পত্থম 48
48
মনঃশি আর ইফ্রয়িমরে যাকোবর বর্ দেনা
1ইয়েন কয়েকদিন পরেদি যোষেফে হবর্ পেলঅ, তা বাপ্পো অসুখ্ ওইয়্যে। সেক্কে তে তার্ দ্বিবে পুয়ো মনঃশি আর ইফ্রয়িমরে লগে নেযেইনে সিধু গেলঅ। 2যেক্কে যাকোবরে কুয়ো অলঅ, তা পুয়ো যোষেফে তা ইধু এচ্চ্যে, সেক্কে তে বলে বলে নিজোরে টানি তুলিনে বিচ্ছোনান্ উগুরে উদিনে বুয়োল। 3সে পরেদি যাকোব যোষেফরে কলঅ, “বেগত্তুন্ খেমতাবলা গোজেন কনান দেজর্ লূস শঅরত্ মরে দেগা দিইনে বর্ দিয়্যে।” 4তে মরে কোইয়্যেদে, মুই তরে ভালোক্কুন্ পুয়োর্ বাব্ অবার্ খেমতা দিলুং আর তঅ বংশর্ মানুচ্চুনোরে বাড়েই দিম। মুই তঅ ভিদিরেত্তুন্ ভালোক্কুন্ গুট্টির্ জাদ্ বানেম, আর তঅ পরেদি এ দেজ্ছান্ মুই উমরর্ সোম্বোত্তি ইজেবে তঅ বংশর্ মানুচ্চুনোরে দিম। 5মুই তইধু এবার্ আগেদি তর্ দ্বিবে পুয়ো মিসরত্ জর্ম ওইয়োন তারারে মঅ পুয়ো ইজেবে ধরা অবঅ। রূবেণ আর শিমিয়োন যেধোক্ক্যেন মর্ সেধোক্ক্যেন ইফ্রয়িম আর মনঃশিয়ো মর্। 6মাত্তর্ ইগুনোর্ পরেদি তর্ আর যে পুয়োগুন্ অবাক্ তারারে তর্ বিলিনেই ধরা অবঅ। সোম্বোত্তির্ গিরোজ্ অবার্ অক্তত্ মনঃশি বা ইফ্রয়িম নাঙে তারার্ সিয়েনি ওয়া পুড়িবো। 7পদ্দনত্তুন্ নিগিলিনে কনান দেজর্ ইফ্রাথত্তুন্ কিজু দূরোত্ থাগদে রাহেলে মুরি যেইয়্যে, সেনত্তে মুই খুব দুখ্ পেলুং। ইফ্রাথ পধথ্, অত্তাৎ বৈৎলেহম পধথ্ মুই তারে গোর্ দুয়োং।
8ইয়েন পরেদি যোষেফ পুয়োগুনো মোক্ক্যে রিনি চেইনে ইস্রায়েলে পুযোর্ গুরিলো, “ইগুন্ কন্না?”
9জোবত্ যোষেফে তা বাবরে কলঅ, “ইগুন্ মঅ পুয়ো। গোজেনে এ দেজত্ ইগুনোরে মরে দিয়্যে।”
ইস্রায়েলে কলঅ, “সিগুনোরে মইধু আনঅ। মুই তারারে বর্ দিবাত্তে চাং।”
10বুড়ো বয়জত্ চোগেদি দেগিবার্ খেমতা কম অনার্ কারনে ইস্রায়েলে গমেডালে ন-দেগের্। সেনত্তে যোষেফে তা পুয়োগুনোরে তা বাবঅ ইধু নেযেল। সেক্কে ইস্রায়েলে তারারে আজাগুরি ধুরিনে চুমিলো। 11তে যোষেফরে কলঅ, “মুই আর তঅ মুয়োন্ দিগিম্ বিলিনে ন-ভাবং, মাত্তর্ গোজেনে বানা তরে নয়, তঅ পুয়োগুনোরেয়ো মরে দেগিবাত্তে সুযোগ দিলো।”
