পত্থম 43
43
বিন্যামীনে মিসরত্ গেলঅ
1কনান দেজর্ ভাদ-রাদ অবস্থা আরঅ বেশ্ ওই উদিলো। 2মিসর দেজত্তুন্ ইস্রায়েলর, অত্তাৎ যাকোব পুয়োগুনে যে শোজ্যগুন্ আন্যন্ সিগুন্ শেজ্ ওই যানার্ পরেদি তারা বাপ্পো কলঅ, “তুমি আরঅ যেইনে আমাত্তে কিজু শোজ্য কিনি আনঅ।”
3যিহূদা তারে কলঅ, “মাত্তর্ সে মানুচ্চো আমারে জদবদে হুমকি দিইনে কোইয়্যেদে, ‘তমা ভেইবো তমা লগে ন-থেলে তুমি আর মঅ মুজুঙোত্ ন-এচ্চ্য।’ 4তুই যুনি আমা ভেইবোরে আমা লগে যেবাত্তে দুয়োচ্ সালে আমি যেইনে তত্তেই শোজ্য কিনি আনি পারিবোং। 5মাত্তর্ তারে যেবাত্তে ন-দিলে আমিয়ো ন-যেবং। মানুচ্চো আমারে কোইয়্যে, তমা ভেইবো তমা লগে ন-থেলে তুমি আর মঅ মুজুঙোত্ ন-এবা।”
6সেক্কে ইস্রায়েলে কলঅ, “তুমি মঅ লগে কিত্তে এদক্ বজং বেবহার্ গুরিলে? তমার যে আরঅ এক্কো ভেই আঘে সে কধাগান্ কিত্তে কোইয়ো?”
7তারা কলাক্, “মাত্তর্ মানুচ্চো আমা পরিবার পৌইদ্যেনে গমেডালে পুযোর্ গুরিলো, ‘তমা বাপ্পো কি এজঅ বাঁজি আঘে? তমার্ কি আর কনঅ ভেই আঘে?’ সেনত্তে আমি সেধোক্ক্যেনগুরি তা কধানির্ জোব্ দিয়্যেই। সেক্কে আমি কেধোক্ক্যেন গুরি হবর্ পেবং, তে কবদে, ‘তমা ভেইবোরে আনঅ’?”
8সেক্কে যিহূদা তা বাবরে কলঅ, “তারে মঅ সমারে যেবাত্তে দে। আমি যাদিমাদি রওনা ওইনে তুই, আমি, আর আমা পুয়ো-ঝিগুনে পরাণে বাঁজি থেই, যেন মুরি ন-যেই। 9মুই নিজে তাত্তে জাবিন্দার অলুং। তাত্তে তুই মরে দায়ী গুরিচ্। মুই যুনি তারে তঅ মুজুঙোত্ ফিরেই আনি ন-পারং সালে জিংকানিবর্ মুই তঅ মুজুঙোত্ দুষি ওই থেম্। 10আমি যুনি এদক্ দেরি ন-গত্তং সালে ঘেচ্চেক্গুরি এদক্দিনে আমি আরঅ দ্বিবার্ যেইনে ফিরি এই পাত্তং।”
11তারা বাপ্পো সেক্কে কলঅ, “যুনি সিয়েন গরা পরে, সালে এক্কান্ কাম্ গরঅ। বোক্শিজ্ ইজেবে সে মানুচ্চোত্তে তমা বস্তাগুনোত্ গুরি এ দেজর্ বেগত্তুন্ গম্ গম্ জিনিযোত্তুন্ কিজু কিজু নেযঅ, যেন্ গুগ্গুলু, মধু, তুম্বাস্ মজলা, গন্ধরস, পেস্তা আর বাদাম। 12আর তুমি লগে গুরিনে দ্বিগুণ টেঙা নেযঅ, কিত্তে বস্তা মুয়োনিত্গুরি যে টেঙাগুন্ তারা ফিরেই দুয়োন্ সিগুনো ফেরত্ দিয়্যে পুরিবো। অয়্ত তারা ভুল্ গুরিনে সিগুন্ দি ফেল্যন। 13তমা ভেইবোরে লগে নেযেইনে তুমি যাদিগুরি সে মানুচ্চো ইধু ফিরি যঅ। 14বেগত্তুন্ খেমতাবলা গোজেনে যেন সে মানুচ্চো ইধু তমারে দোয়্যে দেগায়, আর তমা সে ভেইবো আর বিন্যামীনরেয়ো তমা আদত্ ইরি দে; আর যুনি মত্তুন পুয়ো আরেয়্যে উয়ো পরেদে অয়্ সালে নয়ত সিয়েনোই অলুং।”
15সেক্কে তারা সেই বোক্শিজ্ছানি, দ্বিগুণ টেঙা আর বিন্যামীনোরে লোইনে যাহ্ ধুরিলাক্। মিসর দেজত্ লুমিনে তারা যোষেফ মুজুঙোত্ আঝিল্ অলাক।
16তারা লগে বিন্যামীনোরে দেগিনে যোষেফে তা ঘরর্ সদ্দারবোরে কলঅ, “উই মানুচ্চুনোরে ঘরঅ ভিদিরে নেযা আর য়েরা রানিবার্ বেবস্থা গর্। এ বেক্ মানুচ্চুনে দিবুজ্যে অক্তত্ মঅ সমারে হেবাক্।”
