পত্থম 47
47
1যোষেফে ফরৌণ ইধু যেইনে কলঅ, “মঅ বাপ্পো আর ভেইয়ুনে তারার্ ছাগল, ভেড়া, গোরু আর তারার্ বেক্কানি লোইনে কনান দেজচান্ ফেলেইনে এচ্চোন্। তারা ইক্কিনে গোশনত্ এইনে লুম্মোন্দি।”
2ভেইয়ুনো ভিদিরেত্তুন্ পাঁজ্জনরে বেঈ লোইনে তে ফরৌণ মুজুঙোত্ আঝিল্ গুরিলো। 3ফরৌণে তারারে পুজোর গুরিলো, “তুমি কি কাম্ গরঅ?”
তারা কলাক্, “তর্ এ চাগরুনে ছাগল-ভেড়া চড়ান্। তারার্ চোদ্দো গুট্টিগুনেয়ো সিয়েনি গুরিদাক্।” 4তারা আরঅ কলাক্, “আমি এ দেজত্ কয়েক্দিন থেবাত্তে এচ্চ্যেই। কনান দেজত্ ইক্কিনে অমকদ ভাদ-রাদ্ চলের্ বিলিনে সিধু আমার্ ছাগল-ভেড়াগুনে হেবার্ ঘাস নেই। সেনত্তে দোয়্যে গুরি তঅ চাগরুনোরে গোশনত্ থেবাত্তে উগুম্ দে।”
5ফরৌণ যোষেফরে কলঅ, “তঅ বাপ্পো আর ভেইয়ুনে তইধু এচ্চোন্। 6গোদা মিসর দেজ্ছান্ দঅ তঅ মুজুঙোত্ পড়ি আঘে। দেজর্ বেগত্তুন্ গম্ জাগানত্ তঅ বাপ্পো আর ভেইয়ুনোরে বজত্তি গুরিবাত্তে দে। তারা গোশনত্ বজত্তি গোরোদোক্। তারা ভিদিরে যগাজ্যে মানুচ্ পেলে তারা উগুরে মঅ য়েমান পালুনোর্ ভারানঅ দিজ্।”
7ইয়েন পরেদি যোষেফে তা বাবপো যাকোবরে আনিনে ফরৌণ মুজুঙোত্ আঝিল্ গুরিলো, আর যাকোবে ফরৌণরে বর্ দিলো। 8ফরৌণে যাকোবরে পুজোর গুরিলো, “তর্ বয়জ্ কদক্ অলঅ?”
9যাকোবে কলঅ, “এ পিত্তিমীত্ কয়েক্দিনোর্ মানুচ্ ইজেবে মর্ একশঅ ত্রিশ বজর্ গেলঅ। এ দিনুন্ খুব বেশ্ নয়, আর সেদিনুন্ দুঘে দুঘে কাদি যেইয়্যেগোই। মাত্তর্ কয়েক্দিনোর্ মানুচ্ ইজেবে মর্ চোদ্দো গুট্টিগুনে যেদকদিন্ কাদেই যেইয়োন্ মুই সেদকদিন্ কাদেই ন-পারিম।” 10ইয়েন পরেদি যাকোবে ফরৌনরে বর্ দিইনে সিয়োত্তুন্ বিদেয়্ নিলো।
11যোষেফে তা বাবরে আর ভেইয়ুনোরে থিদেবর্ গুরিনে বজত্তি গুরিবার্ বেবস্থা গুরিলো। ফরৌণ উগুম মজিম্ মিসর্ দেজর্ বেগত্তুন্ গম্ জাগাগান তে তারার্ সোম্বোত্তি ইজেবে দান গুরিলো। জাগাগানর্ নাঙ্ এলঅ রামিষেষ। 12যোষেফে তা বাবরে, ভেইয়ুন্ আর তারা পরিবারুনোরে হানার্ জিনিস্ যুগেই দিয়া ধুরিলো। পুয়ো-ঝিগুনোরে গুণিনে সিয়েনি দিয়্যে অদঅ।
