Aposkạmi 13
13
Barnabas ar Sạulakʼ porcar
1Antiokiạ manḍerre do thoṛa nạbi ar cecetʼkoko tahẽkana. Onkoakʼ ńutum do Barnabas, Nigerko metaekan Simeon, Kurene nagraharen Lukius, disạm cakʼlaoyicʼ Herod sãoteye ạsul haralen Manaen ar Sạul. 2Onko do upạskate Probhu Isorko sewawaekan tahẽkanre sonot Jiu do onkoe metatʼkoa, “Barnabas ar Sạul oka kạmi lạgitʼ iń hohoakatʼkin, ińakʼ ona kạmi lạgitʼ ńitokʼ unkin baṛe begarkinpe.” 3Unre onko do upạskateko koejoṅkeda arko capoketʼkinte unkinko bidạkatʼkinạ.
Kupros Dipre
4Ado sonot Jiu hotetekin kol ocoyen khan Barnabas ar Sạul do Seleukiạtekin rakapʼ calaoena. Ar onḍe khon jahajte unkin do Kupros diptekin senena. 5Salamisre seṭerkate unkin do Jihudikoakʼ sunạgogkore Isorakʼ kathakin porcarkeda. Unre goṛoyicʼ lekate Johan hõ unkin sãoteye tahẽkana.
6Ado goṭa dipkin dãṛã mucạtʼketʼ khan unkin do Paphos hạbicʼkin hecʼena ar onḍe do Bar-Jisu ńutuman mitʼṭen Jihudi jạdu udukʼicʼ eṛe nạbikin ńamkedea. 7Uni eṛe nạbi do Eluma, metakʼme jạdu alako metaekan tahẽkana. Uni jạdu udukʼicʼ do disạm cakʼlaoyicʼ Sergius Pạulusren mitʼṭen gateye tahẽkana ar uni disạm cakʼlaoyicʼ do mitʼṭen budan hoṛgeye tahẽkana. Uni do Isorakʼ katha ańjom lạgitʼ Barnabas ar Sạule hoho ạgu ocoketʼkina. 8Menkhan Eluma do Barnabas ar Sạul tạkicʼkine ehopʼkeda ar disạm cakʼlaoyicʼ hõ Jisure pạtiạukʼ khon ruạṛe lạgitʼe kurumuṭukeda. 9Unre Sạul okoe do Pạulko metaekan uni do sonot Jiuteye perecʼente Eluma secʼ beṅgetʼ uricʼkateye metadea, 10“Am do Soetanren hopon ar joto bhageakʼren bạiri kanam. Amre do joto lekan phạsiara ar bedhoromge menakʼa. Probhu Isorakʼ sojhe horko konḍeae do cetʼ bam bạgiya? 11Ńelme, Probhu Isorakʼ ti do am upạrte rakapʼ akana. Am dom kãṛãkʼa ar thoṛa din hạbicʼ siń cando reakʼ marsal bam ńelńama.”
Ar unrege uni do dhund ar ńut paṛaoadete hoṛe ńamkoa mente onte note ṭạmḍạu baṛaye ehopʼena. 12Noako ńelte uni disạm cakʼlaoyicʼ do Probhu Isorreye biswạsena, ente Probhu Isor babotre oka cecetʼakʼe ńamletʼ onate uni doe hahaṛalena.
Pisidiạ disạm reakʼ Antiokiạre
13Noa tayom Pạul ar uniren sãotenko do jahajte Paphos khon Pamphuliạ disạm reakʼ Perga nagrahateko calaoena. Unre Johan do onko bạgikate Jerusalemteye ruạṛ senena. 14Tayomte onko do Perga khon Pisidiạ disạm reakʼ Antiokiạ nagrahateko senena ar jirạukʼ mãhãre sunạgogre bolokateko duṛupʼena. 15Ado sonot sostor reakʼ ạn-ạri ar nạbikoakʼ puthi khon paṛhao sạten khan sunạgogren mukhiyạko do onkoko metatʼkoa, “E boehako, jãhãn sikhạuna katha menakʼtape khan ma roṛpe.”