17যোষেফে যিয়েনি কলঅ সদ্দার্বো সিয়েনি গুরিলো। তে সেই মানুচ্চুনোরে যোষেফ ঘরত্ নেযেল। 18যোষেফ ঘরত্ তারারে নেযা অর্ দেগিনে সে মানুচ্চুনে দরে কুয়ো কি গত্তন্, “আগঅ বারত্ যে টেঙাগুন্ আমা বস্তাগুনো ভিদিরে ফেরত্ যেয়োন্ সেনত্যে আমারে সে জাগানত্ নেযা অর্। এবারত্ তে আমারে দুষ্ দেগেইনে আমারে ধুরিনে নেযেব, আর আমা গাধাগুন্ কারি নেযেনে আমারে তা চাগর্ বানে রাগেব।” 19সেনত্তে তারা যোষেফ ঘরঅ দোরান মুজুঙোত্ এইনে ঘর সদ্দার্বোরে কলাক্, 20বাবু, আমি এ আগেন্দিয়ো একবার্ শোজ্য কিনিবাত্তে এচ্চ্যেই। 21মাত্তর্ ফিরি যেবার পদথ্ ঝিরেবার্ জাগানত্ লুমিনে আমা বস্তাগুন খুলিনে দেগিলোং আমা বেক্ টেঙাগুন্ যার্ যার্ বস্তার্ মুয়োনিত্ আগন্। আমি ইক্কিনে সে টেঙাগুন্ ফিরেই আন্ন্যেই। 22ইগুন্বাদে শোজ্য কিনিবাত্তে লগে গুরি আমি আরঅ টেঙা আন্ন্যেই। সে টেঙাগুন্ আমারে বস্তা ভিদিরে কন্না দিয়্যে সিয়েন্ আমি হবর্ ন-পেই।
23সে সদ্দার্বো কলঅ, “বেক্কানি ঠিগ্ আঘে, ন-দোরেয়ো। তমার্ আর তমা বাপ্পোর্ গোজেনে সেই দানুন্ তমা বস্তাগুনোত্ থোই দিয়্যে। তমা টেঙাগুন্ মুই পেইয়োং।” ইয়েন্ কোইনে তে শিমিয়োনরে নিগিলেনে তারা মুজুঙোত্ আনিলো।
24সে পরেদি তে বেক্কুনোরে যোষেফ ঘরঅ ভিদিরে নেযেইনে পানি হেবাত্তে দিলো আর তারা টেং ধুয়োলাক্। তে তারার্ গাধা গুনোরেয়ো হেবাত্তে দিলো। 25যোষেফে দিবুজ্যে এবঅ বিলিনে তারা বোক্শিজ্ছানি ঠিগ্ গুরি রাগেলাক্। তারা শুন্যন্ তারার হানা-বিনে সিয়োদোই অবঅ।
26যোষেফে যেক্কে ঘরত্ এলঅ সেক্কে তারা সে বোক্শিজ্ছানি ঘর ভিদিরে নেযেইনে তারে দিলাক্ আর মাদিত্ মাদা নিগিরিনে তারে জু জু জানেলাক্। 27তারা গম্ আগন না কি সে হবরান্ নেযানার্ পরেদি তে পুযোর্ গুরিলো, “তমার যে বুড়ো বাপ্পোর্ কধা তুমি কোইয়ো তে কি গম্ আঘে? তে কি এজঅ বাঁজি আঘে?”
28তারা কলাক্, “তঅ চাগর্ আমা বাপ্পো এজঅ বাঁজি আঘে আর গম্ আঘে।” ইয়েন্ কোইনে তারা মাদিত্ মাদাবো নিগিরিনে যোষেফরে সর্মান জানেলাক্।
29যোষেফে চেরোকিত্তে রিনি চেইনে তার্ নিজোর্ ভেই বিন্যামীনরে চেইনে কলঅ, “ইবে কি তমার্ সেই চিগোন ভেইবো যিবে কধা তুমি মরে কোইয়ো?” সে পরেদি তে বিন্যামীনরে কলঅ, “গোজেনে তরে দোয়্যে গোরোক্!”
30ভেইবোরে দেগিনে যোষেফ মনান্ অমকদ চিৎপুরি উদিলো। তে এক্কান্ কানিবার্ জাগা তোগেবাত্তে যাদিমাদি সিয়োত্তুন্ নিগিলি গেলঅ আর নিজো গুদিত্ সুমিনে কানা ধুরিলো। 31পরেদি চোখ-মু ধোইনে তে নিগিলি এলঅ আর নিজোরে সামেলে নিইনে হানা ভাগ গুরি দিবার উগুম্ দিলো। 32ভাগ গুরিদিয়্যেগুনে যোষেফরে, তা ভেইয়ুনোরে আর যে মিসরীয়গুনে যোষেফ ঘরত্ হেদাক্, তারারে যুদো গুরি আরেক জাগাত্ হেবাত্তে দিলাক্। মিসরীয়গুনে ইব্রীয়গুনো লগে হানা-বীনে ন-গুরিদাক্, কিত্তে সিয়েনি এলদে তারা মুজুঙোত্ এক্কান্ ঈচ্ গরেদে কাম্। 33যোষেফ মুজুঙোত্ তা ভেইয়ুনোর্ বয়জ্ ধগে পর পর বোজেই দিয়া অলঅ। ইয়েন্দোই তারা আমক্ ওইনে একজনে আরেকজন মুয়োন্দি চাহ্ ধুরিলাক্। 34যোষেফে তার্ নিজো টেবিলোত্তুন্ কিজু হানা ভেইয়ুনোরে দিবার্ বেবস্থা গুরিলো। অন্য যে কনঅ ভেইয়োত্তুন্ বিন্যামীনোরে পাজ্গুন্ বেজ্ দিয়্যে অলঅ। এবাবোত্যেগুরি তারা যোষেফ লগে হানা-বীনে গুরিলাক্। বেজগুরি আংগুর্ রস্ হেইনে তারা হুজি অলাক্।
Currently Selected:
পত্থম 43: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
