেজ্চান্ দিবাত্তে শমক্ গোজ্যে সে দেজ্চানত্ গেলেয়ো তুমি এ অনুষ্ঠানান্ পালেবা। 26তমা পূয়ো-ঝিগুনে যেক্কে তমারে পুযোর্ গুরিবাক্, ‘এই অনুষ্ঠানানর্ অত্তগান্ কি?’ 27সেক্কে তুমি কোই দিবা, ‘ইবে অলঅ লগেপ্রভুর্ নাঙে উদ্ধোর্-পরবর্ উৎসর্ব, কিত্তে মিসর্ দেজত্ থেবার্ সময়োত্ তে ইস্রায়েলীয়গুনোর্ ঘরানি বাদ দিইনে উজেই যেইয়্যে। তে মিসরীয়গুনোরে মারে ফেলেয়্যে মাত্তর্ আমারে রোক্ষ্যে গোজ্যে।’ ” ইয়েন পরেদি ইস্রায়েলীয়গুনে মাদিত্ মাদা নিগিরি পড়িনে লগেপ্রভুরে তারার্ মনর্ ভোক্তি জানেলাক্। 28মোশি আর হারোণরে লগেপ্রভু যে উগুমান্ দিয়্যে ইস্রায়েলীয়গুনে ফিরি যেইনে সেধগে কাম্ গুরিলাক্। 29সে পরেদি চৌদ্দো তারিগোর্ রেত্ সম্বাগত্ লগেপ্রভু মিসর্ দেজর্ পত্তি ঘরর্ পত্তম পূয়োবোরে মারে ফেলেল। ইয়েনত্ রাজ-সিংহাসনর্ গিরোজ্ ফরৌণর্ পত্তম পুয়োবোত্তুন্ ধুরি জেলোত্ পোজ্যে মান্জ্যর্ পত্তম পূয়োগুন্ সং, এন্ কি, য়েমানুনোর্ পত্তম চেলা ছবুয়ো মুরি গেলঅ। 30সেই রেদোত্ ফরৌণে আর তার্ বেক্ কাম্গুরিয়েগুন্ আর মিসরর্ পত্তি মানুচ্চুন ঘুমোত্তুন্ জাগি উদিলাক্; আর পুরো মিসর্ দেজত্ এক্কো কানানির কিজেক্ পড়ি গেলঅ, কিত্তে এমন্ এক্কান্অ ঘর বাদ ন-যায় যিয়েনত্ কনজন্ মুরি ন-যান্।
মিসর দেজত্তুন্ যানা
31ফরৌণে সে রেদোত্ মোশি আর হারোণরে ডাগি আনিনে কলঅ, “তুমি ইস্রায়েলীয়গুনোরে সমারে নেযেইনে মঅ মানুচ্চুনো ভিদিরেত্তুন্ নিগিলি যঅ। তুমি যেধোক্ক্যেন কোইয়ো সেধোক্ক্যেন গুরি যেইনে লগেপ্রভুর্ তবনা গরঅ। 32তমা কধা মজিম যেবার্ অক্তত্ তমা গোরু-ভেড়াছাগল ঝাক্কুন্অ নেযেবা, আর মরেয়ো বর্ দুয়ো।”
33মিসরীয়গুনোর্অ দর্ লাগিলো, তারায়ো দগে ন-অলে মুরি যেবাক্। সেনত্যেই তারা ইস্রায়েলীয়গুনোরে তাগাদা দিয়া ধোজ্যন্ যেনে তারা যাদিমাদি তারার্ দেজত্তুন্ নিগিলি যান্। 34ইয়েনত্ ইস্রায়েলীয়গুনে সদা মিজেবার্ আগেদি তারার্ মোইদ্যে মিগিবার্ পিলেবো সুদ্ধো মোইদ্যের্ ডলাগুন্ তারার্ কাবড়লোই বানিনে কানাত্ তুলিলাক্। 35ইস্রায়েলীয়গুনে মোশির্ কধামজিম মিসরীয়গুনোত্তুন্ সনা-রুবোর জিনিসছানি আর কাবড়-চুগোরানি মাগি ললাক্। 36তারা যিয়েনি চেবাক্ মিসরীয়গুনে যেনে তারারে সিয়েনিই দুয়োন্ সেনত্যেই লগেপ্রভু আগে আগে মিসরীয়গুনোর মনত্ ইস্রায়েলীয়গুনো উগুরে এক্কান্ মেইয়্যের্ মনভাব্ গুরি দিলো। এসাইন্যাগুরি তারা মিসরীয়গুনোর্ বোউত্ কিজু অধিকার্ গুরি নিলাক্।
