Aposkạmi 12
12
Patrase aṛakʼ ocoyen
1Ona jokhecʼ Herod raj do santaoko lạgitʼ manḍerren adom hoṛkoe sapʼ ạguketʼkoa. 2Uni do Johanren boeha Jakob tarwaṛeteye khũn ocokedea. 3Onate Jihudikoko kusiakana menteye ńelketʼ khan uni do Patras hõ sabe lạgitʼe calaoena. Noa ghoṭna do bin khạmiyanakʼ piṭhạ porob jokhecʼ hoylena. 4#Exo 12.1-27 Uni do Patras sapʼkate hajotreye bhoraokedea. Ar popon hoṛkate pạri pạrite horhoye lạgitʼ palṭonkoe bharatʼkoa. Herod doe goṭakeda, bańcaokʼ porob tayom bicạre lạgitʼ Patras do hoṛko samaṅreye oḍok ạguiyea. 5Onatege Patras do hajotreye doho ocokʼkan tahẽkana. Menkhan manḍerren hoṛko do uni lạgitʼ Isor ṭhen mitʼ monteko koejoṅkan tahẽkana.
6Oka hilokʼ Herod do Patras bicạre lạgitʼe oḍok ạguiye ona laha ńindạ Patras do barea palṭon talareye jạpitʼ akatʼ tahẽkana. Uni do barea sikṛiteko tolakade tahẽkana ar pahradarko do duạrreko pahrakan tahẽkana. 7Unre Probhu Isorren mitʼṭen goḍet do ackage hecʼkate onḍeye teṅgoyena. Onate hajot oṛakʼ reakʼ ona kandhare marsal bamberena. Serma goḍet do Patras kokhare ceṭakʼkedeteye ebhenkedea are metadea, “Usạra beretʼ hodokʼme.” Ar inạtege Patrasakʼ banar ti khon sikṛi do ńurgotʼena.
8Unre serma goḍet do Patrase metadea, “Ma paṭhe keṭejokʼme, ar jaṅgare panahi horogme.” Khan Patras doe onkakeda. Ar serma goḍet do uniye metadea, “Amakʼ oyonakʼte oyokʼme, ar pańjańme.” 9Patras do uni tayom tayomte hajot oṛakʼ khon bahreteye oḍok hecʼena, menkhan bae bujhạu daṛeada, serma goḍet hotete hoyokʼ kanakʼ do sạrikana mente. Uni doe hudiskeda dorsone ńeńelkana. 10Unkin do pạhil ar dosar pahradarko kin paromketʼko khan nagrahate bolokʼ mẽṛhẽtʼ silpiń duạr ṭhenkin seṭerena. Ar silpiń do acʼtege jhicʼena ar unkin do ona talatekin oḍok hecʼena. Ado mitʼṭecʼ hortekin calakʼkan tahẽkanre serma goḍet do ackage Patrase bạgi oṭowadea.
11Unre Patras do disạ ạcurenteye menkeda, “Ńitokʼ do sạrigeń bujhạu daṛeakʼ kana, Probhu Isorge acʼren goḍete kolkedete Herodakʼ ti ar Jihudikoakʼ sanam bạṛicʼ phorphundi khone bańcao akadińạ.”
12Noa kathae bujhạuketʼ khan uni do Johanren eṅgat Mạriạmakʼ oṛakʼteye calaoena. Nui Johan do Mark hõko metaekan tahẽkana. Ar ona oṛakʼre do aema hoṛ mitʼ ṭhen jarwakateko koejoṅkan tahẽkana. 13Patras do bahre silpińe ṭhopʼ ṭhopʼketʼ khan Roda ńutuman mitʼṭen kạ̃ṛmĩ kuṛi silpiń jhicʼ lạgitʼe hecʼena. 14Uni do Patrasakʼ aṛaṅe oromketʼtae khan nunạkʼe rạskạyena je, silpiń jhicʼ baṅkate bhitrite ńir bolokateye lạiyatʼkoa, “Patras do duạr ṭhene teṅgo akana mente.”
15Unre celako do kuṛiko metadea, “Amakʼ bohokʼ do bạṛicʼ akantama.” Menkhan uni do artetʼ murukteye menetʼkante onkoko menkeda, “Enḍekhan uni do Patrasren rukhiyạicʼ goḍet kanae.”
16Patras do silpiń ṭhopʼ ṭhopʼtegeye tahẽyena. Unre celako do silpińko jhicʼketʼ khan Patras ńelkedeteko ṭhak utạrena. 17Patras do thirokʼ lạgitʼ titeye isạrawatʼkoa ar hajot khon Probhu Isor cetʼlekateye oḍok ạgukede onae baḍae ocoketʼkoa. Ar mucạtʼreye metatʼkoa, “Noa khobor do Jakob ar eṭakʼ boehako hõ lạiyakope.” Noa katha menkate uni doe oḍokente eṭakʼ jaegateye calaoena.
18Ado setakʼen khan Patrase okayena mente palṭonko talare gulmal hoyena. 19Herod do ạḍi mońjteye sendrakedea, menkhan bae ńamledete pahradarkoe kuliketʼkoa ar tayomte pahradarko gocʼko reaṅe hukumkeda. Ona tayom Herod do Jihudạ khon Kạisạriạteye calaoena ar onḍe thoṛa dine tahẽyena.
Herodakʼ gujukʼ
20Ona oktere Herod do Tur ar Sidon nagraharen hoṛko cetanre ạḍiye edreyena. Unre onḍenko hoṛ do riạu mitʼkate Herod sãote ńapamokʼ lạgitʼko calaoena. Ar Blastos ńutuman rajakʼ giticʼ oṛakʼren kạmiạyicʼko rạmjạukedete onko do raj sãote sulukokʼ reakʼko koekeda, ente Herod rajakʼ disạm khonge ako lạgitʼ jomakʼ do hijukʼ kan tahẽkana.
21Unre Herod do mitʼṭecʼ dine goṭakeda. Ar ona dinre uni do raj kicricʼ horokʼkate siṅghạsonreye duṛupʼena ar onko hoṛe galmaraoatʼkoa. 22Onko do uniyakʼ katha ańjomkate hohowateko menkeda, “Noa do debakʼ aṛaṅ kana, manwawakʼ do baṅa.” 23Herod do unre Isor bae sarhaoledete Probhu Isorren mitʼṭen goḍet do uniye ńẽtʼkedea, arko tejokedete uni doe gocʼena.
24Menkhan Isorakʼ katha do pasnao idiyena ar aema hoṛ onateko pạtiạuena.
25Barnabas ar Sạul do sapʼdapʼ kạmikin purạuketʼ khan Johankin soṅge torakedete Jerusalemteko ruạṛ calaoena. Ar nui Johange Mark hõko metaekan tahẽkana.
Currently Selected:
Aposkạmi 12: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
