যাত্রা 16
16
মান্না আর ভারুই পেক্
1ইস্রায়েলীয়গুনোর্ দল্লো এলীমত্তুন্ আরঅ যানা আরাম্ভ গুরিলাক্। মিসর্ দেজত্তুন্ নিগিলি এজানার্ পরেন্দি দ্বিমাজর্ পনর দিনোত্ তারা সিন ধূল্যেচর-বামত্ যেইনে লুমিলাক্। এই জাগায়ান্ এলঅ এলীম আর সিনাই মুড়োবোর সংমোধ্যে। 2সিন ধূল্যেচর-চাগালাত ইস্রায়েলীয়গুনোর্ গোদা দল্লো মোশি আর হারোনর বিপক্ষে নানান্ কধা কুয়ো দোজ্যন্। 3তারা তাঁরারে কলাক্কে, “মিসর দেজত্ লগেপ্রভুর্ আদত্ আমি কিত্যেই ন-মুরিলোং। সিদু আমি য়েরার্ পিলেগুন মুজুঙোত্ থোইনে পেট ভরন্ পিদে-য়েরা খেদং। আমার এই পুরো দল্লোরে ন-হাবেনে মারে ফেলেবাত্তেই তুমি আমারে এই ধূল্যেচর-বামর্ ভিদিরে আন্য।”
4সেক্কে লগেপ্রভু মোশিরে কলঅ, “মুই এধোক্ক্যেন গুরিম্ যেনে তমাত্যেই স্বর্গত্তুন্ ঝড় ধোক্ক্যেন গুরি হেবার্ জিনিস্ ঝুরি পড়ে। মানুচ্চুনে দিন্মাগেনে বারেন্দি যেইনেই সিয়োত্তুন্ বানা সে দিনোর্ খানাগান কুরেই আনিবাক্। তারা মর্ উগুমো ধোক্ক্যেন চুলিবাক্ কিনা সিয়েন মুই তারারে যগা চেইম্। 5সাপ্তায় ছদিনোত্ তারা যেনে অন্য দিনোত্তুন্ দ্বিগুন্ কুড়েই আনিনে হেবার্ জিনিস্ বানেই লন্।”
6-7সেক্কে মোশি আর হারোণে বেক্ ইস্রায়েলীয়গুনোরে কলাক্কে, “লগেপ্রভুর্ বিপক্ষে তুমি যেদক্কানি কধা কোইয়ো সিয়েনি তে শুন্যে বিলিই এচ্চ্যে সাজোন্যা অক্তত্ তুমি জানি পারিবাদে, সেই লগেপ্রভুই মিসর্ দেজত্তুন্ তমারে নিগিলেই আন্যে, আর তার্ মহিমাগান তুমি কেল্যে বেন্যে দেগিবা। আমি যে কন্না, তুমি আমা বিপক্ষে এদক্কানি কধা কত্তে?” 8মোশি আরঅ কলদে, “সাজোন্যা অক্তত্ যেক্কে লগেপ্রভু তমারে য়েরা দিবো আর বেন্যে অক্তত্ দিবো নানান্ বাবোত্যা পিদে সেক্কেয়ই তুমি বুঝিবাদে, লগেপ্রভুই তমারে মিসর দেজত্তুন্ নিগিলেই আন্যে। তাঁর্ বিরুদ্ধে তুমি যেদক্কানি কধা কোইয়ো সিয়েনি বেক্কানি তে শুন্যে। আমি কন্না? এদক্কানি কধা তুমি আজলে আমা বিরুদ্ধে ন-কর্, কোইয়োদে লগেপ্রভুর্ বিরুদ্ধে।” 9সে পরেন্দি মোশি হারোণর মাধ্যমে বেক্ ইস্রায়েলীয়গুনোরে এই কধাগান্ কবাত্তে কলঅ, “লগেপ্রভু তাঁর্ বিরুদ্ধে তমার নানান্ বাবোত্যা কধা কদে শুন্যে, সেনত্তেই তুমি তাঁর্ মুজুঙোত্ উজেই যঅ।”