13পরেদি ভাদ-রাদ্তো এদক্ বেশ্ ওই উদিলোদে যে, গোদা দেজ্চানত্ কনজাগাত্ আর খানা ন-এলঅ। ভাদ-রাদ্তোর্ কারনে মিসর আর কনান দেজ্ছান্ এক্কুবারে থাদার ওই পুড়িলো। 14মিসর আর কনান দেজর্ মানুচ্চুনে যে শোজ্যগুন কিনিলাক্ সিগুনোর্ দাম ইজেবে যোষেফে সেই দ্বিয়েন্ দেজত্ যেদক্ টেঙা এলাক সিগুন্ তুলি আনিনে ফরৌণ রাজ্ঘরত্ জমা দিলো। 15যেক্কে মিসর আর কনান দেজর্ বেক্ টেঙাগুন্ ফুরেই গেলাক্ সেক্কে মিসরীয়গুনে যোষেফ ইধু এইনে কলাক্, “আমারে হেবাত্তে দে। আমি কি তঅ চোগো মুজুঙোত্ মুরি যেবং? টেঙা-পৌজে আমার্ যিগুন্ এলাক বেক্কুন্ শেজ্ ওইয়োন।”
16যোষেফে কলঅ, “সালে তমার গোরু-ভেড়াগুন্ বেক্কুন্ মরে দুয়ো। তমা টেঙাগুন্ যেক্কে ফুরেয়োন্ সেক্কে সিগুনোর্ বদলে মুই তমারে হানা দিম্।”
17সেক্কে তারা বেক্ গোরু-ভেড়াগুন্ যোষেফ ইধু আনা ধোজ্যন। ছাগল, ভেড়া, গোরু, ঘোড়া আর গাধার বদলে তে তারারে হানা দিয়্যে ধুরিলো। বেক্ য়েমানুন্ এগত্তর্ গুরিনে তে গোদা বজর্বো তারারে হাবেল। 18সে বজর্বো কাদি যানার পরেদি তার্ পরের্ বজরত্ মানুচ্চুনে এইনে যোষেফরে কলাক্, “গিরোজ ইধু আমি ন-লুগেবং, আমা টেঙা-পৌইজ্যে বেক্ খরচ্ ওই যেইয়োন্, আর আমা য়েমানুনো গিরোজর্। ইক্কিনে আমার এ কিয়্যেগান্ আর জাগা-ভূইয়ানি ছাড়া গিরোজরে দিবার্ মতন্ আর আমার কিচ্ছু নেই। 19সেনত্তে ভূই সুমুত্তো আমি বেক্কুনে তঅ চোগো মুজুঙোত্ কিত্তেই শেজ্ ওই যেবং? সিয়েনত্তে তুই আমারে আর আমা জাগা-ভূইয়ানি বেক্কানি নেযা, আর সিয়েনির্ বদলে আমারে হানা দে। জাগা-ভূইয়ানি সুমুত্তো আমি বেক্কুনে ফরৌণ চাগর্ ওইনে থেবং। ইয়েন পরেদি আমি যেনে মুরি ন-যেইনে পরাণে বাঁজি থেই পারিই সেনত্তে তুই আমারে কিজু বীজ্অ দে। সেক্কে আমা ভূইয়ানিয়ো বর্বাত্ ন-অবঅ।”
20সেক্কে যোষেফে মিসর দেজর বেক্ ভূইয়ানি ফরৌণ নাঙে কিনি নিলো। ভাদ-রাদ্ এদক্ বেশ্ অলদে যে, মিসরীয়গুনে বেক্কুনে তারার্ জাগা-ভূইয়ানি বিজিলাক্। এবাবোত্যেগুরি মিসর দেজর্ বেক্ জাগা-ভূইয়ানি ফরৌণ আদত্ এলঅ। 21যোষেফে মিসর্ দেজর এক ধুজিত্তুন্ আর এক ধুজি সং যিদুক্কুন্ মানুচ্ এলাক্ তারা বেক্কুনোরে শঅরত্তুন্ সোরেই আনিলো। 