পত্থম 44
44
বিন্যামীনো বস্তাবোত্ রূবোর্ গলস্
1যেরেদি যোষেফে তা ঘরর্ সদ্দারবোরে ইয়েন কোইনে উগুম্ গুরিলো, “ইগুনে শোজ্য যিদুক্কুন্ নেযেই পারন সিদুক্কুন্ তারা বস্তাগুনোত্ ভোরেই দুয়ো, আর পত্তিজনরে টেঙাগুন তারা বস্তাগুনোর্ মুয়োনত্ দি-দুয়ো। 2যে বেগত্তুন্ চিগোন্ তা বস্তাবোর মুয়োনত্ মঅ রূবোর্ কদরাবো আর শোজ্যত্তে তার্ দিয়্যে টেঙাগুনঅ দি-দুয়ো।” যোষেফে তারে যিয়েনি গুরিবাত্তে কলঅ তে সিয়েনি গুরিলো।
3তার্ কেল্যে বেন্যে পর্ অদে ন-অদে গাধা পিদিত্ গুরিনে তারারে পাধেই দিয়্যে অলঅ। 4তারা এইমাত্র শঅরত্তুন্ নিগিলি যেইয়োন মাত্তর্ বেশ্ দূরোত্ ন-যান, এন্ সময়োত্ যোষেফে তা ঘরর্ সদ্দারবোরে কলঅ, “যাদিমাদি গুরি উই মানুচ্চুনো পিজেদি যাহ্। তারারে দেগিলে কবেদে, তুমি উপোকারর্ বদলে অপকার্ গুরি এলা কিত্তে?” 5উই কদরাবোত্ গুরিনে দঅ মঅ গিরোচ্চো পানিয়ো হেদঅ আর সিবেলোই গোনোক্ক্যে কাম্ গুরিদো। তুমি এ কামান গুরিনে খুব অন্যেয়্ গোজ্য।
6পধথ্ সে সদ্দার্বো তারারে দেগিনে সে কধাগান্ কলঅ। 7মাত্তর্ তারা তারে কলাক্, “বাবু, তুই এ কধাগান্ কিত্তেই কোইয়োচ্? তঅ চাগরুনে এবাবোত্যে কাম্ কনদিনঅ ন-গুরিবাক্। 8চাহ্, গেল্যেবারত্ আমা বস্তাগুনো মুয়োনত্ যে টেঙাগুন্ পেইয়্যেই সিগুন্ আমি কনান দেজত্তুন্ আরঅ ফেরত্ আন্ন্যেই। ইয়েন পরেদি তঅ গিরোচ্চো ঘরত্তুন্ আমি রূবো বা সোনা চুর্ গুরি কিত্তেই আনিবোং? 9যুনি সে কদরাবো তর্ এ চাগরুনোর্ কার ইধু পাহ্ যায় সালে তারে যেন মারে ফেলা অয়, আর সেক্কে আমিয়ো আমা গিরোচ্চোর্ চাগর্ ওই থেবং।”
10সে সদ্দারবো কলঅ, “ঠিগ্ আঘে, তুমি যিয়েনি কোইয়ো সিয়েনোই ওক্। মাত্তর্ যাইধু সেই কদরাবো পাহ্ যেবঅ বানা তেয়ই মর্ চাগর্ ওই থেবঅ। অন্য কারর কনঅ দুজ্ ন-থেবঅ।”
11সেক্কে বেক্কুনে যাদিমাদি গুরি তারা বস্তাগুন্ মাদিত্ লামেইনে খুলিলাক্। 12সেই সদ্দারবো সেক্কে দাঙর্ ভেইবো বস্তাত্তুন্ ধুরি আরম্ভ গুরিনে চিগোন্ ভেইবো বস্তাবো সং তোগেই চেলঅ, আর বিন্যামীনো বস্তাবোত্ সেই কদরাবো পাহ্ গেলঅ। 13এ বেপারান্ দেগিনে তারা নিজো কাবড়ানি ফাদিলাক্। সে পরেদি তারা গাধা পিদিত্ বস্তাগুন্ তুলিনে আরঅ শহরঅ মোক্কে ফিরি গেলাক।
14যিহূদা আর তা ভেইয়ুনে যে সময়ানত্ যোষেফ ঘরত্ গেলাক্ যোষেফে সেক্কেয়ো সিয়েনত্ এলঅ। তারা তা মুজুঙোত্ যেইনে মাদিত্ আদু পাড়িনে পড়িলাক্। 15সেক্কে যোষেফে তারারে কলঅ, “তুমি ইয়েন্ কি গোজ্য? মঅ ধোক্ক্যেন মান্জ্যে যে ঘেচ্চেক্গুরি বেক্কানি গুণিনে নিগিলেই পারে সিয়েন কি তুমি হবর্ নঅ-পেদা?”
