পত্থম 45
45
যোষেফে নিজোর্ পরিচয়ান্ দিলো
1সেক্কে যোষেফে তার্ কাম্গুরিয়েগুনো মুজুঙোত্ আর নিজোরে লুগেই রাগেই ন-পারিলো। তে দাঙর্ দাঙর্ রঅ গুরি কলঅ, “মঅ মুজুঙোত্তুন্ বেক্কুনে সুরি যঅ।” সেনত্তে ভেইয়ুনো ইধু যেক্কে তে নিজো পরিচয়ান্ দিলো সেক্কে সিয়েনত্ আর কনজন্ ন-এলাক। 2তে এদক্ গুজুরি গুজুরি কানা ধুরিলোদে, মিসরীয়গুনে সিয়েন্ শুনিলাক্ আর সেই হবরান্ ফরৌণ ঘরত্ যেইনে লুমিলো।
3যোষেফে তা ভেইয়ুনোরে কলঅ, “মুই যোষেফ! আমা বাপ্পো কি এজঅ বাঁজি আঘে?” এ কধাগান্ শুনিনে তা ভেইয়ুনে দরে গির্গিরাদন্; তারা তা কধার্ জোবপান দি নঅ-পারিলাক্।
4সেক্কে যোষেফে তা ভেইয়ুনোরে কলঅ, “তুমি মইধু এজঅ।” তারা কায়-কুরে এজানার্ পরেদি তে কলঅ, মুই তমার সেই ভেইবো যোষেফ; যিগুনে মিসরত্ যাদন্ তারা ইধু তুমি মরে বিজি দুয়ো। 5মাত্তর্ তুমি মরে বিজি দুয়ো বিলিনে ইক্কিনে দুঃখো ন-পেয়ো বা নিজো উগুরে রাগ ন-গোজ্য। মান্জ্য পরাণ রোক্ষ্যে গুরিবাত্যে গোজেনে তমা আগেদি মরে ইধু পাদেয়্যে। 6ভাদ-রাদ্ চলের্ এ দ্বিবজর ধুরিনে। ইবে আরঅ পাঁজ্ বজর্ সং চুলিবো। সেক্কে খেত-খেত্তি লাগেই ন-পারিবাক্ কাবিয়ো ন-পারিবাক্। 7পিত্থিমীত্ বিশেজ্ গুরি তমা বংশগুন্ বাজেই রাগেবাত্তে আর ভস্ত অনার্ আদত্তুন্ উদ্ধোর্ গুরিনে তমা পরাণানি রোক্ষ্যে গুরিবাত্তে গোজেনে তমা আগেদি মরে পাধেই দিয়্যে। 8সেনত্তে দেগা যাত্তে, তুমি মরে ইধু ন-পাদঅ, গোজেনে পাদেয়্যে। তে মরে ফরৌণ বাবঅ জাগানত্ রাগেয়্যে আর তা পরিবারর্ গিরোজ্ বানেয়্যে। ইয়েন বাদেয়ো তে মরে গোদা মিসর দেজত্ শাজন্ গুরিবার্ খেমতাগান্ দিয়্যে।
9ইক্কিনে তুমি যাদিমাদি বাবা ইধু যেইনে কগোই, তা পুয়ো যোষেফে এ কধাগান্ কোইয়্যে, গোজেন মরে গোদা মিসর দেজর গিরোজ্ বানেয়্যে। তুই আর দেরি ন-গুরিনে মইধু এই যাগোই। 10তুমি এইনে গোশন চাগালাত্ বজত্তি গরঅ। সেক্কে তুমি, তমার পুয়ো-ঝি, তমার নাদিন-পুদিন, তমার য়েমান আর ভেড়া ছাগলর্ ঝাক্ আর তমার যিয়েনি আঘে বেক্কানি লোইনে মইধু থেই পারিবা। 11তমার্, তমা পরিবারর্ আর বেক্কুনোর্ যেনে কনঅ অভাব ন-অয়্ সেনত্তে মুই সিয়োদোই তমাত্তে হেবার-উরিবার বেবস্থা গুরিম, কিত্তে ভাদ-রাদ্ শেজ্ অদে এজঅ পাঁজ্ বজর্ বাগী আঘে।
12“মুই যে নিজো মুয়োন্দি এ বেক্ কধানি কঙর্ সিয়েন তুমি নিজো চোগেদি দেক্কো, আর মঅ ভেই বিন্যামীনেয়ো দেক্ক্যে। 13মিসর দেজত্ মর্ যেত্তমান্ মান-সর্মান আর যিয়েনি দেগর্ সিয়েনি বেক্কানি যেইনে বাবারে কামাক্কায়্ জানেবা। ইক্কিনে তুমি যাদিমাদি যেইনে বাবারে ইধু আনগোই।”