22তে বানা ধর্মগুরুগুনোর জাগা-ভূইয়ানি ন-কিনিলো। এ ধর্মগুরুগুনে ফরৌণত্তুন্ ভাতা পেদাক্ আর সিগুন্দোই তারা চুলিদাক্। সেনত্তে তারা ভূইয়ানি ন-বেজন্। 23যোষেফে মানুচ্চুনোরে কলঅ, “চঅ, ফরৌণ পক্ষত্তুন্ মুই এচ্চ্যে তমারে আর তমা জাগা-জোমিগানি কিনি নিলুং। তুমি ইক্কিনে এ বীজছুন্ নেযঅ, আর সিগুন্ লোইনে ভুইয়োত্ ফেলগোই। 24খেত-খেত্তি কাবিবার পরেদি তুমি বেক্ ফসলানির্ পাজ্ ভাগর্ এক ভাগ্ ফরৌণরে দিবা, আর বাগী চের্ ভাগ্ ভুইয়ো বীজোত্তেই আর নিজোর্, পরিবার মানুচ্চুনোত্যেই আর পুয়ো-ঝিগুনোর্ হেবাত্তে রাগেবা।”
25সেক্কে মানুচ্চুনে কলাক্, “তুই আমা পরানান্ বাজেয়োচ্। প্রভুর্ দোয়্যে পেইনে আমি ফরৌণ চাগর্ ওই থেবং।”
26পরেদি যোষেফে মিসর দেজ জাগা-জোমি পৌইদ্যেনে এ সুদোমান্ জারি গুরিলো, বেক্ ফসলর পাঁজ্ ভাগর্ এক ভাগ্ ফরৌণর অবঅ। এ সুদোমান্ এজঅ মিসর দেজত্ চলের্। বানা ধর্মগুরুগুনো ভুইয়ানি ফরৌণর্ সোম্বোত্তি ভিদিরে ন-পড়ে।
যাকোবর কোজোলী
27ইস্রায়েলীগুনে মিসর্ দেজ গোশনত্ বজত্তি গরা ধুরিলাক্। সিয়েনত্ তারা জাগা-জোমি গুরিলাক্। তারার্ ভালোক্কুন্ পুয়ো অলাক আর তারা জনেদি বোউত্ বাড়িলাক্। 28যাকোবে মিসর দেজত্ আরঅ সতর বজর্ বাঁজি এলঅ। সেনত্তে তে একশঅ সাতচল্লিশ্ বজর্ বাঁজি এলঅ। 29মরাণার্ কয়েক্দিন আগে ইস্রায়েলে তার্ পুয়ো যোষেফরে ডাগিনে কলঅ, “যুনি মঅ উগুরে তর্ টান্ থায় সালে মঅ দামানাগান তলে তর্ আত্তান্ রাগেইনে মরে কধা দে, তুই মর্ উগুরে তঅ কামানিত্ বিশ্বেজ্ রাগেবে। মরে মিসরত্ গোর্ ন-দিস্, 30কিত্তে মুই মর্ পুরোণি মানুচ্চুনো সমারে থেদুং চাং। তুই মর্ মরাকিয়্যেগান্ মিসর্ দেজত্তুন্ নিগিলে নিইনে মর্ পূরোণিমানুচ্চুনে যিয়েনত্ গোর্ পেইয়োন্ সিয়েনত্ মরে গোর্ দুয়ো।”
31সেক্কে যাকোবে কলঅ, “সালে তুই মইধু শমক্ গর্।” যোষেফে তাইধু শমক্ হেলঅ। সেক্কে ইস্রায়েলে বিচ্ছোন মাদান্দি তা মাদাবো নিগিরিনে গোজেনরে মনর্ ভোক্তি জানেল।
Currently Selected:
পত্থম 47: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