10হারোণে যেক্কে ইস্রায়েলীয়গুনো ইদু কধা কলঅ সেক্কে তারা ধূল্যেচর-চাগালা ইন্দি রিনি চেলাক্; আর আমক্ অবার্ ইয়েন, সিয়েনত্ মেঘ ভিদিরে তারা লগেপ্রভুর্ মহিমা দেগিলাক্। 11সেক্কে লগেপ্রভু মোশিরে কলঅ, 12“ইস্রায়েলীয়গুনে মর্ বিরুদ্ধে যেদক্কানি কধা কদন্ সিয়েনি মুই শুন্যং। তারারে এই কধাগান্ কোই দুয়ো, তারা সাজোন্যা অক্তত্ য়েরা হেবাক্ আর বেন্যে মাদান হেবাক্ পেট ভরন্ পিদে। সেক্কে তারা জানি পারিবাক্, মুই লগেপ্রভু তারার্ গোজেন।”
13সাজোন্যা অক্তত্ নানান্ বাবোত্যা ভারুই পেক্ এইনে তারার্ তাম্বুলোর-চাগালাগান্ ঢাগি ফেলেলাক্। বেন্যে অক্তত্ দেগা গেলদে চাগালার্ চেরোকিত্তে শিরোপানিয়ে নাঢা যেইয়্যে। 14যেক্কে সেই শিরো পানিগানি শুগেই গেলঅ সেক্কে মাদিত্ মাছঅ চগলা ধোক্ক্যেন পাদল্ এক্ বাবোত্য জিনিস্ দেগা গেলঅ। সিয়েনি চাদে দেগা গেলদে পড়ি থেইয়্যে বরফ ধোক্ক্যেন। 15সিয়েনি দেগিনেই ইস্রায়েলীয়গুনে একজন আরেক্জনরে কলাক্, “ইগুন্ কি?” ইগুন্ যে কি, সিয়েন্ তারা ন-জানিদাক্।
সেক্কে মোশি তারারে কলদে, “ইগুনোই সেই রুটি যিগুন্ লগেপ্রভু তমারে হেবাত্তে দিয়্যে। 16লগেপ্রভু তমারে এই উগুমান্ দিয়্যে, পত্তিজনে যেন তার্ পরিবারর্ দরকার্ মজিম্ কুড়োন্। তাম্বুলর্ পত্তিজনত্তেই যেন এক ওমর (পেরায়্ দ্বি লিটার) গুরি কুড়ো অয়্।” 17ইস্রায়েলীয়গুনে সিয়েনোই গুরিলাক্। কয়েকজনে বেশ্ কুড়েলাক্, কয়েকজনে কম কুড়েলাক্। 18মাত্তর্ ওমর মাবত্ দেগা গেলদে, যিগুনে বেশ্ কুড়েয়োন্ তারার্ বেশ্ ন-অলঅ আর যিগুনে কম কুরেয়োন্ তারার্ কম্ ন-পড়িলো। পত্তিজনে পরিবারর্ দরকার্ মজিম্ সিয়েনি কুড়েলাক্।
19সে পরেদি মোশি তারারে কলঅ, “বেন্যেত্যে তুমি ইয়েনির্ কিজু ন-রাগেয়ো।” 20মাত্তর্ কয়েকজনে মোশির কধা ন-শুনিনে বেন্যে মাদানত্যে কিজু রাগেই দিলাক্। সেক্কে সিয়েনিত্ পুগেই ধুরিলাক্ আর পঁজাবাজ্ ওই গেলঅ। এ অবস্থা দেগিনে মোশি তারা উগুরে রাগে জুলি উদিলো। 21মানুচ্চুনে দিন্মাগেনে বেন্যেঅক্তত্ যার্ পরিবারত্ যেত্তমান্ লাগে সেত্তমান্ কুড়েই আনিদাক্। মাত্তর্ রোদ বেশ্ অলে সিয়েনি গুলি যেদঅ।