16Unre Pạul doe teṅgoyena ar ti tulkateye menkeda, “E Israelko ar Isor botoraekan boṅgan hoṛ jạtrenko ańjompe baṛe. 17-18#Exo 1.7; Exo 12.51 #Num 14.34; Bib 1.31 Israel jạtren Isor do aboren hapṛamkoe bachaoletʼkoa ar Misor disạmreko tahẽkanre uni doe usul ocoletʼkoa. Ar daṛeanakʼ tite ona disạm khone oḍok ạguketʼkoa ar pongel bochor hạbicʼ hahaṅkarre onkoakʼ bạṛicʼ colonkoe sahaoketʼtakoa. 19#Bib 7.1; Josu 14.1 Ona tayom Kanan disạmren eae jạtrenkoe maraoketʼkote acʼren hoṛko ona disạm cetanre ạidạriye ematʼko tahẽkana. 20#Bikʼ 2.16; 1 Sam 3.20 Noako sanamakʼ hoy purạukʼte pon sae mõṛẽgel bochor lagaolena.
“Noa tayom Sạmuel nạbi hạbicʼ Isor do bicạricʼe ematʼko tahẽkana. 21#1 Sam 8.5; 1 Sam 10.21 Ona tayom disạmren hoṛko do rajko khojkedea. Unre uni do Benjamin khũṭren, Kisren hopon Sạulgeye ematʼkoa. Sạul do pongel bochor hạbicʼ raje calaoketʼa. 22#1 Sam 13.14; 1 Sam 16.12; Ser 89.20 Ona tayom Isor do Sạul ocokʼkate Dạude rajkedea. Uni do Dạud reaṅe menakada, ‘Jisạiren hopon Dạud do ińakʼ mone lekan mitʼṭen hoṛiń ńam akadea. Uni do ińakʼ sanam monejoṅakʼkoe purạutińạ.’ 23Isor do acʼakʼ gokʼakʼ lekage noko hoṛkoakʼ bõs khon babańcaoicʼ Jisuge Israelko ṭhene sodorkedea. 24#Mrk 1.4; Luk 3.3 Jisu hijukʼ lahare sanam Israelko ṭhen Johan do noa menteye porcarleda je, hoṛko do kại khon mon ạcurkate bạptisma hatao lek takoa. 25#Jhn 1.20; Mat 3.11; Mrk 1.7; Luk 3.16; Jhn 1.27 Johan do acʼakʼ kạmiye mucạtʼ ạguiyetʼ tahẽkanreye menleda, ‘iń doń okoe kana mentepe hudisetʼkana? Iń do uni Mạsi doń baṅkana. Uni do iń tayomteye daraekana, iń do uniyakʼ panahi raṛaetae lek hõń baṅkana.’
26“E boehako, Abrahamren hoponko ar Isor botoraekanko, kại khon bańcao reakʼ noa khobor do abon ṭhenge kolakana. 27Jerusalemren hoṛko ar onkoren mukhiyạko do Jisu bako oromledea. Noa chaḍa nạbikoakʼ okaṭakʼ katha jirạukʼ mãhãre jaoge paṛhao idikʼkan tahẽkan, ona katha hõ onko do bako bujhạu daṛeada; onate Jisuko dusikedete ona kathako purạukeda. 28#Mat 27.22,23; Mrk 15.13,14; Luk 23.21-23; Jhn 19.15 Onko do Jisuakʼ gocʼ ocokʼ reaṅ jãhãn dos bako ńamletʼtaere hõ Pilạtko metadea jemon uniye goje. 29#Mat 27.57-61; Mrk 15.42-47; Luk 23.50-56; Jhn 19.38-42 Sonot sostorre uni reaṅ cetʼko ol tahẽkan ona sanamakʼ purạuen khan onko do kurus khon pheḍkedeteko topakadea. 30Menkhan Isor do gocʼko khon uniye jiwetʼ beretʼkedea. 31#Apos 1.3 Gạlil khon okoeko uni sãote Jerusalemteko hecʼlen, onko do aema din hạbicʼ uniko ńelledea. Ar onkoge ńitokʼ do aboren hoṛko ṭhen uni reaṅ gohako emeda.
32 #
Ser 2.7
“Ạliń do apeko ṭhen noa bhage sombat liń emape kana, aboren hapṛamko ṭhen Isor okaṭakʼe gokʼletʼ tahẽkan, 33ona do onkoren hoponko lạgitʼ, metakʼme abo lạgitʼ Jisu gocʼko khone jiwetʼ beretʼkedeteye purạu akada. Noa reaṅ do dosarakʼ sereńre olakana:
Am dom ińren hopon kana,
teheńge amren apatiń hoyena.
34 #
Jes 55.3 (LXX) Isor do gocʼko khon uniye jiwetʼ akadea ar uniyakʼ hoṛmo do tishõ baṅ nosṭokʼtaea, ona kathakore Isore menakada,
‘Sonot ar sạriyakʼ bhor reakʼ
Dạud ṭhen okań kiriyạlen,
ona do amiń emama.’
