Aposkạmi 14
14
Ikonium nagrahare
1Ikonium nagrahare Pạul ar Barnabas do ạkinakʼ cạli leka Jihudikoakʼ sunạgogkote kin boloyena. Unkin do onḍe nonkan kathakin galmaraoatʼkoa je, Jihudiko ar Junạniko khon ạḍi utạr hoṛko pạtiạuena. 2Menkhan okoeko Jihudi bako pạtiạulen onko do boṅgan hoṛ jạtrenkoko uskurketʼkote biswạsi boehako upạrte onkoakʼ monko bạṛicʼketʼtakoa. 3Pạul ar Barnabas do ona nagrahare thoṛa dinkin tahẽyena ar dil salakʼ Probhu Isorakʼ kathakin galmaraoatʼkoa. Ar Probhu Isorakʼ daya reaṅ okakin porcaretʼ tahẽkan ona katha sạrikana mente sạbud lạgitʼ Probhu Isor do Pạul ar Barnabas hotete cinhạko ar hahaṛawakʼkoe hoyocokeda. 4Onate nagraharen hoṛko doko begarena; adomko do Jihudiko secʼ ar adomko do apostol secʼko calaoena. 5Unre boṅgan hoṛ jạtrenko ar Jihudikoren mukhiyạko do jarwa mitʼkate Pạul ar Barnabas santaokin ar dhirite tińkin lạgitʼko solhawana. 6Menkhan Pạul ar Barnabas do onakin baḍaeketʼ khan Lukạuniạ Prodes reakʼ Lustrạ ar Derbe ar ona aḍe pase ṭoṭhatekin dạṛkeda. 7Onako ṭoṭhare unkin do Mạsi reaṅ bhage sombat porcarkin dhurạuena.
Lustrạ ar Derbe nagrahare
8Lustrạ nagrahare mitʼṭen leḍha hoṛe duṛupʼkokʼkan tahẽkana. Uni do jonom khonge leḍhageye tahẽkana ar tishõ bae taṛamakatʼ tahẽkana. 9-10Ar uni hõ Pạulakʼ galmaraoe ańjomkan tahẽkana. Unre Pạul do uni secʼ sojheteye beṅgetʼkeda ar boge ocokʼ lạgitʼ biswạs menakʼtaea menteye ńelkede khan ãṭ aṛaṅte hohowateye metadea, “Amakʼ jaṅgate sojhete teṅgonme.” Ar inạtege uni hoṛ doe don beretʼente taṛame dhurạuena.
11Pạul okae kạmiketʼ ona ńelte hoṛko do Lukạuniạ pạrsite hohowateko menkeda, “Debko manwa chinte abo ṭhenko pheḍ hecʼakana.” 12Onate Barnabas do Jupiṭer ar Pạul do kathae roroṛkan tahẽkante Merkuriko ńutumkedea. 13Jupiṭer debakʼ than do nagraha bahrere tahẽkana. Ar uni debren naeke do nagraha reakʼ duạr ṭhen daṅgra ar malae ạgukeda, ente naeke ar sanam hoṛko do Pạul ar Barnabas janwar dãṛẽ emakin lạgitʼko menetʼ tahẽkana.
14Barnabas ar Pạul do ona kathakin ańjomketʼ khan ạkinakʼ kicricʼkin oṛecʼketʼte hoṛko ṭhenkin ńir calaoena ar ãṭ aṛaṅtekin menkeda, 15#Exo 20.11; Ser 146.6 “E ho gateko, ape do cedakʼ noakope onkayeda? Ạliń hõ coṅ ape leka duk suk jojom manwakange liń. Ạliń do ape ṭhen bhage sombat liń porcareda jemon noa ạuṛiyakʼko khon jiwetʼ Isor secʼpe, ạcurokʼ. Unige serma ar ot ar jalapuri ar onare menakʼ jotowakʼe sirjạu akada. 16Laha piṛhiren sanamkoge uni do akoakʼ sana lekageye sen ocowatʼko tahẽkana, 17menkhan enhõ uni do jao okte acʼ reaṅ gohae emakada. Ente uni do serma khon dakʼe emokʼkana ar okte nạpitre phosole dan abonkante dayae udukʼape kana. Uni do asambheṛ jomakʼe dan apekante apeakʼ mon do rạskạteye perecʼetʼtapea.” 18Noako kathakin galmaraoatʼkore hõ janwar dãṛẽ khon hoṛko thir ocoko lạgitʼ unkin do ạḍi haronokʼ hoyentạkina.
19Ado Antiokiạ ar Ikonium khon adom Jihudiko hecʼkate Pạul ar Barnabas upạrte hoṛkoko bhiṅgṛạuketʼkoa. Unre Pạul do dhiriteko tińkedea ar gocʼenae hudiskate nagraha bahreteko or idikadea. 20Menkhan tayomte biswạsiko uni beṛhaeteko teṅgoyen khan uni doe beretʼente nagrahateye ruạṛ calaoena. Ar dosar hilokʼ acʼ ar Barnabas do Derbe nagrahatekin calaoena.
21-22Ado Derbere bhage sombat porcarkate Pạul ar Barnabas do ạḍi utạrkin celaketʼkoa. Ona tayom Lustra, Ikonium ar Pisidiạ Prodes reakʼ Antiokiạte ruạṛ senkate onḍenko celakoakʼ biswạskin kajakketʼte onkokin daṛe ocoketʼkoa ar pạtiạure ṭarhao tahen lạgitʼkin udgạuketʼkoa. Unkinkin menkeda, “Isorakʼ rajte bolokʼ lạgitʼ ạḍi utạr duk jojom hoyokʼ tabona.” 23Unkin do mitʼke mitʼ manḍerre maraṅ mukhiyạkin bahalketʼkoa ar okoe Probhu Isor cetanreko biswạs akan tahẽkan, koejoṅ ar upạste uni Probhu Isorakʼ tirege manḍerren hoṛkokin jimạkatʼkoa.
Siriạ disạm reakʼ Antiokiạte kin ruạṛkan
24Tayomte Pạul ar Barnabas do Pisidiạ Prodes talatekin parom calaoente Pamphuliạ Prodeste kin seṭerena. 25Unkin do Perga nagrahare Isorakʼ katha porcarkate Attaliạ bondortekin calaoena. 26Ar Attaliạ khon jahajte Siriạ disạm reakʼ Antiokiạte kin ruạṛ hecʼena. Ar oka kạmi ńitkin mucạtʼketʼ ona kạmi lạgitʼge noa Antiokiạ khonge Isorakʼ dayarekin jimạ ocolena. 27Ado Antiokiạtekin seṭeren khan unkin do manḍerren sanamko mitʼ ṭhenkin jarwaketʼkoa ar Isor ạkin hotete okakoe kạmiketʼ ona sanamakʼ kin lạiyatʼkoa. Ar cetʼlekate Isor do boṅgan hoṛ jạtrenko Mạsire biswạs reakʼ duạre jhicʼ akawatʼko ona reakʼ hõkin lạiyatʼkoa. 28Ona tayom Pạul ar Barnabas do celako sãote onḍe ḍher dinkin tahẽyena.
Currently Selected:
Aposkạmi 14: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