22সাপ্তার্ ছয় দিনোত্ তারা ডবল্ গুরি, অত্তাৎ দ্বি ওমর গুরিনে পত্তি জনত্তে কুড়েলাক্, আর ইস্রায়েলীয়গুনোর্ নেতাগুনে এইনে সেই কধাগান্ মোশিরে জানেলাক্। 23সেক্কে মোশি তারারে কলদে, “ইয়েন্ লগেপ্রভুর্ কধা। এজেত্তে কেল্যে জিরেবার্ দিন, লগেপ্রভুর পবিত্র জিরেবার্দিন। সেনত্তেই যেদক্কানি সিঁগি নিবার নেযঅ আর যেদক্কানি উজিবার্ গুরিবার উজিবার্ গুরি নেযঅ; বাদ্বাগীগানি তার্ কেল্যে বেন্যেত্তেই থোই দুয়ো।” 24মোশির্ উগুম মজিম তারা বেন্যে মাদানত্যেই বাদবাগীগানি থোই দিলাক্। সেদিন্যে সিয়েনিত্ পঁযাবাজঅ ন-অলঅ, পুগেয়ো ন-ধুরিলাক্।
25মোশি সেক্কে কলঅ, “এচ্চ্যে তুমি সিগুনোই হঅ কিত্তে এচ্চ্যে লগেপ্রভুর্ বেঈ লোইয়ে জিরেবার্ দিন। এচ্চ্যে তুমি মাদঅ ইদু সিয়েনি ন-দেগিবা। 26তুমি সাপ্তায়্ ছয়দিন সিয়েনি কুড়েবা মাত্তর্ সাত দিনোত্ সিয়েনি ন-পেবা, কিত্তে সেদিন্যে অলঅ ঝিরেবার্ দিন।”
27তো সাত্ দিনোত্ কয়েকজন মান্জ্যে সিয়েনি কুড়েবাত্যেই বারেদি গেলাক্, মাত্তর্ কিচ্চু ন-পেলাক্। 28সেক্কে লগেপ্রভু মোশিরে কলঅ, “আর কয়দিন তুমি মর্ উগুম্ আর হুকুম্ ন-মানিনেই চুলিবা? 29চঅ, তমাত্তে জিরেবার্ এই সুদোমান্ তমা লগেপ্রভু গোজ্যে। সেনত্তে ছঅ দিনোত্ তে দ্বি দিনোর্ হানা তমাত্তে যুগেলেই দের্। সেনে সাত দিনোত্ তুমি কনজনে ঘরর্ বারেদি ন-যেবা, ভিদিরেই থেবা।” 30সেনত্তে মানুচ্চুনে সাত্ দিনোত্ জিরেলাক্।
31ইস্রায়েলীয়গুনে সে হানাগানরে কদাক্ মান্না (যিয়েনর্ ভেদ্তান্ সিগুন্ কি?)। ইগুনোর্ চেঙেরাঙান্ এলঅ বাগোর্ পাদা বিজি ধোক্ক্যেন আর চাদে ধুব্; তার্ সুয়োত্তান্ এলঅ মধু দিয়্যে পিদে ধোক্ক্যেন। 32পরেদি মোশি কলঅ, “লগেপ্রভুর উগুম্ গোজ্যেদে যেনে তুমি তমা বংশধরুনোত্ত্যেই এক ওমর পরিমাণ মান্না তুলি রাগঅ, যেনে তারা দেগন্ লগেপ্রভু মিসর দেজত্তুন্ তমারে নিগিলেই আনিবার্ পরেদি ধূল্যেচর বামত্ কি হেবার্ জিনিস্ তমারে হেবাত্যে দিয়্যে।”
33মোশি হারোণরে কলঅ, “তুই এক্কো পিলেলোই এক ওমর মান্না নেযেনে লগেপ্রভুর্ মুজুঙোত্ রাগা যেনে বংশর্ পর্ বংশ ধুরিই সিয়েন থায়।” 34সেই মান্নাগান্ যেনে বংশর পর্ বংশ ধুরিনে তুল্যে থায় সেনত্তে হারোণে যেরেদি মোশিরে দিয়্যে লগেপ্রভুর্ উগুম্ মজিম্ সাক্ষ্য-সুন্দুগো মুজুঙোত্ সিয়েনি নেযেইনে রাগেল। 35মান্জে বজত্তি গরন্ এধোক্ক্যেন এক্কান জাগাত্, অত্তাত্ কনান দেজর্ দুঝিত্ ন-এজানা সং ইস্রায়েলীয়গুনে চোল্লিশ্ বজর্ ধুরিনে এই মান্নাগান হেইয়োন।
36এক ওমর মাপ অলঅ এক কেজি আস্তোশ গ্রাম সমান।
Currently Selected:
যাত্রা 16: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