35 #
Ser 16.10
Ona reaṅ ar mitʼ jaegare olakana:
Amren sonoticʼ do
alom sea ocoyea.
36“Dạud do ona piṛhiren hoṛko modre Isorakʼ monejoṅakʼe purạuketʼ tayome gocʼena. Ar uniren hapṛamko sãoteko topakede khan uniyakʼ hoṛmo do nosṭoyena. 37Menkhan Isor do okoe gocʼko khone jiwetʼ beretʼkede, uniyakʼ hoṛmo do baṅ sealena. 38Onate E ińren boehako, ape do baḍae joṅpe, Jisu hotetege ape ṭhen kại reakʼ ikạ ńam reaṅ jạhirokʼ kana. 39Ape do Moseyakʼ ạn-ạri hotete kại reakʼ sạjại khon bape rukhiyạ akana, menkhan jãhãege Jisureye pạtiạukʼ, uni do kại reakʼ sạjại khon bańcaoe ńama. 40Onate ape do sontorokʼpe, jemon nạbikoko roṛakatʼ noako apere alo paṛaokʼ:
41 #
Hab 1.5 (LXX) Ape okoe do Isor sãotepe khiloḍkan, ańjompe
ape do bhaṛokʼpe ar mohor meṭaokʼpe;
ente ape bidạlrege iń do nonkanakʼ iń kạmiya
one uniyakʼ katha ohogepe pạtiạulen,
jãhãeye lạiyapere hõ baṅa.”
42Ado Pạul ar Barnabas sunạgog khonkin oḍok calakʼkan tahẽkan jokhecʼ hoṛkoko nehõratʼkinạ jemon hijukʼkan jirạukʼ mãhãre noako reaṅ arhõkin galmaraoako. 43Ar sunạgog khonko calao baṛayen khan ạḍi utạr Jihudiko ar Jihudi dhoromre pạtiạu akan Isor botoraekanko do Pạul ar Barnabas tạkinko pańjaketʼkinạ. Unre Pạul ar Barnabas do onkokin galmaraoatʼkoa, ar Isorakʼ dayare jemon khạtirko tahen ona lạgitʼkin udgạuketʼkoa.
44Ado dosarakʼ jirạukʼ mãhãre nagraharen sanam hoṛko do Isorakʼ katha ańjom lạgitʼ mitʼ ṭhenko jarwayena. 45Ar nunạkʼ hoṛakʼ bhiṛ ńelte Jihudiko do hiskạteko perecʼena ar Pạul okae menetʼkan tahẽkan ona upạrte aema lekan kathakote nisṛạueko ehopʼena. 46Unre Pạul ar Barnabas do dilkate kin roṛ ruạṛatʼkoa, “Pạhilre ape ṭhen Isorakʼ katha lạlại jạruṛ tahẽkan tạlińa, menkhan tinre ape do bape moneyada ar jaejug jion ńam lạgitʼ apete lek bape bujhạulena unre ạliń do boṅgan hoṛ jạtrenko secʼliń ạcurokʼkana. 47#Jes 42.6; 49.6 Ente Probhu Isor do noa kathae men akada,
‘boṅgan hoṛ jạtrenko ṭhen iń do
mitʼṭecʼ marsal lekań dohoakatʼmea,
jemon am hotete goṭa dhạrtiren hoṛ do
kại khon bańcaoko ńam.’ ”
48Noa katha ańjomkate boṅgan hoṛ jạtrenko doko rạskạyena ar Probhu Isorakʼ kathako sarhaokeda; ar jaejug jion ńam lạgitʼ Isor tinạkʼe niṭ dohoakatʼko tahẽkan onko doko pạtiạuena.
49Ar Probhuakʼ katha do onako ṭoṭha reakʼ sanam jaegakore pasnao idiyena. 50Menkhan Jihudiko do Isor bhoktiae bhodro maejiuko ar nagraharen manotan hoṛkoko udgạuketʼkoa. Nonkate onko do Pạul ar Barnabas upạrte khedko calaoketʼte ona ṭoṭha khonko oḍok gotʼkatʼ kinạ. 51#Mat 10.14; Mrk 6.11; Luk 9.5; 10.11 Unre Pạul ar Barnabas do onko hoṛko upạrte ạkinakʼ jaṅga reakʼ dhuṛikin koṭa giḍi oṭokatʼte Ikonium nagrahatekin calaoena. 52Menkhan onḍenko cela do rạskạ ar sonot Jiuteko perecʼena.
Currently Selected:
Aposkạmi 13: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
