পত্থম 27
27
ইস্হাক যাকোবরে বর্ দিলো
1বুড়ো বয়জত্ ইস্হাকে চোগেদি রিনি চেবার খেমতাগান এদক্ কুমি গেলদে যে, যেরেন্দি তে আর কিচ্ছু ন দেগিদো। একদিন্যে তে তার দাঙর্ পুয়ো এষৌরে ডাগিনে কলঅ, “মর্ বাবা।”
এষৌ জোবত্ কলঅ, “এইয়্যে দঅ মুই।”
2ইস্হাকে কলঅ, “চাহ্, মুই দঅ বুড়ো ওই যেয়োং; কমলে যে মুরি যাং সিয়েন কোই ন-পারং। 3তুই এক কাম্ গর্; তঅ আত্যেরান্, অত্তাৎ শেল্-ধনু লোইনে শিগের্ গুরিবাত্তে মাঢত্ যাহ্ আর মত্তে কিজু শিগের্ গুরি আন্। 4সে পরেদি মুই হুজি অং পারা দোল্ হানা বানেইনে মইধু আন্, যেনে সিয়েন্ হেইনে মুরিবার আগেদি তরে বর্ দি যেই পারং।”
5ইস্হাকে যেক্কে তা কোচ্পানার পুয়ো এষৌ লগে কধা কর্ সেক্কে রিবিকা সিয়েনি শুনিলো। সেনত্তে এষৌ যেক্কে শিগের্ গুরিবাত্তে গেলঅ, 6সেক্কে রিবিকায়ো তা কোচ্পানার পুয়ো যাকোবরে কলঅ, “চাহ্, মুই শুনিলুং, তঅ বাবে তর্ ভেই এষৌরে কলঅ, 7‘তুই মত্তে শিগের্ গুরি আনিনে কিজু গম্ হানা যুক্কুলো। সিয়েন্ হেইনে মুই মুরি যেবার আগেদি লগেপ্রভুরে সাক্ষী রাগেনে তরে বর্ দি যেবাত্তে চাং।’ 8ও মর্ বাবা, মুই তরে ইক্কিনে যিয়েন গুরিবাত্তে কোম্ তুই ঠিগ্ সিয়েনোই গর্। 9তুই ইক্কিনে যেইনে ছাগল পালত্তুন্ দ্বিবে পক্তা-মক্তা ছঅ আনিনে মরে দেগি। মুই সিগুনোরে তঅ বাবে হুজি অয়্দে ধোক্ক্যেন গম্ হানা রানি দিম্। 10পরেদি তুই দঅ সিয়েন্ তঅ বাবঅ ইধু নেযেবে যেনে সিয়েন্ হেইনে তে মুরি যেবার আগেদি তরে বর্ দে।”
11সেক্কে যাকোবে তা মাবোরে কলঅ, “মাত্তর্ মঅ ভেই এষৌ কিয়্যেগান দঅ কেশ্দলা, আর মঅ কিয়্যেনত্ দঅ কেশ্ নেই। 12বাবা অয়্ত মঅ কিয়্যেগান আত্তোই বিজিরেব আর মনে গুরিবো মুই তা লগে বিগিদি গরঙর্। যেরেদি বর্ দেনার বদলে মুই নিজো উগুরে অভিশাপ্পান্ ডাগি আনিম্।”
13মাত্তর্ তা মা তারে কলঅ, “বাবা, তর্ সে অভিশাপ্পান্ মঅ উগুরে পোড়োক্। তুই বানা মঅ কধাগান শুন্ আর যেইনে দ্বিবে ছাগল ছঅ মরে আনি দে।”
14সেনত্তে যাকোবে যেইনে ছাগল ছঅ আনিনে তা মারে দিলো, আর রিবিকা যাকোব বাপ্পো খাইদ্যে ধোক্ক্যেন গম্ হানা রানি দিলো। 15সে পরেদি তে তা দাঙর্ পুয়োবোর্ বেগত্তুন্ গম্ কাবড়ান নেযেইনে তা চিগোন্ পুয়োবোরে উরেই দিলো; কাবড়ানি ঘরত্ এলঅ। 16যাকোব আঢত্ আর গত্তনাবোত্ কেশ্ ন-এলঅ সিয়োদোই তে ছাগল ছঅগুনোর চাম্ বাজেই দিলো। 17সে পরেদি নিজোর বানেয়্যে সে গম্ হানাগান আর পিদেগানি যাকোব আঢত্ দিলো।
18যাকোবে তা বাপ্পো ইধু যেইনে ডাগিলো, “বাবা।”
জোবত্ ইস্হাকে কলঅ, “এইয়্যে দঅ মুই। তুই কন্না, বাবা?”