16যিহূদা কলঅ, “বাবুরে আমি কি কবং? কি জোব্ বা দিবোং? আর কেধোক্ক্যেন গুরিনে বা নিজোরে নিদ্দুযি বিলি প্রমাণ গুরিবোং? তঅ চাগরুনোর্ দুষ দঅ গোজেনে দেগেই দিয়্যে। যিবে ইধু সেই কদরাবো পাহ্ যেইয়্যে তে আর আমি বেক্কুনে বাবুর্ চাগর্ অলং।”
17মাত্তর্ যোষেফে কলঅ, “এ কামান্ মুই কনদিনঅ গুরি ন-পারং। যিবে ইধু সেই কদরাবো পাহ্ যেইয়্যে বানা তেয়ই মর্ চাগর্ অবঅ। তুমি চিদে ন-গুরিনে তমা বাপ্পো ইধু ফিরি যঅ।”
ভেইবোত্তে যিহূদার কোজোলী
18সেক্কে যিহূদা যোষেফ ইধু উজেই যেইনে কলঅ, বাবু, তুই ফরৌণ জাগানত্ আগচ্, সেনত্তে তঅ চাগর্বোরে তঅ মুজুঙোত্ দু-এক্কান কধা কবাত্তে উগুম দে। তঅ চাগর্বো উগুরে তুই রাগ্ ন-গুরিচ্। 19বাবু, তর্ চাগরুনোরে তুই পুযোর্ গোজ্যচ্চ্যে, তমা বাপ্পো কি বাঁজি আঘে, তমার্ আর কনঅ ভেই আগন্ না কি? 20সেক্কে আমি বাবুরে কোইয়্যেই, আমা বুড়ো বাপ্পো বাঁজি আঘে আর তার্ বুড়ো বয়জত্ এক্কো পুয়ো আঘে। তা ভেইবো মুরি যেইয়্যে, আর এক্কো মার্ পুয়ো ইজেবে ইক্কিনে তে গাই গাই গুরি বানা পড়ি আঘে। সেনত্তে তা বাবে তারে খুব কোচ্পেদঅ।
21সে পরেদি তুই তঅ চাগরুনোরে কোইয়োচ্, তারে মইধু আন; মুই তারে দেগিবাত্তে চাং। 22মাত্তর্ আমি বাবুরে কোইয়্যেদে, পুয়োবো তা বাবরে ফেলেই এই ন-পারিবো। যুনি এযেদে অয়্ সালে তা বাবে মুরি যেবঅ। 23মাত্তর্ তুই তঅ চাগরুনোরে কোইয়োচ্চ্যে, তমা চিগোন্ ভেইবোরে লগে ন-আনিলে তুমি আর মঅ মুজুঙোত্ ন-এবা। 24সেনত্তে আমি ফিরি যেইনে তঅ চাগর্বো, অত্তাৎ আমা বাপ্পোরে বাবুর্ বেক্ কধানি জানেয়্যেই।
25পরেদি আমা বাপ্পো কলদে, তুমি ফিরি যেইনে আমাত্তেই আরঅ কিজু শোজ্য কিনি আনগোই। 26সেক্কে আমি কোইয়্যেদে, আমা চিগোন্ ভেইবো যুনি আমা লগে যায় সালে আমিয়ো যেবং। সিয়েন ন-অলে আমি সিধু যেই ন-পারিবোং। আমা চিগোন ভেইবো যুনি আমা লগে ন-থায়্ সালে আমি সেই মানুচ্চো মুজুঙোত্ যেই ন-পারিবোং।
27সেক্কে তঅ চাগর্বো, অত্তাৎ আমা বাপ্পো আমারে কলদে, তুমি দঅ হবর্ পঅ মর্ সেই মোক্কোর্ দ্বিবে পুয়ো ওইয়োন্। 28একবার তারাত্তুন্ একজনে মঅ মুজুঙোত্তুন্ নিগিলি যেইয়্যে, আর যেরেদি মুই বুঝিলুং, ঘেচ্চেকগুরি কনঅ ঝার্বো য়েমানে তারে কত্তা কত্তা গুরি ফেলেয়্যে। সে পরেত্তুন্ ধুরি তারে মুই আর ন-দেগং। 29ইক্কিনে যুনি তুমি ইবেরেয়ো মত্তুন্ নেযঅ আর তার্ কনঅ দজা অয়, সালে এ বুড়ো বয়জত্ বোউত্ দুঘে তুমি মরে মরণ জাগাত্ পাদেবা।
30-31“সেনত্তে ইক্কিনে যুনি তঅ চাগর্বো ইধু, অত্তাৎ আমা বাপ্পো ইধু আমি ফিরি যেই সালে ঘেচ্চেক্ঘুরি তে মুরি যেবঅ, কিত্তে পুয়োবো সমারে তা পরানান্ যেন একলগে বান্যে আঘে। এবাবোত্যেগুরি তঅ চাগরুনে তারা বুড়ো বাপ্পোরে, অত্তাৎ তঅ চাগর্বোরে বোউত্ দুঘে মরণ জাগাত পাদেবাক্। 32তঅ চাগর্ মুই মঅ বাপ্পো ইধু পুয়োবোত্তে ইয়েন কোইনে জামিনোত্ আগং, ‘যুনি মুই তারে ত’ইধু ফিরেই আনি ন-পারং সালে বাবা, জিংকানিবর্ মুই তইধু দুষি ওই থেম্। 33সেনত্তে বাবু, দোয়্যে গুরি পুয়োবোর্ বদলে মরে তর্ চাগরঅ ধোক্ক্যেন গুরি রাগা, আর পুয়োবোরে তা ভেইয়ুনো সমারে ফিরি যেবাত্তে দে। 34এ পুয়োবোরে ন-নেযেইনে মুই কিঙিরিনে মঅ বাপ্পো ইধু ফিরি যেম্? সিয়েন গুরিলে তার্ দুঃখান্ মর্ নিজোর্ চোগেদি দেগা পুড়িবো।”
Currently Selected:
পত্থম 44: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