12সেক্কে যোষেফে তা বাব ইত্তুন্ তা পুয়োগুনোরে সোরেইনে মাদিত্ মাঢা নিগিরিনে তা বাবরে জু জু দিলো। 13সে পরেদি যোষেফে তার দ্বিবে পুয়োরে আরঅ ইস্রায়েল ইধু আনিলো। তে ইফ্রয়িমরে ডেন্ আদন্দি ধুরিনে ইস্রায়েল বাঙেন্দি আর্ মনঃশিরে বাঙ্ আদন্দি ধুরিনে তা ডেন্ ডাগেদি রাগেল। 14মাত্তর্ ইস্রায়েলে চিবেচিপ্যে গুরিনে আত্তান্ বাবে দিইনে ডেন্ আত্তান্ যোষেফ চিগোন্ পুয়ো ইফ্রয়িম মাদাত্ রাগেল; আর মনঃশি যোষেফ দাঙর পুয়ো অলেয়ো তা মাদাত্ রাগেল বাঙ্ আত্তান্। 15সে পরেদি তে যোষেফরে বর্ দিইনে কলঅ,
“সেই গোজেন, যিবের মনে মন্জক্কাগুরি মর্ পূরোণি মানুজ্ অব্রাহাম আর ইস্হাকে চলিদো,
মঅ জীংকানির্ পোইল্যেত্তুন্ ধুরি এচ্চ্যে সং
যিবে মরে য়েমান্ চোড়েয়্যে ধোক্ক্যেন পালেই এজের্,
16সেই স্বর্গদূত্তো, যিবে মরে বেক্ দজাত্তুন্ উদ্ধোর্ গোজ্যে,
তে এ পুয়োগুনোরে বর্ দুয়োক্।
ইগুনোরে দিইনে মর্ আর মঅ পুরোণি মানুজ্
অব্রাহাম আর ইসহাক নাঙানি জিংকানিবর্ বাঁজি থোক্।
আমা দেজ ভিদিরে তারা বংশর্ মানুচ্চুনে
জনেদি ভালোক্কুন্ বাড়োদোক্।”
17-18বাবপো তা ডেন্ আত্তান্ ইফ্রয়িম মাদা উগুরে রাগেয়্যে দেগিনে যোষেফে হুজি ন-অলঅ। তে সিয়েন্ ইফ্রয়িম মাদা উগুরেত্তুন্ সোরেইনে মনঃশি মাদা উগুরে রাগেবার্ আজায়্ তা বাবঅ আত্তান্ ধুরিনে কলঅ, “বাবা, এবাবোত্যে নয়। ইবে মর্ দাঙর্ পুয়োবো। তঅ ডেন্ আত্তান্ ইবে মাদা উগুরে রাগা।”
19মাত্তর্ তা বাবে সেক্কে আবিত্তি জানেইনে কলঅ, “মুই সিয়েন্ হবর্ পাং বাবা, মুই দঅ হবর্ পাং। তেয়ো দাঙর্ অবঅ আর তা বংশ মানুচ্চুনে এক্কো জাদ্ ওইনে উদিবাক্। মাত্তর্ তা চিগোন্ ভেইবো তাত্তুন্ বেশ্ দাঙর্ অবঅ আর্ তা বংশ মানুচ্চুনো ভিদিরেত্তুন্ ভালোক্কুন্ জাদ্ উদিবাক্।”
20সে পরেদি ইস্রায়েল পুয়ো দ্বিবেরে বর্ দিলো আর কলঅ, “ইস্রায়েলীগুনে কাররে বর্ দিবার্ অক্তত্ তমা নাঙানি কবাক্, ‘গোজেনে তরে ইফ্রয়িম আর মনঃশি ধোক্ক্যেন গোরোক্।’” ইয়েন্ কোইনে তে মনঃশিত্তুন্ ইফ্রয়িমরে দাঙর্ বানেল।
21সে পরেদি ইস্রায়েলে যোষেফরে কলঅ, “চাহ্, মর্ মরণর্ অক্ত প্রায় গোণেই এচ্চ্যে। মাত্তর্ গোজেনে তমা লগে থেবঅ আর তমা পুরোণি মানুচ্চুনো দেজত্ তমারে ফিরেই নেযেব। 22তমা ভেইয়ুনোত্তুন্ বেশ্ সোম্বোত্তি মুই তরে দিলুং। যে জাগাগান্ মুই তলোয়ার আর ধনুলোই যুদ্ধো গুরিনে ইমোরীয়গুনো আঢত্তুন্ পেইয়োং সে জাগাগান্ মুই তরে দিলুং।”
Currently Selected:
পত্থম 48: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
