যাত্রা 14
14
1পরেদি লগেপ্রভু মোশিরে কলঅ, 2“তুই ইস্রায়েলীয়গুনোরে কঅ যেনে তারা ঘুরি যেইনেই বড়গাঙ্ আর মিগ্দোলর্ সংমোধ্যে পী-হহীরোৎ নাঙে জাগান ইধু তারার্ তাম্বুলান ফেলান্। জাগাগান্ বড়্গাঙ পারত্ বাল্-সফোনর মুজুঙেদি। 3ইয়েন্ দেগিনেই ফরৌণে মনে গুরিবো ইস্রায়েলীয়গুনে কি গুরিবাক্ সিয়েন্ ঠিগ গুরি ন-পারিনেই দেজ ভিদিরে ঘুরোঘুরি গর্তে গর্তে ধূল্যেচর চাগালাত্ আক্সোই যেইয়োন্। 4মুই ফরৌণর মনান্ দরঅ গুরি দিম্ আর তে তারা পিজেদি লোড়েব। মাত্তর্ ফরৌণে আর তার্ সৈন্যদলুনে মর্ বাঈনী ফগদাঙ্ গুরিবার্ পথ অবাক্। ইয়েনত্তুন্ মিসরীয়গুনে জানি পারিবাক্, মুই লগেপ্রভু।” ইস্রায়েলীয়গুনে লগেপ্রভুর্ কধা মজিম কাম্ গুরিলাক্।
5মিসরর্ রাজা ফরৌণরে যেক্কে কুয়ো অলঅ, ইস্রায়েলীয়গুনে ধেই যেইয়োন্ সেক্কে তারা পৌইদ্যেনে ফরৌণ আর তার্ কাম্গুরিয়েগুনোর মনানি বুদুলি গেলঅ। তারা কলাক্ “ইয়েন্ আমি কি গুরিলোং? তারারে বিদেয়্ গুরি দিইনে দঅ আমি আমার্ বেক্ চাগরুন্ আরেলং।” 6এ কধাগান্ কোইনে ফরৌণে তার্ রথ্তান্ সাজেবার্ উগুম্ দিইনে তার্ সৈন্যগুনোরে এগত্তর্ গুরিনে লগে লগে নেযেল। 7তে ছয়শত্ বেঈ লোইয়্যে রথ্ দঅ নেযেলয়ো, সিয়েনি বাদেয়ো মিসরীয় অন্য বেক্ রথ্তানিয়ো লগে নেযেল। এক এক্কান্ রথ এক একজন সেনাপতিয়ে চালাদন্। 8লগেপ্রভু মিসরর্ রাজা ফরৌণর মনান্ দরঅ গুরি দিলো। সেনে ইস্রায়েলীয়গুনে যেক্কে ন-দোরেয়েগুরি মুজুঙেদি উজেই যাদন্ সেক্কে তে তারার্ পিজেদি লোড়েই নেযেল। 9তার্ বেক্ ঘোড়াগুন, রথ্তানি, ঘোড়াবাহিনীগুন আর সৈন্যদলুন্ নেযেইনে মিসরীয়গুনে তারার্ পিজেদি লোড়েইনে তারার্ কায়কুরে লুমিলাক্। ইস্রায়েলীয়গুনে এই সময়োত্ বড়গাঙর্ পারত্ বাল্-সফোনর মুজুঙেদি পী-হহীরোত ইধু এলাক্।
10ফরৌণে আর তাঁর্ দলবলুনোরে তারার্ পিজেদি এত্তে দেগিনেই ইস্রায়েলীয়গুনে অমহদ দোরেইনে লগেপ্রভু ইধু কানাকুদি গরা ধুরিলাক্। 11তারা মোশিরে কলাক্, “মিসরত্ গোর্ দিবার্ জাগা নেই বিলিনে কি মুরিবাত্যেই তুই এই ধূল্যেচর চাগালাত্ আমারে আন্যচ্? মিসরত্তুন্ নিগিলেই আনিনে তুই আমারে ইয়েন্ কি গুরিলে? 12মিসরত্ থাগদে কি আমি তরে ন-কোই, ‘আমারে ইয়োদোই থেবাত্তে দে; আমি মিসরীয়গুনোর্ চাগর খাদিবোং’? ইয়োত্ এই ধূল্যেচর-চাগালা ভিদিরে মুরি যানাত্তুন্ মিসরীয়গুনো ইধু কাম্ গরানা আমাত্যেই বোউত্ গম্ এলঅ।”