19যাকোবে তা বাবরে কলঅ, “মুই তঅ দাঙর্ পুয়ো এষৌ। তুই মরে যিয়েনি গুরিবাত্তে কোইয়োচ্ মুই সিয়েনি গোজ্যং। ইক্কিনে তুই উদিনে বস্ আর শিগের্ গুরি আন্যে য়েরাগান্ হা যেনে তুই মরে বর্ দি পারচ্।”
20জোবত্ ইস্হাকে তা পুয়োবরে কলঅ, “বাবা, তুই কিঙিরিনে এদক্ যাদিমাদি শিগের্ পেয়োচ্?”
জোবত্ যাকোবে কলঅ, “তর্ গোজেন লগেপ্রভুর দোয়্যেই পেয়োং।”
21সেক্কে ইস্হাকে যাকোবরে কলঅ, “মইধু আয়্ বাবা, যেনে তঅ কিয়্যেত্ আত্ রাগেইনে মুই বুঝি পারঙ্ তুই হামাক্কায়্ মঅ পুয়ো এষৌ না কন্না।”
22যাকোবে তার বাপ্পো ইস্হাকর্ আরঅ কায়-কুরে গেলঅ। ইস্হাকে তা কিয়্যেত্ আত্ দি চেইনে কলঅ, “রঅবুয়ো যাকোবর্ ঠিগ্, মাত্তর্ আত্ দ্বিয়েন্ দঅ এষৌ ধোক্ক্যেন।”
23যাকোব আত্থান্ তা ভেই এষৌ ধোক্ক্যেন কেজে ভরা এলঅ বিলি ইস্হাকে তারে চিনি ন-পারিলো। যাওক্, তে তারে বর্ দিবাত্তে যুক্কোল অলঅ। 24তো তে তারে আরঅ পুযোর্ গুরিলো, “তুই কি হামাক্কায়্ মর্ পুয়ো এষৌ?”
যাকোবে কলঅ, “অয়্, বাবা।”
25ইস্হাকে কলঅ, “সালে তঅ শিগের্-গোজ্যে য়েরাগান্ কিজু মইধু আন্, যেনে মুই সিয়েন্ হেইনে তরে বর্ দি যেই পারং।”
সেক্কে যাকোবে ইস্হাক ইধু হানা নেযেল, আর্ ইস্হাকে সিয়োত্তুন্ হেলঅ। পরেদি যাকোবে তারে আংগুর-রস্ দিলো ইস্হাকে সিয়েন হেলঅ। 26সে পরেদি তার বাপ্পো ইস্হাকে তারে কলঅ, “বাবা, ইধু এইনে তুই মরে এক্কো চুমু দে।”
27সেক্কে যাকোবে কায়-কুরে যেইনে তারে চুমু দিলো, আর ইস্হাকে তার কিয়্যের কাবড়ান তুম্বাজ্ পেইনে তারে এবাবোত্যেগুরি বর্ দিলো;
ইবে দঅ মঅ পুয়োবোর তুম্বাস্চান,
লগেপ্রভু বর্ দিয়্যে ভুইয়ো ধোক্ক্যেন এ বাসচান্।
28গোজেনে যেন তরে আগাজ শিরোপানি দে,
আর তঅ ভুইয়ানিত্ বোল্বোল্যে ওক্;
সেক্কে তুই বোউত্ ফসল আর্ নুয়ো আংগুর-রস পেবে।
29নানান্ জাতিয়ে তরে সেবা গোত্তোক্,
আর বেক্ মানুচ্চুনে তরে জু জু জানাদোক।
তঅ গুট্টির মানুচ্চুনো ইধু তুই নেতা অ,
তারা তরে জু জু জানাদোক।
যিগুনে তরে অভিশাব্ দিবাক্
তারা উগুরে অভিশাব্ পোড়োক;
যিগুনে তরে বর্ দিবাক্
তারা উগুরে ভালেদি লামি এজোক্।
বর্ পেবাত্তে এষৌর কোজোলী
30ইসহাক যাকোবরে বর্ দেনা থুম্ গুরিলো। যাকোবে তা বাপ্পো ইস্হাক মুজুঙোত্তুন্ যাদে নঅ যাদে তা ভেই এষৌ শিগের্ গুরিনে ঘরত্ ফিরি এলঅ। 31তেয়ো দোল্ হানা বানেইনে তা বাব ইধু আনিনে কলঅ, “বাবা, উদি বোইনে তঅ পুয়োবোর্ শিগের্ গুরি আন্যে য়েরাগান্ হেইনে মরে বর্ দে।”
32তা বাবে তারে কলঅ, “তুই কন্না?”