37সে পরেদি ইস্রায়েলীয়গুনে রামিষেষত্তুন্ সুক্কোত ইন্দি যাহ্ ধুরিলাক্। প্রায় ছয়লাখ্ মরদপুয়ো আঢি আঢি গেলাক্। তারা সমারে মিলেমানুচ্ আর গুরো-গারায়ো এলাক্। 38ইস্রায়েলীয়গুনে বাদেয়ো আরঅ বোউত্ মানেই আর গোরু-ভেড়াছাগলসুদ্ধো এক্কো দাঙর্ য়েমানর্ ঝাক্অ তারা সমারে এলঅ। 39যে সদানেইয়্যে মোইদ্যের্ ডলাগুন্ তারা মিসরত্তুন্ লোই এচ্ছোন্ পদথ্ তারা সিয়েনিলোই পিদে বানেলাক্। এদক্ যাদিমাদি মিসর দেজত্তুন্ তারারে নিগিলেই দিয়্যে অলদে যে, তারা মোইদ্যেগানি লগে সদা মিজেবার্অ সময় ন-পান্ আর পদথ্ হেবাত্তে কনকিজু বানেয়ো নেযেই ন-পারন্।
40মিসর দেজত্ ইস্রায়েলীয়গুনে বেক্কুনে মিলিনে চেরশঅ ত্রিশ বজর্ বজত্তি গোজ্যন্। 41চেরশঅ ত্রিশ বজর্ শেজ অবার দিন্নোত্ লগেপ্রভুর বেক্ মানেইয়ুন সৈন্যদল ধোক্ক্যেন গুরি মিসর্ দেজ্চান ফেলেইনে নিগিলি এচ্ছোন্। 42লগেপ্রভু সেই রেদোত্ পারা দিইনে মিসর্ দেজত্তুন্ তারারে নিগিলেই আন্যে বিলি বংশর পর বংশ ধুরিনে ইস্রায়েলীয়গুনেয়ো লগেপ্রভুর কধা মনত্ গুরিনে সেই রেত্তো জাগিনে কাদা পড়ে।
উদ্ধোর্-পরপ্পো পালেবার্ সুদোম
43পরেদি লগেপ্রভু মোশি আর হারোণরে কলঅ, উদ্ধোর্-পরবর্ ভেড়া ছাগলর ছঅবো পৌইদ্যেনে কদক্কানি সুদোম্ মুই তমারে দুয়োঙর্। অন্য কনঅ জাদর্ মানেই এই এরাগান্ হেই ন-পারিবাক্। 44টেঙালোই কিন্যে চাগর্বোর চুনুগুলোবো তনা গরানার পরেদি সিয়েন্ হেই পারিবো। 45তোমা ভিদিরে বজত্তি গুরিবাত্যেই এচ্ছ্যে বা টেঙালোই খাদানা অর্ এধোক্ক্যেন অন্য কনঅ জাদর্ মানেই সিয়েনি হেই ন-পারিবাক্। 46যে ঘরানত্ ভেড়া ছাগলর ছবুয়ো কাবা অবঅ সেই ঘরানদই সিবে খা পুড়িবো। ঘরানর্ বারেদি সিবে নেযেই ন-পারিবো আর সেই ভেড়া ছাগল্লোর এক্কো আড়্অ ভাঙি ন-পারিবো।
47“ইস্রায়েলীয়গুনোর্ বেক্কুনোত্তুন এই পরপ্পো পালন গরা পড়িবো। 48তোমা ভিদিরে বজত্তি গোজ্যে অন্য জাদর্ কনঅ মানেই যুদি লগেপ্রভুর্ নাঙে এই উদ্ধোর্-পরপ্বো পালন্ গুরিবাত্তে চান্ সালে আগে তার্ পরিবারর্ বেক্ মরদ পূয়োগুনোত্তুন্ চুনুগুলোর মাদাগুন্ তনা গরা পড়িবো। সে পরেদি তে ইস্রায়েলীয়গুনো ধোক্ক্যেন সিয়েনি পালন্ গুরি পারিবো। মাত্তর্ চুনুগুলোবো তনা গরা ন-অয়্ এধোক্ক্যেন কনঅ মানেই এই পরবর্ এরানি হেই ন-পারিবাক্। 49ইস্রায়েলীয়গুনোত্যেই আর তোমা ভিদিরে বজত্তি গোজ্যে অন্য জাদর্ মানেইয়ুনোত্যেই এই এক্কুই উগুম্ থেলঅ।”
50লগেপ্রভু মোশি আর হারোণরে যে উগুমান্ দিয়্যে ইস্রায়েলীয়গুনে ঠিগ সেধোক্ক্যেনই গুরিলাক্। 51লগেপ্রভু সেদিন্যেই সৈন্যদল ধোক্ক্যেন গুরি ইস্রায়েলীয়গুনোরে মিসর দেজত্তুন্ নিগিলেই আনিলো।
Currently Selected:
যাত্রা 12: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
