যাত্রা 15
15
মোশি আর মরিয়মর্ গান
1ইয়েন পরেদি মোশি আর ইস্রায়েলীয়গুনে লগেপ্রভুর নাঙে এই গীদ্তো গেলাক্:
মুই লগেপ্রভুর নাঙে গীদ্ গেইম্,
কিত্তে মানেইয়ুনোর চোগোত্ তাঁর্ মহিমাগান্ বাড়িলো।
ঘোড়া আর ঘোড়াবাহিনীর্ দলুনোরে
তেয়ই বড়গাঙর্ পানিত্ ফেলেই দিলো।
2লগেপ্রভুই মর্ বল্, তেয়ই মর্ গীদ্;
মর্ উদ্ধোরান্ তা ভিদিরে আঘে।
লগেপ্রভুই মর্ গোজেন;
মুই তাঁরই বাঈনী গরেদে-গীদ্ গেইম্।
তে মর্ বাবার্ গোজেন;
মুই তাঁর মহিমার্ গীদ্ গেইম্।
3তা নাঙান লগেপ্রভু, তে বীর যোদ্ধা।
4ফরৌণর রথ আর সৈন্যদলুনোরে
তেয়ই বড়গাঙ পানিত্ ফেলেই দিলো;
ফরৌণর বেঈ লোইয়্যে কাম্গুরিয়্যেগুনোর্ দল্লো
লোহিত সাগরত্ ডুবিনেই মুরিলাক্।
5তারা গভীন্ পানিত্ নাঢা গেলাক্
আর পাত্তর ধোক্ক্যেন গুরি সাগর তলাত্ ডুবি গেলাক্।
6ও লগেপ্রভু, খেমতায়্ দাঙর্ তর্ সেই ডেন্ আত্তান্,
অয় সেই ডেন্ আত্তানে শত্রুগুনোরে শেজ্ গুরিলো।
7যিগুনে তর্ বিরুদ্ধে ঠিয়্যেলাক্
তর্ দাঙর্ মহিমায়
তুই তারারে তলেদি ফেলেই দিলে;
তর্ পাদেয়্যে জোল্জোল্যে রাগ্কানে
দার্বো ধোক্ক্যেন তারারে পুড়ি ফেলেল।
8তর্ নিশ্বেজর্ থেলায়
পানিগান্ এগত্তর্ ওই উদিলো।
তুবোল্লোই ভোজ্যে বেক্ পানিগান
খুদো ধোক্ক্যেন ওইনে ঠিয়্যেই গেলঅ,
আর তলা ন-পেইয়্যে পানিগান্ জমা অলঅ সাগরর্ বুগোত্।
9শত্রুবো কলঅ, মুই তারারে লোড়েম্, ধুরি ফেলেম
আর তারার্ পযাপিরানি ভাগ গুরি নেযেম্;
মুই নিজোরে ফেলেং ফেলেং গুরিম সেই বেক্ পযাপিরানিলোই।
মুই লাম্বা ছুড়িলোই তারারে লোড়েম।
10মাত্তর্ তুই ফুন্ দিইনে বোইয়্যের্ দিলে,
আর সাগরানেয়ো তারারে ঢাগি ফেলেল।
তারা মরং পানি তলাত্ শিজে ধোক্ক্যেন গুরি ডুবি গেলাক্।
11“ও লগেপ্রভু,
দেবেদাগুনো ভিদিরে কন্না আঘে তঅ ধোক্ক্যেন্?
কন্না আঘে তঅ ধোক্ক্যেন এমন্ পবিত্রতালোয় দাঙর্
আর মহিমালোই দর্গরেপারা?
এধোক্ক্যেন আমক্ কাম গুরিরার্ বল্ কার্ আঘে?
