যাত্রা 4
4
মোশিরে গোজেনে খেমতা দিলো
1এ কধাগানর্ জোবত্ মোশি কলঅ, “মাত্তর্ যুদি ইস্রায়েলীয়গুনে মরে বিশ্বেজ্ ন-গরন আর মঅ কধানি ন-শুনোন্? তারা দঅ কোই পারিদাক্, ‘না, লগেপ্রভু তরে দেগা নঅ-দে।’” 2সেক্কে লগেপ্রভু তারে কলঅ, “তঅ আঢত্ সিবে কি?”
তে কলঅ, “এক্কো লুদিক্।”
3লগেপ্রভু কলঅ, “সিবে মাদিত্ ফেলা।”
মোশি লুদিক্কো মাদিত্ ফেলাদে ন-ফেলাদে সিবে এক্কো সাপ ওই গেলঅ। সেক্কে মোশি সিবে মুজুঙোত্তুন্ ধাবা দিইনে ধেই গেলঅ। 4মাত্তর্ লগেপ্রভু মোশিরে কলঅ, “তঅ আত্থান্ বাবেইনে সিবে লেজ্সান্ ধর্।” মোশি সিয়েন গুরিবাত্তে যেইনে তা আঢত্ আরঅ সিবে লুদিক্ ওই গেলঅ।
5সে পরেদি লগেপ্রভু কলঅ, “তুই ইয়েন গুরিবে যেনে তারা বিশ্বেজ্ গরন্, তারার্ পুরোণি মানুচ্ অব্রাহাম, ইস্হাক আর যাকোবর্ গোজেন লগেপ্রভু ঘেচ্চেক্গুরি তরে দেগা দিয়্যে।”
6লগেপ্রভু তারে আরঅ কলঅ, “তঅ আত্থান্ ফারত্ দুরি উগুরেদি কাবড় ভাজ ভিদিরে থঅ।” মোশি সিয়েন গুরিলো। মাত্তর্ যেক্কে তে আত্তান্ নিগিলেই আনিলো সেক্কে দেগা গেলঅ ফারাঙিলোই তা আত্তান উগুরে যেন বরফ ধোক্ক্যেন ধুব্ ওইয়্যে। 7সেক্কে লগেপ্রভু কলঅ, “তঅ আত্থান আরঅ সিয়েনত্ রাগা।” তে সিয়েন গুরিলো। যেক্কে তে আত্থান নিগিলেই আনিলো সেক্কে দেগা গেলঅ তা আত্থান কিয়্যের্ অন্য চামানি ধোক্ক্যেন গম্ ওই যেইয়্যে।
8সেক্কে লগেপ্রভু কলঅ, “যুদি তারা তরে বিশ্বেজ্ ন-গরন্ বা পত্তম চিহ্নোগানর্ কনঅ দাম ন-দুয়োন্ সালে অয়ত দ্বিলম্বরান্ তারা বিশ্বেজ্ গুরিবাক্। 9মাত্তর্ তারা যুদি এ দ্বিয়ানর্ এক্কান বিশ্বেজ্ ন-গরন বা তঅ কধানি ন-শুনোন্ সালে তুই নীল গাঙত্তুন্ কিজু পানি তুলি আনিনে মাদি উগুরে ঢালি দিবে। সেক্কে মাদি উগুরে সে পানিগান্ লো ওই যেবঅ।”
10মোশি লগেপ্রভুরে কলঅ, “মাত্তর্ প্রভু, মুই কনঅ দিন গমেডালে কধা কোই ন-পারং। আগেয়ো ন-পারং আর তর্ এ চাগর্বো লগে তুই কধা কনার্ পরেন্দিয়ো ন-পারঙর্। মঅ মুয়োনত্ কধানি বাঁজি থায়, মঅ ঝিলান্ ঘুয়োর্।”
11মাত্তর্ লগেপ্রভু তারে কলঅ, “মান্জ্যর মুয়োনি কন্না বানেই দিয়্যে? কন্না তারে বুব্, বহ্রা, চোখ কান্ গোজ্যে? আর কন্না বা তারে চোগোদি দেগিবার্ খেমতাগান্ দিয়্যে? সিবে কি মুই লগেপ্রভু নয়? 12তুই এবেরা যাহ্। মুই নিজেই তরে কধা কবাত্তে বল্ দিম আর যিয়ান্ কবার্ সিয়ান তরে শিগেই দিম।”
13জোবত্ মোশি কলঅ, “ও প্রভু, মুই কোজোলী গরঙর্, অন্য কনজনরে দিইনে তুই এ হবরান্ পাধেই দে।”
14এ কধাগান শুনিনে লগেপ্রভু মোশি উগুরে রাগে জুলি উদিলো। তে কলঅ, “তর্ ভেই লেবীয় হারোণে কি নেই? মুই হবর্ পাং তে অমহদ গমেডালে কধা কোই জানে। তে তঅ লগে দেগা গুরিবাত্তে এজের্। তরে দেগিলে তে অমহদ হুজি অবঅ। 15তুই যেক্কে তা লগে কধা কবে সেক্কে তারে কোই দিবে কি কুয়ো পুড়িবো। মুই তমা দ্বিজনরে কধা কবাত্যে বল্ দিম আর কি গরা পুড়িবো সিয়েন তমারে শিগেই দিম। 16তমার্ ওইনে হারোণে মানুচ্চুনো লগে কধা কবঅ, যেনে তা মুয়োন তমা মুয়োনি আর তুয়ই যেনে তার্ গোজেন। 17তর্ এ লুদিক্কো তুই আঢত্ গুরি নেযেবে আর সিবেলোই সে বেক্ আমক্ অবার কামানি গুরিবে।”
