পত্থম 28
28
যাকোব উগুরে ইস্হাকর উগুম্
1রিবিকার কধা শুনিনে ইস্হাকে যাকোবরে ডাগিনে বর্ দিলো আর তারে এ উগুমান্ দিলো, “তুই কনান দেজর্ কনঅ মিলেরে মোক্ ইজেবে ন-লবে। 2তুই পদ্দন-অরাম দেজত্ তঅ মা বাপ্পো বথূয়েল ঘরত্ যাহ্। সিয়েনত্ থেবার্ সলাবোত্ তর্ মোল্যা লাবনর যে কনঅ ঝিরে তুই মোক্ ইজেবে লগোই। 3বেগত্তুন্ খেমতাবলা গোজেনে তরে বর্ দুয়োক্ আর তরে ভালোক্কুন্ ঝি-পুয়োর বাব্ অবার্ খেমতা দুয়োক্। তে তঅ বংশর্ মানুচ্চুনোরে জনেদি বাড়েই দোক্। সেক্কেনে তারা অবাক্ এক্কো ভালোক্ গুট্টির্ জাদ্। 4যে বরান্ তে অব্রাহামরে গোজ্যে সে বরান্ তে তরে আর তঅ পরেদি তঅ বংশর্ মানুচ্চুনোরে গোরোক্। যে দেজচান গোজেনে অব্রাহামরে দিলো, যিয়েনত্ তুই ইক্কিনে বিদেশী ইজেবে আগচ্, সে দেজ্চান্ যেনে তইদু এজে।”
5ইয়েন্ কোইনে ইস্হাকে যাকোবরে পাদেই দিলো, আর যাকোবেয়ো পদ্দন-অরাম অরামীয় বথূয়েলর পুয়ো লাবন ইদু গেলঅ। লাবনে অলদে যাকোব আর এষৌর মা রিবিকার ভেই।
6পরেদি এষৌ শুনিলোদে, ইস্হাকে যাকোবরে বর্ দিইনে পদ্দন-অরাম কনঅ মিলেরে লবাত্যে সিদু পাদেই দিলো। তে আরঅ শুনিলোদে, ইস্হাক যাকোবরে বর্ দিবার অক্তত্ উগুম দিইনে কোইয়্যেদে যেনে তে কনঅ কনানীয় মিলেরে ন-লয়। 7এষৌ দেগিলোদে, যাকোবে তা মা-বাবঅ কধামজিম্ পদ্দন-অরামত্ গেলগোই। 8সেক্কে এষৌ বুঝিলো, তা বাপ্পো ইস্হাকে কনানীয় মিলেগুনো উগুরে বেজার্। 9সেনত্তে দ্বিবে মোক্ থেলেয়ো তে অব্রাহামর পুয়ো ইশ্মায়েল ঘরত্ যেইনে তার ঝি মহলতরে ললঅ। মহলতে অলদে নবায়োতর বোন।
যাকোবর স্ববনান্
10ইন্দি যাকোবে বের্-শেবা ছাড়িনে হারণ শঅর ইন্দি যাহ্ ধুরিলো। 11পদত্ এক জাগাত্ বেলান্ ডুবিলে পরেদি তে সিয়োদোই রেত্তো কাদেল। সিয়েনত্ কুদুক্কুন্ পাত্তর্ পোজ্যে আগন্। যাকোবে সিগুনোত্তুন্ এক্কো মাদাত্ দিইনে ঘুমোত্ পড়িলো। 12তে স্ববনত্ দেগিলোদে মাদি উগুরে এক্কান সাঙু অজল্ গুরি আঘে আর সিয়েন মাদাবো যেইনে স্বর্গত্ লুম্মেগোই। তে দেগিলোদে গোজেন দূত্তুনে সিয়েন উগুরেন্দি উজোল্-লামন্ গত্তন, 13আর লগেপ্রভু সিয়েন উগুরে ঠিয়েইনে কলঅ, “মুই লগেপ্রভু। মুই তঅ পুরোণি মানুচ্ অব্রাহামর গোজেন আর ইস্হাকরঅ গোজেন। তুই যিয়েনত্ ঘুম যর্ সে দেজ্চান মুই তরে আর তঅ বংশর্ মানুচ্চুনোরে দিম্। 14তঅ বংশর মানুচ্চুনে পিত্থিমীর ধূল্যেকণা ধোক্ক্যেন গুণি ন-ফুরেইয়্যে অবাক্। পূগ্-পোজিমে আর উত্তোর-দোগিণে তঅ বংশগুন ছিদি পরিবাক। পিত্থিমীর বেক্ জাদ্তুনে তর্ আর তঅ বংশবো ভিদিরেন্দি বর্ পেবাক। 15মুই তঅ লগে লগে আগং; তুই যিয়োদোই যেদে সাৎ মুই তরে রোক্ষ্যে গুরিম্। এ দেজত্ আরঅ মুই তরে ফিরেই আনিম। মুই তরে যিয়েনি কোইয়োং সিয়েনি পূরোণ ন-গরানা সং মুই তরে ছাড়ি ন-যেম্।”
16পরেদি যাকোবে ঘুমোত্তুন্ উদিনে কলঅ, “সালে লগেপ্রভু হামাক্কায়্ এ জাগানত্ আঘে অদচ মুই সিয়েন্ বুঝি ন-পারং।”
17এ কধাগান্ ভাবিনে তা মনত্ দর্ এলঅ। তে কলঅ, “ কি দর্গরেপারা এ জাগায়ান! ইয়েন্ গোজেনর থেবার জাগা ছাড়া আর কিচ্ছু নয়; স্বর্গর্ দুঅরান ইয়োদোই।”
18যাকোবে বেন্যেপোত্যে উদিলো আর যে পাত্তর্বো তে মাদাত্ তলে দিলো সিবেরে থুনি ধোক্ক্যেন উজু গুরিনে তা উগুরে তেল ঢালি দিলো। 19তে জাগাগান নাঙান্ দিলো বৈথেল (যিয়েন ভেদ্তান্ “গোজেন ঘর”)। এ জাগায়ান ইদু শঅরানর্ পুরোণি নাঙান এলদে লূস।
20ইয়েন পরেদি যাকোবে শমত্ খেইনে কলঅ, “যুদি গোজেনে মর্ এ যাত্রাবোত্ মরে রোক্ষ্যে গরে, যুদি তে মরে হেবার-উরিবার্ যোগেই দে, 21যুদি মুই আরঅ মঅ বাবঅ ঘরত্ গমে-ডালে ফিরিনে এ পারং, সালে এ লগেপ্রভুরে মুই মর্ গোজেন বিলিনে মানিম। 22ইবে যে পাত্তর্বো মুই থুনি ধোক্ক্যেন গুরি ঠিয়েই রাগেলুং ইয়োদোই অবঅ গোজেন ঘর। ও গোজেন, তুই মরে যিয়েনি দিবে সিয়েনির দশ্ ভাগর্ এক ভাগ হামাক্কায় মুই তরে ফিরেই দিম্।”
Currently Selected:
পত্থম 28: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