12তর্ ডেন্ আত্তান্ তুই বাড়েই দিলে,
আর পিত্থিমীগানে তারারে গিলি ফেলেল।
13তর্ অমহদ কোচ্পানায়্ তুই যিগুনোরে ছাড়েই আনিলে
তারারে তুয়ই চালেই নেযেবে।
তর্ নিজোর্ বল্লোই তর্ পবিত্র ঘরত্
তুই তারারে চালেই আনিবে।
14সেই কধানি শুনিনেই অন্য জাদ্তুনে জদবদে দরে গির্গিরেবাক্,
আর পলেষ্টীয়গুনোর্ মনানি অমহদ দুগে নরম্ অবঅ।
15-16ইদোমীয় সর্দারুনে দরে ওলোমত্ত্য অবাক্;
মোয়াবীয় নেতাগুনে দরে গির্গিরেবাক্,
আর অমহদ দর্বুগোত্ পড়িনে
কনানীয়গুনে সাহস্ আড়েবাক্।
ও লগেপ্রভু, তর্ মানেইয়ুনোর্ যানা
থুম ন-অনা সং,
তর্ ছাড়ি নেযেয়ে মানেইয়ুনোর্ যানা
থুম ন-অনা সং
তর্ দাঙর্ খেমতার্ মুজুঙোত্
সেই বেক্ জাদ্তুনে পাত্তর্ ধোক্ক্যেন পড়ি থেবাক্।
17তুয়ই তর্ মানেইয়ুনোরে আনিনে চারা ধোক্ক্যেন গুরি
লাগেই দিবে তর্ নিজোর্ মুড়োবোত্।
ও লগেপ্রভু, তর্ নিজোর আত্তোই গোজ্যে
সিয়েনই তর্ থেবার্জাগা;
ও প্রভু, তর্ নিজো আত্তোই গোজ্যে
সিয়েনই সেই সুদ্ধো-সাংগ জাগায়ান্;
18ও লগেপ্রভু, যুগে যুগে তুয়ই রাজগিরি গুরিবে।”
19ফরৌণর বেক্ ঘোড়াগুন, রথ্তানি আর ঘোড়া বাহিনীগুনে যেক্কে বড়গাঙ ভিদিরে চোমেলাক্ সেক্কে লগেপ্রভু বড়গাঙর্ পানিগান তারা উগুরেদি ফিরেই আনিলো। মাত্তর্ ইস্রায়েলীয়গুনে বড়গাঙর্ সংমোধ্যেদি শুগুনো জাগান উগুরেদি আঢি আঢি যেইয়োন্।
20হারোণর বোন্নো মরিয়মে এলদে এক্কো মিলে-নবী। তে চিগোন্ ঢুল্ আঢত্ নেযেল, আর তার্ পিজে পিজে অন্য মিলেগুনেয়ো চিগোন্ ঢুল্ আঢত্ নেযেনে নাচ্যে নাচ্যে নিগিলি এলাক্।
21মোশির্ গীদ্তোর্ জোবত্ মরিয়মে এই গান্নো গেলঅ;
“তুমি লগেপ্রভুর্ নাঙে গীদ্ গঅ,
কিত্তে মানেইয়ুনোর চোগোত্ তাঁর্ মহিমাগান্ বাড়িলো।
ঘোড়া আর ঘোড়াবাহিনীগুনোর দলুনোরে
তেয়ই ফেলেই দিলো বড়গাঙ পানিত্।”
পানির্ ব্যবস্থা
22পরেদি মোশি লোহিত সাগরত্তুন্ ইস্রায়েলীয়গুনোরে নেযেল। তারা পত্তমে শূর নাঙে এক্কান ধূল্যেচর চাগালাত্ গেলাক্। সেই ধূল্যেচর চাগালাত্ তিন দিন সং ঘুরি ঘুরি তারা কনজাগাত্ পানি ন-পেলাক্। 23পরেদি তারা মারা নাঙে এক্কো ধূল্যেচর চাগালা ইধু লুমিলাক্, মাত্তর্ তিদে বিলিনে সিধুগোর্ পানিগান তারা হেই ন-পারিলাক্। সেনত্তে সেই জাগানর্ নাঙ্ ওইয়্যেদে মারা (যিয়েনর্ ভেদ্তান্ “তিদে”)। 24সেক্কে মানেইয়ুনে তোস্যে পেইনে মোশিরে কলাক্, “ইক্কিনে আমি হেবার্ পানি কুদু পেবং?”
25এই কধাগান্ শুনিনে মোশি যেইনে লগেপ্রভু ইধু কানাকুদি গরা ধুরিলো। তে মোশিরে এক্কো গাজ্ দেগেই দিলো। মোশি সিবে পানিত্ ফেলে দিলো আর সেই পানিগান হেই পারেপা অলঅ।
লগেপ্রভু সিয়েনত্ তারারে জগা চেলঅ আর তারাত্তেই এক্কান সুদোম আর আইন থিদেবর্ গুরিলো। 26তে কোইয়্যেদে, “তুমি যুদি তমা গোজেন লগেপ্রভুর্ কধা মানিনে তা চোগেদি যিয়েন্ দোল্ সিয়েনোই গরঅ আর তাঁর্ উগুমোত্ কান্ পাদঅ আর তাঁর্ দিয়্যে বেক্ সুদোমানি পালন্ গরঅ, সালে মিসরীয়গুনো উগুরে মুই যেদক্কানি পীড়ে আন্যং সিয়েনি তমা উগুরে ন-আনিম। মুই লগেপ্রভু তমারে সুগেই রাগেম্।”
27ইয়েন পরেদি তারা এলীম নাঙে এক্কান ধূল্যেচর ইধু লুমিলাক্। সিয়েনত্ বারোবো উইফুদ্ আর সত্তুর্বো খাজোর্ গাজ্ এলাক্। সেই উইফুদর্ পানিগান কায়কুরে তারা তাম্বুলান্ টাঙেলাক্।
Currently Selected:
যাত্রা 15: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