মোশির মিসর দেজত্ যানা
18ইয়েন পরেদি মোশি তা শুয়োর্ যিথ্রো ইধু ফিরি যেইনে তারে কলঅ, “মিসর দেজত্ মঅ কুদুম্মোগুনো ইধু মরে ফিরি যেবাত্তে অনুমতি দুয়ো। মুই যেইনে দেগিবাত্তে চাং তারা এজঅ বাঁজি আগন্ নাহি।”
যিথ্রো মোশিরে কলঅ, “ঠিক্ আঘে যঅ, তমার্ ভালেদি ওক্।”
19মিদিয়ন দেজত্ থাগদে লগেপ্রভু মোশিরে কোইয়্যে, “তুই ইক্কিনে মিসর দেজত্ ফিরি যাহ্। যিদুক্কুন্ মান্জ্যে তরে মারে ফেলেবাত্তে চেইয়োন তারা মুরি যেইয়োন্।”
20সেক্কে মোশি তা মোক্কো আর পূয়োগুনোরে এক্কো গাধা পিদিত্ বোজেল আর তারারে লোইনে মিসর দেজ মোক্যে ফিরিলো। গোজেনর্ সে লুদিক্কোয়ো তে আঢত্ গুরি নেযেল। 21লগেপ্রভু মোশিরে কলঅ, “মুই তরে যেদক্কানি আমক্ অইদে কাম্ গুরিবার্ খেমতা দুয়োং তুই মিসর্ দেজত্ ফিরি যেইনে ফরৌণ মুজুঙোত্ সিয়েনি বেক্কানি গুরিবে। মাত্তর্ মুই তা মনান্ এন্ চিৎনপুজ্যে গুরি দিম্ যেনে তে মানুচ্চুনোরে যেবাত্তে ন-দিবো। 22সে পরেদি তুই ফরৌণরে কবে, লগেপ্রভু কোইয়্যে, ‘ইস্রায়েল মর্ পত্তম্ পূয়োবো। 23মরে উবোসনা গুরিবাত্তে মর্ পত্তম পূয়োবোরে যেবার অনুমতি দিবাত্যে মুই তরে কোইয়োং। মাত্তর্ তুই তারে যেবাত্তে অনুমতি ন-দুয়োচ্ বিলি মুই তর্ পত্তম পূয়োবোরে মারে ফেলেবাত্তে যাঙর্।’ ”
24মিসর দেজত্ যেবার্ পদথ্ এক রেত্ কাদেবার্ জাগানত্ লগেপ্রভু মোশিরে মারে ফেলেবাত্তে তা মুজুঙো-মুজুঙি অলঅ। 25সেক্কে সিপ্পোরা এক্কো ধারেয়্যে পাত্তর্লোই তা পূয়োবোর্ চুনুগুলোবোর্ মুজুঙেদি চামান্ কাবিলো। সে পরেদি সিয়েন মোশি টেঙত্ বাজেইনে কলঅ, “তুই লো-ফেলেইনে পেইয়্যে মর্ নেক্।” 26সেক্কে লগেপ্রভু মোশিরে মাপ্ দিলো। চুনুগুলোবোর মাদাগান্ কাবানার পৌইদ্যেনে সিপ্পোরা সে কধাগান্ কোইয়্যে।
27ইয়েন পরেদি লগেপ্রভু হারোণরে কলঅ, “ধূল্যেচর-চাগালাত্ যেইনে তুই মোশি লগে দেগা গর্।” সেক্কে তে গেলঅ আর গোজেন মুড়োবোত্ মোশিরে দেগিনে তারে চুমিলো। 28লগেপ্রভু মোশিরে যিয়ান কবাত্তে পাদেয়্যে সিয়ান মোশি হারোণরে জানেল। ইয়েনিবাদে যেদক্কানি আমক্ অইদে কাম্ গুরিবার্ উগুম্ লগেপ্রভু তারে দিয়্যে সিয়ানিয়ো মোশি হারোণরে বুঝেইনে কলঅ।
মিসর দেজত্ মোশি আর হারোণে
29সে পরেদি মোশি আর হারোণে মিসর দেজত্ যেইনে বেক্ ইস্রায়েলীয় বুড়ো নেতাগুনোরে একলগে এগত্তর্ গুরিলাক্। 30লগেপ্রভু মোশিরে যেদক্কানি কধা কোইয়্যে সিয়ানি বেক্কানি হারোণে তারারে জানেল আর মানুচ্চুনো মুজুঙোত্ সে আমক্ অইদে কামানি গুরি দেগেলাক্। 31সেক্কে মানুচ্চুনে বিশ্বেজ্ গুরিলাক্। তারা যেক্কে শুনিলাক্, লগেপ্রভু ইস্রায়েলীয়গুনোর্ দুখ্কানি দেক্ক্যে আর তারা কধানি চিদে গোজ্যে সেক্কে তারা মাদিত্ মাঢা নিগিরিনে লগেপ্রভুরে তারার্ মনর্ ভোক্তি জানেলাক্।
Currently Selected:
যাত্রা 4: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