এষৌ কলঅ, “মুই তঅ দাঙর্ পুয়োবো এষৌ।”
33এ কধাগান শুনিনে ইস্হাক কিয়্যেত্ গির্গিরানি উদিলো। তে কলঅ, “সালে যে মইধু শিগের্ গোজ্যে য়েরাগান্ আন্যে সিবে কন্না? তুই লুমিবার্ আগেদি মুই সিয়েন্ হেইয়োং আর তারে বর্অ দুয়োং, আর সে বর্ দেনার ফল্ তে পেবগোই।”
34এষৌ তা বাব কধাগান শুনিনে গুজুরি গুজুরি কানিলো। সে পরেদি তে কলঅ, “বাবা, মরেয়ো বর্ দে।”
35ইস্হাকে কলঅ, “তঅ ভেইবো এইনে চালাগি গুরিনে তর্ পাইদ্যে বরান্ নেযেয়্যেগোই।”
36এষৌ কলঅ, “তার এ যাকোব নাঙান্ দেনা ঠিগ্ ওইয়্যে, কিত্তে ইয়েন্ সহ দ্বিপল্লা তে মরে মঅ জাগানত্তুন্ সোরেই দিলো। দাঙর্ পুয়োবো ইজেবে মর্ যিয়েন্ অধিকার তে আগে আগে নেযেয়েগোই আর এবারত্ মর্ বর্ পেবার ভাগকানঅ নেযেল।”
এষৌ আরঅ কলঅ, “মত্তে কি কনঅ বর্ দিবাত্যে ন-রাগাচ্?”
37জোবত্ ইস্হাকে কলঅ, “চাহ্, মুই তারে তঅ গিরোজ্ বানেয়োং আর তা গুট্টির্ বেক্কুনোরে তা চাগর্ বানেয়োং। মুই তাত্তে ফসল আর আংগুর-রসর্ বেবস্থা গোজ্যং। ইয়েন পরেদি বাবা, মুই তত্তে আর কি গুরি পারং?”
38সেক্কে এষৌ তা বাবরে কোজোলী গুরিনে কলঅ, “বাবা, তইধু কি বানা সে এক্কান বর্ দিবার এলঅ? বাবা, তুই, মরেয়ো বর্ দে।” ইয়েন্ কোইনে এষৌ গুজুরি গুজুরি কানা ধুরিলো।
39সেক্কে তা বাবে কলঅ,
“যে ভুইয়ানত্ তুই বজত্তি গুরিবে
সে ভুইয়ান্ বোল্বোল্যে ন-অবঅ;
সিয়েনত্ আগাজ শিরো পানিয়ো ন-পড়িবো।
40তলোয়ারানই অবঅ তর্ জীংকানিকান,
তুই তঅ ভেইয়ুনোর চাগর্ ওইনে থেবে।
মাত্তর্ যেক্কে তুই অধৈর্য্য ওইনে উদিবে
সেক্কে তুই তঅ কানাত্তুন্
তার্ জুঙোলান ঠিলিনে ফেলেই দিবে।”
41যাকোবে তা বাবত্তুন্ বর্ পেইয়্যে বিলিনে এষৌ তারে ইংসে গরা ধুরিলো। তে মনে মনে কলঅ, “আমা বাপ্পোত্তে আবিলেজ্ গুরিবার দিনুন ঘোনেই এজের্। সে পরেদি মুই মঅ ভেই যাকোবরে মারে ফেলেম।”
42রিবিকা তা দাঙর্ পুয়ো এষৌর এ কধানি জানি পারিনে মানুচ্ পাদেইনে চিগোন্ পুয়ো যাকোবরে ডাগি আনিনে কলঅ, “শুন্, তর্ ভেই এষৌ তরে মারে ফেলেবাত্তে নিজোরে বুঝোর্। 43-44সেনত্তে বাবা, তুই মঅ কধাগান শুন। তুই হারণ শঅরত্ মর্ ভেই লাবন ইধু ধেই যাহ্ আর তঅ ভেইবোর্ রাগকান্ ন-কমানা সং তাইধু থাক্কোই। 45কয়েকদিন পরে যেক্কে তা রাগকান্ কুমি যেবঅ আর তে ভুলি যেবঅ তুই তা বিরুদ্ধে কি গোজ্যস্, সেক্কে মুই মানুচ্ পাদেইনে তরে সিয়েনত্তুন্ ফিরেই আনিম। কিত্যে মুই একদিনে তমা দ্বিজনরে আরেম্?”
46পরে রিবিকা ইস্হাকরে কলঅ, “এ হিত্তীয় মিলেগুনোত্তে মর্ আর বাঁজি থেবাত্তে আওজ্ ন-গরের্। ইয়েন পরেদি যাকোবেয়ো যুদি এ দেজর্ কনঅ হিত্তীয় মিলেরে লয়্ সালে মর্ বাঁজি থেইনে কি লাভ?”
Currently Selected:
পত্থম 27: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
