Aposkạmi 11
11
Jerusalem manḍerre Patrasakʼ roṛdogokʼ
1Boṅgan hoṛ jạtrenko hõ Isorakʼ kathareko pạtiạu akana mente ona katha do apostolko ar goṭa Jihudạren biswạsi boehako hõko ańjomkeda. 2Onate Patras do Jerusalemteye hecʼen khan biswạsiko modren okoekoko khatna ocoakan tahẽkan onko do uni dusikedeteko metadea, 3“Am do begor khatna akan hoṛkoakʼ oṛakʼte senkate onko soṅgem jom-ńũiyetʼ kana.”
4Unre Patras do pạhil khon ehopʼkate cetʼ cetʼko hoylen ona mitʼ mitʼte bujhạuatʼkoteye metatʼkoa, 5“Joppa nagrahareń koejoṅkan tahẽkanre mitʼṭecʼ dorsoniń ńelkeda. Iń doń ńelkeda mitʼṭecʼ cador lekanakʼ pon konare sapʼ akatʼ serma khon iń ṭhen pheḍ hecʼena. 6Ar mońjteń ạri bạndhiketʼ khan onare ạḍi lekan janwarko, bir janwarko, leńokʼ ṭunḍạṅko ar coṭren cẽṛẽko menakʼkoa menteń ńelkeda. 7Ar okoe coṅ mitạńkaniń ańjomkedea, ‘E Patras, ma beredokʼme ar gocʼkate jomkom.’
8Iń doń menkeda, baṅa, E Probhu Isor, ona do ohoge hoedaṛelena. Besapha ar chutakʼ jãhãnakʼge tishõ ińakʼ mocare do baṅ boloakana.
9“Ona tayom serma khon dosar dhao roṛ ańjomena, ‘Isor okaṭakʼe sapha akatʼ ona do be sonotakʼ alom metakʼa.’ 10Nonkage pe dhao hoyena, ar ona tayom jotowakʼ do arhõ sermate rakapʼ ocoyena.
11“Ar ona são sãote okaṭakʼ oṛakʼreń tahẽkan ona oṛakʼre pe hoṛ do hecʼkateko teṅgoyena. Onko do Kạisạriạ khonko kol ocoakan tahẽkana. 12Unre sonot Jiu do begor digdhạte onko sãote calakʼe metadińạ. Ar iń tulucʼ noko turui boeha hõko sen torayena. Ale do uni hoṛakʼ oṛakʼtele boloyena one okoe do ińe hohowạdiń tahẽkan. 13Uni do mitʼṭen serma goḍet acʼakʼ oṛakʼre cetʼlekae ńellede onae lạiyatʼlea. Uni serma goḍete metade tahẽkana, ‘Simon, okoe do Patrasko metaekan, uni hoho ạguiye lạgitʼ am do Joppa nagrahate hoṛ kolkom. 14Ar uni okako kathae lạiyam, ona kathatege am ar am gharońjren sanam hoṛ kại khon bańcaope ńama.’
15“Sonot Jiu etohopʼre cetʼleka aboko cetanreye hecʼlen, onkage galmaraoiń ehopʼketʼ khan onko cetanreye hecʼena. 16#Apos 1.5 Unre Probhu Isore roṛletʼakʼ katha disạ hecʼạdińạ, ‘Johan do dakʼteye bạptisetʼkokan tahẽkana, menkhan ape do sonot Jiutepe bạptis ocokʼa.’ 17Enḍekhan Probhu Jisu Mạsire bon pạtiạulenre Isor okaṭakʼ dane ematʼbon tahẽkan inạ mitʼ dange uni do onko hõe ematʼko khan iń doń celekante, Isoriń akoṭ daṛekea?”
18Noa katha ańjomkate Jihudạren biswạsiko do begor ạnḍuṅte Isor sarhaoateko menkeda, “Isor do boṅgan hoṛ jạtrenko hõ kại khon mon ạcurkate jion ńam lạgitʼ ạte em akatʼkoa.”
Siriạ disạm reakʼ Antiokiạ manḍer
19 #
Apos 8.1-4
Ado Stephan babot hoyen santao iạte okoekoko chirchạtur akan tahẽkan onko do Phoenikiạ, Kupros ar Siriạ disạm reakʼ Antiokiạ hạbicʼ senkate eken Jihudiko ṭhenge Isorakʼ kathako lạikeda. 20Menkhan onko modre adomko do Antiokiạte senkate Junạni pạrsiren hoṛko ṭhen hõ Probhu Jisu reaṅ bhage sombat porcarko dhurạuena. Noko do Kupros dip ar Kurene nagraharen hoṛko tahẽkana. 21Isorakʼ ti onko cetanre tahẽkante ạḍi utạr hoṛ do Probhu Isorreko pạtiạuente uni secʼko ạcurena.
22Ado Jerusalem manḍerren hoṛko noa sombatko ańjomketʼ khan onko do Antiokiạte Barnabasko kolkadea. 23Ar Antiokiạren hoṛko Isorakʼ dayako ńamakada menteye ńelketʼ khan Barnabas do ạḍiye rạskạyena. Onko jemon goṭa ontorte Probhu Isorre biswạsko tahen onate uni do sanamkoe sikhạu paṛhaoketʼkoa. 24Barnabas do mitʼṭen bhage hoṛe tahẽkana uni do sonot Jiu ar biswạste hõ perecʼ akane tahẽkana. Unre Probhu Isor do ḍher hoṛge acʼ apnar ṭhene ạguletʼkoa.
25Noa tayom Barnabas do Sạul sendra ńame lạgitʼ Tạrsus nagrahateye calaoena, 26ar uniye ńamkede khan Antiokiạteye ạgukedea. Barnabas ar Sạul do goṭa bochor manḍerren hoṛko sãotekin tahẽyena ar ạḍi utạr hoṛkin cetʼatʼkoa. Ar noa Antiokiạrege celako do pạhil Khristanko ńumocoyena.
27Onako dinre adom nạbiko do Jerusalem khon Antiokiạteko hecʼena. 28#Apos 21.10 Onko modren Agabus ńutuman mitʼ hoṛ doe teṅgoyente sonot Jiuakʼ ạyurteye lại lahakeda je, goṭa Rom disạmre mitʼṭecʼ maraṅ akal hoyokʼa. (Ona do Klạudius raj oktere hoylena.)
29Unre celako doko goṭakeda, Jihudạ disạmren biswạsi boehako goṛowako lạgitʼ apan ạpin daṛe leka onko do jemon ṭakako kol. Arko onkaletʼgea. 30Onko do Barnabas ar Sạulakʼ tite Jihudạ manḍerren maraṅ mukhiyạko ṭhen ona goṛoko kolleda.
Currently Selected:
Aposkạmi 11: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