13মোশি তারারে কলঅ, “ন-দোরেয়ো। তুমি যিয়োত্ আগঅ সিয়োদোই থাগঅ আর লগেপ্রভুর উদ্ধোর্ গুরিবার্ কামান্ একবার্ চঅ। তে এইচ্যে তমাত্যে সিয়েন্ গুরিবো। যে মিসরীয়গুনোরে এইচ্যে তুমি দেগর্ ইয়েনর্ পরেদি তারারে আর কনদিন্অ ন-দেগিবা। 14তুমি বানা অলর্ গুরি থাগঅ। লগেপ্রভুই তমার ওইনেই যুদ্ধো গুরিবো।”
15ইয়েন পরেদি লগেপ্রভু মোশিরে কলঅ, “তুই মইধু কিত্তেই কানাকুদি গরর্? ইস্রায়েলীয়গুনোরে উজেই যেবাত্তে কঅ। 16তুই তর্ লুদিক্কো তুলি নেযা আর বড়গাঙ উগুরে তর্ আত্তান্ বাড়েই দিইনে বড়গাঙানরে দ্বিভাগ গর্। সেক্কে বড়গাঙ ভিদিরে শুগুনো জাগার্ উগুরেদি ইস্রায়েলীয়গুনে আঢি যেবাক্। 17মাত্তর্ মুই মিসরীয়গুনোর্ মনানি এমন্ দরঅ গুরি দিম, তারা ইস্রায়েলীয়গুনোর পিজে পিজে বড়গাঙত্ চমেবাক্। সেক্কে ফরৌণ আর তার্ বেক্ সৈন্যদলুন, রথ আর ঘোড়াবাহিনীগুনে মর্ বাঈনী ফগদাঙ্ গুরিবার্ পথ অবাক্। 18সিয়েন্ দেগিনে মিসরীয়গুনে বুঝি পারিবাক্, মুয়ই লগেপ্রভু।”
19-20সেক্কে গোজেনর্ দূত্তো যিবে ইস্রায়েলীয়গুনোর দলর্ আগে আগে যাল্লোই তে ঘুরিনেই তারার্ পিজে পিজে গেলগোই। মেঘর্ আন্দলান্ তারার্ মুজুঙেত্তুন্ পিজেদি সুরি যেইনে ইস্রায়েলীয় আর মিসরীয়গুনোর্ দলর্ সংমোধ্যে গেলঅ। সেক্কে মিসরীয়গুনোর্ ইন্দি মিগিলো ওই গেল আর আন্ধারত্ ঢাক্কে আর ইস্রায়েলীয়গুনোর্ ইন্দি রেদোত্অ পোট্পোট্যে পহ্র ওই গেল। ইয়েনত্যেই পুরো রেত্তো ভিদিরেয়ো মিসরীয়গুনে ইস্রায়েলীয়গুনো ইধু এই ন-পারিলাক্।
21পরেদি মোশি বড়গাঙ উগুরে তার্ আত্তান্ বাড়েই দিলো; আর লগেপ্রভু গোদা রেত্তো ধুরিনে এক্কান পূগেন্দিত্তুন্ বোইয়্যের্ জোরে বেঈনে বড়গাঙর্ পানিগানরে দ্বিকিত্তেদি সোরেই দিলো। তে পানিগানরে দ্বিভাগ্ গুরিনেই বড়গাঙর্ ভিদিরেদি এক্কান্ শুগুনো পথ বানেই দিলো। 22ইস্রায়েলীয়গুনে বড়গাঙর্ সংমোধ্যেদি শুগুনো মাদির্ পথতান্ বেইনে আঢা মারিলাক্। তারার্ ডেনে-বাঙেদি বড়গাঙর্ পানিগান দেবাল ধোক্ক্যেন ওইনে দ্বিডাগেদি ঠিয়্যেই রলঅ।