14ইয়েন পরেদি যোষেফে তার্ ভেই বিন্যামীনরে গত্তনাত্ আজাগুরি ধুরিনে কানা ধুরিলো আর বিন্যামীনেয়ো তা গত্তনাবোত্ আজাগুরি ধুরিনে কানা ধুরিলো। 15সে পরেদি যোষেফে তার্ বেক্ ভেইয়ুনোরে চুমিনে আদর্ গুরিলো আর তারারেয়ো গত্তনাত্ আজাগুরি ধুরিনে কানিলো। সেক্কে তা ভেইয়ুনে তা লগে কধা কলাক্।
16যোষেফর্ ভেইয়ুনে এজানার্ হবরান্ ফরৌণ ঘরত্ লুমিলে পরেদি ফরৌণ আর তা কাম্গুরিয়েগুনে হুজি অলাক্। 17ফরৌণে যোষেফরে কলঅ, “তঅ ভেইয়ুনোরে কঅ যেন তারা গাধা পিদিত্ গুরি শোজ্য বানিনে কনান দেজত্ ফিরি যান, 18আর তারা বাপ্পো আর তারা পরিবারর্ বেক্কুনোরে লোইনে তঅ ইধু এজোদোক্। তুই তারারে জানেই দে, মিসর দেজর্ বেগত্তুন্ গম্ গম্ পযাপিরানি তুই তারারে দিবে আর দেজত্ বেগত্তুন্ গম্ হানাগানি তারা হেই পেবাক। 19ইয়েনবাদে তঅ উগুরে মর্ এই উগুমান থেলঅ, তুই তঅ ভেইয়ুনোরে কোইদে যেন তারার মোক্কুন্, চিগোন পুয়ো-ঝি গুনোত্তে মিসর দেজত্তুন্ গাড়ী নেযান, আর তারা বাপ্পোরে আনন্। 20তারা যেনে সংসার পযাপিরেনিত্তে চিদে ন-গরন, কিত্তে গোদা মিসর দেজর্ গম্ গম্ পযাপিরানি দঅ তারার্।”
21ইস্রায়েল পুয়োগুনে সিয়েন গুরিলাক্। ফরৌণর উগুম মজিম যোষেফে তারাত্তে গাড়ী আর পধথ্ হেবার বেবস্থা গুরিলো। 22তে তারারে বেক্কুনোরে এক জড়া গুরি কাবড় দিলো, মাত্তর্ বিন্যামীনরে দিলো পাঁজ্ সেট কাবড় আর তিনশ রূবোর্ কট্টা। 23তে তার্ বাপ্পোত্তে দোজ্শো গাধা আর দোজ্শো গাধী পাধেই দিলো। সেই দোজ্শো গাধা পিদিত্ মিসরর্ গম্ গম্ পযাপিরা বুদি বান্যে এলঅ, আর গাধীগুনো পিদিত্ এলঅ শোজ্য, পিদে আর অন্য হেবার্ জিনিস। সিয়েনি এলঅ তা বাপ্পোর্ পধত্ হেবার জিনিস। 24এ বেবস্থাগানি গুরিনে তে তার্ ভেইয়ুনোরে পাধেই দিলো। যেবার অক্তত্ তে তারারে কোই দিলো, “তুমি পধথ্ কোল্-কোজ্যে ন-গোজ্য।”
25-26যেরেন্দি তারা মিসরত্তুন্ কনান দেজত্ তারার বাপ্পো যাকোব ইধু যেইনে কলাক্, “যোষেফে এজঅ বাঁজি আঘে। তেয়ই ইক্কিনে গোদা মিসর্ দেজর্ শাজন্ গুরিয়েবো।” এ কধাগান শুনিনে যাকোবে আমক্ ওই গেলঅ, কিত্তে কধাগান্ তার্ বিশ্বেজ্ ন-অলঅ।
27মাত্তর্ যোষেফে তারারে যিয়েনি কোইয়্যে সিয়েনি শুনিনে আর তারে নেযেবাত্তে যোষেফে যে গাড়ীগানি পাদেয়্যে সিয়েনি দেগিনে তারা বাপ্পো যাকোবর্ সেই চিন্তেগান্ কাদেই গেলঅ। 28তে কলঅ, “মর্ পুয়ো যোষেফে যে এজঅ বাঁজি আঘে সিয়েনোই যদেষ্ট। মুরিবার্ আগেন্দি মুই যেইনে তারে একবার্ রিনি চেম্।”
Currently Selected:
পত্থম 45: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