23এই বেপারান্ দেগিনে মিসরীয়গুনে পিজেন্দিত্তুন্ ইস্রায়েলীয়গুনোরে লোড়েলাক্। ফরৌণর বেক্ ঘোড়াগুন, রথ্তানি আর ঘোড়াবাহিনীগুন তারার্ পিজে পিজে বড়গাঙ ভিদিরে যেইনে চোমেলাক্। 24বেন্যেপোত্যে লগেপ্রভু মেঘ আর আগুনো থুনি ভিদিরেত্তুন্ মিসরীয় সৈন্যদলুনো ইন্দি রিনি চেলঅ আর তারা ভিদিরে এক্কান্ যাগুলুক্ বাজেই দিলো। 25ইয়েনিবাদেয়ো তে রথ্তানর্ চাক্কাগুনো খুলি ফেলেল; সেক্কে রথ্তানি চালাদে তারার্ অমহদ দুখ্ ওইয়্যে। মিসরীয়গুনে সেক্কে কলাক্, “আঢঅ, আমি ইস্রায়েলীয়গুনোরে ইরি দিইনে ধেই যেই, কিত্তে লগেপ্রভুই ইস্রায়েলীয়গুনোর্ ওইনে মিসরীয়গুনোর্ বিরুদ্ধে যুদ্ধো গোজ্যে।”
26সেক্কে লগেপ্রভু মোশিরে কলঅ, “বড়গাঙ উগুরে তর্ আত্তান্ বাবেই দে। সেক্কে পানিগান্ আরঅ ফিরি এইনে মিসরীয়গুনো উগুরে আর তারার্ রথ্তানি আহ্ ঘোড়াবাহিনী উগুরে পড়িবো।” 27সেক্কে মোশি তাঁর্ আত্তান্ বড়গাঙ উগুরে বাবেই দিলো। বেন্যেপোত্যে বড়গাঙ পানিগান নিজো জাগাত্ ফিরি এলঅ। মিসরীয়গুনে সেক্কে ডেনে-বাঙে দাবাদেদি গত্তন্, মাত্তর্ লগেপ্রভু তারারে বড়গাঙর্ তুবোলে ভাজেই নেযেল। 28বড়গাঙ পানিগান ফিরি এইনে রথ আর ঘোড়াবাহিনীগুনোরে, অত্তাৎ ইস্রায়েলীয়গুনোর্ পিজেদি লোড়েই এচ্ছ্যে ফরৌণর্ গোদা সৈন্যদল্লোরে ডুবেই দিলো। তারাত্তুন্ একজন্অ আর বাঁজি ন-রলাক্। 29মাত্তর্ ইস্রায়েলীয়গুনে বড়গাঙর্ সংমোধ্যেদি শুগুনো পথ ধুরিনেই যেয়োন্দোই। তারার্ ডেনে-বাঙেদি পানিগান্ দেবাল ধোক্ক্যেন ওই ঠিয়্যেই রলঅ। 30লগেপ্রভু এধোক্ক্যেনগুরি সেদিন্যে মিসরীয়গুনোর্ আঢত্তুন্ ইস্রায়েলীয়গুনোরে উদ্ধোর্ গুরিলো। ইস্রায়েলীয়গুনে মিসরীয়গুনোর্ মরাকিয়্যেনি বড়্গাঙর্ পারত্ পড়ি থাগদে দেগিলাক্। 31লগেপ্রভু মিসরীয়গুনোর বিরুদ্ধে তাঁর্ যে দাঙর্ খেমতাগান্ বেবহার্ গুরিলো সিয়েন্ দেগিনেই ইস্রায়েলীয়গুনোর মনত্ তা উগুরে এক্কান্ দর্বুগ্ জাগি উদিলো। তারা লগেপ্রভু আর তাঁর্ চাগর্ মোশি উগুরে পুরো বিশ্বেজ্ রাগেইনে যাহ্ ধুরিলাক্।
Currently Selected:
যাত্রা 14: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
